Preparando pa e Segunda Benida di Cristu
Mas ku nunka promé, ta wòrdu rekerí di nos pa konfrontá e realidat ku nos ta serkando kada bes mas na e Segunda Benida di JesuCristu.
Manera a keda grabá den e Buki di Mormon, seis aña promé ku e nasementu di JesuCristu, Samuel, un Lamanita hustu, a profetisá na un pueblo Nefita ku pa e tempu ei ya mayoria a bira un pueblo den apostesia,1 di e señalnan ku lo a kompaña e nasementu di nos Salbador. Tragikamente, mayoria Nefita a rechasá e señalnan ei pasó “no tabata rasonabel ku un ser manera un Cristu [lo] bini.”2
Lamentablemente, segun e registronan di skritura, mayoria di e Hudiunan, di mesun manera, no por a aseptá ku un hòmber yama Jesus, di e provinsia poko konsiderá di Galilea, tabata e Mesias tan-sperá.3 Jesus, kende a bini pa kumpli ku hopi di e profesianan hasí dor di e profetanan Hebreo,a wòrdu rechasá i asta krusifiká pasó, manera e profeta Jakob di Buki di Mormon a siña, e Hudiunan tabata “wak mas aleu ku e meta.” Konsekuentemente, Jakob a testifiká ku “Dios a kita su simplesa for di nan, i a duna nan hopi kos ku nan no por komprondé, pasó nan tabata deseá esaki. I pasó nan a deseá esei Dios a hasié, pa nan por a trompeká.”4
Pa straño ku ta parse, niun siñansa, niun milager, i ni sikiera aparishon di un angel selestial, manera Laman i Lemuel a presensiá, 5 ta parse di tin e poder ku ta persuadí pa konvensé algun individuo pa kambia nan rumbo, vishon, òf kreensia ku algu ta berdat. Esaki ta spesialmente e kaso ora ku siñansanan òf milagernan no ta kuadra ku un individuo su opinion formá adelantá, deseonan, òf ideanan.
Por fabor kompará e dos siguiente skrituranan, e promé di e Apòstel Pablo papiando di e delaster dianan, deskribiendo e kamindanan di hende, i e di dos di Alma e profeta mustrando kon Dios ta hasi Su obra bou di humanidat. Promé di Pablo:
“Sabi esaki tambe, ku den e delaster dianan lo bai tin dianan peligroso.
“Pasobra hende lo ta stimadó di nan mes, envidioso, bromadó, orguyoso, blasfemadó, desobediente na mayornan, desagradesido, impio,
“Sin afekto natural, kibradó di tregua, akusadonan falsu, sin kontròl propio, feros, despresiado di esnan ku ta bon,
“Traidornan, kabesura, arogante, stimadónan di plaser mas ku stimadónan di Dios; …
“Semper siñando, sin nunka por yega na e konosementu di e bèrdat.”6
I awor di Alma, deklarando un prinsipio fundamental di e evangelio di JesuCristu: “Awor bo por suponé ku esaki ta lokura den mi; pero mira Mi ta bisa boso, ku pa medio di kosnan chikitu i simpel kosnan grandi ta keda realisá; i kosnan chikitu den mayoria kaso ta konfundí e sabio.”7
Nos ta biba den un mundu moderno yená ku gran konosementu i hopi abilidat ekstraordinario. No opstante, e kosnan aki hopi bes ta kamuflá e fundeshi instabil riba kua nan ta trahá. Konsekuentemente, nan no ta kondusí na e bèrdat real ni na Dios ni na e poder pa risibí revelashon, atkerí konosementu spiritual, i desaroyá fe den JesuCristu ku ta kondusí na salbashon.8
Nos ta wòrdu rekordá profundamente di e palabranan di nos Señor na Tomas i e otro Apòstelnan riba e anochi promé ku Su sakrifisio ekspiatorio: “Jesus a bisé, Ami ta e kaminda, e bèrdat, i e bida: niun hende ta yega na e Tata, si no ta pa mi.”9
Pa esnan ku tin wowo pa mira, orea pa skucha, i kurasonnan pa sinti, mas ku nunka promé ta wòrdu rekerí di nos pa konfrontá e realidat ku nos ta aserkando mas serka ku nunka di e Segunda Benida di JesuCristu. Ta bèrdat ku ainda ta spera difikultatnan grandi pa esnan na tera na su regreso, pero pa ku esaki, esnan fiel no mester tin miedu.
Awor mi ta sita pa un ratu for di e temanan di Evangelio di Iglesia bou di e titulo “Segunda Bienida di JesuCristu”:
“Ora ku e Salbador bini atrobe, E lo bini den poder i gloria pa reklamá e mundu komo Su Reino. Su Segunda Benida lo marka e komienso di e Milenio.
“E Segunda Benida lo ta un tempu teribel i tristu pa esnan malbado, pero e lo ta un dia di pas pa esnan rekto. Señor a deklará:
“‘Esnan ku ta sabí i a risibí e bèrdat, i a tuma e Spiritu Santu komo nan guia, i no a wòrdu engañá—di berdaderamente Mi ta bisa boso, nan lo no wòrdu kòrtá i bentá den kandela, pero lo sobrebibí e dia.
“‘I e tera lo wòrdu duná na nan komo herensia; i nan lo multipliká i bira mas fuerte, i nan yunan lo krese sin piká pa wòrdu salbá.
“‘Pasó Señor lo ta entre nan, i su gloria lo ta riba nan, i e lo ta nan rei i nan dunadó di lei’ (Doktrina i Kombenionan 45:57–59).”10
Den nos preparashon pa e Segunda Benida di JesuCristu, Mi ta proveé un nota vital, i di konsuelo pa esnan fiel di e profeta Amos saka for di den Tèstamènt Bieu: “Di bèrdat Señor Dios lo no hasi nada, te ora ku e revelá su sekreto na su sirbidónan e profetanan.”11
Ku e spiritu aki, e profeta di Señor pa e mundu awendia, Presidente Russell M. Nelson, resien a duna nos e konseho inspirá aki: “E Evangelio di JesuCristu ta un evangelio di arepentimentu. Dor di e Salbador Su Ekspiashon, Su evangelio ta proveé un invitashon pa sigui kambia, krese i yega na bira mas puru. E ta un evangelio di speransa, di sanashon, i di progreso. Asina, e evangelio ta un mensahe di alegria! Nos spiritu ta alegrá ku kada un stap chikitu ku nos dal pa dilanti.”12
Sin reserva mi ta duna mi testimonio i ta tèstifiká e realidat di Dios i e milagernan den e bida diario di numeroso hende di ámbos parti, klase abou i klase haltu. Ta bèrdat, ku hopi bes ta papia di hopi eksperensianan sagrado, un parti dor di nan orígen divino i nan posibel resultadonan ku ta wòrdu redikulisá pa esun ku no sa mihó.
Relashoná ku esaki, e último profeta di e Buki Mormon, Moroni, ta rekordá nos:
“I atrobe Mi ta papia na boso ku ta nenga e revelashonnan di Dios, i ta bisa ku nan no tei mas, ku no tin revelashonnan, ni profesia, ni donnan, ni sanamentu, ni papiamentu den lenga, i e interpretashon di lenganan;
“Ata aki Mi ta bisa boso, es ku nenga e kosnan aki no konosé e evangelio di Cristu; si, e no a lesa e skrituranan; si ta asina, e no ta komprondé nan.
“Nos no ta lesa ku Dios ta e mesun ayera, awe, i pa semper, i den dje no tin variashon ni sombra di kambio?”13
Mi ta konkluí mi komentarionan ku un deklarashon profétiko di e profeta Jose Smith, duná serka di e final di su ministerio miéntras e tabata warda e Segunda Benida di JesuCristu: “Nos lo no kontinuá pa un kousa asina grandi? Bai dilanti i no patras. Kurashi, hermanonan [i, pèrmití mi inkluí, hermananan]; i sigui, sigui pa e viktoria! Laga boso kurason regosihá, i sea ekstremadamente alegre.”14 Na kua Mi ta agregá mi testimonio den e nòmber di JesuCristo, amèn.