E Kosnan di Mi Alma
Kiko ta e kosnan riba kua bo ta reflekshná? “Kiko ta e kosnan ku ta importante pa bo? “Kiko ta e kosnan di bo alma?
Mi rumannan, miéntras mi ta pará den nos kerido Sentro di Konferensia un biaha mas, mi ta wòrdu rekordá di e palabranan di e Apòstel Pedro: “Señor, ta bon pa nos pa ta akinan.”1
Mi pensamentunan awe ta sentrá riba e palabranan di e profeta Nefi, ku a tene un registro di su pueblo despues di e morto di Tata Lehi. Nefi a skirbi, “ riba esakinan mi ta skirbi e kosnan mi alma.”2
Antes mi tabata pasa riba e versíkulo aki, pensando ku e palabra kosnan no ta hopi elegante òf spiritual, no ta grandi sufisiente pa konektá ku “mi alma.” Asina mi a siña ku e palabra kosnan ta wòrdu usá den e skrituranan 2,354 biaha.3 Por ehèmpel, den Moises: “Mi ta e Komienso i e Fin, e Dios Todopoderoso; dor di mi Yu Unigenito mi a krea e kosnan aki.”4 I Nefi su palabranan: “At’, mi alma ta deleitá den e kosnan di Señor; i mi kurason ta pensa kontinuamente riba e kosnan ku mi a Wak i tende.”5
E palabranan di Nefi ta trese e preguntanan “Ki kosnan bo ta meditá?” “Ki ta e kosnan ku ta importante pa bo?” “Ki ta e kosnan di bo alma?”
E kosnan di nos alma hopi bia ta wòrdu klarifiká i profundisá dor di hasi pregunta.
Durante e pandemia mi a topa ku hobennan di rònt mundu den vários devoshonal, grandi i chikí, pa medio di transmishon i medio sosial, i nos a diskutí riba nan preguntanan.
José Smith di dieskuater aña tabatin tabatin un pregunta profundo den su alma, i el a hib’ na Señor. Presidente Russell M. Nelson a enfatisá: “Hiba bo preguntanan na Señor i na otro fuentenan fiel. Studia ku deseo pa kere en bes di ku e speransa ku bo por piki pieu den bida di un profeta òf diskrepansia den e skrituranan. Stòp di oumentá bo dudanan dor di kompartí nan ku esnan ku ta duda. Pèrmití Señor pa guia bo riba bo biahe spiritual di deskubrimentu.”6
Hobennan hopi bia ta puntra mi kiko mi ta kere i dikon mi ta kere.
Mi ta kòrda un bishita virtual ku un muhé hóben na su kas. Mi a puntra si ta promé bia un Apòstel a bin na su kas. El a smail i kontestá lihé, “Si.” Su pregunta n’ami tabata bon: “Kiko ta e kosnan mas importante ku mi mester sa?”
Mi a kontestá ku e kosnan di mi alma,e kosnan ku ta prepará mi pa skucha susuro, ku ta alsa mi bista na mas ayá di e mundu, ku ta duna propósito na mi obra den e evangelio i hasta na mi bida.
Permití mi kompartí ku boso algun di e kosnan di mi alma? E kosnan aki ta apliká na tur ku ta buska pa ta bèrdadero disípulo di JesuCristu. Dies ta un bon number. Awe mi ta duna bo shete ku e speransa ku bo ta kompletá ocho, nuebe, i dies for di bo propio eksperiensianan.
Promé, stima Dios e Tata i JesuCristu, nos Salbador.
Jesus a dekretá e promé i gran mandamentu: “Lo bo stima Señor bo Dios, ku henter bo kurason, i ku henter bo alma i ku henter bo mente.”7
Presidente Nelson a deklará su deboshon na Dios, nos Tata Eterno, i na Su Yu, JesuCristu, ora el a wòrdu yamá pa guia Señor Su Iglesia, bisando, “Mi konos’E, stim’E, i priminti di sirbi’E—i boso—ku tur e rosea ku a keda di mi bida.”8
Pues promé, stima e Tata i e Yu.
Di dos, “Stima bo próhimo.”9
Esei no solamente ta un bo idea; e ta e di dos gran mandamentu. Bo próhimo ta bo kasá i famia, miembronan di bario, koleganan di trabou, kompañero di kamber, esnan ku no ta di bo fé, esnan den nesesidat di un yudansa, i frankamente, tur hende. E esensia di “stima bo próhimo” ta ekspresá den e himno “Como Os He Amado.”10
Presidente Nelsona ta rekordá nos, “Ora nos ta stima Dios ku tur nos kurason, E lo bira nos kurasonnan na e bienestar di otronan.”11
Di tres, stima bo mes.
Aki hopi ta lucha. No ta kurioso ku stima nos mes ta parse di ta ménos fásil ku stima otronan? Tòg Señor a bisa, “Stima bo próhimo manera bo mes.”12 E ta balorá e divinidat den nos, i nos tambe mester hasié. Ora nos ta kargá ku fayonan, doló di kurason, sentimentu di ta inadekua, desapunto, rabia, òf piká, e poder di e Ekspiashon di e Salbador, pa diseño divino, ta un di e kosnan ku ta lanta nos alma.
Di kuater, warda e mandamentunan.
Señor a bisa bon kla: “Si bo stima mi, warda mi mandamentunan.”13 Lucha kada dia pa bo ta un tiki mas mihó i sigui pa dilanti den rektitut.
Di sinku, semper ta digo pa asistí na tèmpel.
Mi ta yamé wòrdu rekomendá na Señor. Sea bo tin akseso na un tèmpel òf nò, siendo digno di un rekomendashon di tèmpel ta mantené bo enfoká den e kosnan ku ta importante, e kaminda di kombenio.
Di seis, sea alegre i kontentu.
“Sea di bon ánimo, i no tene miedu.”14 Señor a bisa. Di kon? Kon, ora desafionan enfrentá nos na kada momentu? Pa motibu di e promesa hasí dor di JesuCristu: “Ami Señor ta ku bo, i lo Mi para banda di bo.”15
Presidente Nelson ta deskribí e evangelio restorá “un mensahe di goso!”16 I el a splika, “E goso ku nos ta sinti tin poko di haber ku e sirkunstansianan di nos bida i tur kos di haber ku e enfoke di nos bida.”17
Di shete, sigui Dios Su profeta bibiente.
Esaki por ta di shete riba mi lista di kosnan, pero e ta tòp den mi mente den término di su importansia awendia.
Nos tin un profeta di Dios na mundu awendia! Nunka ignorá kiko esei ta nifiká p’abo. Kòrda e muhé hóben ku mi a menshoná na komienso. E tabata ke a sa kiko ta e kosnan ku ta di mas importansia. “Sigui e profeta bibiente,” mi a bisa i ta enfatisá awe atrobe.
Nos ta wòrdu distinguí komo un Iglesia ku ta wòrdu guiá pa profetanan, videntenan i reveladónan yamá pa Dios pa e tempu aki. Mi ta primintí ku si bo ta skucha i sigui nan konsehonan, nunka lo bo wòrdu guiá den mal kaminda. Nunka!
Nos ta biba den un tempu kaminda nos ta wòrdu “bentá di aki pa aya,”18 ora spiritualidat, integridat, i respèt, ta bou di atake. Nos tin ku hasi nos eskoho. Nos tin e bos di Señor pa medio di Su profeta pa kalma nos miedu i alsa nos bida, pasó ora Presidente Nelson papia, e ta papia pa Señor.
Nos ta bendishoná ku skrituranan i enseñansanan ku ta rekordá nos, “Mi pensamentunan no ta boso pensamentunan, tampoko boso maneranan ta Mi maneranan, Señor a bisa.”19
Asina tabata ku Naaman, un gran lider militar na Syria, pero un leproso, ku a wòrdu bisá ku e profeta Elisha por kur’e. Elisha a manda un mensahero pa bisa Naaman pa baña den e Riu Jordan shete bia i ku e lo bira limpi. Naaman a burla. Siertamente tin un riu mas poderoso ku Jordan, i pakiko manda un siervo ora e tabata spera Elisha, e profeta, pa bin san’e personalmente? Naaman a kana bai, pero eventualmente a wòrdu persuadí dor di su siervonan: “Si e profeta a pidi bo pa hasi algun kos grandi, lo bo no a hasiele?”20 Naaman finalmente a baña shete bia den Jordan i a sana.
E historia di Naaman ta rekordá nos di e rísiko di piki i skohe e partinan di konseho profétiko ku ta pas den nos pensamentu, nos espektativa, òf normanan di awendia. Nos profeta kontinuamente ta guia nos na nos propio Riu Jordan pa wòrdu saná.
E palabranan mas importante ku nos por skucha, meditá, i sigui ta esnan revelá pa medio di nos profeta bibiente. Mi ta tèstifiká ku mi a sinta den konseho ku Presidente Nelson pa diskutí asuntunan importante di e Iglesia i di e mundu, i mi a mira revelashon pasa dor di dj’e. E konosé Señor, e konosé Su maneranan, i e ta desea pa tur e yunan di Dios por skuchaE, Señor JesuCristu.
Pa hopi aña nos a skucha di e profeta dos biaha pa aña den konferensia general. Pero ku e asuntunan kompleho di awendia, Presidente Nelson ta papiando mas tantu den forumnan,21 medio sosial,22 deboshonalnan,23 i asta konferensianan di prensa.24 Mi a opserv’e preparando i presentanto mensahenan reveladó profundo ku a enkurashá mas gratitut, promové mas inklushon di tur nos rumannan na mundu, i mas pas, speransa, goso, salú, i sanashon den nos bidanan individual.
Presidente Nelson ta un komunikadó talentoso, pero [ainda] mas importante, e ta un profeta di Dios. Esei ta asombroso ora bo pensa riba dje, pero e ta krítiko pa realisá ku su guia kla por protehá nos for di engaño, mentira, i maneranan sekular ganando tereno den e mundu awendia.25
E mantel profétiko ta tokante revelashon. “E Restourashon di e Plenitut di e Evangelio di JesuCristu: Un Proklamashon Bisentenal na e Mundu,” duná na konferensia general di Aprel 2020, ta enfatisá riba Señor dirigiendo Su obra. Den e proklamashon aki, e Promé Presidensia i e Quorum di Diesdos Apòstelnan a deklará: “Nos ta deklará enkaresidamente ku e Restourashon primintí lo sigui pa dilanti pa medio di revelashon kontinuo. E tera nunka mas lo no ta meskos, pasó Dios lo “reuní tur kos den Cristu” (Efesionan 1:10.”26
“Tur kos den Cristu”27 i “tur kosnan di mi alma”28 ta loke e Iglesia, e evangelio, i e hendenan aki ta.
Mi ta sera ku un invitashon pa kada un di boso pa konsidera e shete “kosnan di mi alma”ku mi a kompartí awe: stima Dios e Tata i JesuCristu, nos Salbador; stima bo próhimo; stima bo mes; warda e mandamentunan; semper ta digno di un rekomendashon di tèmpel; sea ku goso i alegre; i sigui Dios Su profeta bibiente. Mi ta invitá boso pa identifiká boso propio ocho, nuebe, i dies. Konsiderá maneranan ku bo por komparti “kosnan” di kurason ku otronan i enkurashá nan pa hasi orashon, meditá, i buska e guia di Señor.
E kosnan di mi alma ta mesun presioso pa ami manera di bo nan ta p’abo. E kosnan aki ta fortalesé nos servisio den e Iglesia i den tur e areanan di bida. Nan ta komprometé nos na JesuCristo, nan ta rekordá nos di nos kombenionan, i nan ta yuda nos sinti siguir den e brasanan di Señor. Mi ta tèstifiká ku E ta deseá ku nos alma “nunka lo tin hamber ni set, pero ku ta yená”29 ku Su amor ora nos ta buska pa bira Su bèrdadero disípulonan, di ta un ku n’E manera E ta ku e Tata. Den e nòmber di JesuCristu, amèn.