Chiyaab’asiiq li trompeet

Xb’aan li Elder Gregory A. Schwitzer

Re li Setenta

Sa’ li ruchich’och na’ajman ru xtzolom li Kristo li te’xnumsi li resilal li evangelio chi saqen ru ut na’el chaq sa’ xch’ooleb’.

Sa’ li saq’ehil xnume’, wiib’eb’ li kok’ qimam li wixaqil ut laa’in ke’kana qik’in naq eb’ lix na’ xyuwa’ yookeb’ chi tz’aqonk sa’ jun k’anjel aj tehol b’e sa’ li oqech’. Li qarab’in kiraj xnawb’al naq eb’ lix kok’al yookeb’ chixtzolb’al xch’eb’al li piano naq maa’ani wan. A’an kixnaw naq rik’in li wank sa’ rochocheb’ lix mama’, jwal junpaat neke’sach sa’ xch’ool li tzolok. Jun kutan kinchunla chixk’atq laj Andres, li wimam li oxlaju chihab’ wan re, re rab’inkil chi ch’e’ok piano.

Jwal nawulak chiru li ch’ajom a’in li wank chirix kab’l. Naru xnumsinkil chixjunil lix hoonal chi yohok ut karib’k. Naq yoo chixch’e’b’al li piano, kink’e reetal naq jwal taaraj raj karib’k sa’ jun li nima’ nach’ aran chiru li ch’e’ok piano. Kiwab’i naq yoo chixtoch’b’al chi kaw jun li son nawb’il ru. Li junjunq lix yaab’ li son juntaq’eet ki’eek’an, xb’aan a’in ink’a’ jwal natawman ru li son. Kinchunla chixk’atq sa’ li tem ut kinch’olob’ chiru lix aajelil ru xch’e’b’al chi kaw b’ayaq lix sonil ut q’un b’ayaq li rochb’eeninkil li son. Koo’aatinak chirix naq li piano nim xwankil chiru yal jun sachb’a-ch’oolejil yiib’ahom. Taaruuq raj taa’ok jo’ xkab’il xyaab’ xkux ut reek’ahom, ut taaruuq taa’oksimanq jo’ jun k’anjeleb’aal re numsink esil. Chanchan jun li kristiaan na’aatinak ut timil timil naxye li junjunq chi aatin, jo’kan naq taa’eek’anq li son sa’ li junjunq xyaab’.

Koose’ek sa’ wiib’al naq ki’ok wi’chik chixyalb’al xch’eb’al. Lix se’ kik’utun sa’ xnaq’ ru naq li son ki’ok chi elk sa’ xyanq li son ink’a’ jwal natawman ru. Li esil kik’utun chi chaab’il: “Laa’in jun ralal li Dios; ut xinixtaqla arin”.¹ Kinpatz’ re laj Andres wi kixk’e reetal lix jalanil li esil, ut kixye we naq: “Hehe’, yuwa’chin, naru naweek’a!”

Sa’ lix tz’iib’ahom reheb’ laj Korintios, li Apostol aj Pablo naxk’ut chiqu xjuntaq’eetankil li wotzok esil rik’in li k’anjeleb’aal re li son:

“Jo’ka’in nak’ulmank rik’ineb’ li wajb’ jo’ li xolb’ ut li aarp. wi ta ink’a’ jalan jalanq li xyaab’eb’, chan raj ru naq taanawmanq li na’elk sa’ li xolb’ ut li na’elk sa’ li aarp?

“Ut wi ta li trompeet ink’a’ saqenk taa’eek’anq, ani tixkawresi rib’ re xik chi yalok? ”²

Wi jun sut sa’ li ruchich’och’ na’ajman ru xtzolom li Kristo li te’xnumsi li resilal li evangelio chi saqen ru ut na’el chaq sa’ xch’ooleb’, li hoonal a’an, a’an anajwan. Aajel ru lix kawilal xyaab’ lix b’oqom li trompeet.

Li Kristo a’an li qachaab’il eetalil. A’an junelik kixk’ut xkawilal xch’ool sa’ xkolb’al rix li yaal. Li raatin toj yoo chi eek’ank chiru xnumikeb’ li chihab’ naq nokoxb’oq chixjultikankil xraab’al li Dios ut li qas qiitz’im, xpaab’ankil chixjunileb’ lix taqlahom li Dios, ut chi wank jo’ jun xsaqen li ruchich’och’. A’an ink’a’ kixuwak chi aatinak chiruheb’ xwankil li ruchich’och’ chi moko chiruheb’ li ninqeb’ xwankil sa’ xkutankil, us ta ke’raj xramb’al ru lix k’anjel kik’ehe’ re xb’aan lix Choxahil Yu’wa’. Li raatin a’an moko re ta sachok na’leb’, re b’an reek’ansinkil li raameb’ li winq. A’an kixnaw chi saqen li rajom lix Yuwa’ sa’ chixjunil li kixye ut kixb’aanu.

Jwal nawulak ajwi’ chiwu li reetalil laj Pedro, li kixsumeheb’ ru li winq re li ruchich’och’ rik’in xkawilal xch’ool ut chi saqen ru sa’ li kutan re li Pentekostes. Sa’ li kutan a’an, ch’utub’anb’ileb’ rib’ kristiaan re jar paay chi tenamit li yookeb’ chixwech’inkil rixeb’ li xb’eenileb’ aj Santil Paab’anel xb’aan naq ke’rab’iheb’ chi aatinak sa’ jalan aatinob’aal ut ke’xk’oxla naq kalajenaqeb’. Laj Pedro, nujenaq rik’in li Musiq’ej, kixaqli ut kixkol rix li Iglees ut eb’ li komon. A’an kixch’olob’ xnawom xch’ool rik’in li aatin a’in: “Ex aj Judio ut chejunilex li wankex Jerusalen, ch’olch’o chikanaaq a’in cheru ut ab’ihomaq chi us li waatin”.³

Toja’ naq kixnumsiheb’ li raqal sa’ li loq’laj hu wankeb’ wi’ li profeetil raatin li Kristo ut kixk’e jun xnawom xch’ool saqen ru: “Che’xnawaq b’i’ chixjunileb’ li ralal xk’ajol laj Israel naq li Jesus a’in li xek’e laa’ex chiru krus, a’an kixaqab’aak xb’aan li Dios choq’ Qaawa’ ut Kristo”.⁴

Naab’aleb’ ke’rab’i li raatin ut ke’reek’a li Musiq’ej, ut oxib’ mil chi aamej ke’xjunaji rib’ sa’ xtzol li najter Iglees. A’an jun xnimal reetalil naq wi jun li winq malaj li ixq wan xch’ool xyeeb’al xnawom xch’ool us ta li ruchich’och’ ink’a’ naraj ab’ink, naru tixk’e chi uxmank jun nimla jalok.

Naq laa’o, jo’ komon, naqasik’ xxaqab’ankil qib’ ut rik’in wankilal naqach’olob’ xyaalal lix tzol’leb’ li Dios ut lix Iglees, wan li k’aru najala sa’ li qawanjik. Naqak’ul lix jalam-uuch sa’ qab’een. Nokonach’o’ rik’in lix Musiq’. Jo’kan ut naq A’an taaxik chiqu ut taawanq “sa’ [li qanim] uq’ ut sa’ [li qatz’e] ut [lix] Musiq’ taawanq sa’ [li qach’ool] ut eb’ [lix] anjel [chi qasutam] re [qawaklesinkil]”.⁵

Eb’ lix tz’aqal tzolom li Kristo ink’a’ neke’xyal xch’olob’ankil chi jalan li tzol’leb’ naq ink’a’ nak’ulub’aman jo’ rilom li ruchich’och’. Laj Pablo a’an jun chik li tzolom kaw xch’ool, li kixyaab’asi rik’in xkawilal xch’ool naq “ink’a’ [naxutaanaq] chixpuktesinkil lix [evangelio li Kristo]; xb’aan naq a’an xnimal xwankil li Dios re xkolb’al chixjunileb’ li te’paab’anq re”.⁶ Eb’ li tz’aqal tzolom neke’xb’aanu ruuchil li Qaawa’ us ta naq kaw xb’aanunkil. Eb’ li tz’aqal tzolom neke’raj xmusiq’ankil li raameb’ li winq, ut ink’a’ yal xk’utb’al xchaab’ilal xjuneseb’ rib’ chiruheb’.

Naab’al sut, kaw b’ayaq ut ink’a’ jwal sa’ xkolb’al rix li Kristo. Ninnaw chi yaal naq jo’kan kireek’a’ laj Pablo naq kib’oqe’ chiru li rey aj Agripa ut kipatz’e’ re naq tixk’e rib’ choq’ tiik xch’ool ut tixseraq’i lix wanjik. Laj Pablo, chi maak’a’ xxiw, kixye li k’a’ru naxpaab’ rik’in wankilal q’axal nim, tojo’ re naq li xuwajel rey kixye naq “b’ab’ay chik” ma kiq’ajsiik jo’ aj paab’anel.

Li xsumehom laj Pablo kixk’ut li rajom naq eb’ li kristiaan te’xtaw ru chi tz’aqal li k’aru tixye. Kixye re li rey aj Agripa naq li rajom a’an naq chixjunileb’ li ke’ab’ink re ink’a’ te’paab’anq chi “b’ab’ay” a’ut te’wulaq raj b’an jo’ “tz’aqal” xtzolom li Kristo.⁷ Li ani neke’aatinak chi saqen naru neke’xk’e chi uxmank a’in.

Chiru k’iila chihab’ wokik chixtzolb’al lix matk’ laj Lehi sa’ lix Hu laj Mormon,⁸ junelik nink’oxla li nimla kab’l paapo xsa’ jo’ jun na’ajej b’ar wankeb’ wi’ moko ka’aj ta wi li ani po’jenaqeb’ xch’ool. Li nimla kab’l a’an nujenaq rik’in kristiaan li neke’reetz’u ut neke’xk’ut chi ru’uj ruq’ li tiikeb’ xch’ool neke’xchap rib’ rik’in li b’arb’ookil ch’iich’, a’an reetalil li raatin li Dios, ut neke’wulak wan wi’ li che’ re li yu’am, a’an reetalil lix rahom li Dios. Junjunqeb’ ink’a’ ke’xkuy xnumsinkil li eetz’uuk, ut ke’sach. Wankeb’ chik kexjunaji rib’ rik’ineb’ laj eetz’unel sa’ li nimla kab’l. Ma ink’a’ kaweb’ xch’ool chi aatinak re xtz’eqtaananil li hob’ok malaj lix na’leb’ li ruchich’och’?

Naq nawil naq li ruchich’och’ anajwan naxnajtob’resi rib’ rik’in li Dios, nink’oxla naq li kab’l a’in yoo chi k’iik xnimal. Naab’aleb’ yookeb’ chi b’eek chire li nimla kab’l paapo xsa’, ut ink’a’ neke’xk’e reetal naq yookeb’ chixjunajinkil rib’ rik’in xna’leb’. Neke’t’ane’ xb’aan li aaleek ut eb’ li esil. Chirix a’an naqileb’ chi eetz’unk ut chixtaaqenkileb’ li ani neke’hob’ok ut neke’eetz’un.

Chiru k’iila chihab’ xink’oxla naq li molam aj eetz’unel yookeb’ chireetz’unkil chanru neke’xyu’ami xyu’ameb’ li tiikeb’ chi paab’ank, a’b’an eb’ li xyaab’ kuxej li nachal chaq sa’ li nimla kab’l anajwan jalan xyaab’eb’. Eb’ lii neke’eetz’un rajlal neke’xyal xramb’al li saqen ru esil re li evangelio rik’in aatinak chi kaw chirix jun ch’ina na’leb’ kik’ulman sa’ resilal li Iglees malaj rik’in xhob’b’al junaq li profeet malaj jalan chik laj jolominel. Jo’kan ajwi’ neke’xhob’ lix tzol’leb’ ut lix chaq’rab’ li Dios, li ke’k’eeman chalen chaq sa’ xyo’ob’tesinkil li ruchich’och’. Laa’o, jo’ xtzolom li Jesukristo ut komon sa’ lix Iglees, maajun wa raj taqakanab’ li b’arb’ookil ch’iich’ a’an. Tento taqakanab’ naq chalen li qaam taa’yaab’asimanq li trompeet.

Li saqen ru esil chirix a’an naq li Dios a’an li qaChoxahil Yuwa’ aj rahonel ut li Jesukristo a’an li Ralal. Li evangelio ak k’ojob’anb’il wi’chik sa’ li roso’jikeb’ li kutan a’in rik’ineb’ li yo’yookil profeet, ut lix Hu laj Mormon a’an li reetalil. Li b’e re li sahil ch’oolejil wan sa’ li junajil sa’ junkab’al jo’ chanr kixk’ub ut kik’utb’esi li qaChoxahil Yuwa’. A’in li nawb’il ru xb’ichul li esil li naru natawe’ ru xb’aan naab’aleb’ xb’aan naq ak ke’rab’i chaq sa’ lix yu’am naq maji’ neke’yo’la.

Jo’ aj Santil Paab’anel sa’ Roso’jikeb’ li Kutan, xwulak xhoonalil naq toowakliiq ut taqawotz xnawom li qach’ool. A’in xhoonalil naq xyaab’ xb’ichul li evangelio taa’yaab’asiiq chi kaw chiru xyaab’ li ruchich’och’. Ninjunaji xnawom inch’ool rik’in li resilal li Kolonel ut aj Tojol rix li ruchich’och’. Yo’yo a’an! Lix evangelio ak k’ojob’anb’il wi’chik, ut li osob’tesink re li sahil ch’oolejil ut tuqtuukilal naru natawman sa’ li yu’am a’in rik’in xyu’aminkil lix taqlahom ut li b’eek sa’ xb’ehil A’an. A’in xnawom lin ch’ool sa’ xk’ab’a’ li Jesukristo, amen.