Invitá Cristu pa ta Outor di Bo Historia

Dor di Camille N. Johnson

Presidente General di Primaria

Laga bo relato ta unu di fe, siguiendo bo Ehèmpel, e Salbador JesuCristu.

Mi ta kuminsá hasiendo vários pregunta, ku intenshon pa reflekshon propio:

Ki tipo di relato personal bo ta skirbiendo di bo mes bida?
E kaminda ku bo ta deskribí den bo historia ta stret?
Bo historia ta kaba kaminda el a kuminsá, na bo hogar selestial?
Tin un ehèmpel den bo historia—i e ta e Salbador JesuCristu?

Mi ta tèstifiká ku e Salbador ta “e Outor i Esun ku ta finalisá nos fe.”¹ Lo bo invit’É pa ta e outor i esun ku ta finalisá bo historia?

E konosé e kuminsamentu for di e final. E tabata e Kreador di shelu i tera. E ke pa nos bin kas bèk na DjE i nos Tata Selestial. El a invertí tur kos den nos i ke pa nos logra.

Kiko bo ta suponé ku ta tene nos for duna nos historia na DjE?

Kisas e komparashon aki por yuda bo den evaluashon propio.

Un abogado efektivo sa ku den un interogashon poko biaha bo mester hasi un testigu un pregunta di kual bo no sa e kontesta. Hasiendo tal pregunta ta invitashon na e testigu pa konta abo—i e hues i e hurado—algu ku bo no sa kaba. Bo por haña un kontesta ku ta sorpresá bo i ta kontrario na e relato ku bo a desaroyá pa bo kaso.

A pesar ku hasiendo un testigu un pregunta ku bo no sa e kontesta ta generalmente bobo pa un abogado di prosedura, kontrario di esaki ta bèrdat pa nos. Nos por hasi pregunta na nos Tata Selestial amoroso, den e nòmber di nos Salbador miserikordioso, i e testigu ku ta kontestá nos preguntanan ta e Spiritu Santu, ku semper ta tèstifiká di e bèrdat.² Pasó e Spiritu Santu ta traha den unidat perfekto ku Tata Selestial i JesuCristu, nos sa ku e manifestashonnan di e Spiritu ta konfiabel. Di kon, anto, tin biaha nos ta resistente pa pidi pa e tipo di yudansa selestial aki, bèrdat manifestá na nos pa e Spiritu Santu? Di kon nos no ta keda sin hasi un pregunta di kual nos no sa e kontesta ora e testigu no solamente ta amistoso pero semper lo bisa e bèrdat?

Kisas ta pasó nos no tin e fe pa aseptá e kontesta ku nos por risibí. Kisas ta pasobra e hòmber òf muhé natural den nos ta resistí pa bira kosnan kompletamente na Señor i konfia E kompletamente. Podisé esei ta p’esei nos ta skohe pa keda ku e relato ku nos a skibi pa nos mes, un vershon konfortabel di nos historia ineditá pa e Maestro Outor. Nos no ke hasi un pregunta i haña un kontesta ku no ta pas presis den e historia ku nos ta skirbiendo pa nos mes.

Frankamente, poko di nos probablemente lo skirbi den nos historianan e pruebanan ku a refiná nos. Pero nos no ta gusta e kulminashon glorioso di un historia ku nos ta lesa ora e protagonista ta vense e lucha? Pruebanan ta e elementonan ku ta hasi nos historianan faborito, konvinsente, interminabel, ku ta promové fe, i bale la pena pa konta. Bunita luchanan skirbí den nos historianan ta lokual ta hiba nos mas serka na e Salbador i ta refiná nos, hasiendo nos mas manera E.

Pa David por a vense Goliat, e mucha hòmber mester a konfrontá e gigante. E relato konfortabel di David lo por a bira un regreso na kuido di karné. Pero na su lugá el a reflehá riba su eksperensia salbando e lamchinan for di un leon i un oso. I edifikando riba e prestashonnan heroiko aki, el a reuní fe i kurashi pa laga Dios skirbi su historia, deklarando, “Señor ku a salba mi for di e gara di leon i oso, lo libra mi tambe for di man di e filisteo aki.”³ Ku un deseo pa laga Dios prevalesé, ku un orea pa e Spiritu Santu, i un disposishon pa laga e Salbador ta e outor i esun ku ta finalisá su historia, e mucha hòmber David a derotá Goliat i a salba su pueblo.

E prinsipio sublime di albedrio ta, naturalmente, pèrmití nos pa skirbi nos mes historianan—David por a bai kas, bèk na kuida karné. Pero JesuCristu ta para kla pa usa nos komo instrumentonan dibino, pòtlotnan di sleip den Su man, pa skirbi un obra maestro! E ta miserikordioso i dispuesto pa usa ami, un pòtlot flaku, komo un instrumento den Su mannan, si mi tin fe pa laga E ta e outor mi historia.

Ester ta un otro ehèmpel bunita di laga Dios prevalesé. Na lugá di tene su mes na un relato kouteloso di preservashon propio, el a ehersé fe, entregando kompletamente su mes na Señor . Haman plania e destrukshon di tur hudiu den henter Persia. Mardokeo, famia di Ester, a haña sa di e komplòt i a skirbié, urgiendo e pa e papia ku e rei na bienestrar di su pueblo. El a konté ku esun ku aserká e rei sin e manda yam’é lo nifiká su morto. Pero den un tremendo akto di fe, el a pidi Mardokeo pa reuní tur hudiu i pa yuna p’e. “Mi ku mi sirbientenan ta hasi meskos,” el a bisa, “ i despues mi ta bai serka rei, maske mi aktua kontra lei: i si ta muri mi tin ku muri, lo mi muri.”⁴

Ester tabata dispuesto pa laga e Salbador skirbi su historia ounke, dor di e lèns di mortalidat, e final lo por tabata trágiko. Afortunadamente, e rei a risibí Ester, i e hudiunan di Persia a wòrdu salbá.

Klaro, ku Ester su nivel di kurashi ta wòrdu pidí poko biaha di nos. Pero laga Dios prevalesé, laga E ta e outor i Esun ku ta finalisá nos historia, ta rekerí di nos pa warda Su mandamentunan i e kombenionan ku nos a hasi. Ta nos wardamentu di mandamentu i kombenio lo habri e liña di komunikashon pa nos pa risibí revelashon pa medio di e Spiritu Santu. I ta dor di e manifestashonnan di e Spiritu Santuku nos lo sinti e Maestro Su man, skirbiendo nos historia ku nos.

Na aprel 2021, nos Profeta, Presidente Russell M. Nelson, a pidi nos pa konsiderá kiko nos por hasi si nos tabtatin mas fe den JesuCristu. Ku mas fe den JesuCristu, nos por hasi un pregunta na kual nos no sa e kontesta—puntra nos Tata ku ta na Shelu, den e nòmber di JesuCristu, pa manda un kontesta pa medio di e Spiritu Santu, ku ta tèstifiká di bèrdat. Si nos tabatin mas fe, nos lo hasi e pregunta i despues ta dispuesto pa aseptá e kontesta ku nos risibí, asta ku e no ta pas den nos relato konfortabel. I e bendishon primintí ku lo bini for di aktua den fe den JesuCristu ta un oumento di fe den Dje komo nos outor i esun ku ta finalisá. Presidente Nelson a deklará ku nos ta “risibí mas fe dor di hasi algu ku ta rekerí mas fe.”⁵

Asina, un pareha sin yu ku ta sufri ku infertilidat por puntra ku fe si nan tin ku adoptá un muchanan i ta dispuesto pa aseptá e kontesta, a pesar ku e relato ku nan mes a skirbi pa nan mes tabata inkluí un nasementu milagroso.

Un pareha ansiano por puntra si ta tempu pa nan sirbi un mishon i ta dispuesto pa bai, a pesar ku e relato ku nan a skirbi pa nan mes ta inkluí mas tempu den e forsa laboral. Òf kisas e kontesta por ta “ainda no,” i nan lo siña den kapítulonan mas patras di nan historia di kon nan tabata nesesario un tiki mas largu na kas.

Un mucha hòmber òf mucha muhé teenager por puntra den fe si e aktividat deportivo, akadémiko òf musikal ta di mas balor i ta dispuesto pa sigui e inspirashonnan di e testigu perfekto, e Spiritu Santu.

Di kon nos ke pa e Salbador ta e outor i etinalisadó di nos historianan? Pasobra E konosé nos potensial perfektamente, E lo hiba nos na lugánan ku nunka nos mes no a imaginá. E por hasi nos un David òf un Ester. E lo rèk nos i refiná nos pa ta mas manera E. E kosnan ku nos lo logra ora nos aktua ku mas fe lo oumentá nos fe den JesuCristu.

Rumannan, solamente un aña pasá nos profeta stimá a puntra: “ Bo ta dispuesto pa laga Dios prevalesé den bo bida? … Bo ta dispuesto pa laga loke ku E tin mester pa bo hasi ta mas importante ku otro ambishon?”⁶ Ku humildat mi ta agregá na e preguntanan profétiko aki: “Lo bo laga Dios ta e outor i Esun ku ta finalisá bo historia?”

Den Revelashon nos ta siña ku nos lo para dilanti Dios i wòrdu husgá for di e bukinan di bida, segun nos obranan.⁷

Nos lo wòrdu husgá pa nos buki di bida. Nos por skohe pa skirbi un relato konfortabel pa nos mes. Òf nos por pèrmití ku e Maestro Outor i Esun ku ta finalisá pa skirbi nos historia ku nos, lagando e ròl ku E tin mester pa nos hunga tuma presedensia riba otro ambishonan.

Laga Cristu ta e outor i esun ku ta finalisá bo historia!

Laga e Spiritu Santu ta bo testigu!

Skirbi un historia den kual e kaminda ku bo ta ariba ta stret, riba un ruta ku ta hiba bo bèk na bo hogar selestial pa biba den presensia di Dios.

Laga e atversidat i aflikshon ku ta parti di tur bon historia ta un medio pa kual bo por yega mas serka di, i bira mas manera, JesuCristu.

Konta un historia den kual bo ta rekonosé ku e shelunan ta habrí. Hasi preguntanan na kual bo no sa e kontesta, sabiendo ku Dios ta dispuesto pa hasi Su boluntat konosí pa bo pa medio di e Spiritu Santu.

Laga bo relato ta unu di fe, siguiendo bo Ehèmpel, e Salbador JesuCristu. Den e nòmber di JesuCristu, amèn.