« អំណរនៃការរៀនសូត្រ » ទស្សនាវដ្តី ប្រិយមិត្ត ខែ កក្កដា ឆ្នាំ ២០២៤ ទំព័រ ៣២-៣៣ ។
មិត្តទៅកាន់មិត្ត
អំណរនៃ ការរៀនសូត្រ
ដកស្រង់មកពីការសម្ភាសមួយជាមួយ អូលីវ៉ា ឃីធឺមែន និងណូអែល ឡាមប៊ឺត បារ៉ុស ។
ខ្ញុំមានអារម្មណ៍ថា ខ្ញុំមិនមែនជាមនុស្សរៀនពូកែទេ ពេលខ្ញុំធំឡើង ។ បងប្អូនបង្កើតទាំងអស់របស់ខ្ញុំពិតជាឆ្លាតៗណាស់ ។ ពួកគេទទួលបានពិន្ទុល្អ ។ ពួកគេបានរៀនថ្នាក់ពិបាកបំផុត ។ ខ្ញុំបានបន្តព្យាយាមចុះឈ្មោះរៀនថ្នាក់ពិលំបាកបំផុត ប៉ុន្តែខ្ញុំមិនដែលទទួលបានការអនុញ្ញាតឲ្យចូលរៀនឡើយ ។ ថ្នាក់គណិតវិទ្យាគីពិតជាពិបាកណាស់ ។ ដូច្នេះខ្ញុំបានគិតថា « ប្រហែលខ្ញុំមិនឆ្លាតទេ » ។ ខ្ញុំគិតថារឿងនោះមិនអាចផ្លាស់ប្តូរបានទេ ។
ក្រោយមកក្នុងរយៈពេលមួយឆ្នាំ ខ្ញុំមានអ្នកគ្រូម្នាក់ដែលបានផ្តល់ទំនុកចិត្តដែលខ្ញុំត្រូវការ ។ អ្នកគ្រូរបស់ខ្ញុំបានមើលឃើញទេពកោសល្យជាច្រើនរបស់ខ្ញុំ ច្រើនជាងខ្ញុំ ។ គាត់បាននិយាយថា « ក្លាក ឯងអាចក្លាយជាសិស្សពូកែម្នាក់ ។ ឯងគ្រាន់តែត្រូវជឿលើខ្លួនឯងប៉ុណ្ណោះ » ។
ដូច្នេះ ខ្ញុំបានបន្តព្យាយាម ។ ខ្ញុំខំសិក្សាកាន់តែខ្លាំង ។ ខ្ញុំក៏បានខំធ្វើការដើម្បីឲ្យកាន់តែមានរបៀបរៀបរយកាន់តែច្រើន ។ ខ្ញុំបានរៀនអំពីរបៀបតាមដានកិច្ចការផ្ទះរបស់ខ្ញុំ ។ ការបិទទូរទស្សន៍បានជួយខ្ញុំឲ្យផ្តោតអារម្មណ៍ទៅលើកិច្ចការសាលារបស់ខ្ញុំ ។ មិនយូរប៉ុន្មាន ខ្ញុំបានក្លាយជាសិស្សដ៏ល្អប្រសើរម្នាក់ ។ ហើយទំនុកចិត្តរបស់ខ្ញុំបានកើនឡើង ។
ពេលខ្ញុំទៅបេសកកម្ម ខ្ញុំបានឃើញថាខ្ញុំមិនចាំបាច់រៀនដោយខ្លួនឯងទេ ។ ខ្ញុំបានទូលសុំជំនួយពីព្រះវរបិតាសួគ៌។ ហើយខ្ញុំបានស្ដាប់តាមព្រះវិញ្ញាណបរិសុទ្ធ ។ កាលខ្ញុំខិតខំធ្វើការ ខ្ញុំអាចបង្រៀន និងជួយមនុស្សបាន ។ នៅពេលខ្ញុំត្រឡប់មកពីបេសកកម្មវិញ ខ្ញុំបានចូលរៀនមហាវិទ្យាល័យ ។ ខ្ញុំបានអធិស្ឋានទូលសុំជំនួយពីព្រះគ្រប់ថ្នាក់ទាំងអស់ ។ ខ្ញុំបានក្លាយជាសិស្សល្អជាងមុន ហើយថែមទាំងចាប់ផ្ដើមស្រលាញ់មុខវិជ្ជាគណិតវិទ្យាផងដែរ !
ខ្ញុំបានគិតថាភាពឆ្លាតវៃមានន័យថាយើងចេះច្រើន ហើយការរៀននៅសាលាគឺងាយស្រួល ។ នោះមិនពិតទេ ។ ប្រសិនបើក្មួយមានឆន្ទៈឲ្យព្រះអម្ចាស់ចូលរួមជាមួយនៅក្នុងការរៀនសូត្ររបស់ក្មួយ ហើយខិតខំរៀនសូត្រ នោះក្មួយនឹងឆ្លាតវៃ !
ប្រសិនបើអ្វីៗពិបាកឥឡូវនេះ សូមចាំថាក្មួយគឺជាកូនរបស់ព្រះ ។ ក្មួយមានសក្តានុពលដ៏អស្ចារ្យ ។ ក្មួយអាចធ្វើកិច្ចការពិបាកៗបាន ។ គ្រាន់តែបន្ដអនុវត្ត ។ អធិស្ឋានទូលសុំជំនួយពីព្រះវរបិតាសួគ៍ ។ ទ្រង់ចង់ឲ្យក្មួយជោគជ័យ ។ ក្មួយអាចធ្វើវាបាន !
ការរៀនសូត្រសប្បាយណាស់
ស្វែងរកគំរូនីមួយៗនៃសម្ភារសិក្សានៅក្នុងក្រឡាចត្រង្គខាងក្រោម ។ តើប្អូនចូលចិត្តរៀនអ្វីនៅសាលា ?
រចនារូបភាពដោយ អាហ្គនីស សាកានី