Li yaal li saqen ru ut loq’
Xb’aan li Elder Gary E. Stevenson
Re lix Molameb’ li Kab’laju chi Apostol
Li osob’tesink li nokoxq’ajqamu li qaChoxahil Yuwa’ sa’ xnumsinkil qayu’am sa’ li kutankil xuwajel, a’an xnumsinkil qayu’am sa’ xtz’aqalil ru li kutan.
Ex was wiitz’in, ak ke’nume’ k’iila chihab’ naq xtikla junaq li jolomil ch’utub’aj-ib’ chi ma’aani wan li Awa’b’ej Boyd K. Packer, ut eb’ li Elder L. Tom Perry malaj Richard G. Scott, chi chunchuukeb’ chirix li pulpito re te’aatinaq sa’ jun reheb’ li ch’utam. Toj nanaq chi us sa’ qach’ool li xqil rik’ineb’, ut ninye ajwi’ li woxloq’ihom choq’ reheb’, li jalan jalanqeb’ a’ut toj junajinb’ileb’ sa’ lix nawom ut lix ch’olob’ahom chirix li Jesukristo ut lix tojb’al rix li maak.
Jo’kan ajwi’, laa’in, jo’ laa’ex, nintaw inmetz’ew rik’in xxaqab’ankil li Awa’b’ej Thomas S. Monson jo’ profeet, aj ilol na’leb’, ut aj k’utb’esinel, ut chaq’al ru nawil lix k’anjel jo’ apostol chiru numenaq 50 chihab’.
Ut jo’kan kiwan sa’ li Martes eq’la sa’ li xamaan a’in, junpaat chirix li b’eleb’ hoonal, naq li Obispil yoo chixtikib’ankil jun ch’utam rik’ineb’ li Awa’b’ej re Asia, li wankeb’ arin choq’ re li ch’utub’aj-ib’, ut xinb’oqe’ chi wulak rik’in li Awa’b’ej Monson, rochb’eeneb’ lix tenq’ aj k’ehol na’leb’. Yal junpaat chirix a’an, naq xin’ok sa’ li oficina, uuchin raj chiwu naq yoo lin xiw, xb’aan naq q’un ki’aatinak chink’ojob’ankil. Chan a’an naq anchal saajin ut ink’a’ nak’utun chiwu tz’aqal inchihab’.
Sa’ junpaat wi’chik, li Awa’b’ej Monson kixye naq rik’in xk’anjel re xb’aanunkil rajom li Qaawa’, yoo chixk’eeb’al jun li b’oqok we chi k’anjelak sa’ lix Molameb’ li Kab’laju. Xpatz’ ma tink’ulub’a li b’oqok a’in, ut chirix naq xin-ch’inajap li we chi moko ch’ina-us ta, sa’ naab’al inxiw, xinye naq tink’ulub’a. Toja’ naq chi maji’ ninru xyeeb’al li nimla eek’asink sa’ lin ch’ool, wan wi’ naab’al xk’eeb’al reetal lin majelal, li Awa’b’ej Monson ki’ok wi’chik sa’ q’unalil, ut kixch’olob’ chanru kixk’ul xb’oqb’al a’an k’iila chihab’ chaq rik’in li Awa’b’ej David O. McKay, naq a’an ajwi’ xreek’a xnimal xmajelal. Chi q’un, kixk’e lin na’leb’, “Obispo Stevenson, li Qaawa’ naxk’awresi li ani naxb’oq.” Li q’unal raatin jun li profeet yoo chixk’eeb’al lin tuqtuukilal sa’ jun nimla iq’ re xtz’ilb’al wix injunes ut sa’ li q’unal week’ahom sa’eb’ li hoonal li xinnumsi chi kutan ut chi q’eq chalen chaq sa’ li hoonal a’an.
Xinye resil li xinye eere laa’ex anajwan re li chaab’il wochb’een, li xLesa, moqon sa’ li kutan a’an, chi chunchuuko sa’ li Manzana re li Templo, rik’in jun li chaab’il ilok chiru li santil ochoch ut li najter Tabernaculo. Naq xqayal qaq’e chixtawb’al ru li k’a’ru xk’ulman sa’ li kutan a’an, xqak’e reetal naq li qak’ojleb’, a’an qapaab’aal chirix li Jesukristo ut li qanawom chirix li nimla na’leb’ choq’ re xsahil qach’ool. Anajwan tinye jun aatin chirix xnimal inrahom choq’ re li xLesa. A’an lix saqenkil lin yu’am, ut jun chaq’al ru xrab’in li Dios. Utz’u’ujinb’il xyu’am rik’in xtenq’ankileb’ jalan ut xraab’aleb’ chixjunil. Tinyal inq’e chi kanaak jo’ k’ulub’ej re li qajunajinkil sa’ li junelik q’e kutan.
Ninye xnimal lin rahom choq’ reheb’ li kaahib’ li qalal ut lix junkab’aleb’. Oxib’eb’ wankeb’ arin rochb’eeneb’ li rixaqil, a’aneb’ lix na’ li waqib’ li qimam; li xka, jun li misioneer, xk’ul xliceens naq ink’a’ taawarq anajwan re naq taaruuq chirilb’al li ch’utam a’in sa’ Internet rochb’een li awa’b’ej re lix mission ut li rixaqil sa’ Taiwán. Ninraheb’ chixjunil ut ninsaho’ naq neke’xra li Kolonel ut li evangelio.
Ninye lin rahom choq’ re chixjunileb’ sa’ lin junkab’al: lin na’ ut lin yuwa’, li kikam sa’ li chihab’ xnume’, li kixk’ojob’ sa’ lin ch’ool jun lin nawom li anchal xkana wik’in chalen chaq xtiklajik li k’a’ru toj nanaq sa’ lin ch’ool. Ninye a’in ajwi’ reheb’ li was ut li wiitz’in ut eb’ lix sum aatin jo’ ajwi’ re lix junkab’al li xLesa, naab’aleb’ wankeb’ arin anajwan. Ninjek’i li b’antioxihom a’in reheb’ naab’aleb’ lin komon, li amiiw, li misioneer, laj jolominel, ut laj k’utunel li wanjenaqeb’ wik’in.
Xink’ul wosob’tesinkil rik’in naq nach’ wanjenaqin rik’ineb’ xkomon li Xb’eenil Awa’b’ejil, li Kab’laju, ut laj Setenta ut eb’ li jolomil aj k’anjenel. Ninye lin rahom ut woxloq’ihom eere chejunilex ut tinyal inq’e re ink’ulub’aq naq tinkanaaq sa’ eeyanq. Li Jolomil Obispil nasaho’ sa’ jun li junajil anchal choxahil. Tinpatz’ lin wanjik sa’ xyanqeb’ li Obispo Gérald Caussé, li Obispo Dean M. Davies, ut eb’ aj k’anjel.
Ninxaqli cheru, jo’ jun xk’utb’al xyaalal li raatin li Qaawa’ li tz’iib’anb’ileb’ sa’ xb’een xtasal li Tzol’leb’ ut Sumwank: “… lix tz’aqalil lin evangelio … taajultikaaq xb’aaneb’ li q’uneb’ xmetz’ew ut li moko nim ta xna’leb’eb’ toj sa’ xmaril li ruchich’och’, ut chiruheb’ li rey ut eb’ laj taqlanel.”1 Xb’eenil chiru li aatin a’in neke’k’utun li raatin li Qaawa’ li naxk’utb’esi lix rahom li Yuwa’b’ej choq’ reheb’ li ralal xk’ajol: “Jo’kan ut, laa’in li Qaawa’, xb’aan naq kinnaw li nimla rahilal li taachalq sa’ xb’eeneb’ li wankeb’ sa’ li ruchich’och’, kinb’oq chaq inmoos aj Jose Smith, alalb’ej, ut kiwaatina chalen chaq sa’ choxa, ut kink’a taqlahom re.”2
Li qaChoxahil Yuwa’ ut li Ralal, li Jehovah, rik’in xnawb’al li xtiklajik toj sa’ xraqik,3 ke’xte ru li choxa ut jun li ak’ k’ojlajik re xtuqub’ankil ru li nimla rahilal li kixnaw naq taachalq. Li Apostol Pablo kixch’olob’ li ch’a’ajkilal chalel jo’ “li kutankil xuwajel.”4 Choq’ we laa’in, a’in naxye naq li osob’tesink li nokoxq’ajqamu li qaChoxahil Yuwa’ sa’ xnumsinkil qayu’am sa’ li kutankil xuwajel, a’an xnumsinkil qayu’am sa’ xtz’aqalil ru li kutan.
Naq xinraho’ rik’in inmajelal chiru li xamaan a’in, xink’ul jun musiq’anb’il na’leb’ li xinixtij jo’ ajwi’ xk’ojob’ inch’ool: xk’eeb’al ink’a’uxl rik’in li k’a’ru naru tinb’aanu ut ink’a’ rik’in li k’a’ru ink’a’ naru chiwu. Ninru chixch’olob’ankil xyaalal li xyaalalil li evangelio, li saqen ru ut loq’.
A’aneb’ a’in li aatin inwotzom k’iila sut rik’ineb’ li ak komoneb’ sa’ li Igleesl ut reheb’ naab’alaeb’ li moko komoneb’ ta: “Li Dios a’an li [qaraarookil] Choxahil Yuwa’b’ej. Laa’o li ralal xk’ajol. … A’an nayaab’ak qik’in naq nokoraho’k ut nasaho’ sa’ xch’ool naq naqab’aanu li us. A’an naraj qaatinankil, ut naru too’aatinaq rik’in a’an rik’in li tijok. …
“Li qaChoxahil Yuwa’ naxk’e qe, li ralal xk’ajol, jun b’e … toosutq’iiq wi’ rik’in a’an. … Q’axal xnimal ru sa’ li xk’uub’anb’il na’leb’ li [qaChoxahil] Yuwa’, a’an lix tojb’al rix li maak xb’aan li Jesukristo.”5
Li qaChoxahil Yuwa’ kixtaqla li Ralal sa’ ruchich’och’ re xtojb’al rix xmaakeb’ chixjunil li winq. Chirixeb’ li yaal li saqen ru ut loq’ nink’e xnawom inch’ool, ut ninb’aanu sa’ xk’ab’a’ li Jesukristo, amen.