Trata Salú Mental
Permitimi kompartí algun opserbashon ku mi a hasi ora ku nos famia a pasa dor di pruebanan.
Ounke nos famia a disfrutá di bendishonan riku miéntras nos tabata kanando ku goso riba e kaminda smal di kombenio, nos tambe a enfrentá serunan sumamente haltu. Mi ta deseá di kompartí algun eksperiensia hopi personal tokante malesa mental. Esakinan ta inkluí depreshon kliniko, ansiedat severo, desòrdu bipolar, ADHD- i algun biaha un kombinashon di nan tur. Mi ta kompartí e eksperiensianan tiernu aki ku e aprobashon di esnan envolví.
Durante mi ministerio, mi a haña un sentenar di personanan i famianan ku eksperiensianan paresido. Tin biaha mi ta puntra mi mes si e malesa desolá ku ta kubrí e tera manera ta wòrdu menshoná den e eskrituranan lo por a inkluí malesanan mental.1 E ta mundial, ta kubri tur e kontinentenan i kulturanan, i ta afektá tur—hoben, e grandinan, hende riku, i hende pobèr. Miembronan di Iglesia no a wòrdu ekskluí.
Den e mesun rosea, nos doktrina ta siñanos lucha pa bira manera JesuCrist u wòrdu perfekshoná den Dje. Nos yunan ta kanta,“Mi ta purba di tá manera Hesus.”2 Nos ta anhelá pa ta perfekto manera nos Tata Selestia i JesuCristu ta perfekto.3 Pasobra malesanan mental por stroba nos persepshon di perfekshon, ku frekuensia e ta keda un tabú. Komo resultado, tin demasiado ignoransia, demasiado sufrimentu den silensio, i demasiado desesperashon. Hopi, sintiendo nan mes hundí pasobra nan no ta kumplí ku e normanan persibí, ta kere kibokádamente ku nan no tin lugá den Iglesia.
Pa kombatí un desepshon asina, ta importante pa kòrda ku “e Salbador ta stima kada un di e yunan di Su Tata. E ta komprondé kompletamente e doló i lucha ku hopi ta eksperensiá ora nan biba ku un amplio rango di desafionan di salú mental. El a sufrí ‘Dolónan i aflikshonan i tentashonan di tur tipo; … [tumando] riba DjE e dolónan i malesanan di Su pueblo’Alma 7:11; enfasis añad: wak tambe íHebreonan 4:15-16, 2 Nefi 9:21). Pasó E ta komprondé tur aflikshon, E sa kon ‘pa sana esnan ku kurason kibrá’(Lukas 4:18; wak tambe saias 49:13–16). ”4 Desafionan hopi biaha ta indiká un nesesidat di hèrmèntnan i sosten adishonal i no ta un defekto di karakter.
Permitimi kompartí algun opserbashon ku mi a hasi ora ku nos famia a pasa dor di pruebanan.
Promé, hopi hende lo yora ku nos; nan no lo husga nos. Debí na atakenan di pániko severo, ansiedat, i depreshon, nos yu hòmber a regresá kas for di su mishon despues di kuatèr siman só. Komo mayornan, nos a haña difisil pa deal ku desepshon i tristesa pasobra nos a hasi hopi orashon pa su éksito. Manera tur mayornan, nos kier pa nos yunan progresá i ta felis. Un mishon lo tabata unmarka importante pa nos yu hòmbèr. Nos tambe a pensa kiko otro hende lo pensa.
Sin ku nos sá, e regreso di nos yu hòmber tabata infinitamente mas doloroso p’e. Tuma nota ku e tabata stima Señor i ku e tabata kier a sirbi, i tòg e no tabata por pa motibunan ku e tabata lucha pa komprondé. El a haña su mes na un punto di total desesperansa, luchando ku un kulpa profundu. E no tabata sinti su mes aseptá mas sino spiritualmente dof. El a wòrdu konsumí pa pensamentunan repetitivo di morto.
Turesten e tabata den e estado irrashonal aki, nos yu hòmber a kere ku e úniko akshon ku a sobra tabata pa tuma su mes bida. A tuma e Spiritu Santu i un multitut di angelnan na tur dos banda di e velo pa salb’é.
Turesten ku e tabata bringa pa su bida i durante e tempu inmensamente difisil aki, nos famia, lidernan di e bario, miembronan, i amigunan a hasi tur posibel pa apoyá i ministrá nos.
Nunka mi no a sinti asina un dramamentu di amor. Nunka mi no a sinti ku mas poder i di un manera asina personal kiko ta nifiká pa konsolá esnan ku mester di konsuelo. Nos famia semper lo ta agradesí pa e dramamentu ei.
Mi no por splika e inkontabèl milagernan ku a kompañá e eventonan aki. Afortunadamente, nos yu hòmber a sobrebibí, pero a tuma un tempu largu i hopi atenshon médiko, terapeutiko, i spiritual pa e por kura i pa aseptá ku e ta stimá, balorá i nesesitá.
Mi ta rekonosé ku no tur insidentenan asina ki ta kaba manera esun di nos. Mi ta sinti pena ku esnan ku a pèrdè sernan kerí demasiado lihé i awor nan ta keda ku sentimentunan di doló i preguntanan sin kontesta.
Mi siguiente opservashon ta ku e por bira difisil pa mayornan pa identifiká e luchanan di nan yunan, pero nos mester eduká nos mes. Kon nos por sa e diferensia entre e difikultatnan asosiá ku un desaroyo normal i signonan di malesa? Komo mayornan, nos tin e deber sagrado di yuda nos yunan nabegá e desafionan di bida; sinembargo, tiki di nos ta espesialistanan den salú mental. Nos sinembargo, tin mester di kuida nos yunan dor di yudanan siña di ta kontentu ku nan esfuersonan sinsero turesten nan ta esforsá pa kumpli ku e ekspektativanan adekuá. Kada un di nos sa di nos propio defisiensianan personal ku kresementu spiritual ta un proseso kontinuo.
Awor nos ta kompronde ku “No ta eksistí un remedi pa bienestar emoshonal i mental. Nos lo eksperesiá estrès i konfushon pasobra nos ta biba den un mundu kaí ku un kurpa kaí. Adishonalmente, hopi faktor kontribuyente por hiba na un diagnòstiko di malesa mental. No opstante di nos bienestar mental i emoshonal,enfoká riba kresementu ta mas saluda tabèl ku opseshoná riba nos defisiensianan.”5
Pa mi kasá i ami, e kos ku semper a yuda nos ta di keda mas serka na Señor ku ta posibel. Mirando atras, awor nos ta wak kon Señor ku pasenshi a instruí nos durante tempunan di hopi insiertitut. Su lus a guia nos stap pa stap dor di e oranan mas skur. Señor a yuda nos pa wak ku e balor di un alma individual ta hopi mas importante den e schema eterno ku kualke tarea of logro terenal.
Atrobe, edukando nos mes riba malesanan mental ta prepará nos pa yuda nos mes i otronan ku por ta luchando. Diskushon honesto i habri unu ku otro lo yuda e topiko importante aki pa haña e atenshon ku e meresé. Na final, informashon ta bin promé ku inspirashon i revelashon. E frekuentemente invisibèl desafionan por afektá kualke hende, i ora nos ta enfrentá nan, nan parse insuperabèl.
Un di e promé kosnan ku nos tin ku siña ta ku nos siertamente no ta nos só. Mi ta invitá boso pa studia e tópíko di salú mental den e sekshon Yudansa pa bida di e aplikashon di e Biblioteka di Evangelio. Enseñansa lo kondusí na mas komprendementu, mas aseptashon, mas kompashon, mas amor. E por redusí desgrasia miéntras e ta yuda nos desaroyá i manehá e ekspektativanan di salú i e interakshonan di salú.
Mi obserbashon final: nos mester di keda pendiente di otro konstantemente. Nos mester stima otro i hasi ménos huisio—espeshalmente ora nos ekspektativanan no ta di wòrdu kumplí mesora. Nos mester yuda nos yunan i hóben sinti e amor di JesuCristu den nan bida, asta ora ta difisil pa nan personalmente sinti amor pa nan mes. Elder Orson F. Whitney, ku a sirbi komo miembro di e Quorum di e Diesdos Apòstelnan, a duna konseho na mayornan di kon pa yuda e yunan ku ta luchando: “Hasi orashon pa bo … yunan: tene na nan ku bo fe.”6
Hopi biaha mi a puntra mi mes kiko kemen tene na nan ku fe. Mi ta kere e ta inkluí aktonan simpel di amor, humildat, bondat, i rèspèt. Ta nifiká permitií an pa desaroyá na nan mes ritmo i kompartí testimonio pa yuda nan sinti e amor di nos Salbador. E ta rekerí di nos pa pensa mas riba nan i menos riba nos mes of otronan. Esaki usualmente ta nifiká di papia ménos i skucha hopi, hopi mas. Nos mester stima nan, empodera nan, i elogiá nan frekuentemente den e esfuersonan pa yega na éksito i ta fiel na Dios. I finalmente, nos mester hasi tur kos den nos poder pa keda serka di nan—manera nos ta keda serka di Dios.
Pa tur esnan ku personalmente ta afektá pa malesanan mental, tene duru na boso kombenionan, ounke bo no sinti e amor di Dios na e momentu aki. Hasi lokual ku ta na bo alkanse i despues keda ketu … pa wak e salbashon di Dios, i pa Su brasa wòrdu revelá.”7
Mi ta testifiká ku JesuCristu ta nos Salbador. E konosé nos. E stima nos i E lo warda riba nos. Durante nos difikultatnan familiar, mi a realisá kon serka E ta. Su promesanan ta bèrdat:
No tene miedu, Mi ta kubo; o, no desanimá,
Pasobra mi ta bo Dios i lo mi sigui yuda bo.
Lo mi fortalese bo, yuda bo, i buta bo lanta, …
Sostené pa mi man hustu i omnipotente.
Sabiendo kon firme nos fundeshi tá, laga nos deklará semper ku goso:
E alma ku a len riba Jesus pa sosegá
Mi no ke, mi no por, laga mi enemigunan;
E alma, ounke tur fiernu mester lucha pa sakudí, …
Ami nunka, no nunka, nunka lo bandon‘é!8
Den nòmber di JesuCristu, amèn.