“O Le a Le mea ua Faia e lo Tatou Faaola mo i Tatou?,” Mo le Malosi o le Autalavou, Me 2021.
Sauniga a le Au Perisitua
O Le A Le Mea Ua Faia e lo Tatou Faaola mo i Tatou?
Vaega
O le a le mea ua faia e Iesu Keriso mo i tatou taitoatasi? Ua Ia faia mea uma e tatau ai mo la tatou malaga i le olaga faaletino ma agai atu i le taunuuga ua faataatia mai i le fuafuaga a lo tatou Tama Faalelagi. O le a ou talanoa atu i vaega autu e fa o lena fuafuaga. …
Ua aumaia e le Toetu ia i tatou le vaaiga ma le malosi e onosaia ai luitau o le olaga faaletino o loo feagai ma i tatou taitoatasi ma i latou tatou te alolofa i ai. E aumaia ia i tatou se ala fou e vaai ai i faaletonu faaletino, faalemafaufau, pe faalelagona tatou te mauaina i le taimi e fanau mai ai pe aafia ai foi i le gasologa o le olaga faaletino. E aumaia ia i tatou le malosi e onosaia ai faanoanoaga, toilalo, ma ni lē fiafia.
Ua aumaia foi e le Toetū ia i tatou se uunaiga mamana e tausi poloaiga a le Atua i le taimi o o tatou olaga faaletino. …
Na onosaia e lo tatou Faaola ma le Togiola le mafatiaga lē mafaamatalaina, ina ia avea ai o Ia lava ma taulaga mo agasala a tagata uma o le a salamo. O lea taulaga togiola na ofoina atu ai le lelei silisili, le tamai mamoe e aunoa ma se ila, mo le fuataga silisili o mea leaga, o agasala a le lalolagi atoa. …
… Na aoao mai e Iesu ia i tatou le fuafuaga o le faaolataga. O lenei fuafuaga ua aofia ai le Foafoaga, le faamoemoega o le olaga, le tatau ai o mea faafeagai, ma le meaalofa o le faitalia. Sa Ia aoao foi i tatou i poloaiga ma feagaiga ia e tatau ona tatou usitaia atoa ai ma sauniga e tatau ona tatou oo i ai e toe faafoi atu ai i tatou i o tatou matua faalelagi. …
Ua lagona ma silafia e lo tatou Faaola o tatou faaosoosoga, o tatou tauiviga, o tatou lototiga, ma o tatou puapuaga, aua na Ia loto e oo i ai i na mea uma e fai ma vaega o Lana Togiola. … O tagata uma e mafatia i soo se ituaiga o vaivaiga faaletino e tatau ona manatua na oo foi lo tatou Faaola i lena ituaiga o tiga, ma e ala i Lana Togiola, ua Ia ofo mai ai ia i tatou taitoatasi le malosi e onosaia ai.