E Kompashon Permanente di e Salbador
E ekspreshon di kompashon pa otronan ta e esensia di e evangelio di JesuCristu.
Un di e prinsipionan mas remarkabel siñá pa e Salbador durante Su ministerio terenal tabata trata otronan ku kompashon. Laga nos reflekshoná riba e prinsipio aki i su aplikashon práktiko dor di konsiderá e relato di Jesus Su bishita na e kas di Simon e fariseo.
E Evangelio di Lukas ta relatá ku sierto muhé, konsiderá un pekadó, a drenta kas di Simon ora Jesus tabata einan. Ku humildat kontrito, e nuhé a aserká Jesus, a laba Su pianan ku su lágrimanan, seka nan ku su kabei, i despues a sunchi i a hunta nan ku perfume spesial.1 E anfitrion orguyoso, ku a konsiderá su mes moralmente superior na e muhé, a pensa den su mes ku reproche i arogansia, Si e hòmber aki tabata un profeta, e lo tabata sa ta ken i ki sorto di hende e muhé aki ta ku ta mishi kuné: ku ta un pekadó e ta.”2
E fariseo ku aktitut di ta mas-santu-ku-abo a hib’é na husga inhustamente tantu Jesus i e muhé. Pero den Su omnisiensia, e Salbador tabata konosé Simon su pensamentu i, ku gran sabiduria, a reta Simon su aktitur kondesendiente, i tambe a amonest’é tambe pa su falta di kortesia pa risibí un bishitante spesial manera e Salbador den su kas. En realidat, Jesus Su reprenshon direkto na e fariseo a sirbi komo un testigu ku Jesus di bèrdat tabata poseé e don di profesia i ku e muhé aki, ku un kurason humilde i kontrito, tabata arepentí i pordoná pa su pikánan.3
Manera hopi otro evenemento durante Jesus Su ninisterio terenal, e relato aki ta demostrá atrobe ku e Salbador tabata aktuá ku kompashon pa bin serka Dje—sin distinkshon—i mas spesial pa ku esnan ku mas tabatin mester di Su ayudo. E kontrishon i amor ku reverensia mustrá na Jesus pa e muhé tabata evidensia di su arepentimentu i deseo sinsero pa risibí un remishon di su pikánan. Sinembargo,Simon su kompleho di superioridat, huntu ku su kurason duru,4 a strob’é pa mustra empatia pa e alma arepentí aki, i el a asta referí na e Salbador di mundu ku indiferensia i menospresio. Su aktitut a revelá ku su manera di biba no tabata nada mas ku un opservashon estrikto i bashí di reglanan i manifestashonnan eksterno di su konvikshonnan dor di gabamentu di su mes i santidat falsu.5
E ministerio di kompashon i personalisá di Jesus den e relato aki ta demostrá un modelo perfekto di kon nos mester trata ku nos próhimo. E skrituranan tin ehèmpelnan inkontabel di kon e Salbador, motivá pa Su kompashon profundo i permanente, a interaktuá ku hende di Su tempu i a yuda esnan ku tabata sufri i esnan ku a “kansa, i tabata plamá, manera karné sin wardadó.”6 El a ekstendé Su man miserikòrdioso na esnan ku tabatin nesesidat di alivio for di nan karganan, tantu físiko i spiritual.7
E aktitut di kompashon di Jesus tin su rais den karidat,8 spesialmente, den Su amor puru i perfekto, kual ta e esensia di Su sakrifisio ekspiatorio. Kompashon ta un karakterístika fundamental di esnan ku ta hasi esfuerso pa santifikashon i e kualidat dibino aki ta liga ku otro atributonan Cristian manera yora ku esnan ku ta yora i tin empatia, miserikòrdia, i bondat.9 E ekspreshon aki di kompashon pa otronan ta, en realidat, e esensia di e evangelio di JesuCristu i un evidensia marká di nos serkania spiritual i emoshonal na e Salbador. Ademas, e ta mustra e nivel di influensia ku E tin riba nos kaminda di bida i ta demonstrá e magnitut di nos spiritu.
Ta signifikativo pa opservá ku Jesus Su aktonan di kompashon no tabata pa okashon òf manifestashonnan mandá, a base di un lista di tarea pa wòrdu kompletá pero ekspreshonnan diario di realidat di Su amor puru pa Dios i Su yunan i Su deseo permanente pa yuda nan.
Jesus tabata kapas pa identifiká hende su nesesidatnan hasta for di un distansia. Kermen, no ta un sorpresa, por ehèmpel, ku inmediatamente despues di kura sierto sirbiente di un senturión,10 Jesus a biaha for di Capernaum pa e siudat yamá Nain. Tabata aya ku Jesus a efektuá un di e milagernan mas tierno di Su ministerio terenal ora ku El a manda un hòmber yòn, e úniko yu hòmber di un mama biuda, pa lanta i biba. Jesus no solamente a sinti e sufrimentu intenso di e pober mama aki pero tambe e sirkunstansianan difísil di su bida, i E tabata konmoví pa kompashon sinsero pe.11
Meskos ku e muhé pekadó i e biuda di Nain, hopi hende den nos sirkulo di influensia ta buskando konsuelo, atenshon, inklushon, i kualke yudansa ku nos por ofresé nan. Nos tur por ta instrumento den mannan di Señor i aktua ku kompashon pa esnan den nesesidat, meskos ku Jesus a hasi.
Mi konosé un mucha muhé chikitu ku a nase ku hazelip serio. E mester a haña e di e promé di un serie di hopi operashon riba e di dos dia di su bida. Konmoví pa kompashon sinsero pa esnan ku ta eksperensiá e mesun desafio, e mucha aki i su mayornan a buska pa duna sosten, komprendementu, i asistensia emoshonal na otronan ku ta enfrentá e realidat difísil aki. Nan a skirbi mi resientemente i a kompartí: “Dor di e desafio di nos yu muhé, nos a haña e oportunidat pa topa ku hende maravioso ku tabatin nesesidat di konsuelo, sosten, i ánimo. Algun tempu pasá, nos yu muhé, ku awor tin 11 aña, a papia ku e mayornan di un beibi ku mesun desafio. Durante di e kombersashon aki, nos yu muhé pa un momentu a kita su tapa boka ku e tabata usa pa motibu di e pandemia pa asina e mayornan por a mira ku tin speransa, ounke ku e beibi aki ainda tin un kaminda largu pa bai den e siguiente par di aña pa solushoná e problema. Nos ta sinti hopi gratitut pa e oportunidat pa ekstendé nos empatia na esnan ku ta sufri, manera e Salbador ta hasi pa nos. Nos ta sinti ku nos ta suavisá nos doló kada biaha ku nos aliviá otro hende su doló.”
Mi kerido amigunan, ora nos ta hasi esfuerso intenshonalmente pa inkorporá un aktitut di kompashon den nos manera di biba, manera e ehèmpel di e Salbador, nos lo bira mas sensitivo na nesesidat di hende. Ku e oumento di sensibilidat aki, sentimentunan di interes berdadero i amor lo influensiá tur nos akshonnan. Señor lo rekonosé nos esfuersonan, i ku seguridat nos lo wòrdu bendishoná ku oportunidatnan pa ta instrumentonan den Su mannan pa suavisá kurasonnan i den trese alivio na esnan ku su “mannan ta kologá abou.”12
Jesus Su amonestashon na Simon e fariseo a laga kla ku nunka nos no mester hasi huisio desagradabel i kruel di nos kprohimo, pasó nos tur ta den nesesidat di komprenshon i miserikòrdia, di nos Tata Selestial amoroso, pa nos imperfekshonnan. Esaki no tabata eksaktamente [meskos] loke e Salbador a siña nos na un otro okashon ora El a bisa, “I pakiko bo ta wak e stòf den e wowo di bo ruman, pero no ta ripará e balki ku tin den bo mes wowo?”13
Nos mester konsiderá ku no ta fásil pa komprondé tur e sirkunstansianan ku ta kontribuí na un persona su aktitut òf reakshon. Aparensia por ta desepshonante i hopi biaha no ta representá un midi presis di un hende su komportashon. Kontrali na abo i ami, Cristu ta kapas pa mira ku mas klaridat tur e fasetanan di sierto situashon.14 Asta konosiendo tur nos debilidatnan manera E ta hasi, e Salbador no ta kondená nos sin konsiderashon pero ta sigui pa traha ku nos ku kompashon durante tempu, yudando nos pa kita e balki for d i nos wowo. Jesus semper ta wak na e kurashon, i no riba e aparensia.15 E mes a deklará, “No husga segun aparensia.”16
Awor, konsiderá e konseho sabio di e Salbador na e diesdos disípulonan nefita tokante e kuestion aki:
“I sabi ku boso lo ta huesnan di e pueblo aki, segun e huisio ku ami lo duna boso, ku lo ta hustu. Di manera ku, ki tipo di hòmbernan boso mester ta? Di bèrdat mi ta bisa boso, asta manera Ami ta”17
“Di manera ku mi ta deseá pa boso ta perfekto asta manera Ami, òf boso Tata kende ta na shelu ta perfekto.”18
Den e konteksto aki Señor ta drecha husgamentu riba esnan ku ta tuma riba nan mes pa husga e supuesto fayonan di otronan inhustamente. Pa por kualifiká nos mes pa husga hustamente, nos mester hasi esfuerso pa bira meskos ku e Salbador i mira na e imperfekshonnan di personanan ku kompashon, asta dor di Su wowonan. Konsiderando ku ainda nos tin un kaminda largu di bai pa logra perfekshon, kisas lo ta mihó si nos sinta na Jesus su pianan i roga pa miserikòrdia pa nos propio imperfekshonnan, manera e muhé arepentí a hasi den kas di e fariseo, i no tuma muchu tempu i energia mirando na e imperfekshonnan persibí pa otronan.
Mi kerido amigunan, mi ta tèstifiká ku ora nos hasi esfuerso pa inkorporá e Salbador Su ehèmpel di kompashon den nos bida, nos kapasidat pa komplementá e birtutnan di nos próhimo lo oumentá i nos instinto natural pa husga nan imperfekshonnan lo disminuí. Nos komunion ku Dios lo krese, i sigur nos bida lo bira mas dushi, nos sentimentunan mas tierno, i nos lo haña un fuente di felisidat ku no ta kaba nunka. Nos lo wòrdu konosí komo pasifikadónan,19 kende su palabranan ta mes amabel manera e serena di lènte mainta.
Mi ta pidi den orashon ku nos por bira mas humilde i komprensivo pa otro i ku Señor Su miserikòrdia lo, den humildat perfekto, kalma nos falta di pasenshi pa nan imperfekshonnan. Esaki ta e Salbador Su invitashon na nos. Mi ta tèstifiká ku E ta biba. E ta e modelo perfekto di disipulado miserikòrdioso i ku pasenshi. Mi ta kompartí mi testimonio di e bèrdatnan aki den e nòmber sagrado di e Salbador JesuCristu, amèn.