“Avanoa i le Faletalimalo,” Mo le Malosi o le Autalavou, Me 2021.
Sauniga o le Taeao o le Aso Toonai
Avanoa i le Faletalimalo
Vaega
I lenei vaitau o le Eseta, o loo valaaulia i tatou e Iesu Keriso ia avea, e faapei o Ia, o se Samaria agalelei, ia fai Lona Faletalimalo (Lana Ekalesia) o se lafitaga mai uno’oa uma ma afa o le olaga. …
A o tatou o mai faatasi ma le Samaria Agalelei i le Faletalimalo, tatou te aoao ai ni mea se lima e uiga ia Iesu Keriso ma i tatou lava.
Muamua, tatou te o mai i le faletalimalo e pei ona tatou i ai, faatasi ai ma uiga faalenatura ma lē atoatoa o ia i tatou uma. Ae, e tofu uma lava i tatou ma se mea e manaomia ona foai atu. E tele ina tatou maua lo tatou ala e foi atu ai i le Atua e ala i sootaga ma isi. …
Lona lua, ua finagalo o Ia ia tatou faia Lona Faletalimalo o se nofoaga o le agaalofa ma se avanoa, ia e mafai ona faapotopoto ai tagata taitasi, ma maua se avanoa mo tagata uma. I le avea ai o ni soo o Iesu Keriso, e tutusa tagata uma, e leai ni vaega e tulagalua. …
Lona tolu, i Lona Faletalimalo, tatou te aoao ai o loo ia Iesu Keriso le atoatoa, ae le o i le lalolagi. … Na te valaaulia i tatou taitasi ia avea ma se Samaria agalelei, ia tuuitiitia le faamasinosino mo i tatou lava ma faapea ma isi. …
Lona fa, … Na te aumaia i tatou i Lona faletalimalo ma faapea foi i Lona maota — o le malumalu paia lea … lea … e mafai e le Samaria Agalelei ona faamama ma faalavalava i tatou, saunia i tatou e toe foi atu i le afioaga o le Atua, ma tuufaatasia i tatou e faavavau i le aiga o le Atua. …
O le mea mulimuli, lona lima, tatou te olioli aua e alofa le Atua i Ana fanau i o tatou talaaga ma tulaga eseese uma, i atunuu uma, ituaiga, ma gagana, faatasi ai ma se avanoa mo tagata uma i Lona Faletalimalo. …
Ua folafola mai e lo tatou Samaria Agalelei e toe foi mai. E tutupu vavega pe a tatou tausia le tasi ma le isi e pei ona Ia faia.