“O Epikopo—O Leoleo Mamoe i Lafu Mamoe a le Alii,” Mo le Malosi o le Autalavou, Me 2021.
Sauniga a le Au Perisitua
O Epikopo—O Leoleo Mamoe i Lafu Mamoe a le Alii
Vaega
Ua i ai i le epikopo le matafaioi maualuga i le avea ai o se leoleo mamoe e taialaina le tupulaga faia’e, e aofia ai talavou matutua nofofua, ia Iesu Keriso. …
Atonu e te fesili, “Aisea ua faatonuina ai le epikopo e faaalu le tele naua o le taimi i le autalavou?” Ua faatulagaina e le Alii Lana Ekalesia ina ia faataunuu ai faamuamua aupito taua. E tusa ai ma lena mea, o le faatulagaga o Lana Ekalesia ua i ai se fausaga lea ua i ai i le epikopo se tiutetauave e itulua. Ua ia te ia le tiutetauave faaleaoaoga faavae mo le uarota atoa, ae ia te ia foi se tiutetauave faaleaoaoga faavae patino mo le korama a ositaulaga. …
O le toatele o ō tatou talavou faapelepele, atonu e le o i ai se malamalama manino pe o ai i latou ma pe o ai e mafai ona avea ai i latou. Ae e le o toe mamao ona outou faia lea o faaiuga aupito sili ona taua o ō outou olaga. Faamolemole fefautuaai ma ou matua uma e toalua, ma lou epikopo e uiga i filifiliga taua o i ou luma. Faataga le epikopo e avea ma au uo ma faufautua.
Ua matou iloa ua outou feagai ma faigata ma tofotofoga mai soo se itu. Tatou te manaomia uma le salamo i aso taitasi e pei ona sa aoao mai e Peresitene Nelson. Faamolemole talanoa i lou epikopo e uiga i soo se mataupu e mafai e se faamasino masani ona fesoasoani ia te oe e faatulaga tatau lou olaga ma le Alii a o sauniuni ai mo le “galuega tele” ua ia te Ia mo oe i lenei toe tisipenisione. E pei ona sa valaaulia ai oe e Peresitene Nelson, faamolemole ia faaagavaaina oe lava e avea o se vaega o le autau talavou a le Alii!