E Nòmber di Iglesia No Ta Negosiabel
Ora nos sigui boluntariamente e konseho di Señor manera revelá dor di Su Profeta bibiente, spesialmente si e ta bai kontra di nos pensamentu inisial, rekeriendo humildat i sakrifisio, Señor ta bendishoná nos ku poder spiritual adishonal.
Den un konferensia di prensa dia 16 ougùstùs 2018, Presidente Russel M. Nelson a bisa: “Señor a impreshoná mi mente di e importansia di e nòmber ku El a revelá pa Su Iglesia, kual ta E Iglesia di JesuCristu di e Santunan di Delaster Dianan.1 Nos tin trabou dilanti di nos pa trese nos mes den harmonia ku Su boluntat.”2
Dos dia despues, riba 18 ougùstùs, mi tabata ku Presidente Nelson na Montreal, Canada. Despues di nos reunion di miembronan den e impreshonante Palais de Congrés, Presidente Nelson a kontestá preguntanan di reporteronan. El a rekonosé ku e lo “bai bira un desafio pa re[establesé e nòmber di e Iglesia i] kita [e] tradishon di mas ku shen aña,” Pero el a añadí, “e nòmber di e Iglesia no ta negosiabel.”3
Shete siman despues, Presidente Nelson a papia den konferensia general: “Señor a impreshoná mi mente di e importansia di e nòmber ku El a dekretá pa Su Iglesia, kual ta E Iglesia di JesuCristu di e Santunan di Delaster Dianan. … Ta e Salbador Mes sa bisa: “Pasó asina Mi Iglesia lo wòrdu yama.” Despues Presidente Nelson a ripití “E Iglesia di JesuCristu di e Santunan di Delaster Dianan.”4
Un Bon Pregunta
Un bon pregunta a surgi: Dikon awor, ora ku pa hopi dékada nos a brasa e nòmber di kariño “Mormon”? “E Tabernákulo di Mormon,” e video “Mi ta un Mormon,” e kantika di Primaria “I Am a Mormon Boy” [“mi ta un mucha Mormon”]?
E doktrina di Cristu no ta kambia i ta eterno. Tòg pasonan spesífiko i importante di Salbador Su obra ta wòrdu revelá na nan debido tempu. E mainta aki Presidente Nelson a bisa, “E Restorashon ta un proseso, no un evenementu.”5 I Señor a bisa, “Tur kos mester pasa den nan tempu.”6 Awor ta e tempu, i nos ta restablesiendo e nòmber revelá di e Iglesia.
E identidat i destinashon di E Iglesia di JesuCristu di e Santunan di e Delaster Dianan ta rekerí pa nos wòrdu yamá na Su nòmber. Resientemente mi tabata na Kirtland, Ohio, kaminda e Profeta José Smith, ku solamente algun miembro di e Iglesia, a profetisá, “E Iglesia aki lo yena nort i sùit Amérka—e lo yena e mundu.”7 Señor ta deskribí e obra di Su dispensashon komo un “un obra maravioso i un milager.”8 El a papia di un “kombenio [ku lo] wòrdu kumplí den e delater dianan,” permitindo “hinter …e mundu [pa] wòrdu bendishoná.”9
E palabranan di e konferensia aki ta wòrdu tradusí bnu den 55 idioma. Al final, e palabranan aki lo wòrdu skuchá i lesá den 98 idioma den mas ku 220 pais i teritorio.
Ora e Salbador regresá den mahestat i gloria, miembronan di E Iglesia di JesuCristu di e Santunan di e Delaster Dianan lo ta entre tur e nashonnan, tur hende, tur rasa, i tur kultura di e mundu.
E Infuensia kresiente di e Iglesia
E influensia di e Iglesia di JesuCristu restorá lo no ta solamente riba esnan ku ta miembro di e Iglesia. Dor di e manifestashonnan di shelu den nos dia, dor di e skritura sagrado restouá na mundu, i e poderoso don di Spiritu Santu, nos lo ta un lus briante riba e seru ora e sombranan skur di inkredulidat den JesuCristu skuresé e mundu. Maske hopi ta pèrmití e mundu pa nubla nan fe den e Redentor, nos lo “no bai mové for di [nos] lugá.”10 Cristiannan ku no ta entre nos miembresia lo duna bonbiní na nos ròl i nos testimonio sigur di Cristu. Asta e Cristiannan ei a mira nos ku skeptisismo lo brasa nos komo amigu. Den e dianan benidero aki, nos lo wòrdu yamá pa e nòmber di JesuCristu.
Danki pa boso pa boso esfuerso noble pa avansá e nòmber berdadero di e Iglesia. Den e konferensia [di] tres aña pasá, Presidente Nelson a a primintí nos “ ku nos atenshon rigoroso pa usa e nòmber korekto di e Salbador Su Iglesia … [lo kondusí na] un fe mas grandi i haña akseso na podernan spiritual mas grandi.”12
E promesa aki a wòrdu realisá dor di disípulonan deboto rònt mundu.13
Ruman Lauri Ahola di e [parti] Ost di Merka taatmití ku maske tin biaha e ta hañ’é inkómodo pa kompartí e nòmber kompletu di e Iglesia. Pero dor di e konseho di e profeta, e ta persistí. Na un okashon, e tabata bishitando un amigu na un Iglesia di [un] otro fe. Ata’ki su palabranan:
Un konosí a puntra, “Bo ta un Mormon?”
“‘Mi ta un miembro di e Iglesia di JesuCristu di e Santunan di e Delaster Dianan, si,’ mi a bisa. El a kuminsá puntra mi diferente pregunta, kada un kuminsando ku: ‘E Iglesia Mormon ta kere … ?’ I kada biaha, mi ta kuminsá mi kontesta ku e frase ‘den e Iglesia restorá di Cristu, nos ta kere …’
“… Ora el a nota ku mi no tabata aseptá e título ‘Mormon,’ el a puntra mi direktamente, ‘Bo no ta un Mormon?’
“Asina ta ku mi a puntr’é si e sa ken Mormon tabata—e no tabata sa, mi a bis’é ku Mormon tabata un profeta … [i mi tabata] honrá di ta wòrdu asosiá ku [ne].
uPero,’ mi a kontinuá, ‘Mormon no a muri pa mi pikánan. Mormon no a … sufri na Getsémani òf muri na e krus [pa mi]. … JesuCristu ta mi Dios i mi Salbador. … I ta den di Su nòmber mi lo ke ta konosí. …’
“… Despues di un par di sekònde di silensio, [e konosí a sklama], ‘Asina ta, ku bo ta un Cristian!’”13
[Boso] ta kòrda e palabranan di Presidente Nelson? “Mi ta primintí boso ku si nos hasi nos esfuerso pa restorá e nòmber korekto di Señor Su Iglesia, Esun di kual e Iglesia aki ta lo drama Su poder i bendishon riba e kabesnan di e Santunan di e Delaster Dianan, manera ku nunka antes nos no a mira.”14
Señor Semper ta Habri e Kaminda
Señor semper lo warda Su promesanan. E ta habri e kaminda pa nos ora nos ta hasi Su obra.
Pa hopi aña nos a spera di kumpra e “domain sites” di internèt ChurchofJesusChrist.org i ChurchofJesusChrist.com. Niun di nan dos tabata na benta. Dos luna promé di Presidente Nelson su anunsio, tur dos tabata direpente disponibel. E tabata un milager.15
Señor a magnifiká nos esfuerso den revisá nòmbernan ku a wòrdu pegá na e Iglesia.
Moviendo dilanti den fe, e nòmber di e koro Tabernakel di Mormon a kambia den E Koro Tabernakel na e Plasa di Tèmpel. E sitio web LDS.org, ku tabata risibí mas ku 21 mion bishita kada luna, a kambia den ChurchofJesusChrist.org.16 E nòmber di LDS Business College a kambia pa Ensign College. E sitio web Mormon.org a wòrdu redirigí na ChurchofJesusChrist.org. Mas ku mil prdukto ku tabatin e nòmber “Mormon” òf “LDS” konektá na nan a wòrdu kambia di nòmber. Santunan di e Delaster Dianan fiel a ahustá nan sitionan web, podcast i kuentanan di Twitter.
Nos a introdusí unsímbolo nobo sentrá den JesuCristu.
“Den e sentro di e símbolo tin un representashon di Thorvaldsen su estatua di marmòl e Christus. E ta ilustrá e Señor resusitá, bibu ekstendiendo Su mannan pa brasa tur ku ke bini serka DjE.
“Komo símbolo, JesuCristu ta pará bou di un arka [kòrdando] nos riba e Salbador resusitá saliendo for di e graf.”17
E tipografiaIglesia di E Iglesia di JesuCrist di e Santunan di e Delaster Dianan, a wòrdu adaptáden mas ku 50 idioma. Nòmber di “Domain” nobo a wòrdu atkerí rònt mundu.
Apresio pa Ayudo di Otronan
Nos ta apresiá e hopi hendenan bon i gentil ku a honrá nos deseo pa wòrdu yamá pa nos nòmber korekto. Resientemente mi a lesa un artíkulo ku a sita un kardenal Katóliko refiriendo na “e Santunan di e Delaster Dianan”.18 Ora mi a reuní ku un lider di un iglesia Cristian un luna pasá na e [parti] ost di Merka, el a referí na e Iglesia den su promé referensia ku nos nòmber kompletu, i duna siguimentu mas ku un biaha ku, “E Iglesia di JesuCristu.”
Nos a realisá ku añadiendo seis palabra na nos nòmber lo no ta ideal pa media, pero manera Presidente Nelson a predisí, “media responsabel lo ta simpátiko kontestando nos petishon.”19 Danki pa ekstendé na nos e mesun konsiderashon duná na organisashonnan kultural, atlétiko, polítiko, òf komunidat dor di usa nos nòmber preferí.
Lo bai tin algun ku, sperando di desvia di òf deminuí e seriedat di nos mishon, lo sigui yama nos “Mormonnan” òf “Iglesia Mormon.” Ku kortesia, nos ta pidi e media imparsial pa honrá nos deseo pa wòrdu yamá na nos nòmber di kasi 200 aña.
E Kurashi di e Santunan di e Delaster Dianan
Tin miles i miles di Santunan di e Delaster Dianan, ku kurashi a proklamá e nòmber di e Iglesia. Ora nos hasi nos parti, otro lo sigui. Mi ta stima e historia aki di Tahiti.
Iriura Jean di dies aña a disidí di sigui e konseho di Presidente Nelson.
“Den su klas na skol nan a papia di nan wikènt … i Iriura a papia di … iglesia.
“Su maestro, Vaite Pifao, a bisa ‘O, kermen bo ta un Mormon?’
“Iriura a deklará firmemente, “No … mi ta miembro di E Iglesia di JesuCristu di e Santunan di e Delaster Dianan!’
“Su maestro a kontesta, ‘Si … bo ta un Mormon.’
“Iriura insistí, ‘no maestro, mi ta miembro di E Iglesia di JesuCristu di e Santunan di e Delaster Dianan!’
“Maestra Pifao tabata asombrá pa e komvikshon di Iriura i a puntra su mes dikon e tabata inistí pa usa [e] nòmber largu di su iglesia. [El a disidí di sa mastokante e Iglesia.]
“[Despues, ora Hermana] Valle Pifao a wòrdu boutisá [el a ekspresá su gratitut] ku Iriura a duna oido na e konseho di Presidente Nelson.”20
“E nòmber di e Iglesia no ta negosiabel.” Laga nos ban dilante den fe Ora nos sigui boluntariamente e konseho di Señor manera revelá dor di Su Profeta bibiente, spesialmente si e ta bai kontra di nos pensamentu inisial, rekeriendo humildat i sakrifisio, Señor ta bendishoná nos ku poder spiritual adishonal. i ta manda Su angelnan pa sostené nos i para banda di nos21 Nos ta risibí Señor Su afirmashon i aprobashon.
Mi ta un testigu okular di e poder di shelu ku ta deskansá riba nos kerido presidente Russell M. Nelson. Su deseo mas sinsero ta pa komplasé Señor i bendishoná e yunan di nos Tata Selestial. Di eksperiensia sagrado, personal, mi ta tèstifiká ku di e Señor Su amor p’e. E ta e Profeta di Dios.
Mi ta tèstifiká ku Jesus ta e Cristu, e Yu di Dios. Den e nòmber di JesuCristu, amèn.