“E Lē Avatu faapei ona Avatu e le Lalolagi,” Mo le Malosi o le Autalavou, Me 2021.
Sauniga o le Afiafi o le Aso Toonai
E Lē Avatu faapei ona Avatu e le Lalolagi
Vaega
O sauaga ma feteenaiga o le a avea ma uiga e iloa ai fegalegaleaiga i aso e gata ai. …
Uso e ma tuafafine, ua tele naua feteenaiga ua tatou vaaia, fefinauai, ma le lē mafaufau o loo vagaia ai i tatou. …
… O lenei Eseta ia tatou taumafai e atia’e le filemu i se ala patino, e faaaoga ai le alofa tunoa ma le pulupāsama faamalolo o le Togiola a le Alii o Iesu Keriso ia i tatou lava ma i latou o loo siomia ai i tatou ma o tatou aiga.
… Tatou te manaomia le mea ua ta’ua e tusitusiga paia “o mana o le lagi,” ma ina ia faaaogaina nei mana e tatau ona tatou ola i mea ua ta’ua e na lava mau “o mataupu faavae o le amiotonu” [Mataupu Faavae ma Feagaiga 121:36]. …
… O mataupu faavae o le amiotonu sa aofia ai uiga mama e pei o le onosai, tali-tiga, agamaualalo, ma le alofa faamaoni. A aveesea na mataupu faavae e mautinoa lava o le a tatou ola ma feteenaiga, finauga, ma tiga. …
…O a taeao o le Eseta, o se taimi mo mataupu faavae o le amiotonu o le talalelei a Iesu Keriso ma Lana Togiola ia “pasia ai e i tatou”—pasia ai feteenaiga ma finauga, o faanoanoaga ma le lotovaivai, ma mulimuli ai le oti. …
E ui i le faalataina ma tiga, e ui i le agaleagaina ma uiga pa’ā’ā, a o tauaveina agasala ua faula’i a le aiga atoa o le tagata, na silasila ifo le Alo o le Atua Soifua i lalo i le ala umi o le olaga faaletino, silasila mai ia i tatou i le faaiuga o lenei vaiaso, ma fetalai mai: “Ou te tuuina atu ia te outou le [filemu], o lo’u [filemu] ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” [Ioane 14:27]. Ia outou maua se Eseta manuia, fiafia, ma filemu.