Komo sosten di e generashon ku ta lantando

Dor di hermano Michael T. Nelson

Di Dos Konsehero di e Presidensha General di Hombres Jovenes

Ta e relashonnan den bida di e hóbennan ta esnan ku tin e influensia di mas grandi riba nan desishonnan.

Preparando pa papia ku boso, mi a wòrdu intrigá pa e historia di Helaman i e yu hòmbernan hóben di e pueblo di Ammon. Mi a sinti e poder di e profetanan di buki di Mormon ku ta siña mayornan, obispunan i miembronan di bario dor di studia e relato aki.

Helaman tabata un hòmber ku e Amonitasnan hóben por a konfia. El a yuda nan desaroyá i madurá den rektitut. Nan tabata konosé i stim’é i “ tabata kier pa [e] por tabata nan lider.”¹

Helaman tabata stima e hóbennan aki manera su yunan i a mira nan potensial.² Elder Dale G. Renlund a siña ku “pa sirbi otronan na un manera efektivo nos mester mira nan …ku e wowonan di Tata Selestial. E ora ei so nos por kuminsá komprondé e berdadero balor di un alma. E ora ei so nos por sinti e amor ku Tata Selestial tin pa tur …Su yunan.”³ Obispunan awendia ta bendishoná ku bon komprondementu pa wak e identidat dibino di e hóbennan bou di nan kuido.

Helaman a “konta”⁴ e hóbennan ku tabata bou di su kuido. El a pone prioridat na formamentu di un bon relashon ku nan.

Na un momentu kritiko ora ku bida i morto tabata den wega, Helaman i su guereronan hóben a pèrdè for di bista e ehérsito ku tabata persiguí nan. Helaman a konsultá ku e hóbennan:

“Ata’ki, nos no sa si nan a stòp pa nos por bai kontra di nan. …

“Pues, ki boso ta bisa mi yunan … ?”⁵

E hóbennan fiel aki a respondé, “Tata, ata’ki nos Dios ta ku nos i E lo no permití pa nos kai; pues laga nos sigui pa dilanti.”⁶ E bataya a wòrdu gana e dia ei, ya ku Helaman a sostené e hóbennan aki den nan determinashon⁷ pa tuma akshon.⁸

E hóben Amonitanan tabata tin un gran kousa i tabata balente den “sostené e pueblo.”⁹ “E forsa chikí aki,” guia pa Helaman, “a plama gran speransa i hopi goso”¹⁰ den e kurason di e ehérsitonan di e Nefitanan ku eksperensia. Obispunan awendia por guia nan hóbennan eksepshonal pa bendishoná e bario i rekohé Israel. Presidente Russell M. Nelson a siña ku esaki ta “e mishon pa kual [nan] a wòrdu manda mundu.”¹¹

Manera e Amonitanan yhóben aki ku tabata “fiel na tur momentu den kualkier kos ku wòrdu konfia na nan”¹² Helaman a sigui su lidernan fielmente. No ta importá e reto o kontratempu, Helaman a keda semper “fihá ku un determinashon”¹³ pa avansá den nan propósito. Ora ku el a wòrdu dirigí pa “sigui avansá ku [su] yunan hòmber chikitu,”¹⁴ el a obedesé.

E hubentut di awendia ta wòrdu bendishoná segun ku obispunan ta sigui e guia di nos lidernan pa “konsultá ku e presidentenan di Mujeres Jovenes di e bario.”¹⁵ Presidentenan di Estaka ta sigurá ku obispunan i presidensianan di Mujeres Jovenes ta wòrdu instruí den kumplimentu di nan responsabilidatnan pa ku e hóbennan.¹⁶

Heleman a honra kombenionan. Ora ku Ammon a siña e evangelio na e mayornan di e hóbennan aki, e mayornan aki a brasa esaki ku kurason habri. Nan tabata asina komprometí ku nan bida nobo di disípulo rekto ku nan a hasi un kombenio pa “pone e armanan di nan rebelion abou.”¹⁷ E úniko kos ku a pone nan konsiderá pa kibra e kombenio aki, hibando nan bèk na nan pasado konosí di lucha, tabata di mira e Nefitanan den peliger.

E Amonitanan kier a yuda e pueblo aki ku a ofresé nan un kas sigur. Helaman, huntu ku otronan, a persuadí nan pa warda nan kombenio di nunka bringa. E tabata konfia mas den e forsa ku Dios lo a proveé ku den e forsa ku e Amonitanan aki lo por a duna nan ku spadanan i flechanan.

Ora ku Helaman i su guereronan hóben a enfrentá retonan enorme, Helaman tabata desidido. “Ata’ki, e no ta importá—nos ta konfia ku Dios lo libra nos.”¹⁸ Un bes, ora ku nan tabata serka di muri di hamber, nan reakshon tabata pa “saka [nan] alma den orashon na Dios, pa e por a fortalesé [nan] i libra [nan] …[i] Señor …a bishita [nan] ku siguransa ku E lo libra [nan]”¹⁹ “pa motibu di nan fe eksepshonal den loke nan a siña pa kere.”²⁰

Nos ta siña for di Helaman ku e hóbennan aki a wòrdu sostené dor di nan mayornan. E mayornan fiel aki tabata sa ku nan tabata tin e responsabilidat primordial pa siña nan yunan. Nan a siña nan yunan pa warda e mandamentunan i kana den rektitut”²¹ dilanti Dios. Nan mamanan a siña nan “ku si nan no duda, Dios lo libra nan.”²² Nan tatanan a duna un ehèmpel poderoso di kon pa hasi kombenio.²³ E guereronan di pasado aki tabata sa e horornan di bataya. Nan a konfia Helaman nan yunan sin eksperensia den su kuido i sostené nan dor di manda “hopi komestibelnan.”²⁴

Helaman no tabata su so segun e tabata sirbi su ehérsito di hóbennan. E tabata tin hende rondó di dje ku el a akudí na dje pa sosten i guia. El a aserka Kapitan Moroni pa yudansa i esaki a bini.

Niun hende ku ta sirbi den Señor Su reino ta sirbi nan so. Señor a bendishoná nos ku barionan i estakanan. Pa medio di su organisashon restorá, nos tin e medionan, konosementu i inspirashon pa fronta kualkier reto.

Un obispu ta proveé guia pa e bario pa medio di konsehonan.²⁵ E ta promové entrevistanan ministrante pa trimèster i despues enkurashá e Quorumnan di elder i Sosiedat di Sokoro pa kumpli ku nan responsabilidat di ministrá na e famianan. E presidenshanan aki ta tuma mando den evaluashon di nesesidatnan i buska solushonnan inspirá. Presidentenan di estaka ta ofresé sosten dor di instruí e korum di eldernan i presidensianan di Sosiedat di Sokoro den e responsabilidatnan aki.

Por haña e guia nesesario pa lidernan i mayornan den e Gospel Library i e aplikashon Gospel Living. Den e rekursonan inspirá aki, nos por haña e skrituranan, siñansanan di profetanan moderno i e Buki di Guia General. E sekshon di hóbennan den e Gospel Library tin mas rekursonan pa presidensianan di korum i klasnan²⁶i tin Para la Fortalesa de la Juventud: Un Guia pa Tuma Desishonnan. Segun tur miembro di e bario ta studia e rekursonan inspirá aki i buska guia di e Spiritu, tur hende lo wòrdu dirigí pa Señor den fortalesé e hubentut.

E bario kompletu lo wòrdu bendishoná i fortalesé si miembronan enfoká riba e generashon lantando. Apesar di nos imperfekshonnan i fayonan, Tata Selestial ta invitá kada un di nos, pa medio di e kompañerismo di Su Spiritu, yega na otronan. E sa ku nos ta krese i ta wòrdu santifiká ora ku nos sigui e inspirashonnan di e Spiritu Santu²⁷ E no ta importá ku nos esfuersonan ta imperfekto. Ora ku nos asosiá ku Señor, nos por konfia ku nos esfuersonan lo ta riba mesun liña ku loke E lo a hasi pa e hubentut.

Dor di sigui e direkshon di e Spiritu Santu den aserkamentu na e hubentut, nos ta bira testigunan di Tata Selestial su amor den nan bida. Aktua riba inspirashonnan di Señor ta konstruí relashonnan di amor i konfiansa. Ta e relashonnan den bida di e hóbennan ta esnan ku tin e influensia di mas grandi riba nan desishonnan.

E hóbennan lo siña e patronchi di revelashon ora ku nan partisipá ku nos den e proseso pa buska i aktua riba inspirashonnan pa sirbi otronan. Segun e hóbennan ta dirigí nan mes na Señor pa e guia inspirá aki, nan relashonnan ku i konfiansa den Dje lo profundisá.

Nos ta ekspresá nos konfiansa den e hóbennan dor di ofresé sosten i direkshon, sin tuma over.²⁸ Segun nos ta hala tras i permití e hóbennan pa siña pa medio di konsehonan huntu, skohe un rumbo inspirá i pone nan plan den akshon, nan lo eksperensia felisidat berdadero i kresementu.

Presidente Henry B. Eyring a siña ku “Loke lo bai importá mas ta loke nan ta siña di [bo] tokante ken nan ta di bèrdat i ken nan por bira en realidat. Mi ta suponé ku nan lo no siña esaki dor di lektura. Nan lo siña esaki dor di sentimentunan di ken bo ta, ken bo ta kere nan ta, i kiko bo ta kere ku nan por bira.”²⁹

Nos hóbennan ta asombrá nos ku nan kurashi, nan fe i nan abilidatnan. Segun nan ta skohe pa ta disípulonan di JesuCristo kompletamente komprometí, Su evangelio lo wòrdu graba den nan kurasonnan. Siguié lo bira un parti di ken nan ta, no solamente loke nan ta hasi.

Helaman a yuda e Amonitanan hóben pa wak kon un disípulo balente di JesuCristo tabata biba. Nos por ta ehèmpelnan poderoso pa e hóbennan di kon disípulonan di Cristo ta biba awendia. Mayornan fiel ta orando pa e ehèmpelnan aki den bida di nan yunan. Niun programa no por remplasá e influensia di adultonan amoroso ku ta warda mandamentunan.

Komo presidente di e korum di presbíteronan, e obispu por ta un ehèmpel pa e hóbennan di kon pa ta un kasa leal i un tata amoroso³⁰dor di protehá, proveé i presidiendo ³¹na e maneranan rekto. Obispunan, ku enfokenan manera “laser riba [e] hóbennan,³²lo tin un influensia ku lo dura pa generashonnan.

E hóbennan di awendia ta den Tata Selestial su spiritunan di mas noble.³³ Nan tabata entre e defensornan inkondishonal di bèrdat i albedrio den e bida premortal.³⁴ Nan a nase den e tempu aki pa rekohé Israel pa medio di nan testimonio poderoso di JesuCristo. E konosé kada un di nan i konosé nan gran potensial. E tin pasenshi segun nan ta krese. E lo redimí i protehé nan. E lo sana i guia nan. E lo inspirá nan. Nos, nan mayornan i lidernan, a wòrdu prepará pa sostené nan. Nos tin e Iglesia di e Salbador pa asistí nos segun nos ta lanta e siguiente generashon.

Mi ta duna testimonio ku Cristo Su Iglesia, restorá pa medio di e Profeta Jose Smith i guia awendia pa Presidente Russell M. Nelson, ta organisá pa yuda e hóbennan kumpli ku nan gran propósito den e último dianan aki. Den e nòmber di JesuCristo, amèn.