« ជម្រើសសម្រាប់ថ្ងៃអាទិត្យ »ប្រិយមិត្ត ខែ កក្កដា ឆ្នាំ ២០២៤ ទំព័រ ៤–៥ ។
ជម្រើសសម្រាប់ថ្ងៃអាទិត្យ
« តើពិធីសាក្រាម៉ង់គឺជាអ្វី ? » អានីតា បានសួរ ។
ដំណើររឿងនេះបានកើតឡើងនៅប្រទេស អ៊ីស្លង់ ។
« ខ្ពស់ជាងនេះ !» អ៊ីវ៉ូលេត បាននិយាយទៅកាន់មិត្តរបស់នាងឈ្មោះ អានីតា ។ ពួកគេចាំមើលតើពួកគេអាចលោតលើបន្ទះក្រណាត់រើស័ររបស់ អ៊ីវ៉ូលេត បានខ្ពស់ប៉ុណ្ណា ។
រំពេចនោះ អានីតាបានលោតឡើងយ៉ាងខ្ពស់ណាស់ ។ ពេលជើងនាងលោតចុះម្តងទៀត វាធ្វើអោយអ៊ីវ៉ូលេតហោះឡើង ! ក្មេងស្រីទាំងពីរបានទង្គេចគ្នាធ្លាក់ទៅលើបន្ទះក្រណាត់រើស័រ ។ ពួកគេសើចសប្បាយ ។
អានីតានិយាយថា « វាសប្បាយណាស់ » ។ « តើយើងអាចលេងនៅថ្ងៃស្អែកទៀតទេ ? »
អ៊ីវ៉ូលេតផ្តួលខ្លួននាងទៅក្រោយ ។ « ត្រូវហើយ ! ខ្ញុំក៏ចូលចិត្តលេងដែរ » ។
«យើងអាចលេងនៅផ្ទះលោកយាយរបស់ខ្ញុំបាន » ។ ផ្ទះលោកយាយរបស់អានីតា នៅឃ្លាតតែពីរបីផ្ទះពីអ៊ីវ៉ូលេតប៉ុណ្ណោះ ។
បន្ទាប់មក អ៊ីវ៉ូលេតបានចាំថាថ្ងៃស្អែកគឺជាថ្ងៃអាទិត្យ ។ នាងចង់ទៅអង្គការបឋមសិក្សា ។ វានឹងសប្បាយរីករាយក្នុងការលេងជាមួយអានីតា ប៉ុន្តែនាងចង់ធ្វើការជ្រើសរើសដ៏ល្អមួយ ។
អ៊ីវ៉ូលេតបាននិយាយថា « ខ្ញុំទើបនឹកឃើញថាខ្ញុំមិនអាចមកលេងបានទេ » ។ « ខ្ញុំសូមទោស ។ ថ្ងៃស្អែកខ្ញុំនឹងទៅព្រះវិហារជាមួយគ្រួសាររបស់ខ្ញុំ » ។
អានីតាបានក្រោកឈរឡើង ហើយលោតម្តងទៀត ។ « ហេតុអ្វី ? »
អ៊ីវ៉ូលេតបានចាប់ផ្តើមលោតដែរ ។ « មែនហើយ ខ្ញុំចង់ធ្វើតាមព្រះយេស៊ូវគ្រីស្ទ » ។ គ្រួសាររបស់ខ្ញុំទៅព្រះវិហាររៀងរាល់ថ្ងៃអាទិត្យ ដើម្បីរៀនអំពីទ្រង់ ហើយទទួលទានសាក្រាម៉ង់ » ។
« តើពិធីសាក្រាម៉ង់គឺជាអ្វី ? » អានីតា បានសួរ ។
អ៊ីវ៉ូលេតបាននិយាយថា « ពិធីសាក្រាម៉ង់នោះ គឺនៅពេលដែលយើងទទួលទាននំប៉័ងមួយដុំតូច និងទឹកមួយកូនពែងតូច ដើម្បីជាការចងចាំដល់ព្រះយេស៊ូវគ្រីស្ទ » ។ « បន្ទាប់មក សមាជិកឡើងនិយាយអំពីរបៀបដែលព្រះយេស៊ូវជួយពួកគេ ។ ហើយបន្ទាប់ពីនោះក៏មានថ្នាក់ពិសេសសម្រាប់ក្មេងៗផងដែរ ! »
« ស្តាប់ទៅសប្បាយណាស់ ! » អានីតា បាននិយាយថា ។ « តើខ្ញុំអាចទៅបានទេ ? »
« ប្រាកដជាបាន ! » អ៊ីវ៉ូលេតបានញញឹម ។
អានីតាបានរត់ត្រឡប់ទៅផ្ទះវិញដើម្បីសុំលោកយាយរបស់នាង ប្រសិនបើនាងអាចទៅព្រះវិហារជាមួយអ៊ីវ៉ូលេតបានឬទេ ។ នៅព្រឹកស្អែក អេវ៉ូលេត និងគ្រួសាររបស់នាងបានមកទទួលអានីតានៅតាមផ្លូវទៅព្រះវិហាររបស់ពួកគេ ។
នៅពេលដែលពួកគេទៅដល់ព្រះវិហារ អ៊ីវ៉ូលេតបាននាំអានីតាដើរមើលជុំវិញព្រះវិហារ ។ នាងបានបង្ហាញបន្ទប់អង្គការបឋមសិក្សា កន្លែងហាត់ប្រាណ និងសាលជំនុំ ។
មិនយូរប៉ុន្មានដល់ពេលប្រជុំសាក្រាម៉ង់ហើយ ។ អ៊ីវ៉ូលេត និង អានីតា អង្គុយជាមួយគ្នា ។ អ៊ីវ៉ូលេតបានព្យាយាមគិតអំពីព្រះយេស៊ូវគ្រីស្ទក្នុងអំឡុងពេលប្រជុំសាក្រាម៉ង់ ។ បន្ទាប់មក ពួកគេបានស្តាប់អ្នកឡើងនិយាយ ។
នៅទីបំផុត វាដល់ពេលសម្រាប់អង្គការបឋមសិក្សាហើយ ! អ៊ីវ៉ូលេតបានណែនាំអានីតា ឲ្យស្គាល់មិត្តភក្តិមួយចំនួនរបស់នាង ។
អ៊ីវ៉ូលេតបាននិយាយថា « នេះគឺជាមិត្តរបស់ខ្ញុំឈ្មោះ អានីតា » ។
អ្នកគ្រូបង្រៀនអង្គការបឋមសិក្សានិយាយថា « យើងសប្បាយចិត្តណាស់ដែលប្អូនមកថ្ងៃនេះ ។ ខ្ញុំ ស៊ីស្ទើរ ម៉ាក់នូសសិន » ។
នៅពេលដែលអ៊ីវ៉ូលេត និងអានីតាបានស្ដាប់មេរៀនអំពីព្រះយេស៊ូវគ្រីស្ទ អ៊ីវ៉ូលេតមានអារម្មណ៍សប្បាយរីករាយក្នុងចិត្ត ។ នាងចូលចិត្តនៅព្រះវិហារជាមួយអានីតា ។ នាងបានបែរទៅរកអានីតា ហើយញញឹម ។ មិត្តរបស់នាងញញឹមដាក់នាងវិញ ។
អានីតាបាននិយាយនៅតាមផ្លូវត្រឡប់មកផ្ទះវិញថា « អរគុណដែលបានអញ្ជើញខ្ញុំមក » ។
អ៊ីវ៉ូលេតរីករាយណាស់ដែលនាងអាចធ្វើតាមព្រះយេស៊ូវគ្រីស្ទ ។ ហើយនាងសប្បាយចិត្ត ដែលអានីតាចង់រៀនអំពីទ្រង់ផងដែរ ។
វាសប្បាយរីករាយក្នុងការលោតលើបន្ទះក្រណាត់រើស័រ និងហោះទៅលើ ប៉ុន្តែអារម្មណ៍កក់ក្តៅដែលអ៊ីវ៉ូលេតមានគឺកាន់តែប្រសើរជាង ។
រចនារូបភាពដោយ ហ្វីអូណា ផាវវើរស៍