“E Mafai ona E Faapotopotoina Isaraelu!,” Mo le Malosi o le Autalavou, Me 2021.
Sauniga a le Au Perisitua
E Mafai Ona E Faapotopotoina Isaraelu!
Vaega
Ua toetoe atoa le tolu tausaga talu ai, na valaaulia ai e Peresitene Russell M. Nelson ia talavou uma o Le Ekalesia a Iesu Keriso o le Au Paia o Aso e Gata Ai ia auai i “le autau talavou e faapotopoto ia Isaraelu i itu uma e lua o le veli. Na ia saunoa, “O lena faapotopotoina o le mea aupito sili lea ona taua o loo tupu i le lalolagi i le taimi nei” [“Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), 8, HopeofIsrael.ChurchofJesusChrist.org]. Ua ou matuai talitonu e mafai e outou le autalavou ona faia lenei mea---ma faia lelei---ona o (1) se mea e uiga i lo outou faasinomaga ma (2) o se mana maoae o i totonu o outou …
… E tusa ai ma le tusi o Faaaliga, “sa i ai se taua i le lagi.”! [Faaaliga 12:7–8]. Sa faaseseina ma le faafiapoto e Satani se vaega e tasi vaetolu o fanau agaga a le Tama Faalelagi e tuu atu ia manumalo o ia nai lo le Atua. Ae le o outou! Sa vaaia e le Aposetolo o Ioane faapea na outou faatoilaloina Satani “i le upu o [la outou] molimau.”… [Faaaliga 12:11].
…O le iloa ai na e faatoilaloina muamua Satani e ala i le upu o lau molimau, o le a fesoasoani ai e te alofa, faasoa, ma valaaulia i le aso ma aso uma---e valaaulia isi e o mai ma vaai, o mai ma fesoasoani, ma o mai ma avea ai ma ni o, a o faifai pea le matamataita o lena taua mo agaga o fanau a le Atua. …
O le polokalama a Tamaiti ma le Autalavou o se meafaigaluega faaperofetaga e fesoasoani ia te oe le talavou e faateleina ai lou faatuatua tele. … A o taitai e outou le autalavou—taitai—i le ola i le talalelei, tausiga o isi, valaauliaina o tagata uma ia talia le talalelei, le tuufaatasia o aiga mo le faavavau, ma le faatulagaina o gaoioiga malie, o le faatuatua tele ia Keriso sa ia te outou i le muai olaga o le a toe tulai mai ma faamamanaina ai oe e faia le galuega a le Alii i lenei olaga!