Ku e Poder di Dios den Gran Gloria
Honrando kombenionan ta armá nos ku rektitut i ku e poder di Dios den gran gloria.
Ta mi orashon ku e Spiritu Santu lo iluminá i edifiká nos tur miéntras nos ta konsiderá huntu e obra maravioso di salbashon i eksaltashon den e dispensashon di e plenitut di tempu.
Moroni su Promé Aparishon na José Smith
Aproksimadamente tres aña despues di e Promé Vishon, den e anochi di 21 di sèptèmber, 1823, e hóben José Smith tabata hasiendo orashon pa risibí remishon di su pikánan i pa sa di su estado i posishon dilanti Dios.1 Un personahe a aparesé banda di su kama, a yama José na su nòmber i a deklará ku “e tabata un mensahero mandá for di presensia di Dios … i ku su nòmber tabata Moroni.” El a splika “ku Dios tin un trabou pa [José] hasi” 2 i despues a instruyé tokante e salimentu na lus di e Buki di Mormon. Ta signifikante, ku e Buki di Mormon tabata un di e promé tópikonan menshoná den Moroni su mensahe.
E Buki di Mormon ta un otro tèstament di Jesucristo i un hèrmènt importante di kombershon den e delaster dianan. Nos propósito pa kompartí e evangelio ta pa invitá tur pa bini na Jesucristo,3 risibí e bendishonnan di e evangelio restourá, i perseverá te na final pa medio di fe den e Salbador.4 Yuda individuonan pa eksperensiá e kambio poderoso di kurason5 i uni nan mes na Señor pa medio di kombenionan i ordenansanan sagrado ta e ophetivonan fundamental di prediká e evangelio.
Moroni su introdukshon di e Buki di Mormon na José Smith a inisiá e obra di salbashon i eksaltashon pa individuonan na e banda aki di e velo den e dispensashon di e plenitut di tempu.
Siguiendo ku su instrukshon na José, Moroni despues a sita for di e buki di Malakías den e Tèstamènt Bieu, ku un variashon chikitu den e lenguahe uzá den vershon di King James:
“Ata’ki, mi ta revelá na bo e Saserdosio, pa medio di e man di Elias e profeta, promé ku e benida di e dia grandi i teribel di Señor.
“… I e lo planta den e kurasonnan di e yunan e promesa hasí na e tatanan, i e kurasonnan di e yunan lo bira na nan tatanan. Si lo no tabata asina, hinter e mundu lo a wòrdu destruí na su benida.”6
Nos propósito den konstruí tèmpelnan ta pa hasi lugánan santu disponibel den kual e kombenionan i ordenansanan sagrado nesesario pa e salbashon i eksaltashon di e famia humano por wòrdu atministrá tantu pa e bibunan komo e mortonan. Moroni su instrukshonnan na José Smith tokante e ròl vital di Elias i outoridat di saserdosio a ekspandé e obra di salbashon i eksaltashon na e banda aki di e velo i a inisiá den nos dispensashon e obra pa e mortonan na a e otro banda di e velo.
Resumiendo, Moroni su enseñansanan di sèptèmber 1823, tokante e Buki di Mormon i e mishon di Elias a establesé e fundashon di doktrina pa e obra di salbashon i eksaltashon na tur dos banda di e velo.
Enseñansanan di e Profeta José Smith
E lèsnan ku José Smith a siña di Moroni a influensiá tur aspekto di su ministerio. Por ehèmpel, na un asamblea solèm tené na Tèmpel di Kirtland riba 6 di aprel 1837, e Profeta a deklará: “Despues di tur lokual a wòrdu bisá, e deber di mas grandi i importante ta pa prediká e Evangelio.”7
Kasi presis shete aña despues, riba 7 di aprel 1844, José Smith a duna un sermon awe konosí komo e Diskurso di King Follett. El a deklará den e diskurso aki “E responsabilidat di mas grandi den e mundu aki ku Dios a pone riba nos ta pa hasi obra pa nos mortonan.”8
Pero kon prediká e evangelio i hasi obra pa nos mortonan tur dos ta e úniko deber i responsabilidat mas grandi ku Dios a pone riba nos? Mi ta kere ku e Profeta José Smith tabata enfatisá den tur dos deklarashon e bèrdat fundamental ku kombenionan, hasí pa medio di ordenansanan di saserdosio outorisá, por uni nos na Señor Jesu Cristu i ta e núkleo esensial di e obra di salbashon i eksaltashon na tur dos banda di e velo.
Obra mishonal i di tèmpel i historia familiar ta aspektonan komplementario i relashoná ku otro di un obra grandi ku ta enfoká riba e kombenionan i ordenansanan sagrado ku ta permití nos pa risibí e poder di santidat den nos bida i, finalmente, regresá na presensia di Tata Selestial. Pues, e dos deklarashonnan pa e Profeta ku na prinsipio por parse kontradiktorio, realmente ta enfatisá e punto di enfoke di e gran obra di delaster dia aki.
Uní na e Salbador pa medio di Kombenionan i Ordenansanan
E Salbador a bisa:
“Tuma mi yugo riba bo, i siña di Mi; Pasó mi ta mansu i humilde di kurason: i lo bo haña deskanso pa boso alma.
“Pasó mi yugo ta suave, i mi karga ta lihé.”9
Nos ta tuma e Salbador Su yugo riba nos segun nos ta siña tokante, risibí ku dignidat,i ku honor kombenionan i ordenansanan sagrado. Nos ta konektá firmemente na i ku e Salbador ora nos ta rekordá fielmente i ta hasi nos esfuerso pa biba di akuerdo ku e obligashonnan ku nos a aseptá. I e union ku E ta e fuente di fortalesa spiritual den tur temporada di nos bida.
E Pueblo di Kombenio di Señor
Mi ta invitá boso pa konsiderá e bendishonnan primintí na disípulonan di Jesu Cristu ku ta warda kombenio. Por ehèmpel, Nefi a mira e iglesia di e Lamchi di Dios den e delaster dianan, i su kantidat tabata poko, e santunan di Dios, tabata tambe riba henter e superfisie di e tera: i nan dominio tabata chikitu.10
El a mira tambe e poder di e Lamchi di Dios, ku a baha riba e santunan di e iglesia di e Lamchi, i riba e pueblo di kombenio di Señor, … i nan tabata armá ku rektitut i ku e poder di Dios den gran gloria. 11
E frase,“ armá ku rektitut i ku e poder di Dios den gran gloria” no ta simplemente un idea nèchi òf un ehèmpel di lenguahe bunita di skritura. Mas bien, e bendishonnan aki ta fásilmente evidente den e bidanan di kantidat inkontabel di disípulonan di delaster dia di Señor.
Mi tareanan komo un miembro di e Diesdos a hiba mi rònt mundu. I mi a wòrdu bendishoná pa topa i siña lèsnan memorabel di hopi di boso. Mi ta tèstifiká ku e pueblo di kombenio di Señor awendia di bèrdat ta armá ku rektitut i ku e poder di Dios den gran gloria. Mi tabata testigu di fe, kurashi, perspektiva, persistensia, i goso ku ta ekstendé mas tantu ku kapasidat mortal—i ku ta solamente Dios por proveé.
Mi a presensiá e rektitut i poder di Dios den gran gloria risibí pa medio di fieldat na kombenionan i ordenansanan den bida di un miembro yòn di Iglesia ku a keda parsialmente paralisá den un aksidente horibel di outo. Despues di lunanan masha pisá pa mi di rekuperashon i adaptashon na un estilo nobo di bida ku mobilidat limitá, mi a topa i a papia ku e alma fuerte i fiel aki. Durante nos kombersashon mi a puntra, “Kiko e eksperensia aki a yuda bo siña?” E kontesta inmediato tabata, “Mi no ta tristu. Mi no ta rabiá. I tur kos lo ta OK.”
Mi a presensiá e rektitut i poder di Dios den gran gloria risibí pa medio di fieldat nakombenionan i ordenansanan den e bida di miembronan nobo boutisá i konfirmá di Iglesia. E konversonan aki tabata ansioso pa siña i sirbi, dispuesto pero hopi biaha insigur kon pa pone kustumbernan i tradishonnan fuerte bieu un banda, i tòg kontentu pa bira “konsiudadano ku e santunan, i di e kas di Dios.”12
Mi a presensiá e rektitut i poder di Dios den gran gloria risibí pa medio di fieldat na kombenionan i ordenansanan den e bida di un famia ku a sòru ku kariño pa kasá i mayor ku un malesa inkurabel. E disípulonan balente aki a deskribí tempunan ku nan famia a sinti nan mes so—i tin biaha nan tabata sa ku e man di Señor tabata elevá i fortalesé nan. E famia aki a ekspresá gratitut sinsero pa e eksperensianan mortal difísil ku ta permití nos pa krese i bira mas manera nos Tata Selestial i nos Redentor, Jesu Cristu. Dios a yuda i bendishoná e famia aki ku e kompania di e Spiritu Santu i a hasi nan hogar mes sagrado ku un lugá di refugio manera e tèmpel.
Mi a presensiá e rektitut i poder di Dios den gran gloria risibí pa medio di fieldat na kombenionan i ordenansanan den bida di un miembro di Iglesia ku a eksperensiá e doló di divorsio. E ruman aki su aflikshon spiritual i emoshonal a intensifiká pa un sentido di inhustisia asosiá ku violashon di kombenionan di parti di su kasá i kibramentu di nan matrimonio. E tabata kier hustisia i responsabilidat.
Durante e tempu ku e muhé fiel aki tabata lucha ku tur lokual a pasa kuné, el a studia i meditá riba e Salbador Su Ekspiashon ku mas intensidat i mas intenso ku nunka promé den su bida. Gradualmente, un komprendementu mas profundo di Cristu su mishon ku ta redimí a destilá riba su alma—Su sufrimentu pa nos pikánan, tambe pa nos dolónan, debilidatnan, desapuntenan, i angustia. I e tabata inspirá pa hasi su mes un pregunta penetrante: siendo ku ya e preis a wòrdu pagá pa e pikánan aki, lo bo demandá pa e preis aki wòrdu pagá dos biaha? El a realisá ku tal rekerimentu lo no ta ni hustu ni miserikòrdioso.
E dama aki a siña ku uni su mes na e Salbador pa medio di kombenionan i ordenansanan por kura e heridanan kousá pa un otro persona ku a ehersé su albderio moral inhustamente i a permití e pa haña e kapasidat pa pordoná i risibí pas, miserikòrdia, i amor.
Promesa i Testimonio
Promesanan i bendishonnan di kombenio ta posibel solamente pa motibu di nos Salbador, Jesu Cristu. E ta invitá nos pa mira na E,13 bini na E,14 siña di E,15 i uni nos mes na E16 pa medio di e kombenionan i ordenansanan di Su evangelio restourá. Mi ta tèstifiká i primintí ku honra kombenionan ta arma nos ku rektitut i ku e poder di Dios den gran gloria. I mi ta tèstifiká ku Señor Jesu Cristu ku ta bibu ta nos Salbador. Di e bèrdatnan aki mi ta tèstifiká ku goso den e nòmber sagrado di Jesu Cristu, amèn.