Christ biBeeo’ool’įįł
Nahasdzáán bikáá’gi t’áá nihi nihe’o’ool’įįł biyi’ yá’át’ééhii baa nihił hózhǫ́ǫ doo dóó hool’áágóó Jesus Christ bina’nitin bits’ą́ą́déé’ o’ool’įįłígíí aniitah doo.
Dooládó’ baa hózhǫ́ǫgo nahasdzáán bikáá’ hiniiná dóó baa dahwiilne’, diné, saad, o’ool’įįł, dóó nákéé’ náháne’ ał’ąą át’éego dabighan—kédaayahgóó kéédaht’į́ dóó dimííł yazhígo ánéélą́ą́go dadeiyíkááh, t’áá át’é o’ool’į́į́ł da’ílíinii dahdeiyólé. Nihokáá’ dine’é lą’ígo yaadahodoonih dóó yaa áłah dooleeł. Ákondi bits’ą́ą́dóó ídahwiil’ą́ą́’—o’ool’įįł bee nihiyaa dahoo’a’ígíí—łahdóó nihidziilgo ánihiił’įįh, áádóó ałdó’, łahda, t’áá doole’é nihich’ą́ą́h siléii yileeh.
O’ool’įįł yéigo nihintsékees dóó bee í’iil’į́ yiidleehígíí biniinaa ch’ééh łahgo íí’nééh łeh. Éí, éii, bee ániit’éhígíí bee nihééh ho’dilzin dóó bee niidlinígíí át’ée łeh. Yéigo da nanihiiłnáá łeh o’ool’įįł diné-yaa ntsézkeezígíí doo bi’tsxe’ígíí doo yiit’į́į da łeh doodaii’ nihe’o’ool’įįł łahgóó doo ákót’éhígíí ałdó’, “nihizází bibee’o’ool’įįł“ nahjį’ kódiilnííł bich’į ni’niidlį́į łeh. Nihe’ó’ool’įįł bee ániit’éhígíí íiyisíí nihił nilínígíí da biniinaa nááná łahdéé’ yá’át’ééhii nahjį’ kwííłįįh—Diyin God da bits’ą́ą́déé’ígíí—ntsá’ákees, yee át’éii, dóó yinahjį’ yee iiná íił’íinii.
Hastiin ba’áhwiinít’į́į łeii’ bééhasingo lą’ída naahai ó’ool’įįł yee doo nízaadgóó ntsékeesígíí yaa hodoolnih. Singaporedi bééhosésįįd nínádízi’go bighan haz’ą́ądi baa náshdááhgo bee shik’ihódíínii’. Sanskrit dóó Tamildéé’ hastiin bił ééhózinii béého’dílzinii nilį́, éí India shádi’ááhdéé’go níyá. Bich’ooní dóó biye’ naakiígíí sodizin da’atah, ákondi bí éí t’áadoo idiiyáa da dóó diyingo na’nitin doo hózhǫ́ yidiizts’ą́ą da. Bich’ooní dóó biye’ké hait’áó nooséłígíí yaa bił hózhǫ́ dóó sodizindi ádeeł’ínígíí dóó bee bik’idahodiinii’ígíí yá yineedlį́.
Diyin bina’nitin bitł’ááh naazléii bich’į’ kwííshłaago dóó nihe’oodlą’ bee bił hooshne’go, ałtsé yik’ijį’ nilį́į́ nt’éé’. Biniinaanígíí hodíína’go índa baa ákoniizį́į́’: idiiyáago bizází, bidine’é, dóó binákéé’ náhane’ yik’ijį’ dooleełgo, yaa ntsékees! Bintsékeesgo, t’áá ałtso nilínígíí yik’ijį’ dooleeł, t’áá ałtso yił háájéé’ ndabineeztą́ą́’ yee nilį́į doo yę́ę, ts’ídá bits’į’ yishtłizhii nilínée. Náás ndadeezidgo, díí baańdahat’ínígíí baa yéilti’. Baa ááh niizį́į́’ (doo éí bik’ee shił hóóyéé’da) hait’áó Jesus Christ bina’nitin naanáłahgi át’áó ntsáhákees yaa ákoniizį́į́’.
O’ool’įįł nihokáá’ dine’é ádayiilaii, yá’át’ééhii dóó doo yá’át’ééhii bii’ hólǫ́, bee anoolzééł dóó bee na’iichxǫǫhii bii’.
Lą’ída nahasdzáán bikáá’ andahazt’i’ éí ał’ąą ntsá’ákees dóó áda’ool’įįł ahídadinidahígíí áda’ool’įįł’déé’ ndahwiileeh. Ákondi t’áá át’é baa saad dahólóonii dóó hadahonoochaad t’áá hooshch’į’ ni’kódoonííł nihokáá’ dine’é íiyisíí o’ool’įįł yę́ę deiyiłtsoodgo, t’áá ániid nihee hólónéé. Díí t’ahdoo nahasdzáán bikáá’ yiikáhę́ędą́ą́’ hólǫ́ǫ́ ńt’ę́ę́’. Adam dóó Enoch bibeeo’ool’įįł ńt’éé’. Éí o’ool’įįł Yisda’iiníiłii na’neeztą’ yę́ędą́ą́’ bee hadilyaa, dóó éí dííjį́į́di sáanii dóó hastóí báhólǫ́ǫgo ninályá. Doo nááná ła’gi’ át’ée da. O’ool’įįł ts’ídá aláahdi ayóó át’é dóó ayóó át’áó ił hózhǫ́ nahat’á bits’ą́ą́déé ályaa, Diyin God áyiilaa dóó Christ yee ásizį́į ńt’éé. Ła’ ídlį́ á’oolííł doo ałts’á iinííł da. Na’áłdziih doo ni’iiłchǫǫh da.
Jesus Christ bina’nitin biniyé iiná yee na’nitin. Nahasdzáán bikáá’ niidzáhígíí yádiłhił bii’ doo t’óó áhoodzaii dóó asdzihii át’ée da! Biniyéii hólǫ́ǫgo niidzá.
O’ool’įįł nihiTaa’ Yá’ąąshdi hólóonii t’áá aaníí hiináago binahjį’ hadilyaa, t’áá aaníí hiiná dóó ła’í niidzínígo ayóó áníhóní. Nihí “binaanish dóó [Bí]yóó át’áii daniidlį́.“ 1 Díí o’ool’įįł ahihoołt’éego bííniighago yaa halne’. Doo ła’ alą́ąjį dóó doo ła’ akéédéé’ dahyikahgo baa ntsá’ákees da. Nihí éí, t’áá áníít’é, ałk’is dóó alahkéii daniidlį́, ii’sizíiniijígo yá’ąąshdi nihimá dóó nihizhe’é hólónígíí daniidlį́—t’áá aníigo. Doo ał’ąą át’éego ahaa ntsída’akees da doodaii’ “nihíkójí dóó nihí éí aají“ ha’níigo doo ntsá’ákees da díí alááhdi o’ool’įįł biyi’di. T’áá ániiltso “nihí kojí“ daniidlį́. T’áá ániiltso “nihí aají“ daniidlį́. T’áá áníít’é ániit’éhígíí nihąąh násdlą́, ahił da’niidl’į́įgo, Sodizin, dóó nihił nahaz’ą́ągo. Ániit’é dóó t’áá nihí ádíná’niil’į́ bee niidzééłgo ílíinii át’é.
Diyingo Ayóó o’ó’ní, Christgi’ át’áó aa’áhwiilyą́, éí díí atł’áahdi tsé yistł’ingo ó’ool’įįł át’é. Nihik’éí íiyisíí yinízinígíí nihił nilį́, ats’íís dóó iisizį́ k’ehgo, dóó nihił nilínígíí bik’eh áda’iil’į́. Díí ak’ijį’ ídlį́ dóó ajoodlá nahjį’ hwííl’į́.
Diyingo a’iilyéego o’ool’įįł baa nihił dahózhǫ́, Diyin God bizaad ałníigi siláago Diyin Yáyałt’í beilyáago (dóó t’áá nihí Ii’sizį́ Diyinii nihił halne’go). T’áá ałtso nihokáá’ dine’é Diyin God binitsékees bił béé dahózin doo.
Bitł’ááh naazléii t’áá hó hontsékees bik’ehgo hiniiná díí o’ool’įįł yee ásizį́. Nihi nitsékees bik’ehgo i’ii’į́ nihe’iłhózhǫ́ noosééłgo íiyisíí nidzin. Hódzą́ągo na’iidlááh éí íiyisíí nidzin.
Éí íhoo’ááaah dóó na’alkaahgo o’ool’įįł át’é. Ééhózin dóó hódzą́ dóó t’áá át’é alááhdi’ígíí hadaniitá.
Oodlą’ dóó Diyin bik’eh hól’į́ o’ool’įįł át’é Jesus Christ éí áłtsé bitł’áá naazléí díí o’ool’įįł bii’ silá, dóó bina’nitin dóó bibeehaz’áanii bik’eh hól’į́ éí bee ła’ nahwiileeh. Díí bee haałt’é á’diil’įįh.
Éí sodizingo o’ool’įįł át’é. Diyin God doo t’óó nihididoots’į́į́ł da ákondi nihíká’adoolwołgo ałdó’ deiniidlą́.
Ałha’deet’aah dóó í’diilzį́į́h, aláahdi yá’át’ééh oodááł, bá asdzį́, aańdiit’ááh dóó ádaana’ookąąh, dóó nihits’íís Diyin God bighangi’ át’éhígíí o’ool’įįł át’é. Díí t’áá át’é Diyin God bá ít’į́įgo yaa halne’.
Diyin God bibe’adziil bee aa’áháyá o’ool’įįł át’é, éí bee óhólnííhgo Diyin God bá neilnish, Diyin God be’adziil bee ba’ałchíní yik’ihojídlí. Diné, naat’áanii, amá, azhe’é ach’ooní hózhǫ́ yá’át’ééhii dadooleełgo neinitin dóó hasht’eyoolííł—hooghan haz’ą́ hodílzingo ádeile’.
T’áá aníigo álílee díí, t’áá át’é biláahdi ałk’idą́ą́’ii o’ool’įįł biyi’ hólǫ́, Jesus Christ woodlą́, Diyin God bibe’adziil, sodizin, bee náásadi’dááh, t’áá aníigo akéé’iidzįįh, dóó aańdiit’aah bii’ silá.
Diyin bána’nitin o’ool’įįł át’é. Ii’sizį́ ílínígíí ayóó át’é.
Christ bi’o’ool’įįł biyi’, sáanii hool’áágóó t’áá ákót’éego bá haz’ą́ąjį nehekááh. Hastiin Diyin bibe’adziil dayooléelii yił naalnish, nahasdzáán bikáágóó áda’ool’įįł t’óó ahayóí ákóhoot’é, ákondi t’áá át’é dóó aheełt’éego kwe’é dóó ahool’áágóó ahił naa’aashii danilį́.
Díí o’ool’įįł hooghan haz’ą́ yáhodízin bá lą́go ályaa. Hooghan haz’ą́ hool’áágóó bee hadahwiis’á át’é. Hooghan haz’ą́ hałt’é álnééhgo bá asdzíigo bííghah, díí bee na’neestą́ą́’, “doo ła’ beehodínóónééł da hooghan haz’ą́ yichǫǫhgo.“ 2 Hooghan haz’ą́ą́ góne’ ts’ídá naanish yá’át’ééhii ádoolnííł dóó ts’ídá aláahdi ił hózhǫ́ ndidiilyééł.
Christ bi’o’ool’įįł biyi’, bíká adéést’į́į́’ii hólǫ́—dóó hool’áágóó bíká áhát’į́ dóó ahóót’i’ hólǫ́. Díí o’ool’įįł ńzaagóó ílį́ ádaat’ée yaa ntsídaakees. Jesus Christ bina’nitindéé’ yit’ih, éí ahool’á dóó ha’át’íí biniyé, ha’át’íí, dóó háádi honiidlǫ́ yaa halne’. (Ahą’ánihoolííł, doo éí nahjį’ ahiinííł da.) Díí o’ool’įįł Yisdá’iinííłii bina’nitin bee ła’ nahwiileehígíí biniinaa, bee nizhónígo ná’iidziih éí nihi nihokáá’ dine’é íiyisíí daniizin.
Dooládó’ ak’ihojidlíi át’ée da díí kót’áó ayóó át’é dóó ts’ídá hódahdi ntsá’ákeesgo iiná! Díí aniitah dooleełgo, ó’ool’įįł ts’ídá alááh át’ée doogo, łahgo ándoolníiłgo át’é. Diyin yáyádaałti’ii yee nda’neeztą́ą́’ t’áá ałtsóní ałk’idą́ą́’ nihe’o’ool’įįł Christ be’o’ool’įįł doo bił ahédíneelnánígíí bíne’ naaznilgo ádaałééh. Ákondi doo t’áá ałtsóní bíne naaznilgo ádoolnííł da. Diyin yá yádaałti’í ałdó’ ádaaní hágo nihi’di’ní, ła’í noozínígo dóó t’áá ánóht’é, nihe’oodlą’ dóó bee niidlíinii dóó nihi’ééhózin deinííjááh doo—t’áá át’é bee ya’át’ééhgo hiniinánígíí dóó siidzį́įgo nihe’ó’ool’įįł—dadiijih dóó bine’ sodizin “yighą́ą́h adi’tsééh“ diyin bina’nitin bee. 3
Jesus Christ Bisodizin Dííjį́į́dí Yá Naazíinii doo Americají doodaii’ E’e’aahjí dahooldah ó’ool’įįł át’ée da. T’áá ałtsogo sodizin át’é, t’áá ákót’ée doo hodooniid yę́ęgi’ át’áo. Bilááhgo éí diyingo át’é. Adahwiis’áádéé’ idahidiikáhígíí da’ílíinii, da’niłts’ą́ą́déé dine’é da’ílíinii, dóó ił honeenih nihighan haz’ą́ noosééłiijį’ ndeiyijááh. Dííjį́įdi Yá Naazíinii t’ahdii deiyíkaidéé’ dóó diné yaadahaniihii yá ahínéikah dóó yádahodísin, ákondi k’ad éí ałdó’ ayóó át’ée yee da’atah. Christ be’ó’ool’įįł íiyisíí nilínígíí bee ádinííl’į́, dóó hool’áágóó’ígíí bii’ díníít’į́į́go, dóó diyingo yiidááłgo, bee nihidziilgo ił hózhǫ́ binahat’á ła’ diilnííł.
Áko shik’is shą’ éí haidzaa? Áko, bee na’nitinígíí bee na’bi’dineestą́ą́’ dóó Sodizin yidiiyá. Bighan haz’ą́ Sydney Australia Diyin Bighan Ntsaa’ídi yił hoolzhiizh dóó ahool’áágóó ahił naaldeeh doogo dabi’diilzį́į́’. Ałts’íísígo nahjį’ kóyiilaa—dóó t’áá ałtsóní néídidooleeł yííghahgo dahdiiyá. Bikéé’ náháne’, bizází yaa haniih, biyiin dóó azhish dóó nda’asdzoh, bich’iiyą’, bikéyah dóó bidine’é yił ahínéekahgo yaa dahaniihgo yaa ákóniizį́į́’. Naagháhí dóó ts’ídá ílį́įgo ó’ool’įįł ts’ídá ayóó át’éí ó’ool’įįł bił ahii’siláago doo nanitł’aa’ígíí yik’í níyá. T’áá aníinii dóó diyin oodááł ałk’idą́ą́ be’iina’dę́ę dóó ániidjigoo’ígíí Ak’éé’ Naazíinii yił náaldeeh hózhǫ́ nizhónígo ąą’ádzaago yaa ákoniizį́į́’ dóó yá’ąąshjí dah’ooldah bee ła’ídlínígíí yíká’eelwod.
Bídeiníighah, aoo’, t’áá ánííltso ts’ídá aláahdi nahasdzáándi áda’ool’įįł baa nihił dahózhǫ́ doo dóó t’ahdii ts’ídá ałk’idą́ą́’ ó’ool’įįł yę́ę t’ah daniidlį́į doo—tsídá áłtséhę́ę, ts’ídá alááhdi’ígíí, hool’áágóó ó’ool’įįł Jesus Christ bits’ą́ą́dóó’ígíí. Dooládo’ ayóó át’áó da’íldee’déé’ígíí bee ła’ niidlínígíí. Jesus Christ bízhi’ binahjį’, amen