Fe pa Obra i Bira
Dor di orashon, estudio di skritura, i obra, nos por kita e lòk for di e bendishonnan di shelu i bira un mihó siguidó di JesuCristu nos Salbador.
Poko despues ku mi a wòrdu yamá pa sirbi komo SetentaOutoridat General , mi tabatin e oportunidat di ta di bishita ku Presidente Russell M. Nelson pa un par di minüt. Tabata un enkuentro no planiá den kantina, i e tabata asina amabel di invitá Elder S. Mark Palmer i ami pa sinta i almorsá ku ne.
“Kiko nos lo papia durante di e almuerso ku e profeta?” tabata e pensamentu ku a bini den mi mente. P’esei mi a disidí di puntra presidente Nelson si e no tabatin niun konseho òf guia pa mi dor ku mi tabata kuminsando ku mi yamamentu. Su kontesta tabata simpel i direkto; el a wak mi i a bisa, “Elder Schmeil, bo a wòrdu yamá pa loke bo por bira.” Mi a kana bai for di e eksperensia ei reflekshonando riba kiko Señor ke mi bira. Ora mi a pensa riba esaki, mi a realisá ku e ke pa mi bira un mihó kasa, tata y yu un i un mihó sirbidó. E ora ei mi a realisá ku tur esaki por wòrdu lográ si mi traha pa bira un mihó disípulo di Señor JesuCristu.
Delaster konferensia general, Presidente Nelson a bisa: “pa hasi kualke kos bon ta rekerí esfuerso. Bira un disípulo berdadero di JesuCristu no ta eksepshon.”1 Presidente Nelson ta invitando nos pa traha duru pa bira un mihó disípulonan di JesuCristu. El a bisa nos pa bira mas manera Salbador, nos mester fortalesé nos fe dor di pidi, obra i studia entre otro kosnan.
1. Pidi
El a bisa, “Pidi bo Tata Selestial, den nòmber di JesuCristu pa yudansa.”2 Pidi dor di orashon ta un di e yabinan pa bin sa kon bira un mihó disípulo di JesuCristu.
Na final di Su ministerio entre e Nefitanan na Amerika, JesuCristu a subi na shelu. Depues, Su disípulonan a bini huntu, “uní den poderoso orashon i ayuno. I Jesus a mustra Su mes atrobe na nan, pasobra nan tabata hasiendo orashon na e Tata den sSu nòmber.”3 Dikon Jesus a bolbe mustra Su mes na Su disípulonan? Pasobra nan tabata hasi orashon; nan tabata pidi.
E ora ei El a kontinuá:
“Awor mi ta bai serka e mi Tata. I di bèrdat Mi ta bisa boso, kualke kos ku boso pidi e Tata den Mi nòmber lo wòrdu duná na boso.
“P’esei pidi, i lo wòrdu duná na boso; buska, i boso lo haña; bati, i lo wòrdu habrí pa boso. Pasobra tur ku ta pidi, ta risibí; i esun ku buska, ta haña; i na esun ku bati, lo wòrdu habrí.”4
Nos mester pidi ku fe pa sa e boluntat di Señor i aseptá ku Señor sa loke ta mas mihó pa nos.
2. Obra
Obra ta un otro yabi esensial pa bira un mihó disípulo di JesuCristu. Miéntras nos ta obra, E lo guia i dirigí nos riba e kaminda. Mi ta sigur ku Nefi tabata buska guia di Señor pa sa kon haña e plachinan di bròns for di Laban, sinembargo e i su rumannan a purba dos biaha sin éksito. Pero nan tabata obra, i Señor tabata guia nam riba e kaminda. Finalmente, Nefi tabata éksitoso e di tres biaha. El a kòrda, “Mi a wòrdu guiá pa e Spiritu, sin sa di antemanokiko mi mester hasi.”5
Asinaki Señor ta traha si nos buta esfuerso i obra dilanti hasta ora nos no tin un komprondementu kla di kiko lo mester wòrdu hasi. Señor a bisa Nefi kiko mester hasi: bai i buska e plachinan. Pero E no a bisa Nefi kon pa hasié El a laga pa Nefi saka afó i buska e Señor Su yudans —i asinaki Señor ta traha hopi biaha den nos bida. Ora nos obra den fe, Señor ta guia i dirigí nos.
3. Studia
Den 3 Nefi,e disípulonan a menshoná na Señor ku tabatin diskushonnan entre e hendenan tokante e nòmber di e iglesia. Pa kontestá, Señor a siña un prinsipio masha importante ora El a puntra, “Nan no a lesa e skrituranan?”6 Studia e ora ei ta un otro yabi esensial pa bira un mihó disípulo di JesuCristu. Orashon i estudio di skritura ta bai man na man. Nan ta traha huntu pa nos benefisio. Esaki ta e proseso ku Señor a establesé. “Deleitá den e palabra di Cristu; pasobra e palabra di Cristu lo bisa boso tur loke boso tin ku hasi.”7
Tambe Señor a siña ku no solamente nos mester studia e skrituranan pero tambe siña otro for di nan, manera el a demostrá na e Nefitanan: “Awor a sosodé ku ora Jesus a splika tur e skrituranan huntu, ku nan a skirbi, el a mandanan pa nan siña e kosnan ku El a siñanan.”8
Esaki ta un di e motibunan dikon tabata asina importante pa Nefi bai bèk i buska e plachinan di bròns: su famia tabatin mester di e skrituranan no solamente pa yuda nan biahe na e tera primintí pero tambe pa yuda nan siña nan yunan. Nos tambe mester buska guia for di e skrituranan pa nos biahe, i nos mester siña for di nan den nos kas i yamamentu den iglesia.
4. Obra pa bira
Hopi biaha kontesta riba orashon no ta bini mesora. Pero nos mester tin fe pa kontinuá, obra den hustisia, i keda pesistente manera Nefi ora e tabata purba di haña e plachinan di bròns. Señor lo mustra nos kada bes un tiki; ora nos studia e skrituranan, Señor lo duna nos kontesta òf e forsa nesesario pa nos pasa den un dia mas, un siman mas i purba un biaha mas. Eldder Richard G. Scott a bisa: “Sea gradesí ku tin biaha Dios ta laga bo lucha pa un tempo largu promé ku kontesta bini. Esei ta laga bo fe bira mas grandi i bo karakter krese.”9
Dor di orashon i estudio di skritura, Señor semper a duna mi e forsa pa obra i perserverá un dia mas, un siman mas, i pa purba un biaha atrobe. Hopi biaha e kontesta no ta bini mesora. Mi tin preguntanan ku ainda no a wòrdu kontesta, pero mi ta sigui puntra i studia, i mi ta kontentu ku Señor ta sigui duna mi e forsa pa obra miéntras mi ta sperando riba e kontesta.
Elder Scott tambe a bisa, “si bo ta yega na e limite di bo komprendementu drentando den e insiguridat di e bahada di solo, ehersiendo fe lo bo wòrdu dirigí pa haña solushonnan ku bo no por a haña di otro manera.”10
Pa bira un mihó siguidó di nos Señor JesuCristu ta un biahe di henter un bida, i nos tur ta den diferente etapa, moviendo na diferente ritmo. Nos mester tene den nos mente ku esaki no ta un kompetensia, i ku nos ta aki pa stima i yuda otro. Nos mester ta obrando di un manera pa laga Señor traha den nos bida huntu ku nos.
Papiando ku Sidney Rigdon Señor a bisa lo siguiente: “He puesto mis ojos en ti y en tus obras.” He oído tus oraciones y te he preparado para una obra mayor.”11 Mi ta testifiká ku Señor ta skucha i kontestá nos orashonnan, E konosé nos, E tin un obra grandi pa kada un di nos. Dor di orashon, estudio di skritura, i obra, nos por kita e lòk for di e bendishonnan di shelu i bira un mihó siguidó di JesuCristu nos Salbador.
Elder Dallin H. Oaks ta siña ku: “E huisio final no ta djis un evaluashon òf un resúmen total di aktonan bon òf malu—di loke nos a hasi. E ta un rekonosementu di e efekto final di nos aktonan i pensamentunan---di lokual nos a bira.”12
Mi ta gradisí pa profetanan, videntenan i reveladornan; na ta e vigilante riba e toren. Nan na mira kosnan ku nos no ta mira. Mi ta testifiká ku pa medio di nan palabranan, nos por bira mihó siguidornan di JesuCristu nos Salbador i logra nos potensial. Mi ta testifiká ku JesuCristu ta bibu i e konosé kada un di nos individualmente. Esaki ta Su Iglesia. Den e nòmber sagrado di JesuCristu, amèn.