“Puipuia o Lo Tatou Faavae na Musuia mai le Lagi,” Mo le Malosi o le Autalavou, Me 2021.
Sauniga o le Afiafi o le Aso Sa
Puipuia O Lo Tatou Faavae na Musuia mai le Lagi
Vaega
I lenei taimi o faigata, ua ou lagona ai e tautala atu e uiga i le Faavae musuia o le Iunaite Setete. O lenei Faavae e faapitoa lona taua i o tatou tagata i le Iunaite Setete, ae o se tofi masani foi o faavae i le lalolagi atoa. …
O lo tatou talitonuga i musumusuga paia e maua ai e le Au Paia o Aso e Gata Ai se tiutetauave tulagaese e tausisia ma puipuia le Faavae o le Iunaite Setete ma mataupu faavae o le faavae i soo se mea tatou te nonofo ai. E ao ona tatou faalagolago i le Alii ma ia vaai i le itu lelei e uiga i le lumanai o lenei atunuu.
O a isi mea e tatau ona fai e le Au Paia o Aso e Gata Ai? E tatau ona tatou tatalo i le Alii ina ia taialaina ma faamanuiaina atunuu uma ma o latou taitai. O se vaega lenei o la tatou mataupu faavae o le faatuatua. O le tatau ai ona tatou usitai i peresitene po o taitai o le mea moni e leai se iota o ta’u mai ai tatou te tetee i tulafono po o aiaiga faavae taitasi. O loo manaomia ai e tatau ona faaaoga la tatou tosinaga i le ava ma le faaaloalo ma le toafimalie, i totonu o le faavaa o o tatou faavae ma tulafono e faatatau i ai. I mataupu e feteenai ai, e ao ina tatou saili ia masuigamalie ma ia lotogatasi.
O loo i ai isi tiute o se vaega o le taofimauina o le Faavae musuia. E ao ona tatou aoao ma lagolago ia mataupu faavae musuia o le Faavae. E ao ina tatou sailia ma lagolago ia tagata atamamai ma lelei o e o le a lagolagoina na mataupu faavae i a latou faatinoga lautele (tagai i le Mataupu Faavae ma Feagaiga 98:10). E ao ona avea i tatou ma tagatanuu malamalama o e e malolosi i le faia o a tatou tosinaga ia lagonaina i fegalegaleaiga faalemalo.