Éí bąą T’áá Áłahjį’ Hada’ísídół’į́į́’ índa Sodadołzin
Díijį́, shí ałtso dine’é nihokáá’góó kééhoht’íi sodizin nihíinishkeed.
Shik’is dóó shiláh, Bí bits’íís hólóo damǫ́ǫjį’ t’éi nááhodoolníhgo, Jesus Bí dahóoł’aahí yił hóolne’ “Éí bąą t’áá áłahjį’ hada’ísídół’į́į́’ índa sodadołzin, éí danihidziilgo ádanihi’di’doolníiłgo díí ádahodooníłígíí t’áá ałtso bits’ąą dadoohdzih índa Diné Silį́į’ii bidááhdę́ę́’ deidoohsįįł biniyé.”1
Atah “díí ádahodooníłígíí” Bí Naakigi Nadááh bitsijį’ “anaa’ dahazlį́į’go índa anaa’ dahaleeh ha’níigo baa dahane’go … łahgóó dahodichin doo, [áádóó ach’į’ nidahwii’náa doo,] áádóó ni’ nídahidi’náah doo.”2
Yisdá’iiníiłii Na’nitin dóó Aha’da’deest’áanii yii’ ádííniid, “Dóó t’áá ałtsoní yee’ baa hahóó’á; … haalá dine’é ałtso yee’ ńdadooldzííł.”3
Áá’aaníí, nihí éiyá t’áá ałtsoní baa hahóo’á biyi’ yiikáh. Lą’í diné nee’níjį’ yéédaaldzid, dóó lą’í Diyin God dóó bíYe’, Jesus Christ bijéí yee dayoodlą́ yits’áheeskai.
Áseezį́ bináaltsoos yáá dahálne’ yéego diné da’ahigáh. Aa hwiinit’į́ t’éí saad nayiiláhí biyi’ dabikáá’. Yóó ada’alne’, sodizin dabighan, hodílzii, bii’ dahodílzin, dóó nahagha’ yit’íh yaa dahale’ dayíizti’.
Kéyah bik’ih náałnííh nahasdzáá nidanáal’áajį’ hatáh niłnii’: dine’é dadimíiltso bidadéesna’: dimíiltso ádaasdiid. Ółta’í nda’íiłtááh, sodizin bighangi hodílzin, da’íigeh, nda’nitiní niitłóó’, dóó nááná ła’ iiná bá nidei’ááhę́ę ne’kódáalyaa. Dine’é wólta’ biláah áásáhí ch’íheeskai dóó bąąh ádahasdįįdíi dabíi’oh.
Bééso néididoo’ááł t’óó ahayói bee bich’į’ ándahazti’, ts’ídá aláahgo nihiTaa’ Yá’ąąshdi Hólóonii ba’áłchíní t’áá iidáá’ a’óhdanlíi.
Nihí dine’é t’áá doo at’éhoo bida’diił’á yaa kintah háádiikah, dóó nihí deiltsą́ nidáachǫ’íi doole’é atídeił’į́ yiká ałhíndeikah.
T’áá bił, nihí nihokáá’ dine’é ałtso ahóol’áo ałch’į’ nidahwíił’á.
Nihi áłahjį’ nihaa tsíndiskos ti’dahóohníhíi, nihida’díił’á, béédaałdzid, doodáo ídahosáah. T’áá ła’ínóozíngo eíí Bóhólníihii nihéédahósin dishní, Bí eíí nihi ádooníił dóó nihinéesgai bił bééhózin, dóó Bí eíí ayóó ánho’ní—soozíigi, naaháagi, dóó ahool’áo.
T’áá hiłiijįįh bik’e sodiszingo, Bóhólníihii bíinishki’ bik’ih hózhdoodlíił biyéél nidáaz, diníihii, e’hásááh, dóó doo bił hózhónii. Shił bééhóziníi eíí nááná ła’ Sodizin báHooghan yá naazíi eíí át’áo sodadilzin. Nihijéí, ła’ níidzinóo dóó áá aníit’é, baah danhíne’, dóó Diyin God bich’į’ nihá sodadíilzin.
Shí hóhoot’éedáá’ náhookǫsdoo ha’a’ááhjí Kéyah Dasinil American biyi’ dóó Sodizin báHooghan bikin náaznil, na’nitiní bił áłah ńda’áshleeh, dóó wáashindoon dóó naanish dayiyéełyeed yánaazíi.
Damǫ́ǫgo, Ghąąjį’ 20gi, shí Boston, Massachusetts diné lą’í áłah silíí’. Shí yáshti’go, shidíisna’ii bee ádishní, “Baa nánhooshkąąh … díí kéyah bá sodadółzin, nihánaazíi bá, nihidine’é bá, dóó ahił háájéé’ bá áko díí yikáá’ kééhat’į́níi Diyin God binahjį’.”4
Shí ałdó’ kodííniid America dóó t’óó ahayói kééhat’į́níi nihokáá’, eíí yoołkááłdę́ę́’ gi’at’áo, ayóó ch’į’ninááhwiidoo’náał dóó nihisodizin yídin danilíi doo.5
Bííkeedíí doo íishlaaígíí biyi’ da. Eíidí saad shich’į’ kwólyao Ii’sizį́į yee shidíina’íi diné naháaztąníi kéédahat’íi dóó ánaazíi bá sodadołzin bidishní.
Díijį́, shí ałtso dine’é nihokáá’góó kééhoht’íi sodizin nihíinishkeed. Hait’áo shį́į́ sodadółzin doodáo hai shį́į́ bich’į’ sodółzin, t’áá shǫǫ nihe’oodlą’ shół’į́—ha’í shį́į́ wóohdlą́—dóó kééhoht’íigi bá sodólzin dóó nihá ánaazíi bá. Shí Ghąąjį’ biyi’ Massachusettsdi adííniid, nihí diijį́ nihokáa’gi diné bich’į’ nahwii’ná, dóó nahasdzáá yikáá’ kééhat’íi yee ha’ólní dóó yii’ habidóo’ish yídin danilį́. Díí doo bee’na’ászį́įjí dóó nahat’á al’į́įjí da. Díí hóozyeel dóó diné bigáál eíí hadáałt’é ńdoodleeł baa t’áá bił kédaayahgi—dakinłánígi, dakinnínilgi, dóó dabighansingi bee ndahodóodzih—Hozhǫ́ǫ́jí Yinánt’a’í dóó ałtso na’ádzíih hólóo doo, Bóhólníihii Jesus Christ binahjį’.
Dikwii shį́į́ ńdeezidjį’ baa ákoniizí’ii eíí nihokáá’ k’ad áhooníłii bee biká adíilwołíi yee’ ał’ąą dine’é ałtso Diyin God yíwohgo yada’ólí dóó bijéí t’áá íiyisíi Bí yich’į’ yee sodadílziníi binahjį’. T’áabí jóoba’ áda’dilne’ dóó yá’ąąshgóó ii’sizį́ k’eh iiná yee hada’ólní hadéintá doodáo nihitsigi díidi bee nihich’į’ ndáhwii’nánii hazhó’í dóó t’áá akót’áo bii’ hahidíikah.
Saad dadiyinii Jesus sodóolziníi binahjį’ ch’ét’ą́ t’áá bił Bí hináago sodizin yína’neestą’ą́ą. Nihi Bóhólníihii Bisodizin béédaał’ííh:
“NihiTaa’ yá’ąąshdi honílóonii, nízhi’ diyingo óolzin le’,
“Bee nóhólníihii náásgóó k’ee’ąą yilzhish le’. Áádóó bee íinínízinii t’áá yá’ąąshdi ááníłígi át’éego nahasdzáán bikáa’gi ááníił le’.
“Ch’iyáán t’áá ákwíí jį́ niha’iyíłtsódígíí díí jį́ nihaa náádiní’aah.
“Áádóó t’áá nihich’į’ bąąhági ádaaníiłii bá yóó’adahidiit’aahígi át’éego nich’į’ nida’ayiilzíhígíí nihá yóó’ahidí’aah.
“Áádóó nihí hodínóotahjį’ nihi’óółnííh lágo, nidi bąąhági át’éii bits’ą́ąjį’ yisdánihiyínííł. [Háálá ahóyéel’áágóó ni t’éí nóhólnííh áádóó t’áadoo bee nóodziilí da, índa ayóó ánít’é. T’áá ákót’ée doo.]”6
Díí sodizin ayóó anóolnin nel’į́, aghąąh Christ dayoodlą́ yee háádaadzih, éí bee t’áá iishjání bee bich’į’ ha’ádzíhii t’áá akót’é “NihiTaa’ yá’ąąshdi honílóonii” bee nihí da’díił’áhii nihił náhane’. Díí bąą, nihí diyiníi nihwóolóos doo biká sodíilzin.
Táá shǫǫdí áłahjį’ sodadołzin.7 Nihighandóó bá sodadołzin. Ał’ą́ą dine’é yá naazíinii bá sodadółzin. Bá sodíizin diné hada’ólnínii alą́ą́’jį’ naazíigo yich’áah nidáabaah hooghan, kéyah, áłah ne’ádleeh, dóó ats’íís yaa nidóot’įįłii ndáałniihígíí eíí diné nihokáá’góó yich’į’ ndahwíiłná: at’į́į dóó te’e’į́, nooséł dóó są́ nilíi.
Yisda’iiníiłii yee nanhineeztą’ii háiida sodizin bąąh woh’įní ní. Bí adííniid, “Nihi’ana’í ayóó’ádeínóh’ní, [danihódziihígíí hózhǫ́ǫgo bá hadahohdziih, nihik’ee dadiniihígíí nizhónígi bich’į’ ádanoht’é, áádóó t’áá bita’ígi ádanihił’íinii] áádóó atídanihił’íinii bá sodadołzin.”8
Calvary dah hidíiltį́įgi, ákwe’é Jesus nihibąąhí yá daaztsą́, Bí ye’íilaa Bí yee na’nítin konóo Bí sodóolzingo, “ShiTaa’, díí yaa naakaígíí t’áadoo bik’ijį’ síníł’ání, háálá doo bił béédahózingóó ádaat’į́.”9
Yéego nihe’ana’í bá sodadíilzin akó Diyin God diné dóó dine’é yijéí łahgo anéiidoodlííłgo yiníidlą́. Ts’ídá kot’áo sodíilzingo ha’íshį́į́ doo yádaat’éhę́ę hasht’éé dadíilnííł nihíne’, nihíghangi, dóó bił kééhwiit’íigi.
Háadi shį́į́ nihighan, ha’í shį́į́ saad bee yáłti’, doodáo nihich’į’ anáhóołti’, Diyin God nidíits’a’ dóó nił náhalne’ íinizinii yik’ehgo dóó k’ad niizíi’di. Ba’áłchíní niidlínii biniinaa, Bí haníitáo bich’į’ hwíidzao nihiká adóolwoł, bee háadiilyįh, dóó nihokáá’ dine’é biníidlį́įgo biká ahíilyeed doo.
Biká sodółzin hazhó’ó bił na’ánish, bił hoozyéél, te’e’į́ nilį́į, dóó kanaagháii yíwohgo yinízin łeh. Niní ntsidíigoh bik’ijį’ sodíilzin bii’, ne’dóó nidii’náh dóó ha’íi biiníighahíi bee aká adíilwoł—t’áa áłah t’áanihí dóó náaná ła’ bee biká adíilwołíi.10
Saad dadiyiníi t’óó ahayói dine’é be’oodlą’ yee áda’íilaa bii’ éí sodizin bee ádaat’į́įgi ałhí dayiizóhgo t’áabí dóó náaná ła’ be’íina’ łahgo ádayiilaa. Mormon biNáaltsoos bii’, yee át’įniigi, baa da’íilta’ Enos. Éí binahjį’ ééhóziníi eíí “táá’ bíighahdi daats’í naaltsoos ałts’ísíi ła’ sodizin yaa halne’, doodáo sodizin dihwíi shį́įgo, dóó bee bił hwóone’ doo háa yit’įįdíi ałkéé’ baa hane’.”11
Nihí Sodizin bá Hooghan bii’ hait’áo sohodizin t’óó ahayói bee éédahózingo bee hasht’e’ yilwół, Joseph Smith ałtsé sodizin tsíyi’di yee haadzíi’ doo bizáanii bighan doo t’áa ahangóó 1820 shį́įgo. Ádaana’óokąąh hat’į́įgo dóó diyin k’ehjí honíti’, Joseph bisodizin yá’ąąsh ąą’ áyiilaa. Díijį́, nihí Joseph, Diyin yá Yáłti’í binahjį’ ndáhidíilyáh dóó náaná ła’ hastói dóó sáanii dayoodlą’ sodadóolziníi dóó Jesus Christ Bisodizin bá Hooghan Dííjį́įdi Da’oodlą aká íijée’go háalwod.
Shí áłahjį’ baa tsídískos sáanii da’oodlą́ągo sodadilziníi ła’ Mary Fielding Smith éí, Diyin God biká éelwodgo, ha’ólníigo ba’áłchíní da’jóołah Illinois yii’ ałhíhiikáahgo díí ch’íhonízhoodjį’ t’áadoo at’éhoo niná ákwe’é ba’áłchíní ii’sizį́ k’eh iiná dóó bits’íis yee yik’ídahałta’. Nitsidinígo’ yéego sodóolzin bik’ijį’, áadoo bee bich’į’ ándahazti’íi t’áá awołíbee yináalnish dóó yee ba’áchíní yik’íjisdlí’.
Sodizin bee bíniil’ą́ diidlééł dóó bee ałhíidiikah ła’ siizíidoo, niha’áchínídoo, Sodizin bá Hooghandóó, dóó nihokáa’ bitahdoo. Sodizin bee nda’áłkaahíi yidiyóołnááł dóó yiká adóolwołgo bił ąą’i’dóotsih dóó azéé’ ázaat’ááh yik’ídookahgo eíí díí náałniih nidóotih. Sodizin bee bił dahasíh doo diné ayóó adayó’níi bąąh ádaasdiidíí. Éí t’áanihí bee ha’ádiilzídii nihił béehódoozíił.
Shik’is dóó shiláh, shí t’áashǫǫ sodizin ándáoł’įįh bee ádeehadáahdzíihgo ádáał’į́. Shí t’áashǫǫ nihi’éé’ dah sinil góne’ sodadólzin, wohhááłgóó t’áá akwiijį́, sodizin bii’ ałhíndáokah, dóó, áłahjį’ nihijéí bii’ hóló.12
Jesus Christ biSodizin bá Hooghan Dííjį́įdi Da’oodlą́ yá naazį́ bá, shí nihá sodadółziníi biká ahéhee’ nihidíshní. Shí t’áashǫǫ áłahjį’ sodólzin dishní áko nihił íishją́ ádoolníił dóó Sodizin báHooghan yee náas yilwół díidí nidáhóta’ biyi’.
Sodizin nihe’íina’ łahgo íidoolííł. T’áá aaníí sodizin bee hididóo’nááł, ts’ííd diidlééh dóó ła’ akot’é bee ádadíilnííł.
Sodizin bidzíilíi bee shí bii’ hadiiyáhii bee shił bééhózin. Ánii shí naanishgi t’áá sáhigo. Shí doo lą́’í yiskándáá’ shíla’ azee’ál’į́įdi shá naashgizh. Eí łizhin dóó dóotł’izh ńt’ę́ę́’, neezhcháád, dóó éí diníih ńt’ę́ę́’. Bik’ih náasjnísh bich’į’ dah nedáo, ch’ééh da’ílį́nii dóó ła dadóolníłii baa ntséskees dóó ayóó neezgaihígíí biniinaa.
Ntsidinígo’ doo sodéeszin dóó Bóhólníihii bee shiká adíilwołgo naanísh ładadooníłii bííkeed. Yíizi’ dóó biká’ naashníshgi naaltsoos yanáa’áhee bidéshnish. K’asdáá’ t’áá hooshch’į́, shíne’ k’esgod dóó ładáashłe’, dóó ándahazht’i’ę́ę ładéshłaa shitsígóó tsinílę́ę.
Nihokáá’ dine’é akwǫǫ bił dahalą́ągo bąą k’eh hadóoh da nihí baa nitsíikeesgo t’óó ahayói bee ándahazt’i’ dóó ádadóolniił hóló. Ndi éí baa ákonsingo eíí hasht’eh dooníił nísin jó nihí sodíilzin dóó Azhé’é Diyiníi yee nihik’ízhdoodlííł dóó yíí’ hanhídoo’ish bíí níikeedgo, hait’áo niha’áłchíní, nihinaagóó dabighaníi, kin daníjaa’góó, kéyah bił há hwiisdzóhgóó bik’íhojidlíih nihił béé dahódóozįįł.
Yisdá’iiníiłii sodóolzin dóó Bí áádóó “yá’át’éehii yaa naaghá”13 bich’į’ ándahazti’ yi’íísą́, te’e’į́níi ha’íínílní dóó bee hasht’e’ oodáał, dóó be’ayóó ’ó’ó’ní yee, yaa jóozba’, yinázchid; dóó baa hakáhíi ałtso háá doolyįh yich’į’ kóyiilaa. Bí t’ahdíi nihich’į’ dah dóolníh.
Wóshdę́ę́’ Sodizin bighan ałtso bidóohkaii, nihinaagóó dabighan dóó nihik’is nihokáá’góó haaji shį́į́ da’iinóhdláníi, Yisdá’iiníiłíi Bí dahóoł’aahí íiłnín gi’ádadii’nííł: “Éí bąą t’áá áłahjį’ hada’ísídół’į́į́’ índa sodadołzin”14 ił hodíiyił biká, índiichił biká, áhoo’aah biká, dóó náaná ła’ biká adíilwoł hadiníit’įį’.
Sodizin ayóó át’áo bidzííl dóó nihisodizin ayóó áyo’níi yiniidláago bich’į’ sodíilziníi díijį́ nihokáá’ biyi’ yéego bídenhóyéé’! Nihi benéilniih dóó baa ahééh níizin sodizin bidzíil. Jesus Christ bízhi’ bináhjį’, áamen.