“Ua Toetu Keriso; O Le Faatuatua ia te Ia o le a Aveesea ai Mauga,” Mo le Malosi o le Autalavou, Me 2021.
Sauniga o le Taeao o le Aso Sa
Ua Toetu Keriso; O Le Faatuatua ia te Ia O Le a Aveesea ai Mauga
Vaega
O le faatuatua ia Iesu Keriso o le faavae lea o talitonuga uma ma le alātafe o le mana faalelagi. …
O mea lelei uma i le olaga—o faamanuiaga faapolopolo uma e i ai le taua e faavavau—e amata i le faatuatua. O le faatagaina o le Atua e faamuamua i o tatou olaga e amata i le faatuatua o loo Ia finagalo e taiala i tatou. …
O’u uso e ma tuafafine pele, o la’u valaau ia te outou i lenei taeao o le Eseta o le amata nei loa ona faateleina lou faatuatua. E ala i lou faatuatua, o le a faateleina ai e Iesu Keriso ou tomai e aveese ai mauga i lou olaga. …
O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga, ae o le tali i ou lu’itau taitasi o le faateleina lea o lou faatuatua. …
… Se’i o’u ofoina atu ni fautuaga se lima e fesoasoani ai ia te oe e atia’e lena faatuatua ma le faalagolago.
Muamua, suesue. …
Lona lua, filifili e talitonu ia Iesu Keriso. …
Lona tolu, faatino i le faatuatua. …
Lona fa, auai i sauniga paia ma le agavaa. …
Ma le lona lima, ole atu i lou Tama Faalelagi, i le suafa o Iesu Keriso, mo se fesoasoani. …
O le faatuatua ia Iesu Keriso o le mana silisili lea ua avanoa ia i tatou i lenei olaga. E mafaia mea uma ia i latou o ē talitonu [tagai i le Mareko 9:23].
O lou faatuatua tuputupu a’e ia te Ia o le a aveesea ai mauga—e le o mauga o papa o loo faamatagofie ai le lalolagi ae o mauga o faanoanoaga i o outou olaga. O lou faatuatua uluuluola o le a fesoasoani ia te oe e liliu luitau i le tuputupu a’e ma avanoa lē mafaatusaliaina.
I lenei Aso Sa o le Eseta, faatasi ai ma o’u lagona loloto o le alofa ma le lotofaafetai, ou te folafola atu la’u molimau o Iesu Keriso e moni lava ua toetu. Ua toetu o Ia e taitai Lana Ekalesia. Ua toetu o Ia e faamanuia olaga o fanau uma a le Atua, po o fea lava o latou nonofo ai. Faatasi ma le faatuatua ia te Ia, e mafai ai ona tatou aveesea mauga i o tatou olaga.