E Fe pa Pidi i Despues pa Aktua
Fe den JesuCristu ta e yabi pa revelashon si bèrdat
Mi kerido rumannan, mi ta gradisí pa e oportunidat pa papia ku boso riba e djasabra anochi den e seshon di e konferensia general aki. Den su introdukshon den e konferensia awe mainta, Presidente Russell M. Nelson a bisa ku “revelashon puru pa e preguntanan den boso kurason lo hasi e konferensia aki benefisioso i inolvidabel.” Si ainda bo no a buska pa e ministerio di e Spiritu Santu pa yuda bo skucha loke Señor tin p’abo skucha durante e dos dianan aki, mi ta invitá bo pa hasi esaki awor.”1 Mi a buska e bendishon ei ora mi a prepará pa risibí revelashon pa e bishita aki ku boso. Mi orashon sinsero ta ku boso por risibí e revelashon di Dios.
E manera di risibí revelashon di Dios no a kambia for di dianan di Adam i Eva. E ta e mesun kos pa tur sierbo yamá pa Señor for di prinsipio te na e dia djawe. E ta mesun kos pa bo, ku pa mi. Semper e ta sosodé dor di ehersementu di fe.2
E tiner José Smith tabatin sufisiente fe pa hasi un puntra Dios, keriendo ku Dios lo kontestá su deseo profundo. E kontesta ku a bin a kambia e mundu E ker a sa na kua iglesia e mester uni pa wòrdu limpiá di piká. E kontesta ku el a risibí a enkurash’é pa sigui hasi preguntanan mas mihó ainda i pa aktua riba e fluho kontinuo di revelashon ku a kaba di kuminsá.3
Bo eksperensia por ta similar den e konferensia aki. Bo tin preguntanan riba kual bo ta buska kontesta Bo tin por lo ménos sufisiente fe pa spera ku lo bo risibí kontesta di Señor pa medio di Su sierbonan.4 Lo bo no tin e posibilidat di puntra na bos altu pa kontestanan di e diskursantenan, pero bo por puntra bo Tata amoroso den orashon.
Mi sa dor di eksperensia ku kontestanan lo bin pa ahustá na bo nesesidatnan i bo preparashon spiritual. Si bo mester di un kontesta ku ta importante pa bo bienestar eterno òf esun di otronan, e kontesta hopi probabel lo bin. Tòg asta e ora ei, bo por risibí—manera a pasa ku José Smith—e kontesta pa tin pasenshi.5
Si bo fe den JesuCristu a kondusí bo na un kurason suavisá dor di e efektonan di Su Ekspiashon, lo bo ta mas kapas pa sinti e susuro di e Spiritu den kontesta riba bo orashonnan. Mi eksperensia personal ta ku e bos ketu—ku ta real— pasibel ta kla i disernibel den mi mente ora mi sinti un interno ketu isumishon na e boluntat di Señor. E sentimentu di humildat ei por wòrdu mihó deskribí komo “no mi boluntat, pero Bo boluntat wòrdu hasí.”6
E proseso aki di revelashon ta dikon lo bo tende diskursantenan siña den e konferensia aki loke ta wòrdu yamá e doktrina di Cristu.7 Revelashon ta bin na nos den proporshon di e grado den kual nos a buska pa tuma e doktrina di Cristu den nos kurasonnan i implement’é den nos bidanan.
Bo ta kòrda den e Buki di Mormon ku Nefi a siña nos ku fe den JesuCristu ta e yabi pa risibí revelashon di berdat i e yabi pa tin e konfiansa ku nos ta siguiendo e direkshon di e Salbador. Nefi a skirbi e sigiuiente palabranan aki siglonan promé ku e nasementu di JesuCristu den mortalidat.
“Angelnan ta papia dor di e poder di e Spiritu Santu; p’esei, nan ta papia e palabranan di Cristu.” P’esei, mi ta bisa boso, deleitá riba e palabra di Cristu; pasobra ata’ki e palabra di Cristu lo bisa boso tur loke boso tin ku hasi.
“P’esei, awor ku mi a papia e palabranan aki, si bo no por komprondé nan lo ta pasó bo no ta puntra, tampoko bo no ta bati; p’esei, bo no ta wòrdu hibá dilanti e lus, pero mester muri den skuridat.
“Pasó, ata’ki, atrobe mi ta bisa boso ku si boso drenta den e kaminda, i risibí e Spiritu Santu, e lo mustra boso tur loke boso tin ku hasi.
“Ata’ki, esaki ta e doktrina di Cristu, i lo lo no bai tin mas doktrina duná te ora e lo manifestá Su mes na boso den karni. I ora E manifestá Su mes na boso den karni, e kosnan ku E lo bisa boso lo boso tin ku kumpli ku nan.”8
Señor lo bisa kosnan pa medio di Su sierbonan na abo i na ami awendia i den e dianan ku ta bin. E lo bisa nos kiko ta e kosnan ku nos tin ku hasi.9 E Salbador lo no grita mandamentunan na abo ku mi. Manera El a siña na Elias:
“I El a bisa, Sali i bai, i para riba e seru dilanti Señor. I, ata’ki, Señor a pasa bai, i un bientu grandi i fuerte a sakudí e serunan, i a kibra e barankanan na pida pida dilanti di Señor ; pero Señor no tabata den e bientu; i despues di e bientu un teremoto; pero Señor no tabata den e teremoto.
“I despues di e teremoto un kandela; pero Señor no tabata den e kandela; i despues di e kandela un bos ketu i apasibel.”10
Skuchando e bos ei lo bin di nos fe den DjE. Ku sufisiente fe, nos lo puntra direkshon ku e intenshon pa bai i hasi loke sea E pidi.11 Nos lo a desaroyá e fe pa sa ku loke sea E pidi lo bendishoná otronan, i ku nos por wòrdu purifiká den e proseso dor di Su amor pa nos.
Miéntras nos fe den JesuCristu lo a kondusí nos pa puntra e Tata pa kontesta, e fe ei tambe lo a trese e Salbador Su mishimentu suave sufisiente pa nos pa tende Su direkshon i ta determiná i eksitá pa obedesé. Nos lo kanta e ora ei e palabranan di e himno ku goso, asta ora e trabou ta duru:“Dulce Tu obra es, Señor”12
Mas nos tin e doktrina di Cristu den nos bida i kurason, mas nos ta sinti amor mas grandi i simpatia pa esnan ku nunka no tabatin e bendishnonnan di fe den JesuCristu òf ku ta luchando pa manten’é. Ta difisil pa warda Señor Su mandamentunan sin fe i konfiansa den DjE. Ora algun pèrdè nan fe den e Salbador, nan por asta ataká Su konseho, yamando [loke ta] bon malu.13 Pa evitá e fayo trágiko aki, e ta krusial ku revelashon personal ku nos risibí ta den hamonia ku e e nseñansanan di Señor i Su profetanan.
Rumannan, e ta rekerí fe pa ta obediente na Señor Su mandamentunan. E ta rekerí fe den JesuCristu pa sirbi otro pa E. E ta rekerí fe pa sali pa siña Su evangelio i ofresé esaki na hendenan ku kisas no ta sinti e bos di e Spiritu òf por nenga e ralidat di e mensahe. Pero ora nos ehersé nos fe den Cristu—i pèrmití nos sigui Su profeta bibu—fe lo krese rònt mundu. Dor di teknologia, kisas mas di Dios Su yunan lo skucha i rekonosé e palabra di Dios e wikènt aki ku durante kualke otro dos dia den historia.
Ku e fe kresiente ku esaki ta Señor Su Iglesia.i reino na mundu, mas miembro ta paga diesmo i ta hasi donashon pa asistí esnan den nesesidat, asta ora e miembronan ei nan mes ta enfrentando pruebanan. Ku fe ku nan ta yamá pa JesuCristu, misioneronan rònt mundu a haña maneranan pa subi riba e desafionan kreá pa e pandemia, hasiendo esaki ku kurashi i bon ánimo. I den nan esfuerso èkstra, nan fe a krese bira mas fuerte.
Oposishon i pruebanan pa hopi tempu tabata un kama pa planta simia pa e kresementu di fe. Esei semper tabata bèrdat, spesialmente for di prinsipio di e Restourashon i e fundashon di Señor Su Iglesia.14
Loke Presidente George Q. Cannon a bisa hopi tempu pasá ta bèrdat awe i lo ta [asina] te ora e Salbador bin pa personalmente dirigí Su Iglesia i Su hendenan: “Obediensia na e Evangelio ta trese [hendenan] den relashon hopi serka i íntimo ku e Señor. E ta establesé un konekshon entre hende na mundu i nos Gran Kreador den shelu. E ta trese na e mente humano un sentimentu di konfiansa perfekto den e Todopoderoso i den Su disponibilidat pa skucha i kontestá e súplikanan di esnan ku ta konfia den DjE. Den tempu di prueba i difikultat e konfiansa aki ta inpagabel. Problema por bin riba e individuo òf riba e hendenan, desaster por menasá i speransa humano por ta parse di ta basha abou, tòg, kaminda hendenan a probechá nan mes di e privilegionan ku obediensia na e Evangelio ta trese, nan tin un bon lugá di para; nan pianan ta riba un baranka ku no por move.”15
Ta mi testimonio ku e baranka riba kual nos ta para ta nos testimonio ku Jesus ta e Cristu; ku esaki ta Su Iglesia ku E ta dirigì personalmente, i ku Presidente Russell M. Nelson ta Su profeta bibu awendia.
Presidente Nelson ta buska i risibí direkshon di Señor: E ta un ehèmpel pa mi di buska e direkshon ei ku e determinashon di siguiesaki. E mesun determinashon pa ta obediente na Señor Su direkshon ta den su kurasonnan di tur esnan ku a papia òf lo papia, hasi orashon, òf kanta den e konferensia general aki di Su Iglesia.
Mi ta roga ku esnan rònt mundu ku ta mira òf skucha e konferensia aki lo tin e sentimentu di Señor Su amor pa nan. Tata Selestial a kontstá mi orashon ku mi por sinti por lo ménos un parti chikí di e Salbador Su amor pa boso i Su amor pa Su Tata Selestial,Kende ta nos Tata Selestial.
Mi ta testifiká ku Jesus ta biba. E ta nos Salbador i nos Redentor. Esaki ta Su Iglesia. E ta na kabes. E, i Su Tata Selestial, a aparesé den persona na osé Smith den un arboleda na Nueva York. E evangelio di JesuCristu i Su saserdosio a wòrdu restourá dor di mensaheronan selestial.16 Dor di poder di e Spiritu Santu, mi sa ku e ta bèrdat.
Mi ta hasi orashonpa boso por tin e mesun testimonio. Mi ta hasi orashon ku boso lo puntra Tata Selestial pa e fe den JesuCristu boso mester hasi i warda e kombenionan ku lo pèrmití e Spiritu Santu pa ta boso kompañero permanente. Mi ta laga boso ku mi amor i mi testimonio sigur den e nòmber sagrado di JesuCristu, amèn.