Bèrdat Puru, Doktrina Puru, i Revelashon Puru
Por fabor hasi e konferensia aki un tempu pa deleitá riba e mensahenan di Señor pa medio di Su sierbonan.
Mi kerido rumannan, bon biní na konferensia general! Esta un goso pa ta huntu ku boso! Boso tabata den mi mente kasi konstant.emente durante e delaster seis lunanan. Mi a hasi orashon tokante di boso i pa boso. Durante simannan resiente mi a hasi orashon intensivo pa e konferensia aki por ta un tempu di revelasshon i reflekshon pa tur esnan ku ta buska bendishon.
Nos ta enkantá di por ta papia ku boso for di e Sentro di Konferensia un biaha mas. Mayoria di e stulnan ta keda bashí, pero e presensia di algun miembro di e Koro di Tabernakulo ta un paso maravioso pa dilanti. Nos ta yama boso bonbiní nan e konferensia pa gran parti virtual, na unda ku boso ta.
Ainda nos ta atendiendo ku e desaster di COVID-19 i su variantenan. Nos ta gradisí boso pa sigui e konseho i guia di e ekspertonan médiko i ofisialnan di gobièrnu den boso komunidatnan.
Nos ta yama kada konferensia general manera dirigí pa Señor.1 E formato a varia durante e añanan. Tempu mi tabata hopi mas hóben, konferensia tabata dura tres òf kuater dia. Despues, el a wòrdu redusí na dos dia. Kada mensahe—e tempu ei i awor—-ta e resultado di orashon sinsero i hopi preparashon spiritual.
E Outoridatnan General i Ofisialnan General di Iglesia ku papia lo enfoká nan mensahenan riba nos Salbador, JesuCristu, Su miserikòrdia, i Su poder redentor infinito. Nunka tabatin un tempu den historia di mundu kaminda e konosementu di e Salbador ta mas personalmente vital i relevante pa kada alma humano. Imaginá kon lihé e konfliktonan devastador rònt mundu—-i esnan ku ta lanta den nos bidanan individual—lo wòrdu resolvé si nos tur skohé pa sigui JesuCristu i pone atenshon na Su enseñansanan.
Den e spiritu ei, mi ta invitá boso pa skucha pa tres kos durante e konferensia aki, e bèrdat puru, e doktrina puru di Cristu, i e revelashon puru. Kontrali na e dudanan di algun, di bèrdat tin kosnan manera bon i malu. Di bèrdat tin bèrdatnan apsoluto—bèrdat eterno. Un di e plaganan di nos tempu ta ku muchu poko hende sa unda pa buska e bèrdat.2 Mi por sigurá boso ku loke boso ta bai skucha awe i mañan ta konstituí bèrdatnan puru.
E doktrina puru di Cristu ta poderoso. E ta kambia e bida di tur esnan ku komprond’é i ta buska pa implement’é den nan bida. E doktrina di Cristu ta yuda nos enkontrá i keda den e kaminda di kombenio. Kedando riba e kaminda smal ei pero bon definí finalmente lo kalifiká nos pa risibí tur loke ku Dios tin.3 Nada lo por ta bal mas ku tur loke ku nos Tata tin!
Finalmente, revelashon puru pa e preguntanan di nos kurason lo hasi e konferensia aki gratifikante i inolvidabel. Si ainda bo no a buska pa e ministrashon di e Spiritu Santu pa yuda bo skucha loke Señor tin p’abo skucha durante e dos dianan aki, mi ta invitá bo pa hasi esaki awor. Por fabor hasi e konferensia aki un tempu pa deleitá riba e mensahenan di Señor pa medio di Su sierbonan. Siña kon pa apliká nan den boso bida.
Esaki ta E Iglesia di JesuCristu di e Santunan di e Delaster Dianan. Nos ta Su pueblo di kombenio. Señor a deklará ku E lo aselerá Su obra den su tempu aki,4 i E ta hasiendo esaki ku pasonan kresiente. Nos ta priviligia di partisipá den Su obra santu.
Mi ta invoká un bendishon na tur ku ta buskando mas lus, konosimentu, i bèrdat. Mi ta ekspresá mi amor pa boso, den e sagrado nòmber di JesuCristu, amèn.