Un Porshento Mihó

Pa Elder Michael A. Dunn

Di e Setenta

Kada esfuerso ku nos hasi pa kambia—no ta importá kon chikitu e por parse nos—por marka e diferensia di mas grandi den nos bida.

Pa mas ku un siglo, e tim nashonal di kareda di baiskel di Gran Bretaña tabata e opheto di harimentu di e mundu di siklismo. Pegá den mediokresia, koredónan Britániko a logra solamente un man yen di medaya di oro den 100 aña di kompetensianan Olímpiko i tabata asta mas desepshonante den e evenemento prinsipal di siklismo, e Tour pisá di Fransia di 3-siman largu—kaminda ningun koredó Britániko a triunfá den 110 aña. E tabata un situashon asina difísil pa e koredónan Britániko ku fabrikantenan di algun baiskel a nenga di asta bende baiskel na e Britániko nan, dor di miedu ku e lo daña pa semper e reputashon ku e kompania a traha duru pa gana. I apesar di a dediká un kantidat di rekurso na teknologia avansá i entrenamentu rigoroso, nada no a funshoná.

Nada, esei ta, te ku 2003, ora ku algu chikitu, den gran parti poko riparabel a sosodé ku por a kambia e trayektoria di siklismo Britániko pa semper. E enfoke nobo ei lo a revelá tambe un prinsipio eterno—ku e promesa—relashoná ku nos búskeda mortal hopi bes konfuso, pa mehorá nos mes. Pues kiko a pasa den siklismo Britániko ku tin relevansha grandi pa nos búskeda personal pa ta mihó yunan muhé i hòmber di Dios?

Na 2003, Sir Dave Brailsford a wòrdu kontratá. Kontrali na entrenadó nan anterior ku a purba hasi kambionan drástiko, di anochi pa mainta, Sir Brailsford na lugá di esei a komprometé na un strategia ku el a referí na e komo “e agregashon di ganashi marginal.” Esaki tabata ensera implementa mehorashonnan chikitu den tur kos. Esaki tabata nifiká midi konstantemente e statistiknan klave i dirigí riba debilidatnan spesífiko.

E ta parse un tiki e idea di Samuel e profeta Lamanita di “ba[i] ku kuidou.”¹ E bista mas amplio, mas holístiko aki ta evitá e trampa pa keda fiha solamente riba e problemanan opvio o pikanan bisto. Brailsford a bisa, “Tur e prinsipio a surgi for di e idea ku si bo dividí tur loke bo por pensa ku ta impliká korementu di un baiskel, i despues a mehor’é ku un porshento, lo bo optené un kresementu signifikativo ora ku pone nan tur huntu.”²

Su enfoke ta kuadra hopi bon ku esun di Señor, ku a siña nos e parti kritiko di e 1 porshento—asta a kambio di e 99 porshento. Naturalmente, E tabata siñando e imperativo di e evangelio pa buska personanan den nesesidat. Pero kiko si nos apliká e mesun prinsipio aki na e di dos prinsipio hopi dushi i sabroso di e evangelio, arepentimentu? Na lugá di blòkia dor di e agitashon i kambionan dramátiko entre pika i repentimentu, kiko lo pasa si nos enfoke tabata pa hasi nos enfoke mas smal—asta ora ku nos ampli’é? Na lugá di purba pa perfekshoná tur kos, kiko lo pasa si nos atendé solamente un kos?

Por ehèmpel, kiko lo pasa si den bo konsenshi nobo ku ángulo amplio, bo deskubrí ku bo a neglishá lesamentu diario di e Buki di Mormon? Wèl, enbes di pasa desesperadamente den e 536 páginanan den un anochi, kiko lo pasa si mas bien nos komprometé pa lesa solamente 1 porshento di e—ku ta solamente 5 página pa dia—òf un otro meta manehabel pa bo situashon? Agregá kresementu chikí pero konsistente na nos bida finalmente lo por ta e kaminda pa viktoria inkluso riba nos defisiensianan personal di mas ferfelu? E enfoke di tamaño chikí di atendé nos manchanan por funshoná di bèrdat?

E outor James Clear ku ta bon aklamá ta bisa ku e strategia aki ta pone e chènsnan direktamente na nos fabor. E ta sostené ku “kustumbernan ta e ‘interes konhunto pa superashon-personal.’ Si bo por logra solamente un porshento mihó di algu kada dia, na final di un aña … lo bo ta 37 bes mas mihó.”³

Brailsford su mehoransanan chikí a kuminsá ku loke ta opvio, manera ekipo, telanan di unifòrm, i patronchinan di entrenamentu. Pero su tim no a stòp ei nan. Nan a sigui buska 1 porshento di mehoransa den áreanan ignorá i inesperá manera nutrishon i asta matis den mantenshon. Ku tempu, e kantidat di mehoransa nan masha-chikí aki a keda agregá na e resultadonan asombroso kual a yega mas lihé ku niun hende por a imaginá. Berdaderamente, nan tabata na e prinsipio eterno “liña pa liña, presepto pa presepto, aki un tiki i aya un tiki.”⁴

E ahustenan chikí lo funshoná pa hasi e “kambionan poderoso”⁵ ku bo ta deseá? Debidamente implementá, Mi tin 99 porshento sigur ku nan lo hasié! Pero e úniko atvertensha pa ku e enfoke aki ta pa e mehoransa chikí wòrdu agregá, mester tin esfuerso konsistente, dia den dia afó. I maske probablemente nos lo no ta perfekto, nos mester ta determiná pa reflehá nos persistensia ku pasenshi. Hasi esei, i e kompensashonnan dushi di oumento di rektitut lo trese e alegria pa bo i pas ku bo ta buska. Manera Presidente Russell M. Nelson a siña: “Nada ta liberá mas, ta mas noble, òf mas krusial pa nos progreso individual ku e enfoke regular, diario riba arepentimentu. Arepentimentu no ta un suseso; e ta un proseso. E ta e yabi pa felisidat i pas mental. Ora kombin’é ku fe, arepentimentu ta habri nos akseso na e poder di e Ekspiashon di JesuCristu.”⁶

Pa ku e eksigensha di fe pa arepentimentu, e skrituranan ta kla. Tur loke ta wòrdu rekerí na promé instansha ta solamente un “partíkula di fe.”⁷ I si nos por yega na e mentalidat di “ simia di mòster” aki”⁸ nos spera tambe mehoransa nan inesperá i eksepshonal den nos bida. Pero kòrda, meskos ku nos no mester purba di bai di Attila the Hun pa Mama Teresa di un dia pa otro, meskos nos mester sigui orientá nos patronchinan di mehoransa gradualmente. Asta ora e kambionan nesesario den bo bida ta na eskala grandi, kuminsá den eskala chikitu. Esei ta konta prinsipalmente si bo ta sinti bo hundi o deskurashá.

E proseso aki no ta kana semper stret. Asta bou di esnan mas determiná lo tin kontratempu. Eksperenshando e frustrashon di esaki den mi propio bia, Mi sa ku tin bes e por sinti manera 1 porshento pa dilanti i 2 porshento patras. Sinembargo, si nos pèrmanesé intrepido den nos determinashon pa konsistentemente logra e 1 porshento nan ei, E ku a “tuma nos karganan”⁹sigur lo karga nos.

Opviamente, si nos ta enbolbí den pika nan grave, Señor ta kla i inekibokabel; nos mester stòp, buska yudansa di nos obispu, i bandoná e tipo di práktikanan aki inmediatamente. Pero manera Elder David A. Bednar a rekomendá: “Oumento di mehoransanan spiritual chikí, stabil ta e stap nan ku Señor lo ke pa nos tuma. Preparando pa kana sin kulpa dilanti Dios ta un di e propósitonan prinsipal di mortalidat i e aspirashon di un periodo di bida; e no ta resultado di momentunan sporádiko di aktividat spiritual intenso.”¹⁰

Pues, e enfoke pa repentimentu i kambio real di tamaño asina chikí ku por drenta den un saku aki ta funshoná realmente? E prueba ta den e trapamentu, na moda di bisa? Konsiderá loke a pasa ku e Siklismo Britániko den e dos último dékadanan for di momentu ku ta implementando e filosofia aki. Awor aki siklistanan Britániko a gana e tour históriko di Fransia asombrosamente na seis okashon. Durante e último 4 Weganan Olímpiko, Gran Bretaña tabata e pais di mas eksitoso den e disiplinanan di siklismo. I den weganan Olímpiko ku resien a konkluí na Tokyo, UK a gana mas medaya di oro den siklismo ku tur otro pais.

Pero superando asta plata òf oro, nos promesa presioso riba nos kaminda pa eternidat ta ku di bèrdat nos lo “triunfá, den Cristu.”¹¹ I segun nos komprometé pa hasi mehoransanan chikí pero konstante, a primintí nos “un korona di gloria ku lo no debilitá.”¹² Disfrutando di e brio inmakulá yamando bo, Mi ta invitá bo pa eksaminá bo bida i wak kiko a stagna bo òf tin bo retrasá riba e kaminda di kombenio. E ora ei wak mas amplio. Buska solushonnan moderá pero kumbiniente den bo bida ku por resultá den e alegria dushi di un ser djis un tiki mas mihó.

Kòrda, David a usa un simpel piedra chikitu pa derivá un gigante aparentemente invensibel. Pero e tabata tin kuater otro piedra kla prepará. Di manera similar, Alma Yu su karakter perverso i destino eterno a wòrdu kambiá dor di un pensamentu simpel i remarkabel—un rekuerdo di enseñansa di su tata tokante e grasia ku ta salba di JesuCristu. I asina e ta ku nos Salbador, kende, maske e tabata sin pika, “no a risibí e plenitut na kuminsamentu, pero a sigui di grasia pa grasia, te na momentu ku el a risibí e plenitut.”¹³

Ta E ta esun ku sa na kua momentu e para di Yonchi ta kai, ku tambe ta enfoká den e minüt i e momentu nan memorabel den nos bida i ku ta kla na e momentu nan aki pa asistí bo den kualkier 1 porshento di bo ku sali for di e konferensiá aki. Paso kada esfuerso ku nos hasi pa kambia, no ta importá kon chikitu e por parse nos, kisas por marka e diferensia di mas grandi den nos bida.

Ku e intenshon aki, Elder Neal A. Maxwell a siña, “Kada afirmashon di un deseo hustu, kada akto di servisio, i kada akto di adorashon, sea chikitu i kresiendo, ta kontribuí na empuhe di nos spiritu.””¹⁴ Di bèrdat, ta dor di kosnan chikitu, simpel, i si, asta solamente 1 porshentu di kosnan ku por realisá kosnan grandi.¹⁵ E viktoria final ta 100 porshento sigur, “despues di tur loke nos por hasi,”¹⁶ pa medio di e poder, méritonan, i miserikòrdia di nos Señor i Salbador, JesuCristu. Esaki mi ta testifiká den nòmber di JesuCristu, amèn.