Milagernan di e Evangelio di JesuCristu
Mi sá ku Su evangelio por trese nos speransa, pas, i goso, no awor só, pero tambe lo bendishoná inkontabel generashonnan den futuro.
Mabuhay! Mi ta trese pa bosnan e amor i e sonrisanan kaluroso di e maravioso Santunan di Filipinas. E aña aki ta hasi sesenta aña ku e promé mishoneronan a yega na e islanan di Filipinas. Awe tin bintitres mishon i mas ku ochoshen mil miembro di Iglesia na shenbinti tres estaka. Tin awor shete tèmpel, den operashon, den konstrukshon of anunsiá. Esaki ta berdaderamente un milager. Nos ta tèestigu di e kumplimentu di e profesia den 2 Nefi 10:21: ku ta bisa ku e promesanan di Señor ta grandi na esnan ku riba e islanan di laman.
E milager aki tambe ta un kumplimentu di e profesia ku a wòrdu duná den un orashon pa na e tempu ei Elder Gordon B. Hinckley na Manila na aña 1961. Den e orashon ei, Elder Hinckley a deklará: “Nos ta invoká Bo bendishonnan riba e hendenan di e tera aki, pa nan por ta amigabel i hospitabel i bodadoso ku esnan ku lo bini akinan, i ku hopi, si, Señor, nos ta hasi orashon pa ku lo tin hopi, hopi milnan ku lo risibí e mensahe aki i lo wordu bendishoná p’e. Lo Bo bendishoá nan ku mentenan reseptivo i kurasonnan pa komprondé, i ku fe pa risibí, i ku kurashi pa biba e prisipionan di evangelio” (orashon dedikatorio na American War Memorial Cemetery, Filipinas, Apr. 28, 1961).
Mas ayá di e hopi, hopi míles di fielnan Santunan di Delaster Dianan, e milager di evangelio a trese kambionan positivo na e pais i su hendenan. Mi ta un testigu bibu di esaki. Mi tabatin seis aña ora mi mayornan a bira miembro di Iglesia na e isla parti sur di Mindanao. Na e momentu ei, tabatin solamente un mishon den henter e pais i niun estakanan. Mi ta eternamente gradisí pa e kurashi di mi mayornan, nan forsa, i diligensia pa sigui e Salbador. Mi ta honra nan i tur e pioneronan di Iglesia na Filipinas. Nan a drecha e kaminda pa e generashonan futuro por wòrdu bendishoná.
Rei Benjamin den e Buki di Mormon a bisa: “I ademas, mi ta deseá ku boso lo por kontemplá, riba e estado bendishoná i felis di esnan ku ta mantené e mandamentunan di Dios. Pasobra at’ki, nan ta wòrdu bendishoná den tur kos, tantu temporal komo spiritual” (Mosia 2:41).
Ora nos ta biba i obedesé e prinsipionan i ordenansanan di e evangelio, nos ta bendishoná, kambiá, i kombertí pa bira mas manera JesuCristo. Asina tabata kon e evangelio a kambia i a bendishoná e Santunan di Filipinas, inkluso mi famia. E evangelio ta berdaderamente e kaminda pa un bida felis i abundante.
E promé prinsipio di e evangelio ta fe den e Señor JesuCristu. Hopi filipino tin un kreensia natural den Dios. Ta fásil pa nos pa kere den JesuKCristo i sá ku nos por risibí kontesta na nos orashonan.
E famia Obedoza ta un ehempèl grandi di esaki. Ruman Obedoza tabata mi presidente di rama dia mi tabata un hòmber hóben. E deseo mas grandi di rumannan Obedoza tabata pa wòrdu seyá na nan famia na e tèmpel di Manila. Nan tabata biba na e siudat di General Santos, 1.000 mias (1.600 km) leu for di Manila. Pa un famia di nuebe, hasi e biahe pa e tèmpel tabata parse imposibel. Pero manera e komersiante ku a bai i a bende tur lo kual ku e tabatin pa kumpra un perla di gran balor (wak Mateo13:45–46), e pareha aki a disidí di bende nan kas pa paga pa e biahe. Hermana Obedoza tabata preokupá pasobra nan lo no tin un hogar pa nan bai bèk na dje. Pero ruman Obedoza a sigur’é ku Señor lo proveé.
Nan a wordu seyá komo famia pa tempu i pa tur eternidat den e tèmpel na 1985. Den e tempel nan a haña un goso inkomparabel—nan perla di gran balor. I fiel na e palabranan di ruman Obedoza, Señor a proveé. Na nan regreso di Manila, konosinan amabel a duna nan lugánan pa keda, i despues a atkerí nan propio kas. Señor ta kuida esnan ku ta demostrá nan fe den DjE.
E di dos prinsipio di evangelio ta arepentimentu. Arepentimentu ta alehá for di piká i bai bèk na Dios pa pordon. E ta un kambio di mente i kurason. Manera Presidente Russell M. Nelson ta siña, ta trata di “hasi i ta un tiki mihó kada dia” (“We Can Do Better and Be BetterLiahonaMei 2019, 67).
Arepentimentu ta hopi manera habon. Komo un ingeniero kímiko hóben, mi a traha den un fabrika di habon na Filipinas. Mi a siña kon pa hasi habon i e proseso di kon e ta traha. Ora bo mesklá zeta ku un alkalino i añadí agentenan antibakterial, e ta krea un sustansia poderoso ku por eliminá bakteria i virusnan. Manera habon, arepentimentu ta un proseso di limpiesa. E ta permití nos e oportunidat pa desechá nos impuresanan i nos restunan bieu, asina nos por ta digno di ta ku Dios, ya ku nada impuru lo por heredá e reino di [Dios]” (wak Alma 11:37.
Pa medio di arepentimentu, nos ta akudí na e poder purifikador i santifikador di JesuCristo. E ta un parti klave di e proseso di kombershon. Esaki ta lokual a pasa ku e Anti-Nefi-Lehitanan den e Buki di Mormon. Nan tabata Lamanitanan ku tabata asina kompletamente kombertí ku nunka nan no a bolbe apartá (wak Alma 23:6–8). Nan a dera nan armanan di guera i nunka nan a tumanan atrobe. Nan a preferá di muri ku kibra e kombenio ei. I nan a prueba esaki. Nos sá ku nan sakrifisio a trese milagernan; míles ku a lucha kontra di nan a benta nan armanan abou i a wordu kombertí. Añanan despues nan yunan hòmber, kual nos konosé komo e poderoso hóbennan guerero, a wòrdu protehá den e bataya kontra atversidatnan inkreibel!
Mi famia i hopi Santunan filipino a pasa dor di un proseso similar di kombershon. Ora nos aseptá e evangelio di JesuCristu i uni na Iglesia, nos ta kambia nos manera i nos kultura pa aliniá ku e evangelio. Nos mester a laga tradishonnan robes atras. Mi a mira esaki den mi tata ora el a siña di e evangelio i a arepentí. E tabata un humadó pisá, pero el a benta su sigarianan afó i nunka a mishi ku un atrobe. Pa motibu di su desishon pa kambia, kuater generashon despues di dje a wòrdu bendishoná.
Arepentimentu ta dirigí nos na hasi i warda kombenionan pa medio di ordenansanan sagrado. E prome ordenansa di salbashon i eksaltashon ta boutismo pa inmershon pa e remishon di pikánan. Boutismo ta pèrmití nos pa risibí e don di e Spiritu Santu i nos ta nos ta drenta un kombenio ku Señor. Nos por renobá e kombenio boutismal aki tur siman ora nos tuma e Santa Sena. Esaki tambe ta un milager!
Rumannan, mi ta invitá boso pa trese e milager aki den boso bida. Bini na JesuCristu i skohe pa ehersé bo fe den Dje, arepentí, i hasi i warda e kombenionan haña den e ordenansanan di salbashon i eksaltashon. Esaki lo permití bo ta uní ku Cristu i risibí e poder i bendishonnan di piedat (wak Doctrina y Convenios 84:20).
Mi ta tèstifiká di e realidat di jesuCristu i ku E ta bibu i ta stima kada un di nos. Mi sá ku Su evangelio por trese nos speransa, pas, i goso, no awor só, pero tambe lo bendishoná inkontabel generashonnan den futuro. Esei ta e motibu di e bunita i kaluroso sonrisa di e Santunan filipino. Esei ta e milager di e evangelio i e doktrina di Cristu. Mi ta tèstifiká esaki den e nòmber sagrado di JesuCristu, amèn.