Li Dios naxjolomi li k’amok b’e

Xb’aan li Elder M. Russell Ballard

Re lix Molameb’ li Kab’laju chi Apostol

Li taqlahom ut li sumwank a’aneb’ na’leb’ re nimla b’ihomal li neke’tawman sa’ li Chaab’il Jukub’ Sion, b’ar wi’ li Dios naxjolomi li k’amok b’e.

Sa’ li ch’utub’aj-ib’ re li octubre xnume’, xexinb’oq chi ab’ink chiru li raatin laj Brigham Young naq tookanaaq sa’ li Jukub’ Sion, a’an lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ut naq taqachap qib’ chiru rik’in li wiib’ chi quq’.¹ Chirix a’an, xinsaho’ chixnawb’al naq wankeb’ ani li xe’rab’i, ut neke’xpatz’ we li patz’om a’in; “K’a’ru li jukub’ li tento taqachap qib’ chiru?” Ninjultika reheb’ li k’a’ru kixye li Awa’b’ej Brigham Young: “Wanko sa’ li Jukub’ Sion. … [li Dios] naxjolomi li k’amok b’e ut ink’a’ tixkanab’. ... A’an nataqlan ut nab’eresin. Wi ta li tenamit te’xkanab’ rib’ chi tz’aqal sa’ ruq’ lix Dios, ut wi maajo’q’e te’xkanab’ lix sumwank chi moko lix Dios, A’an toxb’eresi.”²

Li qaChoxahil Yuwa’ ut li Qaawa’ Jesukristo ak ke’xk’awresi li Jukub’ Sion rik’ineb’ li choxahil na’leb’ li tohe’xtenq’a chi kanaak sa’ li b’e us ta yib’ ru li ha’, malaj yoo chi apuuk lix kawil iq’ laj tza. Wahi’keb’ wiib’ oxib’ li na’leb’ a’an.

Lix Iglees li Jesukristo nab’eresiik xb’aaneb’ li profeet ut li apostol chalen chalen. Us ta naru te’wanq xmajelal, eb’ lix moos li Qaawa’ neke’xk’ul xna’leb’ re tohe’xtenq’a chixkanab’ankil li k’a’ru toxkamsi raj sa’ musiq’ej, ut chi nume’k sa’ xyaalal chiru li yu’am a’in toj taqataw qana’aj sa’ choxa.

Rik’in xnumsinkil 40 chihab’ chirochb’eeninkileb’, laa’in wilom li ch’ina musiq’anb’il na’leb’ jo’ wi’ li nimla k’utb’esinb’il na’leb’ chireek’asinkileb’ xk’anjel li profeet, li apostol, ut xkomoneb’ chik li jolomil aj b’eresinel. Us ta moko tz’aqaleb’ ta re ru, eb’ li chaab’il winq ut ixq a’in wanjenaqeb’ xch’ool tz’aqal choq’ re xwaklesinkileb’ li wankeb’ chixsutam ut re xb’eresinkil lix k’anjel li Qaawa’ jo’ taqlanb’il.

Miwiib’an eech’ool: li Qaawa’ naxb’eresi lix Iglees rik’ineb’ li yo’yookil apostol ut profeet. Chi jo’ka’in naxb’aanu xk’anjel chalen chalen. Chi yaal, li Kolonel kixye, “Relik chi yaal ninye eere: ani nak’uluk re li nintaqla laa’in nikinixk’ul.”³ Ink’a’ naru naqajach li Kristo rik’ineb’ lix moos. Chi maak’a’eb’ xnajteril Apostol, maak’a’ raj naab’aleb’ li esil chirix li ke’ril sa’ lix k’utum, lix k’anjel, li rahilal kixk’ul sa’ Getsemani, ut lix kamik chiru li krus. Chi maak’a’eb’ li raatin a’an, maak’a’ raj lix nawom li apostolil chirix li muqleb’aal yamyo xsa’ ut li wakliik wi’chik chi yo’yo.

Kixtaqlaheb’ li xb’eenil Apostol a’an:

“Ayuqex b’i’, ut tzoleb’ chixjunil li tenamit. Teekub’siheb’ xha’ sa’ xk’ab’a’ li Yuwa’b’ej, li K’ajolb’ej, ut li Santil Musiq’ej,

“Ut k’utumaq chiruheb’ xpaab’ankil chixjunil li xexintaqla wi’.”⁴

Li nimla b’oqok a’in xk’eeman chi ak’il sa’ qakutankil naq li Kristo kixb’oq laj Jose Smith chixk’ojob’ankil wi’chik li Iglees rik’ineb’ li Apostol li te’xjultika lix evangelio jun sut chik rub’elaj xsutq’ijik.

Junelik wan xch’a’ajkilal li ruchich’och’ chixnawb’aleb’ ru li yo’yookil profeet ut li apostol, a’ut jwal aajel ru a’an re taqataw ru chi tz’aqal lix tojb’al rix li maak ut lix k’utum li Jesukristo, ut re ajwi’ naq taqak’ul chixjunileb’ li osob’tesink re li tijonelil li k’eeb’ileb’ reheb’ li ani b’oqb’il.

Naab’aleb’ neke’xk’oxla naq laj jolominel sa’ li Iglees tento tz’aqalaqeb’ re ru. Nasach sa’ xch’ooleb’ naq tz’aqal li rusilal li Qaawa’ re xb’aanunkil xk’anjel yal rik’ineb’ li winq. Us ta chaab’ileb’ xch’ool laj jolominel qe sa’ li Iglees, wan naq noko’ok sa’ majelal. Moko ka’aj ta wi’ sa’ li Iglees na’ux a’in, xb’aan naq na’ux ajwi’ sa’ qayu’am rik’ineb’ li amiiw, li qech kab’lal, ut sa’ xyanqeb’ li qech aj k’anjel ut sa’eb’ li sumal ut sa’eb’ li junkab’al.

Ink’a’ ch’a’aj xtawb’al li majelal reheb’ li winq. A’ut naab’al naqasach wi naqak’e reetal junes li wanko wi’ yal jo’ winq, ut ink’a’ naqak’e reetal li ruq’ li Dios chi k’anjelak sa’eb’ li ani b’oqb’il xb’aan.

Xk’eeb’al reetal chanru li Qaawa’ naxmusiq’aheb’ xna’leb’ laj jolominel ut chanru nareek’asiheb’ laj paab’anel chixb’aanunkil li chaab’il us ta yal winqeb’ nokoxtenq’a chixchapb’al lix evangelio li Kristo ut chi kanaak chi kolb’ilo sa’ li Jukub’ Sion.

Jun chik li na’leb’, a’an li k’uub’anb’il na’leb’ re li kolb’a-ib’. Rik’in li Profeet aj Jose Smith, li Dios kixk’e lix Hu laj Mormon, li Tzol’leb’ ut Sumwank, ut naab’aleb’ chik li k’utum choq’ re li Iglees. Aran wan li k’uub’anb’il na’leb’ re li kolb’a-ib’, li naxk’ut b’ar koochal chaq, k’a’ru aj-e naq wanko sa’ ruchich’och’, ut toj b’ar tooxik chirix qakamik. Li na’leb’ a’in naxk’ut ajwi’ chiqu naq laa’o li ralal xk’ajol li Dios sa’ musiq’ejil. Rik’in xtawb’al ru ani li qaChoxahil Yuwa’ ut k’a’ru li qakomonil rik’in a’an ut rik’in lix Raarookil Alal, li Jesukristo, taqak’ulub’aheb’ lix taqlahom ut too’ok sa’ sumwank rik’ineb’ li toxb’eresi wi’chik chi wank chaq rik’ineb’ chi junelik q’e kutan.

Rajlal sut naq ninq’alu jun li ak’ k’uula’al, ninpatz’ sa’ lin k’a’uxl: “Anihat, at ka’ch’in? Toj k’a’ruhaqat sa’ xwankil lix tojb’al rix li maak xb’aan li Kristo?”

Naqapatz’ xkomoneb’ li patz’om a’in naq nakam jun li qakomon: “B’ar wan? K’a’ru yookeb’ chirilb’al ut chixk’ulb’al? Ma toj nawan li yu’am? Chanru taawanq li qakomonil li xqara junxil sa’ li nimla ruchich’och’ reheb’ lix musiq’eb’ li kamenaq?”

Sa’ li ruchich’och’ a’an, wankeb’ wiib’ li rimam lin junkab’al. Li xSara ut xEmily, ut jun li qi, laj Nathan. Sa’ xkamik li junjunq chi qimam, xqachap li evangelio rik’in li wiib’ chi quq’. Li qapatz’om xe’xk’ul xsumenkil chi k’ojk’o qach’ool sa’ lix tojb’al rix li maak xb’aan li Kolonel. Us ta naqapatz’eb’ li qimam, naqanaw naq yo’yookeb’, ut naqanaw naq taqileb’ ru wi’chik. K’a’jo’ naqab’antioxi li k’ojleb’ a’in choq’ re li qaam sa’eb’ li ch’a’ajkilal a’in sa’ qajunkab’al.

Jun chik li na’leb’ sa’ li Iglees, a’an naq li qaYuwa’ kixyo’ob’tesi laj Adan ut li xEva choq’ re jun nimajwal ajom. Ke’xk’ul xk’anjel—ut eb’ li ralal xk’ajol ke’xk’ul ajwi’—naq te’xyo’ob’tesi li tz’ejwalej choq’ re li ralal xk’ajol li Dios re te’ruuq chi nume’k sa’ li yu’am a’in. Chi jo’ka’in, li qaYuwa’ naxtaqlaheb’ li ralal xk’ajol arin re te’tzoloq ut te’k’iiq rik’ineb’ lix k’ulumeb’ arin. Rik’in naq naxraheb’ li ralal xk’ajol, li Dios naxtaqlaheb’ laj yehol esil ut eb’ li Apostol chixtzolb’aleb’ chirix li Kristo jo’ aj Kolol qe.

Chalen chaq najter, eb’ li profeet ke’xb’aanu xk’anjel naq ke’xye reheb’ li tenamit li k’a’ru xuwajel. Teneb’anbileb’ lix Apostol li Qaawa’ chi ilok, chi q’usuk, ut chixtenq’ankileb’ li ani yookeb’ chi patz’ok chirix li yu’am a’in.

Jun may chihab’ chaq, li Xb’eenil Awa’b’ejil ut lix Molameb’ li Kab’laju chi Apostol ke’xpuktesi “Li Junkab’al: Jun Jek’inb’il Aatin choq’ re li Ruchich’och’.” Sa’ li hu a’an, xqaraq rik’in xyeeb’al: “Naqaye ... naq eb’ li ani neke’xq’et li sumwank chirix li saqru ch’oolejil, li neke’rahob’tesink re lix sum aatin malaj reheb’ li ralal xk’ajol, ut li ink’a’ neke’xb’aanu li teneb’anb’il sa’ xb’eeneb’ sa’ li junkab’al, sa’ jun kutan te’xaqab’aaq xsumenkil resil lix b’aanuhomeb’ chiru li Dios. Naqaye ajwi’ .. naq lix sachik li junkab’alej, tixk’am chaq sa’ xb’eeneb’ li winq ut li ixq, li jar tenamit, ut li jar ch’och’, li rahilal yeeb’il resil xb’aaneb’ li profeet najter ut sa’ li kutan a’in.”⁵

Jo’ Apostol, naqaxaqab’ wi’chik li loq’laj q’usuk a’in anajwan. Chek’e reetal naq li taqlahom ut li sumwank a’aneb’ na’leb’ re nimla b’ihomal li neke’tawman sa’ li Chaab’il Jukub’ Sion, b’ar wi’ li Dios naxjolomi li k’amok b’e.

Jun chik li na’leb’ li naru taqachap choq’ re qakolb’al, a’an roxloq’inkil li hilob’aal kutan. A’an jun li maatin li nokoxtenq’a chi kanaak chi maak’a’ xtz’ajnil li ruchich’och’, li naxk’e xhiilal qatib’el, ut nokoxk’e chi ak’ob’resiik sa’ musiq’ej rik’in xloq’oninkil li Yuwa’b’ej ut li K’ajolb’ej.⁶ Naq nokosaho’ sa’ lix hilob’aal kutan, a’an jun reetalil li qarahom ut xq’axtesinkil qib’ choq’ reheb’.⁷

Sa’ qak’anjel re xk’eeb’al xsahilal li hilob’aal kutan, xqatz’aama naq laj jolominel ut eb’ li komon te’xk’e reetal naq li ch’utam re li loq’laj wa’ak, a’an re li Qaawa’, ut wank raj xxe’il sa’ lix k’utum ut lix tojb’al rix li maak. Lix k’utb’esinkil li loq’laj wa’ak wan choq’ qahoonal chirak’ob’resinkil qasumwank ut chixk’utb’al wi’chik qarahom choq’ re li Kolonel ut xk’oxlankil lix mayej.

Wan raj qach’ool chi jo’kan sa’ chixjunil li ch’utam re kuyuk sa’ ut re xwotzb’al qanawom. Li ch’utam a’in naxaqab’aman re naq li komon te’xye junpaat lix b’antioxihom ut lix rahom choq’ re li qaChoxahil Yuwa’, li Jesukristo, ut li evangelio k’ojob’anb’il wi’chik ut re te’xye xnawomeb’ xch’ool chirix. Li ch’utam re kuyuk sa’ a’an jun hoonal re xwotzb’al ch’ina na’leb’, eek’ahom, ut re xyeeb’al li qanawom. Maawa’ jun hoonal re najtil aatinak.

Eb’ li kok’al te’xtzol raj xwotzb’al xnawom xch’ool sa’ li Tzoleb’aal reheb’ li Kok’al ut rik’ineb’ xna’ xyuwa’ sa’ li q’ojyinkil re junkab’al toj reetal te’xtaw ru xyaalalil lix wotzb’al.

Xxaqab’ankil li hilob’aal kutan anajwan, a’an tz’aqal jun li musiq’anb’il na’leb’ k’eeb’il xb’aan li Qaawa’ rik’ineb’ laj jolominel sa’ li Iglees. Eb’ li komon sa’ li ch’utam re lix teep te’xtenq’a raj li obispado rik’in xkawresinkil li b’ich ut li na’leb’ li ak ke’xxaqab’ chaq choq’ reheb’ li ch’utam re loq’laj wa’ak.

Chiqajunilo noko’osob’tesiik naq nanujak li hilob’aal kutan rik’in xraab’al li Qaawa’ sa’ qochoch ut sa’ iglees. Naq eb’ li qakok’al neke’tzole’ sa’ xb’e li Qaawa’, neke’xtzol chanru reek’ankil ut xsumenkil lix Musiq’. Eb’ li saaj te’raj chalk sa’ iglees rajlal domingo re te’tzaqonq sa’ li loq’laj wa’ak wi neke’reek’a lix Musiq’ li Qaawa’. Ut chiqajunilo, ma saaj malaj tiix, li yooko chiriiq’ankil li rahilal taqeek’a xwaklesinkil qamusiq’ ut xk’ojob’ankil qach’ool li nachal xb’aan jun li hilob’aal kutan li q’axtesinb’il choq’ re xk’oxlankil li qaYuwa’ ut li Qaawa’ Jesukristo.

Us choq’ qe naq li Kristo rajal wan chi nach’, sa’ rajb’al ut royb’eninkil naq toxtenq’a wi taqaj xjalb’al qak’a’uxl ut chalk rik’in a’an.

Anajwan, naq naqak’oxla yal wiib’ oxib’ li osob’tesink ut maatan a’in li wankeb’ sa’ li Jukub’ Sion, chokanaaq chi sa’ ut chiqak’e reetal naq li jukub’, a’an jun li b’eleb’aal, ut lix k’anjel li b’eleb’aal, a’an naq toxk’am sa’ junaq na’ajej.

Li na’ajej b’ar wi’ taaxik li qajukub’, a’an li osob’tesiik chi tz’aqal sa’ li evangelio, lix awab’ejihom li choxa, li choxahil awa’b’ejihom, ut rik’in li Dios!

K’ojob’anb’il xk’uub’ankil na’leb’ li Dios. Naxjolomi li k’amok b’e, ut lix nimajwal jukub’ naxik toj sa’ li kolb’a-ib’ ut li taqenaqil loq’al. Tento taqak’e reetal naq ink’a’ naru taqataw a’an wi too’elq sa’ li jukub’ ut toonumxik qajunes.

Lix taqsinkil qaloq’al, a’an li rajom li yu’am a’in, ut maajun nawulak aran chi maak’a’ lix evangelio li Jesukristo: lix tojb’al rix li maak, li k’ojob’anb’il k’anjel, ut li tzol’leb’ ut xb’eenil na’leb’ li neke’tawman sa’ li Iglees.

Junes sa’ li Iglees naqatzol lix k’anjel li Dios ut naqak’ulub’a li rusilal li Qaawa’ Jesukristo li nokoxkol. Ka’ajwi’ sa’ li Iglees naqaq’axtesi qib’ ut naqayiib’ li sumwank choq’ re li junelik junkab’al li na’ok choq’ qaliceens chi ok sa’ taqenaqil loq’al. Ka’ajwi’ li Iglees nab’eek sa’ xwankil li tijonelil re toxtiikisi toj chirix li t’ane’k li wan sa’ li po’b’il ut eek’asinb’il xha’il li palaw re li yu’am a’in.

Chiqab’antioxi li ch’ina-usil Jukub’ Sion, xb’aan naq chi maak’a’ a’an, maak’a’ qab’e, qajunes wanko ut maak’a’ qametz’ew chiru li nimla ha’, xokb’ilo chi maak’a’ xk’amleb’ qab’e, kelosinb’ilo sa’ li sut-iq’ ut li ha’ re laj tza.

Chap chi kaw, ex was wiitz’in, ut k’am lee b’e sa’ li xnimal ru jukub’ a’in, Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ut taqataw qana’aj sa’ junelik q’e kutan. A’an lin tz’aam sa’ xk’ab’a’ li ani k’ab’a’inb’il wi’ li Jukub’ Sion, a’an ajwi’ li Qaawa’ ut li Kolonel, Jesukristo, amen.