Bin na Cristu, i No Bin Bo So

Pa Bonnie H. Cordon

Presidente General di Mujeres Jóvenes

E mihó manera pa bo mehorá e mundu ta pa prepará e mundu pa Cristu dor di invitá tur pa siguiÉ.

Resientemente mi a risibí un karta di un mucha muhé hóben hopi kurioso. El a skirbi, “Mi ta stanká. … Mi no ta sigur ken mi ta, pero mi ta sinti ku mi ta akinan pa algu grandioso.”

Bo a yega di tin e sintimentu di buska aki, puntrando bo mes si Tata Selestial sa ken bo ta i si E tin mester di bo? Mi kerido hubentut, i na tur, mi ta tèstifiká ku e kontesta ta si! Señor Tin un Plan pa boso! Señor a prepará boso pa e dia aki, awor aki, pa ta un fortalesa i forsa pa bon den Su obra poderoso. Nos tin mester di boso! Simplemente e lo no ta asina grandioso sin boso!

Bou di sirkumstansianan sagrado, nos profeta stimá, Presidente Russell M. Nelson, un biaha a kòrda mi di dos simpel bèrdat ku ta fundamental pa boso obra grandioso i glorioso.

Miéntras mi tabata sintá den sofa ku mi kasá, nos profeta a hala su stul serka, kasi rudia ku rudia ku nos, i a wak mi ku su wowonan blou penetrante. Mi no tabata sigur si mi kurason tabata bati mas duru òf a para kompletamente ora ku el a yama mi pa sirbi komo e Presidente General di Mujeres Jóvenes. El a hasi un pregunta ku ta resoná ainda den mi kurason, “Bonnie, kiko ta e kos di mas importante ku e [hubentut] mester sa?”

Mi a reflekshoná un ratu i a bisa,“Nan mester sa ken nan ta.”

“SI!” el a sklama, “i nan mester sa nan propósito.”

Nos Identidat Dibino

Abo ta un kerido yu stimá di Tata Selestial. E stima boso asinaperfekto ku El a manda Su Yu, JesuCristu, pa ekspiá pa abo i pa ami.¹ E amor di e Salbador no ta faya—asta ora nos faya! Nada no por separá nos for di e amor di Dios.² Rekordando e amor aki por yuda nos pusha bèk e konfushon di mundu ku ta purba debilitá nos konfiansa den e identidat dibino i hasi bo siegu pa bo pontenshal.

Na un konferensia di FSY, mi a topa dos muhé hóben ku tabata lucha. Tur dos hóben a menshoná kon nan a buska den nan bendishon patriarkal pa bolbe deskubrí Señor Su amor i guia pa nan personalmente. Buska bo bendishon patriarkal, supla e stòf si mester, pero studié ku frekuensia. Si bo no tin unu, buska unu—lihé. No demorá pa buska pa sa kiko Señor ke bisa bo awor tokante ken bo ta.

Nos Propósito Eterno.

Presidente Nelson su di dos bèrdat duna na nos e dia ei tabata pa konosé nos propósito. Esaki ta nos enkargo grandi i noble.

Hopi aña pasá, mi yu Tanner tabatin masoménos sinku aña ora ku el a hunga su promé wega di futbòl. E tabata emoshoná!

Ora ku nos a yega na e wega, nos a realisá ku su tim tabata usando un palu di gol di tamaño normal—no un palu di gol chikí, pero un nèt hopi grandi ku tabata mustra demasiado grandi pa muchanan di sinku aña.

E wega a tuma proporshonnan mitiko ora mi a mira Tanner tuma e posishon di kiper. Mi tabata fasiná.hopi sorpresá. Di bèrdat e tabata komprondé su propósito kuidando e nèt ei?

E flùit a zona, i nos tabata asina meti den e wega ku nos a lubidá kompletamente riba Tanner. Diripente un di e miembronan di e ekipo kontrali a haña e bala i tabata avansá lihe direkshon di dje. Mi a wak den Tanner su direkshon pa ta sigur ku e ta kla pará pa defende e gol. Mi a mira algu ku mi no a spera.

Na sierto momento den e wega, Tanner a wòrdu distraí i a kuminsá pasa su man robes den e diferente burakunan di e nèt. Despues el a hasi meskos ku su man drechi. Despues, [ku] su pia robes. Finalmente, su pia drechi. Tanner tabata kompletamente pegá den e nèt. El a lubidá su propósito i loke nan a konfié pa hasi.

Maske Tanner su karera di futbòl no a dura largu, su lès pa mi e dia ei nunka lo mi lubidá. Nos tur okashonalmente ta wòrdu distraí for di dikon nos ta akinan i nos ta desviá nos energia na otro lugá. Un di e armanan mas potente di Satanas ta pa distraí nos ku kousanan bon i mihó kua, den tempu di nesesidat, por siega i mara nos for di e mihó kousae—e obra mes ku a yama nos den e mundu aki.³

Nos propósito eterno ta pa bin na Cristu i aktivamente uni na DjE den Su gran obra. E ta mes simpel ku hasi loke Presidente Nelson a siña nos: “Kada biaha ku nos hasi kualke kos pa kualke hende … pa hasi i warda nan konbenionan ku Dios, nos ta yudando den e rekohementu di Israel.”⁴ I ora nos hasi Su obra huntu ku n’E, nos ta bin na konosé i stima E mas.

Nos ta buska kontinuamente pa aserká mas na e Salbador dor di fé, arepentimentu kerí, i warda su mandamentunan. Ora nos mara nos mes na DjE dor di kombenionan i ordenansanan, nos bida ta yená ku konfiansa,⁵ protekshon,⁶ i goso profundo i duradero.⁷

Ora nos ta bin na DjE, nos ta wak otronan dor di Su wowonan.⁸ “Bini na Cristu.” Bin awor, pero no bin bo so!⁹

E Evangelio di JesuCristu no ta solamente bunita, e ta esensial pa tur. “No tin otro manera òf medio pa kual [nos] por wòrdu salbá, solamente den i dor di Cristu.”¹⁰ Nos mester di JesuCristu! E mundu mester di JesuCristu.¹¹

Kòrda, e mihó manera pa bo mehorá e mundu ta pa prepará e mundu pa Cristu dor di siguÉ.

Tin un historia den e Buki di Mormon ku ta papia ku poder di e Salbador resusitá pasando tempu ku e Nefitanan. Bo por imaginá bo kon esaki lo tabata?

Ora Cristu a anunsia ku E mester regresá na e Tata, “El a fiha su wowonan rònt atrobe.”¹² Mirando lagrimanan den e wowonan di e hendenan, E tabata sa ku nan kurasonnan tabata deseá pa E keda mas tantu.

E Salbador ta invitá e Nefitanan pa wòrdu saná

El a puntra: “Boso tin algun entre boso ku ta malu? Trese nan aki. Boso tin kualke ku ta mankaron, òf siegu, … surdu, òf afligí di kualke kos? Trese nan aki i Ami lo kura nan.”¹³

Teniendo gran kompashon, E no a pone limite i a yama tur “ku ta afligí den kualke manera.” Mi ta stima [e echo] ku nada no ta muchu grandi òf muchu chikitu pa JesuCristu sana.

E konosé nos sufrimentunan tambe i ta yama, Trese dilanti esun ansioso i deprimí, esun kansá, esun orguyoso i ku ta wòrdu mal komprendé, e solitarionan, òf esnan ku “ta afligi na kualke manera.”

I tur “a bai dilanti … ; i El a sana kada un di nan. …

“… Tantu esnan ku a wòrdu saná i ku esnan ku a wòrdu kura, [a] kai na Su pia, i a alab’É.”¹⁴

Kada biaha ku mi lesa esaki, mi ta puntra mi mes: Ken lo mi trese na Cristu? Ken abo lo trese?

Nos por bolbe wak rònt atrobe. manera Jesus a hasi, pa sigurá ku no a falta niun hende i pa invitá kada un pa bin pa siña konosé E?

Laga mi komprartí un ehèmpel di kon simpel por ta. Mi amigu hóbendi 15 aña Peyton, tabatin un meta simpel pa lesa 5 versíkulo di skritura durante desayuno tur dia, pero e no a djis hasié su so. Mirando atrobe, Peyton a invitá su mayornan i su rumannan, asta su ruman hòmber di sinku aña. E akto aparentemente chikí aki ta loke Cristu tabata siña ora ku El a invitá, “Trese nan aki.”

E invitashon aki di Señor ta ekstendé te ku awe ainda. Mujeres Jovenes i hombres Jovenes, kuminsá awor, den bo propio kas. Lo bo hasi orashon i pidi Tata Selestial kon abo por sostené bo mayornan segun nan ta sigui yega na Cristu? Nan mester di bo mes tantu ku abo mester di nan.

Despues wak atrobe na bo rumannan, amigunan, i bisiñanan. Ken lo bo trese na Cristu?

Nos Salbador a deklará, “Wak, Ami ta e lus; Ami a pone un ehèmpel pa boso.”¹⁵ Nos ta sinti e amor i pas di e Salbador ora nos ta uni na DjE den salba Dios Su famia, pasobra eE a primintí, “Esun ku sigui Mi lo no kana den skuridat, pero lo tin e lus di bida.”¹⁶

Esta un tempu glorioso pa ta komprometé ku e kousa di Cristu!

Si, boso ta aki pa algu grandioso. Mi ta uni ku Presidente Nelson, ku a bisa; “Señor tin mester di bo pa kambia e mundu. Si bo akseptá i sigui Su boluntat pa bo, lo bo haña bo mes ta logra loke ta imposibel!”¹⁷

Ku firmesa mi ta tèstifiká ku Señor sa ken bo ta, i E stima bo! Huntu, nos lo avansá Su propósito te na e dia grandi ora ku Cristu Mes regresá na e mundu aki i yama kada un di nos pa bin “akinan.” Nos lo reuní ku goso, pasó nos ta esnan ku a bini na Cristu, i nos no ta bini nos so. Den e nòmber di JesuCristu, amèn.