“O Mataupu Faavae o La’u Talalelei,” Mo le Malosi o le Autalavou, Me 2021.
Sauniga o le Afiafi o le Aso Sa
O Mataupu Faavae o La’u Talalelei (Mataupu Faavae ma Feagaiga 42:12)
Vaega
Atapue mai le Getty Images
O se mataupu faavae o le talalelei o se taiala e faavae i aoaoga faavae mo le faaaogaina ma le amiotonu o le faitalia. O mataupu faavae e maua mai i upumoni lautele o le talalelei ma tuuina atu le taitaiga ma tulaga faatonuina a o tatou fetaomi atu i luma i luga o le ala o feagaiga. …
O le aoaoina, malamalama, ma le ola ai i mataupu faavae o le talalelei e faamalosia ai lo tatou faatuatua i le Faaola, e loloto ai lo tatou tuuto atu ia te Ia, ma valaaulia ai le anoanoai o faamanuiaga ma meaalofa faaleagaga i o tatou olaga. E fesoasoani foi mataupu faavae o le amiotonu ia i tatou e vaavaai ai i talaatu o mea e faatauaina e le tagata lava ia ma naunauga faapitoa o le tagata lava ia e ala i le tuuina mai o le vaaiga taua i upumoni e faavavau a o tatou faatautaia tulaga eseese, luitau, faaiuga, ma aafiaga o le olaga nei. …
Ina ua faafalepuipuiina Iosefa Samita i le Falepuipui i Liperate, na ia tusia ni tusi o faatonuga i tagata ma taitai o le Ekalesia ma sa faamanatu atu ai ia te i latou e faapea “e aoga tele i se vaa tele se foeuli laitiiti i le taimi o se afa, e taofiofi faasagatonu ai i le matagi ma galu” [Mataupu Faavae ma Feagaiga 123:16].
O se “foeuli” o se uili po o le ‘auvili ma masini fesootai e faaaoga e feseua’i ai se vaa la’uoloa po o se vaafolau. Ma “e taofiofi faasagatonu ai i le matagi ma galu” e faatatau i le liliuina o se vaa ina ia mafai ona tausisia lona paleni ma lē sa’e ai i le taimi o se afa.
O mataupu faavae o le talalelei e mo a’u ma oe e faapei o se foeuli i se vaa. O mataupu faavae tonu e mafai ai e i tatou ona maua lo tatou ala ma tutumau ai, mausali, ma le lē gaoia ina ia tatou lē sagatonu ma pauu ai i afa matamataita o aso e gata ai o le pogisa ma le fememea’i.