Chatkanaaq saʼ laa bʼe

Xb’aan li Elder Koichi Aoyagi

Komon sa’ li Setenta wan sa’ xhilaal

Sa’ li 11 xb’e li marzo re 2011, wankin chaq sa’ xxaqleb’aaleb’ li k’anti’ch’iich’ aran Shinagawa, Tokio re rula’aninkil li mision Japon Kobe. Sa’ 2:46 re b’enwa’leb’, ki’uxk jun li hiik 9.0 xkawil. Ink’a’ kinru chi kanaak chi xaqxo xb’aan xkawil li eek’ank, ut kinchap wib’ chiru li ch’iich’ re li eeb’. Eb’ li saqen ch’iich re li kab’l ke’ok chi t’ane’k chi ch’och’. Chixjunil Tokio wankeb’ sa’ xiw.

Ink’a’ xintoch’e’, ut kaahib’ oor chik chirix a’an, ki’el lin k’a’uxl naq kinnaw naq lin junkab’al ink’a’ kitoch’e’.

Sa’ li kaxmu ke’xnumsi li esil jwal xiwajel. Jun xnimal xmetz’ew li palaw kixtoch’ xcha’al li Mision Sendai—kixb’eela chixjunil li kixtaw sa’ xb’e: b’eeleb’aal ch’iich’, kab’l, ninqi ochoch, ut awimq. Xiikin naq kisach inch’ool chirilb’al li jalam-uuch ut kinyaab’ak ut kintz’aama chi yaal naq li rilom ut lix tenq’ li qaChoxahil Yuwa’ taawanq rik’ineb’ li kristiaan wankeb’ sa’ li na’jej a’an li jwal nekeb’inra.

Moqon, kiwulak resil naq chixjunileb’ li misioneer ut eb’ li komon sa’ li Iglees ink’a’ ke’toch’e’. A’b’anan naab’aleb’ li komon yookeb’ chixnumsinkil rahilal, ke’toch’e’ xjunkab’aleb’, rochocheb’, ut li k’a’ru reheb’. Ke’kam numenaq jun may mil li kristiaan, ke’sache’ li k’aleb’aal, ut naab’aleb’ li kristiaan ke’teneb’aak chi elk sa’eb’ li rochoch xb’aan jun ch’a’ajkilal rik’in li planta re energía nuclear.

Li nimla rahilal jo’ a’in yoo chi k’ulmank sa’ k’iila na’ajej re li ruchich’och’ sa’eb’ li kutan a’in, chixsachb’aleb’ li yu’am. Ak yeeb’il qe naq taawanq li sachok, li pleet, ut li ch’a’ajkilal maak’a’ rajlankileb’ sa’ li ruchich’och’.

Naq neke’chal li yale’k jo’ a’in, maare taqapatz’ qib’: “K’a’ut naq nak’ulman li k’a’aq re ru a’in?” malaj “K’a’ut naq tento tinnumsi li rahilal?”

Naab’al li hoonal naq ak kinnaw ru li evangelio, ink’a’ jwal kintaw xsumenkil li patz’om a’in “K’a’ut naq nak’eeman inyalb’al?” Kintaw ru naq li k’uub’anb’il na’leb’ re li kolb’a-ib’ naxye naq yalb’ilaqo. A’b’anan, rik’in li patz’om a’an, chi yaal naq maak’a’ xnawom inch’ool re xk’eeb’al junaq xsumenkil chi chaab’il. A’b’an kiwulak li hoonal sa’ lin yu’am naq laa’in ajwi’ kinnumsi jun nimla yale’k.

Naq wan chaq we 30 chihab’, yookin chaq chirula’aninkil li mision Nagoya jo’ xkomon lin k’anjel. Chirix li ch’utam, li awa’b’ej re li mision kixk’uub’ ru naq eb’ li misioneer tine’xk’am sa’ xxaqleb’aaleb’ li so’sol ch’iich’. A’b’anan, naq koowulak sa’ xxuk jun li b’e xulxu ru, jun li nimla b’eleb’aal chi’iich’ ki’el sa’ li b’e chiqix chi jwal kaw, kixten rib’ chiru li qab’eleb’aal ch’iich’ ut kixtiikisi maaru jun may metro chi ub’ej. Li nimla b’eleb’aal ch’iich’ a’an maak’a’ laj ch’e’ol re. Li rit li qab’eleb’aal ch’iich’ kiyoq’e’ chi us. Us ta naq eb’ li misioneer ut laa’in kookole’.

A’b’anan, sa’ li kutan jun chik, kin’ok chireek’ankiil li rahilal sa’ lin kux ut xb’een intel ut jun nimla rahil jolomej. Chalen chiru li kutan a’an, ink’a’ kinru chi wark, ut rajlal kutan tento kinkuy li rahilal a’an sa’ tib’elej ut sa’ jolomej. Kinpatz’ re li Dios naq tixb’aanu usilal tinxk’irtesi, a’b’an li rahilal a’an kikana chiru lajeeb’ chihab’ tana’.

Chiru li hoonal a’an, ki’ok chi chalk sa’ lin jolom eek’ahom re kab’ rix ch’oolej, ut kinpatz’ wib’: “K’a’ut naq tento tinnumsi naab’al li rahilal?” A’b’anan, us ta ink’a’ kik’ehe’ we li k’iraak kinsik’, kinyal inq’e chixk’uulankil chi tiik lix taqlahom li Dios. Ut ink’a’ kinkanab’ li tijok re naq taa’elq lix kab’ rix inch’ool chirix li yale’k.

Kiwulak li hoonal b’ar wi’ kintaw li ch’a’ajkilal sa’ lin yu’am, ut kinpatz’ wib’ b’ayaq xb’aan naq ink’a’ kinnaw chanru xnumsinkil li ak’ yale’k a’an. Kintijok re xpatz’b’al lin sumenkil. A’b’an ink’a’ kink’ul sa’ junpaat. Jo’kan ut xkohin chi aatinak rik’in jun aj jolominel re li Iglees.

Naq yooko chi aatinak, rik’in rahok sa’ lix yaab’ xkux, kixye: “Hermano Aoyagi, ma ink’a’ tab’i xnumsinkil li yale’k li rajb’al laa wanjik sa’ ruchich’och’? Ma ink’a’ tz’aqal xk’ulub’ankil li yale’k re li yu’am a’in a’ yaal jo’ chanruheb’ ut xkanab’ankil lix komon sa’ ruq’ li Qaawa’? Ma ink’a’ nakapaab’ naq li ch’a’ajkilal a’an taak’iraaq naq toowakliiq wi’chik chi yo’yo?”

Naq kiwab’i li aatin a’an, kiweek’a chi kaw lix Musiq’ li Qaawa’. Ak wab’ihom li tzol’leb’ a’an naab’al sut, a’b’an li wilom sa’ xtawb’al ru maji’ nateeman jo’ chanchan sa’ li hoonal a’an. Kintaw ru naq a’an lix sumenkil lin tij chiru li Qaawa’. Kinru chixtawb’al ru chi us lix k’uub’anb’il na’leb’ re li kolb’a-ib’ li qaChoxahil Yuwa’ ut kintaw wi’chik ru li xb’eenil na’leb’ a’in.

Sa’ Abraham, li Qaawa’ Dios kixye: “…Ut taqayaleb’ rix rik’in a’in, re taqil ma te’xb’aanu chixjunil li k’a’aq re ru li b’arwan tixtaqlaheb’ wi’ li Qaawa’ lix Dios”.¹

Li xb’eenil na’leb’, a’an naq li Dios li kixyo’ob’tesi li choxa ut li ruchich’och’ naxnaw chanru yiib’anb’il, naq a’an nab’eresin re chixjunil li k’a’ru wan sa’ choxa ut sa’ li ruchich’och’, ut naq re taa’uxmanq li k’uub’anb’il na’leb’ re kolb’a-ib’, A’an naxk’e qe naab’al li yu’amink jar paay ru—jo’ li yale’k—naq wanko sa’ li ruchich’och’ a’in.

Ut li Qaawa’ kixye a’in re laj Jose Smith:

“Chanaw, at walal, naq chixjunil li k’a’aq re ru a’in tixk’e aana’leb’, ut taawanq choq’ re aachaab’ilal. …

“Jo’kan ut, chatkanaaq sa’ laa b’e …, xb’aan naq li Dios taawanq aawik’in chi junelik q’e kutan”.²

Li yale’k re li ruchich’och’ a’in—jo’ li yajel ut li kamk—a’an xkomon li k’uub’anb’il na’leb’ re li kolb’a-ib’ ut teneb’anb’il chixnumsinkileb’. Aajel ru naq “tookanaaq sa’ li [qa]b’e” ut taqak’ulub’a lix yale’k rik’in paab’aal.

A’b’anan, li rajb’al li qayu’am moko ka’aj ta wi a’an xkuyb’al li yale’k. Li qaChoxahil Yuwa’ kixtaqla chaq lix Raarookil Alal, li Jesukristo, jo’ aj Kolol qe ut aj Tojol qix, re naq tooruuq chixq’axb’al ru li yale’k li naqataw sa’ li ruchich’och’ a’in; sa’ jalan chik aatin, A’an naxb’aanu naq li k’a’aq re ru q’un kawaq chik,³. A’an kixtoj rix li qamaak ut li qapaaltil ut naxb’aanu naq ink’a’ chik tookamq ut naru taqak’ul li junelik yu’am.

Li Awa’b’ej Henry B. Eyring kixye: “Li yale’k li naxk’e qe li Dios aj rahonel moko re ta rilb’al ma tooruuq chixnumsinkil, re b’an rilb’al ma taqanumsi chi chaab’il. Naqanumsi li yale’k rik’in xk’utb’esinkil naq naqajultika A’an ut li taqlahom kixk’e qe”.⁴

“Chatkanaaq sa’ laa b’e” a’an jun li b’aanuhom aajel ru sa’ li hoonal re yale’k. Chasutq’isi laa ch’ool rik’in li Dios, a’ tz’aqal naq wankat sa’ li yale’k. Chat-ab’inq chi tuulan chiru lix taqlahom li Dios. Chak’ut aapaab’aal re xk’eeb’al sa’ usilal laa wajom rik’in li rajom li Dios.

Chiqak’oxla anajwan li kik’ulman rik’in li toch’ok aran Nagoya. Naru raj xinkam sa’ li toch’e’k a’an. A’b’anan, rik’in li rusilal li Qaawa’, kinkole’. Ut ninnaw naq lin rahilal a’an re lin tzolb’al ut inchaab’ilob’resinkil.⁵ Li qaChoxahil Yuwa’ kinxkawresi re xk’iiresinkil lin kuyum, xk’iiresinkil li toq’ob’ank-u, ut re xk’ojob’ankileb’ xch’ool li neke’ k’uluk rahilal. Naq kintaw ru a’an, kinujak inch’ool rik’in jun eek’ahom re b’antioxink rik’in lin Choxahil Yuwa’ xb’aan li yale’k a’an.

Chak’e li Dios xb’een wa sa’ laa yu’am, maak’a’ na’ok wi’ li yale’k yookat chixnumsinkil. Chara li Dios. Chiwanq aapaab’aal chirix li Kristo, ut kanab’ aawib’ sa’ ruq’ sa’ chixjunil li k’a’aq re ru. Laj Moroni naxk’e li yeechi’ihom a’in reheb’ li kristiaan a’an: “Ut wi neketz’eqtaana choq’ eere chixjunil li moko us ta, ut nekera li Dios chi anchal eemetz’ew, eek’a’uxl, ut eekawilal, rik’in a’an tz’aqal li rusilal choq’ eere, re naq rik’in li rusilal taaruuq texwanq chi tz’aqal eere eeru rik’in li Kristo; ut wi xb’aan li rusilal li Dios tz’aqal eere eeru rik’in li Kristo”.⁶

Ninch’olob’ xyaalal chi anchal inch’ool naq li Dios li Yuwa’b’ej ut lix Raarookil Alal, li Jesukristo, yo’yookeb’ ut naq lix yeechi’ihom li Dios choq’ reheb’ li ani “neke’kana sa’ [lix] b’e” ut neke’xra A’an te’uxmanq, us ta wanqex sa’ xyi li yale’k, sa’ lix santil k’ab’a’ li Jesukristo, amen.