Il-Missier

Minn Brian K. Ashton

It-Tieni Kunsillier fil-Presidenza Ġenerali tal-Iskola tal-Ħadd

Kull wieħed u waħda minna għandna fina l-potenzjal li nsiru bħall-Missier. Biex nagħmlu dan, jeħtieġ li aħna nqimu lill-Missier f’ isem l-Iben.

Tul ħajjitha kollha, marti Melinda ppruvat b’ qalbha kollha tkun dixxiplu fidil ta’ Ġesù Kristu. Madankollu, minn meta kienet għadha żagħżugħa, hija ħassitha li ma kenitx denja biżżejjed tal-imħabba u l-barkiet ta’ Missierna tas-Smewwiet għaliex hija ma kenitx fehmet sew in-natura Tiegħu. Fortunatament, Melinda kompliet iżżomm il-kmandamenti minkejja n-niket li hija kienet qed tħoss. Ftit tas-snin ilu, hija għaddiet minn ċerti esperjenzi li għenuha tifhem aħjar in-natura ta’ Alla, inkluż l-imħabba Tiegħu għal uliedu u l-gratitudni Tiegħu għall-isforzi mhux dejjem perfetti tagħna li nwettqu l-ħidma Tiegħu.

Hija tispjega kif dan influwenza ħajjitha: “Illum jiena nħossni ċerta li l-pjan tal-Missier jaħdem verament, li Hu investa personalment fis-suċċess tagħha u li Huwa jipprovdilna l-lezzjonijiet u l-esperjenzi li aħna neħtieġu biex nerġgħu lura fil-preżenza Tiegħu. Jiena bdejt aktar inħares lejja nnifsi u lejn ħaddieħor bil-mod li jħares lejna Alla. Jiena sirt kapaċi nieħu ħsieb uliedi, ngħallem u nservi b’ imħabba akbar u b’ anqas biża’. Jiena nħoss fija l-paċi u l-kunfidenza minflok l-anzjetà u l-inċertezza. Minflok ma nħoss li qed inkun iġġudikata, inħoss li qed inkun sostnuta. Il-fidi tiegħi hija aktar ċerta. Jien inħoss l-imħabba ta’ Missieri b’ mod aktar regolari u b’ aktar profond.”¹

Li jkollna “idea korretta tal-karattru, tal-perfezzjoni u tal-kwalitajiet ta’ Missierna tas-Smewwiet” hija ħaġa mill-aktar essenzjali biex aħna nkunu nistgħu neżerċitaw fidi biżżejjed biex niksbu l-eżaltazzjoni.² Għarfien korrett tal-karattru ta’ Missierna tas-Smewwiet jista’ jibdel il-mod kif aħna nħarsu lejna nfusna u lejn ħaddieħor u jgħinna nifhmu l-imħabba tremenda ta’ Alla għal uliedu u x-xewqa kbira Tiegħu li jgħinna nsiru bħalu. Perspettiva inkorretta tan-natura Tiegħu tista’ twassalna biex inħossuna bħallikieku aħna qatt mhu se nkunu kapaċi nerġgħu fil-preżenza Tiegħu.

L-għan tiegħi illum hu li ngħallem il-punti duttrinali ewlenin dwar il-Missier li jagħti ċans lil kull wieħed u waħda minna, iżda speċjalment lil dawk li jiddubitaw jekk Alla verament iħobbhom, biex nifhmu aħjar il-karattru veru Tiegħu u biex neżerċitaw fidi akbar fih, f’ Ibnu, u fil-pjan Tiegħu għalina.

Il-Ħajja Primortali

Fid-dinja primortali, aħna twelidna bħala spirti lil Ġenituri tas-Smewwiet u hemm għexna magħhom bħala familja.³ Huma kienu jafuna, kienu jgħallmuna u kienu jħobbuna.⁴ Aħna verament ridna nkunu bħal Missierna tas-Smewwiet. Madankollu, biex dan iseħħ, għarafna lkoll li kien jeħtieġ li aħna:

Niksbu ġisem fiżiku gglorifikat u immortali;⁵
Niżżewġu u niffurmaw familji permezz tal-qawwa tas-siġill tas-saċerdozju;⁶ u
Niksbu l-għarfien kollu u l-qawwa u l-kwalitajiet divini kollha.⁷

Konsegwentament, il-Missier ħoloq pjan li permezz tiegħu kien se jagħtina ċ-ċans, jekk aħna nsegwu ċerti kundizzjonijiet,⁸ li niksbu ġisem fiżiku li jista’ jsir immortali u gglorifikat permezz tar-Resurrezzjoni; niżżewġu u niffurmaw familji fil-mortalità jew, għal dawk il-fidili li ma kellhomx din l-opportunità, wara l-mortalità;⁹ nimxu ‘l quddiem lejn il-perfezzjoni; u ultimament nerġgħu lura għand il-Ġenituri tagħna tas-Smewwiet u ngħixu magħhom u mal-familji tagħna fi stat ta’ eżaltazzjoni u ferħ etern.¹⁰

Dan l-iskrittura ssejjaħlu l-pjan tas-salvazzjoni.¹¹ Aħna tant konna grati għal dan il-pjan li meta ġie ppreżentat lilna, aħna għajjatna bil-ferħ.¹² Ilkoll kemm aħna aċċettajna l-kundizzjonijiet tal-pjan, inkluż l-esperjenzi u l-isfidi tal-mortalità li għandhom jgħinuna niżviluppaw ċerti kwalitajiet divini.¹³

Il-Ħajja Mortali

Tul il-mortalità, Missierna tas-Smewwiet jipprovdilna l-kundizzjonijiet li aħna neħtieġu biex inkunu nistgħu nimxu ‘l quddiem fil-pjan Tiegħu. Il-Missier nissel lil Ġesù Kristu fil-ġisem¹⁴ u pprovdielu l-għajnuna divina li kien jeħtieġ biex iwettaq il-missjoni mortali Tiegħu. Bl-istess mod, Missierna tas-Smewwiet jgħin lil kull wieħed u waħda minna jekk aħna nagħmlu l-almu tagħna li nżommu l-Kmandamenti Tiegħu.¹⁵ Il-Missier jagħtina l-għażla ħielsa.¹⁶ Ħajjitna tinsab f’ idejh, u “jiemna magħrufin” u “mhux se jkunu anqas milli għandhom ikunu.”¹⁷ U Huwa jiżgura li eventwalment kollox iseħħ għall-aħjar ta’ dawk kollha li jħobbuh.¹⁸

Huwa Missierna tas-Smewwiet li jagħtina l-ħobża ta’ kuljum,¹⁹ li tinkludi kemm l-ikel li aħna nieklu u l-qawwa li aħna neħtieġu biex inżommu l-kmandamenti Tiegħu.²⁰ Il-Missier jagħtina rigali tajbin.²¹ Huwa jisma’ u jwieġeb talbna.²² Missierna tas-Smewwiet jeħlisna mill-ħażen meta aħna nħalluh jagħmel dan.²³ Huwa jibki għalina meta aħna nsofru.²⁴ Ultimament, il-barkiet kollha tagħna jaslu għandna mingħand il-Missier.²⁵

Missierna tas-Smewwiet jiggwidana u jagħtina l-esperjenzi li aħna neħtieġu bbażati fuq il-ħiliet, id-dgħjufijiet u l-għażliet tagħna ħalli aħna nkunu nistgħu nipproduċu frott tajjeb.²⁶ Il-Missier jikkoreġina meta jkun hemm bżonn għaliex Huwa jħobbna.²⁷ Huwa “Bniedem ta’ Kunsill,”²⁸ li jikkunsilja magħna jekk aħna nduru lejh u nitolbuh.²⁹

Huwa Missierna tas-Smewwiet li jibgħat f’ ħajjitna kemm l-influwenza kif ukoll id-don tal-Ispirtu s-Santu.³⁰ Permezz tad-don tal-Ispirtu s-Santu, il-glorja—jew l-intelliġenza, id-dawl u l-qawwa—tal-Missier tista’ tgħammar fina.³¹ Jekk aħna nagħmlu l-almu tagħna biex nikbru fid-dawl u l-verità sakemm ħarsitna tibqa’ ffissata biss fuq il-glorja ta’ Alla, Missierna tas-Smewwiet jibgħat l-Ispirtu s-Santu tal-Wegħda biex jissiġillana mal-ħajja eterna u jiżvela wiċċu quddiemna—jew f’ din il-ħajja jew inkella f’li jmiss.³²

Il-Ħajja Postmortali

Fid-dinja postmortali tal-ispirti, Missierna tas-Smewwiet ikompli jixħet fuqna l-Ispirtu s-Santu u jibgħat lill-missjunarji għand dawk li jeħtieġu l-evanġelju. Huwa jisma’ t-talb u jgħin lil dawk li jkunu għadhom ma rċevuwhomx biex jirċievu l-ordinanzi tas-salvazzjoni minn xi ħadd ieħor f’ isimhom.³³

Il-Missier qajjem lil Ġesù Kristu mill-imwiet u tah il-qawwa biex iġib fis-seħħ ir-Resurrezzjoni,³⁴ li hija l-mezz kif aħna nistgħu niksbu ġisem immortali. Il-Fidwa u l-Qawmien mill-Imwiet tas-Salvatur iwassluna lura fil-preżenza tal-Missier,fejn aħna lkoll niġu ġġudikati minn Ġesù Kristu.³⁵

Dawk li jafdaw fuq “il-merti, u l-ħniena u l-grazzja tal-Messija Mqaddes”³⁶ jirċievu ġisem igglorifikat bħal tal-Missier³⁷ u jgħammru Miegħu “fi stat ta’ ferħ bla tmiem.”³⁸ Hemmhekk, il-Missier jixxotta d-dmugħ kollu tagħna³⁹ u jgħinna nkomplu bil-vjaġġ tagħna biex insiru bħalu.

Kif qed taraw, Missierna tas-Smewwiet jinsab dejjem hemm għalina.⁴⁰

Il-Karattru tal-Missier

Biex insiru bħall-Missier, aħna jeħtieġ niżviluppaw ċerti karatteristiċi li jinsabu fil-karattru Tiegħu. Il-perfezzjoni u l-kwalitajiet ta’ Missierna tas-Smewwiet jinkludu dan li ġej:

Il-Missier huwa “Bla tmiem u Etern.”⁴¹
Huwa perfettament ġust, ħanin, kollu sabar u jrid biss dak li hu l-aħjar għalina.⁴²
Missierna tas-Smewwiet huwa mħabba.⁴³
Huwa jżomm il-patti Tiegħu.⁴⁴
Huwa ma jinbidilx.⁴⁵
Huwa ma jistax jigdeb.⁴⁶
Il-Missier ma jħares lejn wiċċ ħadd.⁴⁷
Huwa jaf kollox—il-passat, il-preżent, u l-futur—mill-bidu taż-żminijiet.⁴⁸
Missierna tas-Smewwiet huwa aktar intelliġenti⁴⁹ minna lkoll.⁵⁰
Il-Missier għandu l-qawwa kollha⁵¹ u jwettaq dak kollu li jkun jixtieq iwettaq.⁵²

Ħuti, aħna nistgħu nafdaw fil-Missier u niddependu minnu. Peress li Huwa għandu perspettiva eterna, Missierna tas-Smewwiet jista’ jara ħwejjeġ li aħna ma narawhomx. Il-ferħ, il-ħidma u l-glorja Tiegħu se jġibu fis-seħħ l-immortalità u l-eżaltazzjoni tagħna.⁵³ Dak kollu li Huwa jagħmel huwa għall-benefiċċju tagħna. Huwa “jixtieq il-ferħ etern tagħna saħansitra aktar milli nixtiquh aħna stess.”⁵⁴ U Huwa “mhux se jippermettilna li nesperjenzaw mument wieħed ta’ diffikultà iżjed milli hu assolutament meħtieġ għall-benefiċċju tagħna u ta’ dawk li aħna nħobbu.”⁵⁵ B’ riżultat ta’ dan, Huwa jiffoka fuq li jgħinna nimxu ‘l quddiem, mhux li jiġġudikana u jikkundannana.⁵⁶

Insiru bħal Missierna

Bħala wlied spirtu ta’ Alla, kull wieħed u waħda minna għandna fina l-potenzjal li nsiru bħall-Missier. Biex nagħmlu dan, jeħtieġ li aħna nqimu lill-Missier f’ isem l-Iben.⁵⁷ Aħna nagħmlu dan billi nagħmlu l-almu tagħna li nagħmlu r-rieda tal-Missier, kif għamel is-Salvatur,⁵⁸ u billi nindmu kontinwament.⁵⁹ Hekk kif aħna nagħmlu dan kollu, aħna “nirċievu grazzja fuq grazzja” sakemm aħna nirċievu l-milja tal-Missier⁶⁰ u niġu mogħnija bil- “karattru, bil-perfezzjoni u l-kwalitajiet tiegħu.”⁶¹

Meta nikkunsidraw id-distanza li hemm bejna n-nies mortali u dak li Missierna tas-Smewwiet diġà sar, ma tkunx sorpriża li xi wħud iħossu li mhijiex sostenibbli li huma jsiru bħall-Missier. Madankollu, l-iskrittura hija ċara. Jekk aħna nintrabtu bil-fidi ma’ Kristu, nindmu u nfittxu l-grazzja ta’ Alla permezz tal-ubbidjenza, eventwalment aħna nsiru bħall-Missier. Jiena nħossni nitfarraġ bil-fatt li dawk li jagħmlu l-almu tagħhom biex ikunu ubbidjenti sejrin “jirċievu grazzja wara grazzja” u ultimament “jirċievu l-milja sħiħa tiegħu.”⁶² Fi kliem ieħor, ma nistgħux insiru bħall-Missier weħidna.⁶³ Pjuttost, dan iseħħ permezz ta’ rigali ta’ grazzja, li xi ftit minnhom huma kbar iżda l-parti kbira huma żgħar, rigali li dejjem jibqgħu jakkumulaw sakemm aħna niksbu l-milja sħiħa. Iżda, ħuti, dan kollu għad iseħħ!

Jiena nistedinkom biex temmnu li Missierna tas-Smewwiet jaf kif għandu jeżaltakom; fittxu kuljum l-għajnuna Tiegħu li ssostnikom; u ibqgħu mexjin ‘il quddiem b’ fidi fi Kristu anke meta ma tkunux tistgħu tħossu l-imħabba ta’ Alla.

Hemm bosta mistoqsijiet dwar kif aħna nsiru bħall-Missier li għadna ma nistgħux nifhmu.⁶⁴ Iżda jiena nista’ nixhed b’ ċertezza li kull sagrifiċċju li aħna nagħmlu biex insiru bħall-Missier huwa kollu vallapena.⁶⁵ Is-sagrifiċċji li aħna nagħmlu fil-mortalità, kbar kemm huma kbar, huma sempliċiment inkomparabbli mal-ferħ, mal-hena u mal-imħabba enormi li aħna se nħossu fil-preżenza ta’ Alla.⁶⁶ Jekk intom qed issibuha diffiċli biex temmnu li s-sagrifiċċji li qed tagħmlu huma verament vallapena, is-Salvatur qed ikellimkom u jgħidilkom, “Intom għadkom ma fhimtux kemm huma kbar il-barkiet li l-Missier … ħejja għalikom; … bħalissa ma tistgħux tifhmu kollox; madankollu, agħmlu l-qalb, għaliex jiena se nkun qed immexxikom.”⁶⁷

Jiena nixhed li Missierna tas-Smewwiet lilkom iħobbkom u lilkom iridkom terġgħu lura biex tgħixu Miegħu. F’ isem Ġesù Kristu, amen.