Un Kas di Òrden Sekuensial.

Pa Elder Vaiangina Sikahema

Di e Setenta

“òrden sekuensial” ta un manera simpèl, natural, i ekfektivo pa Señor siña nos, komo Su yunan, prinsipionan importante.

Den mi bida profeshnal i den mi servisio den Iglesia, mi a hasi esaki miles di biaha—pero nunka dilanti 15 hòmber sintá nèt mi tras. Mi ta sinti boso orashon in esun di nan.

Rumannan, mi ta un nativo di e Reino di Tonga den e Pasífiko Sur pero mi a krese na Nòrt Amerika. E pandemia a stroba mas ku shen, portá miles di hóbennan mishonero di Tonga sirbiendo rònt mundu pa regresá na nan pais natal stimá pa motibu di e fronteranan será. Algun mishonero di Tonga a keda den nan mishon pa tres aña i e hermananan pa mas ku dos aña! Nan ta warda ku pasenshi ku e fe pa kual nos hendenan ta konosí. Miéntrastantu, no sea muchu alarmá si algun di esnan ku ta sirbi na boso barionan i estakanan ta parse masha hopi manera ami— hende di edat i ku kabei blanku. Nos ta gradisí pa e mishoneronan tur kaminda pa nan servisio deboto, asta ora e tempu a bira mas largu of mas kòrtiku di lokual ku nan a antisipá debí na e pandemia.

Un djadumingu tempumi tabata diákono, mi tabata na entrada ku e skalchi di awa partiendo e Santa Sena ora un muhé a drenta den e edifisio. Fiel na mi deber, mi a bai i a aserk’é e skalchi. El a sakudí su kabes, a hari, i a tuma un kùp di awa. El a yega hopi lat pa risibí e pan. Poko despues di e eksperiensia aki, mi maestro orientador, Ned Brimley a siña mi ku hopi aspektonan i bendishonnan di e evangelio di JesuCristu ta wòrdu duná na nos den un òrden sekuensial.

Mas lat e siman ei, Ned i su kolega a bini na nos kas ku un lès memorabèl. Ned a kòrda nos ku tabata tin un òrdu kon Dios a krea e mundu. Señor tabatin hopi kuidou den splika Moises e òrdu den kual El a krea e mundu Promé, El a kuminsá separando e lus for di skuridat, despues awa for di e tera seku. El a agregá matanan i bestianan promé ku presentá na e planeta resien formá Su mas grandioso kreashon: humanidat, kuminsando ku Adam i Eva.

“I Dios a krea hende segun Su mes imágen; segun e imágen di Dios El a krea hende; hòmber i muhé El a krea nan. …

I Dios a mira tur loke El a traha, i ata, tur kos tabata masha bon”(Genesis 1:27, 31).

Señor tabata komplasí. I El a sosegá riba e di shete dia.

E orden sekuensial den kual e mundu a wòrdu kreá ta duna nos un bista chikí no solamente kiko ta mas importante pa Dios, pero tambe dikon i pa ken El a kreá e mundu.

Ned Brimley a aksentuá su lès inspirá ku un simpèl deklarashon: “Vai, e kas di Dios ta un kas di òrdu. E ta spera di bo pa bo biba bo bida ku òrdu. Den un sekuensia apropiá. E kier pa bo sirbi un mishon promé ku bo kasa.“ Te na e punto aki, e lidernan di Iglesia ta siña aktualmente ku ”Señor ta spera ku kada hòmber hóben kapas prepará su mes pa sirbi. … Mujeres Jóvenes … ku ta deseá pa sirbi tambe tin ku prepará” (General Handbook: Serving in The Church of Jesus Christ of Latter-day Saints, 24.0, ChurchofJesusChrist.org). Ruman Brimley a sigui: “Dios kier pa bo kasa promé ku bo tin yu. I E kier pa bo desaroyá bo talentonan kontiunamente segun bo haña edukashon.” Si bo skohé pa biba bo bida for di sekuensia, lo bo haña bida mas disfísil i kaótiko.

Ruman Brimley tambe a siña nos ku pa medio di Su sakrifisio ekspiatorio, E Salbador ta yuda nos restorá e òrdu na nos bida kaótiko òf for di sekuensia pa motibo di desishonnan pobèr di nos òf di otronan.

For di e momentu ei, mi tin un fasinashon ku “òrden sekuensial.” Mi a desaroyá un kostumber di buska un patronchi sekuensial den bida i den e evangelio.

Elder David A. Bednar a siña e prinsipio aki: “Ora nos studia, siña, i biba e evangelio di JesuCristu, sekuensia hopi biaha ta instruktivo. Konsiderá, por ehèmpel, e lèsnan ku nos a siña tokante e prioridatnan spiritual di e òrden di e eventonan prinsipal ku a sosodé ora e plenitut di evangelio di E Salbador a wordu restourá den e delaster dianan aki.”

Elder Bednar a menshoná ku e Promé Vishon i e promé aparishon di Moroni na José Smith a siña e hóben profeta promé, e naturalesa i karakter di Dios, siguí pa e papel ku e Buki di Mormon i Elias lo hunga na reuní Israel na tur dos banda di e velo den e delaster dispensashon aki.

Elder Bednar a konkluí: “E sekuensia inspirá ta instruktivo tokante e asuntunan spiritu di máksimo prioridat pa e Deidat” (“The Hearts of the Children Shall Turn,” Liahona, Nov. 2011, 24).

Un opsevashon ku mi a hasi ta ku “òrden sekuensial” ta un manera simpèl, natural, i ekfektivo pa Señor siña nos, komo Su yunan, prinsipionan importante.

Nos a bini na mundu pa siña i gana ekserensia ku di otro manera nos lo no haña. Nos kresementu ta úniko pa kada un di nos individualmente i un parti vital na e plan di nos Tata Selestial. Nos kresementu físiko i spiritual ta kuminsá na etapanan i ta wòrdu desaroyá poko poko segun nos haña experensia di un manera sekuensial.

Alma a duna un sermon poderoso di fe—pensando riba e analogia di un simía, kual, si wòrdu nutrí i kuidá apropiadamente, ta germiná di un palu yòng den un palu kompletamente grandi i madurá ku ta produsí fruta sabroso (wak Alma 32:28–43). E lès tá ku bo fe lo oumentá segun bo duna lugá pa nutri e simía —òf e palabra di Dios—den bo kurason. Bo fe lo oumentá segun e palabra di Dios e lo kuminsá “hincha den boso pechu” (versíkulo 28). Ku e ta “hincha, i spùit, i ta kuminsá krese” (versíkulo 30) ta tur tantu visual komo instruktivo. E tá sekuensial tambe.

Señor ta siña nos individualmente segun nos kapasidat pa siña i kon nos ta siña. Nos kresementu ta depené di nos boluntat, kuriosidat natural, nivel di fe i komprendementu.

Nefi a wòrdu siñá lo kual ku José Smith lo a siña na Kirtland, Ohio, mas ku [dosmil treshen] 2,300 aña despues: “Pasó Ata’ki, asina Señor Dios ta bisa: Lo mi na e yunan di hende liñia riba liñia, presepto riba presepto, aki un tiki i aya un tiki,;; i bendishoná ta esnan ku skucha mi preseptonan, i duna oido na mi konseho, pasó nan lo siña sabiduria.”(2 Nefi 28:30).

Lo kual ku nos ta siña “liña riba liña, pesepto riba presepto, un tiki aki i un tiki aya” atrobe ta sekuensial.

Konsiderá e siguiente deklarashonan ku nos a yega di tende e gran parti di nos bida: “Promé kos promé” òf “Alimentánan ku lechi promé ku karni.” Kon ta ku “Nos tin ku kana promé ku nos kore”? Kada un di e aksomanan aki ta splika algu ku ta sekuensial.

Milagernan ta operá di akuerdo ku un òrden sekuensial. Milagernan ta sosodé ora nos ta ehersé fe promé. Fe ta presedé e milager.

Hombres Jovenes tambe ta ordená komo ofisialnan di Saserdosio Aaróniko den sekuensia, di akuerdo ku e edat di esun ku ta wòrdu ordená: diákono, maestro, i despues presbítero.

E ordenansa di salbashon i eksaltashon ta sekuensial di naturalesa. Nos ta wòrdu boutisá promé ku nos risibí e don di e Spiritu Santu. E ordenansanan di tempel ta similarmentesekuensial. Klaro, manera mi amigu Ned Brimley ku sabiduría a siña mi, e sakramento ta sekuensial—e ta kuminsá ku e pan, siguí pa e awa.

“I miéntras ku nan tabata kome, Jesus a kohe pan, i despues di a bendishon’é, El a kibr’é i a duna Su disípulonan i a bisa: Tuma, kome; esaki ta Mi kurpa.

“I despues ku El a kohe un kopa i a duna gradisimentu, El a duna nan esei, bisando: Boso tur bebe for di djé;

”Pasobra esaki ta Mi sanger di e tèstamènt nobo [aliansa], ku ta wòrdu dramá pa hopi pa pordon di pikánan” (Mateo 26:26–28).

Na Yerusalèm i na Merka, e Salbador a instituí e sakramento na eksaktamente e mesun òrdu.

“Ata’ki, mi kas ta un kas di ordu,Señor Dios ta bisa, i no un ks di konfushon” (Doctrina y Convenios 132:8).

Arepentimentu ta sekuensial. E ta kuminsá ku fe den JesuCristu, asta si ta djis un pida. Fe ta rekerí humildat, kual ta un parti esensial di tin un “kurason kibrá i un spiritu kontrito” (2 Nefi 2:7).

Enbèrdat, e promé kuater prinsipionan di evangelio ta sekuensial. “Nos ta kere ku e promé prinsipionan i ordenansanan di e Evangelio ta: promé, Fe den e Señor JesuCristu; di dos, Arepentimentu; di tres, Boutismo dor di inmershon pa e remishon di pikánan; di kuater, Imposishon di man pa [komuniká] e don di e Spiritu Santu” (Artikulonan di Fe 1:4).

Rei Benjamin a siña su pueblo e bèrdat importante aki: “I wak pa tur e kosnan aki wòrdu hasí ku sabiduría i òrdu; pasobra no ta nesesario pa un persona kore mas lihé ku e tin forsa pa hasi. I atrobe, ta nesesario pa e ta diligente, pa asina e por gana e prèis; p’esei, tur kos mester wòrdu hasí ku òrdu.(Mosía 4:27).

Ku nos por biba nos bida ku òrdu i buska pa sigui e sekuensia ku Señor a determiná pa nos. Nos lo wordu bendishoná ora nos buska pa sigui e patronchinan i e sekuensia kual Señor ta siña kiko ta mas importante p’É. Den e nòmber sagrado di JesuCristu, amèn.