“Ta ketu, i Sa ku Ami ta Dios”
Nos por ta ketu i sa ku Dios ta nos Tata Selestial, nos ta Su yunan, i JesuCristo ta nos Salbador.
Durante un kas habrí i dia di medio di komunikashon resien pa un kas nobo di Señor, mi a guia un grupo di periodista den un paseo den e edifisio sagrado. Mi a deskribí e propósito di e tèmpelnan di e Iglesia di JesuCristo di e Santunan di e Delaster Dianan i kontestá nan vários preguntanan ekselente.
Promé ku drenta e kamber selestial, mi a splika ku e kamber partikular aki den e kas di Señor ta representá simbolikamente e pas i bunitesa di e hogar selestial di kua nos por regesá despues di e bida aki. Mi a indiká na nos invitadonan ku nos no mester papia miéntras nos ta den e kamber selestial, pero ku mi lo ta kontentu di kontestá kualke pregunta despues ku nos move bai e otro stòp di nos paseo.
Despues di a sali for di e kamber selestial i reuní den e siguiente lokalidat, mi a puntra nos invitadonan si nan tbatin kualke opservashon ku nan ker a kompartí. Un di e periodistanan a bisa ku emoshon, “nunka mi a eksperensiá algu asin’ei den henter mi bida. Mi no tabata sa ku silensio asina ei tabata eksistí den e mundu aki; simplemente mi no por a kere ku e tipo di silensio aki por tabata posibel.”
Mi tabata maraviá tantu pa su sinseridat i tambe pa e deklarashon skèrpi ku e persona a hasi. I e reakshon di e periodista ta ilustrá un aspekto importante di kietut—superando i serando orea pa e komoshon di nos ambiente eksterno.
Ora ku despues mi a skrudiñá e periodista su komentario i reflekshoná riba e ritmo lihé di nos bida modèrno—tan okupá, bochincha, divertishon, distrakshon, i desviashon di kaminda hopi bia ta parse di ta eksigí nos atenshon—un skritura a bin na mi mente: “Ta ketu, i sa ku ami ta Dios.”1
Ta mi orashon ku e Spiritu Santu lo iluminá kada un di nos ora nos ta konsiderá un dimenshon mas haltu i mas santu den nos bida—un kietut spiritual interno di e alma ku ta abilitá nos pa konosé i rekòrdá ku Dios ta nos Tata Selestial, nos ta Su yunan, i JesuCristo ta nos Salbador. E bendishon remarkabel aki ta disponibel pa tur miembro di Iglesia ku ta luchando fielmente pa bira “un pueblo di kombenio di Señor.”2
Keda Trankil
Na 1833, e Santunan na Missouri tabata e opheto di persekushon intenso. Gèngnan a saka nan for di nan hogarnan den Kondando di Jackson, i algun miembro di Iglesia a purba na establesé nan mes den kondadonan serkano. Pero e persekushon a sigui, i e menasanan di morto tabata hopi. Den e sirkustansianan desafiante, Señor a revelá e spues, vuestros corazones en lo concerniente a Sion, porque toda carne está en mis amanos; quedaos tranquilos y bsabed que yo soy Dios.iguiente instrukshon na e Profeta Jose Smith na Kirtland, Ohio:
“pues, vuestros corazones en lo concerniente a Sion, porque toda carne está en mis amanos; quedaos tranquilos y bsabed que yo soy Dios.”3
Mi ta kere ku Señor Su atmonishon pa “ta ketu” ta muchu mas ku simplemente no papia òf no move. Kisas Su intenshon ta pa nos kòrda i konfia riba djE i Su poder “na tur momentu i den tur kos, i na tur lugá ku [nos] por ta aden.”4 Pues, “ta ketu” por ta un manera pa kòrda nos pa enfoká riba e Salbador invariablemente komo e fuente mas importante di kietut den e alma ku ta fortalesé nos pa hasi i surpasá kosnan difísil.
Konstruí riba e Piedra
Fe bèrdadero semper ta enfoká den i riba Señor JesuCristo—den djE komo e Yu Divino i Unigénito di e Tata Eterno i riba djE i e mishon di redenshon ku El a kumpli kuné.
“Pasobra el a satisfasé e finnan di e lèi, i a reklamá tur esnan ku tin fe den dje; i nan ku tin fe den dje lo tene na tur kos bon; p’esei anto e ta defendé e kousa di e yunan di hende.”5
JesuCristo ta nos Redentor,6 nos Mediador,7 i nos Abogado8 ku e Tata Eterno i e piedra riba kua nos mester konstruí e fundeshi spiritual di nos bida.
Helaman a splika, “Nos mester kòrda pa edifiká nos fundeshi riba e baranka di nos Redentor, ku ta Cristo, e Yu di Dios. Despues, ora e diabel manda su bientunan poderoso dilanti—su flechanan den e warwarúnan—i ora tur su hagel i tormenta furioso bati riba nos, esaki lo no haña poder riba nos pa hala nos abou den e abismo di miseria i angustia sin fin, pa motibu di e baranka riba kua nos ta edifiká, kua ta un fundeshi sigur—un fundeshi riba kua si nos edifiká nos lo no kai.”9
E simbolismo di Cristo komo e “piedra” riba kua nos mester konstruí e fundeshi di nos bida ta hopi instruktivo. Por fabor nota den e versikulo ku e Salbador no ta e fundeshi. Mas bien, nos ta wòrdu amonestá a konstruí nos fundeshi spiritual personal riba djE.10
E fundeshi ta e parti di un edifisio ku ta konekta na e tera. Un fundeshi fuerte ta proveé protekshon for di desaster natural i hopi otro forsanan destruktivo. Un fundeshi apropiá tambe ta distribuí e peso di unástruktura riba un aria grandi p’asina evitá sobrekargá e tera eibou i proveé un superfisie na nivel pa konstrukshon.
Un konekshon fuerte i konfiabel entre e tera i un fundeshi ta esensial si e struktura lo ke keda fuerte i stabil durante tempu. I pa sierto tipo di konstrukshon partikular, pin pa ankra i baranan di heru por wòrdu usá pa konektá e fundeshi di e konstrukshon na un “piedra,” e piedra duru i sólido bou di e materialnan na superfisie manera e tera i e greis.
Na un manera similar, e fundeshi di nos bida mester ta konektá na e piedra di Cristo si nos ke keda firme i stabil. E kombenionan i ordenansanan sagrado di e Salbador Su evangelio restorá por wòrdu kompará ku e pin pa ankra i e baranan di heru pa konekta e edifisio na e piedra. Kada biaha ku fielmente nos ta risibi, revisá, rekordá, i renobá kombenionan sagrado, nos ankranan spiritual ta mas sigurá firmemente ku nunka i pegá duru den e “piedra” di JesuCristo.
“Pesei, ken ku kere den Dios por tin e siguransa speransa den un mundu mihó, si, hasta un lugá na e banda drechi di Dios, kua speransa ta bin dor di fé, hasiendo un ankra den e almanan di hende, kua lo hasi nan firme sigur, semper abundante den bon obra, siendo dirigí pa glorifiká Dios.”11
Inkrementando i kresiendo “den e proseso di tempu,”12 “virtut [ta yena nos] pensamentunan konstantemente,”: nos “konfiansa [ta bira mas fuerte] den e presensia di Dios,” i “e Spiritu Santu [ta nos] kompañero konstante.”13 Nos ta bira mas ankra, rais mas profundo, mas establesé, i mas sigur.14 Ora ku e fundeshi di nos bida ta konstruí riba e Salbador, nos ta wòrdu bendishoná pa “ta ketu”—pa por tin siguransa spiritual ku Dios ta nos Tata Selestial, nos ta Su yunan, i JesuCristo ta nos Salbador.
Tempunan Sagrado, Lugánan Santu, i e Hogar
Señor ta proveé tantu tempu sagrado i lugánan santu pa yuda nos eksperensiá i siña tokante di e kietut interno den nos almanan.
Por ehèmpel, e Sabat ta Dios Su dia, un tempu sagrado poné un banda pa rekòrdá i adorá e Tata den e nòmber di Su Yu, pa partisipá den e ordenansanan di saserdosio, i pa risibí i renobá e kombenionan sagrado. Kada siman nos ta adorá Señor durante e estudio den hogar i komo “ko siudadanonan ku e santunan”15 durante e Santa Sena i otro reunionnan. Riba Su dia santu, nos pensamentunan, akshonnan, i komportashon ta señalnan ku nos ta duna na Dios i un indikashon di nos amor p’E.16 Kada djadumingu, si nos ke, nos por ta ketu i sa ku Dios ta nos Tata Selestial, nos ta Su yunan, i JesuCristo ta nos Salbador.
Un aspekto sentral di nos adorashon riba Sabat ta pa “bai na e kas di orashon i ofresé [nos] sakramentu na [Señor] riba su dia santu.”17 E “kas[nan] di orashon” den kua nos ta reuní riba e dia di reposo ta kasnan di reunion i otro fasilidatnan aprobá—lugánan santu di reverensia, adorashon, i enseñansa. Kada kas di reunion i fasilidat ta dediká dor di e outoridat di e saserdosio komo un lugá kaminda e Spiritu di Señor por biba i kaminda Dios Su yunan por bin “na e konosementu di nan Redentor.”18 Si nos ke, nos por “ta ketu” den lugánan santu di adorashon i sa kada bes mas sigur ku Dios ta nos Tata Selestial, nos ta Su yunan, i JesuCristo ta nos Salbador.
E tèmpel ta un otro lugá santu spesífikamente apartá pa adorashon i sirbi Dios i siña bèrdatnan eterno. Nos ta pensa, i bisti diferente den e kas di Señor for di kualke otro lugá ku nos por frekuentá. Den Su kas santu, si nos ke, nos por ta ketu i sa ku Dios ta nos Tata Selestial, nos ta Su yunan, i JesuCristo ta nos Salbador.
E propósito prinsipal di e tempu sagrado i lugánan santu ta eksaktamente e mesun kos: ta enfoká konstantemente nos atenshon riba nos Tata Selestial i Su plan, Señor JesuCristo i Su Ekspiashon, e poder edifikante di e Spiritu Santu, i e promesanan asosiá ku e ordenansanan i kombenionan sagrado di e Salbador Su evangelio restorá.
Awe mi ta ripití un prinsipio ku previamente mi a enfatisá. Nos hogarnan mester ta e kombinashon prinsipal di tantu tempu sagrado i luga sagrado kaminda individuonan i famianan por “ta ketu” i sa ku Dios ta nos Tata Selestial, nos ta Su yunan, i JesuCristo ta nos Salbador. Lagando nos hogar pa nos adorá riba e Sabat i den e kas di Señor sigur ta esensial. Pero solamente si nos regresá na nos hogar ku un perspektiva i fortalesa spiritual optené den e lugánan i aktividatnan santu nos por sostené nos enfoke riba e propósito primario di e bida mortal pa surpasá e tentashonnan ku ta asina prevalesiente den nos mundu dekaí.
Nos eksperiensianan kontinuo di Sabat, tèmpel, i hogar mester fortifiká nos ku e poder di e Spiritu Santu, ku un konekshon di kombenio kontinuo i mas fuerte na e Tata i e Yu, i ku “un brio perfekto di speransa”19 den Dios Su promesanan eterno.
Ora hogar i Iglesia ta reuní huntu den un den Cristo,20 nos por tin problema den kada banda, pero nos lo no tin angustia den nos mente i kurason. Nos por ta emoshoná dor di nos sirkumstansia i desafio, pero nos lo no ta den desesperashon. Nos por wòrdu perseguí, pero tambe nos lo rekonosé ku nunka nos lo ta nos so.21 Nos por risibí fortalesa spiritual pa bira i keda firme, stabil, i real.
Promesa i Testimonio
Mi ta primintí ku si nos konstruí nos fundeshi di nso bida riba e “piedra” di JesuCristo, nos por wòrdu bendishoná dor di e Spiritu Santu pa risibí i kietut individuo i spiritual den e alma ku ta abilita nos pa konosé i rekòrdá ku Dios ta nos Tata Selestial, nos ta Su yunan, JesuCristo ta nos Salbador, i nos por ta bendishoná pa hasi i surpasá kosnan difísil.
Ku goso mi ta testifiká ku Dios ta nos Tata Selestial, nos ta Su yunan, i JesuCristo ta nos Redentor i e “piedra di nos salbashon. Asina mi ta testifiká den e nòmber sagrado di Señor JesuCristo, amèn.