“O Iesu Keriso: O Le Tausisoifua o o Tatou Agaga,” Mo le Malosi o le Autalavou, Me 2021.
Sauniga o le Taeao o le Aso Sa
Iesu Keriso: O Le Tausisoifua o o Tatou Agaga
Vaega
Ua olioli lo’u loto i le manatuaina o le faatinoga aupito ofoofogia, aupito mamalu, ma aupito lemafuatiaina na tupu i le talafaasolopito uma o le tagata soifua—o le taulaga togiola lea a lo tatou Alii o Iesu Keriso. …
Sa faataunuuina ma le faatamalii e Keriso le finagalo o le Tama e ala i Lana taulaga e le i’u ma le alofa mutimutivale. Na Ia manumalo i le tui o le oti faaletino ma le faaleagaga, na folasia mai i le lalolagi e ala i le Pa’ū, ma ofoina mai ai ia i tatou le avanoa mo le faaolataga e faavavau. …
E ui ina sa aveese mai e le Faaola e aunoa ma ni tuutuuga ia aafiaga o le oti faaletino e ala i Lana taulaga, ae Na Te le i aveesea ai lo tatou lava tiutetauave ia salamo mai solitulafono tatou te faia. …
A’u uo pele, ou te molimau atu ia te outou, a tatou salamo faamaoni i a tatou agasala, ua tatou faatagaina le taulaga togiola a Keriso ia aoga atoatoa i o tatou olaga. …
E faaopoopo atu i lenei meaalofa mamalu o le faaolataga, ua ofoina mai foi e le Faaola mo i tatou le toomaga ma le faamafanafanaga ao tatou feagai ma puapuaga, tofotofoga, ma vaivaiga o le olaga nei, e aofia ai tulaga ua tatou oo i ai i le faama’i oti i le taimi nei. …
Ao tatou faalatalata atili atu ia te Ia, ma tuuina atu i tatou lava faaleagaga i Lana tausiga, o le a mafai ona tatou tauaveina i o tatou lava luga Lana amo, lea e faigofie, ma Lana avega, lea e mamā, ona tatou maua ai lea o lena faamafanafanaga ma le malologa folafolaina. E le gata i lea, o le a tatou maua le malosi tatou te manaomia uma e faatoilalo ai faigata, vaivaiga, ma faanoanoaga o le olaga, lea e matuai faigata lava ona onosaia e aunoa ma Lana fesoasoani ma le mana faamalolo.