“E Leai Se Manumalo o le Tuugamau,” Mo le Malosi o le Autalavou, Me 2021.
Sauniga o le Taeao o le Aso Sa
E Leai Se Manumalo o le Tuugamau
Vaega
I nisi taimi i o tatou olaga, o le a tatou lagonaina le loto nutimomoia pe a maliu se tasi tatou te alolofa faapelepele i ai. E ala i le faamai oti i le lalolagi i le taimi nei, e toatele i tatou ua maliliu e pele—a le o ni tagata o le aiga po o ni uo. Tatou te tatalo mo i latou o loo faanoanoa i le maliliu ai [o na tagata pele].
E mafai ona tatou vaai faalemafaufau i le ala na lagona ai e uo a Iesu, o e na mulimuli ma auauna atu ia te Ia, i le molimauina o Lona maliu. Ua tatou iloa na “latou faanoanoa ma fetagisi” [Mareko 16:10]. …
…Ina ua iva ou tausaga, sa maliu lo’u tuagane matua i le taimi o se mafuie faataumaoi. Ona sa faafuasei ona tupu, sa umi se taimi mo au e malamalama ai i le mea na tupu. Sa nutimomoia lo’u loto i le faanoanoa, ma ou te fesili ifo ia te a’u lava, “O le a le mea na tupu i lo’u tuagane? O fea o ia? O fea na alu i ai o ia? Pe ou te toe vaai ea ia te ia?” …
Pe tusa o le 40 tausaga mulimuli ane, i le taimi o le Eseta, sa ou mafaufau loloto ai e uiga i le Toetu o Iesu Keriso ma amata ona ou mafaufau e uiga i loʻu tuagane. …
I lena aso, sa ou iloaina ai sa tuuina mai e le Agaga ia te a’u le mafanafana i se taimi faigata. Na ou mauaina se molimau e faapea e le o oti le agaga o lo’u tuagane; o loo soifua o ia. O loo agai pea o ia i luma i lona olaga e faavavau. Ua ou iloa nei “e toe tu mai [lo’u] tuagane” [Ioane 11:23] i lena taimi matagofie, ona o le Toetu o Iesu Keriso, o le a tatou toetutu uma ai.