“Faamoemoe ia Keriso,” Mo le Malosi o le Autalavou, Me 2021.
Sauniga o le Afiafi o le Aso Toonai
Faamoemoe ia Keriso
Vaega
Uso e ma tuafafine, i lenei taimi o le Eseta tatou te tulimatai atu ai i le Toetu mamalu o lo tatou Alii ma le Faaola, o Iesu Keriso. Tatou te manatua Lana valaaulia alofa ia “outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaaoao ia te au, aua o au lē agamalu ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” [Mataio 11:28–30].
O le valaaulia a le Faaola e o mai ia te Ia o se valaaulia i tagata uma ia le gata e o mai ia te Ia ae ia avea ma ni ō Lana Ekalesia. …
E finagalo Iesu ia tatou iloa o le Atua o se Tama Faalelagi alofa.
O le iloa ai e alofa lo tatou Tama Faalelagi ia i tatou o le a fesoasoani lea tatou te iloa ai pe o ai i tatou ma iloa ai o i tatou o ni ō Lona aiga tele e faavavau. …
… E ui i luitau tatou te feagai i le olaga, e pei o lena taeao o le Eseta, e mafai ona tatou alafa’i mai i se ola fou ia Keriso faatasi ai ma ni avanoa fou ma le ofoofogia ma ni mea fou moni, pe a tatou liliu atu i le Alii mo se faamoemoe ma avea ai ma ni ō. …
O loo ou tautala e uiga i le faamoemoe ia Keriso, ae le o se mafaufauga faivavale. Nai lo lena, o loo ou tautala e uiga i le faamoemoe o le a faataunuuina. O lena faamoemoe e tatau ai mo le faatoilaloina o mafatiaga, e siitia ai le maufetuuna’i mausali ma le malosiaga, ma oo ai ina iloa e alofagia i tatou e lo tatou Tama Faavavau ma o i tatou o Ana fanau o ni ō Lona aiga. …
Aua lava nei galo o oe o se atalii/afafine o le Atua, lo tatou Tama Faavavau, nei ma le faavavau. E alofa o Ia ia te oe, ma e manao le Ekalesia ia te oe ma e manaomia oe. Ioe, matou te manaomia outou! Matou te manaomia o outou leo, taleni, agalelei, ma le amiotonu.