Ta Sabidura den Señor Ku Nos Mester Tin e Buki di Mormon

Dor di Presidente Mark L. Pace

Presidente General di Escuela Dominical

Ta mi orashon ku lesa e Buki di Mormon e aña aki lo ta un goso i un bendishon pa kada un di nos.

Rumannan stimá, nos ta masha gradesido pa boso esfuersonan pa lesa e skrituranan ku Bin, Sigui Mi. Danki pa tur loke boso ta hasiendo. Bo konekshon diario ku Dios i Su palabra tin konsekuensianan profundo. ““Bo ta poniendo e fundeshi pa un gran obra. I for di e kosnan chikitu ta sali kosnan ku ta grandi.”“¹

Lesa e enseñansanan di e Salbador den e skrituranan ta yuda nos transformá nos hogarnan den santuarionan di fe i sentronan di siñamentu di evangelio.² E ta invitá e Spiritu den nos hogarnan. E Spiritu Santu ta yena nos alma ku goso³ i ta kombertí nos den disípulonan di JesuCristo pa bida largu.

Durante e delaster añanan aki, ora nos tabata lesa e bukinan di e skritura santu, nos a mira e panorama di e siñansanan di Dios na Su yunan den tur e dispensashonnan di e evangelio.⁴

Den tur dispensashon, nos a mira un patronchi familiar. Dios ta restorá òf revelá e evangelio di JesuCristo pa medio di Su profetanan. E hendenan ta sigui e profetanan i ta bendishoná grandemente. Sinembargo, despues di tempu, algun hende ta stòp di hasi kaso na e palabranan di e profetanan i ta distansiá nan mes for di Señor i Su evangelio. Esaki ta loke nos ta yama apostasia. E evangelio a wòrdu revelá promé na Adam, pero algun di e yunan di Adam i Eva a kita bai for di Señor den apostasia.⁵ Nos ta mira un patronchi den restorashon i apostasia ripití den e dispensahonnan di Enok, Noe, Abraham, Moises, i otronan.

Awor, awe, nos ta biba den e dispensashon di e plenitut di tempunan.⁶ Esaki ta e úniko dispensashon ku lo no kaba den apostasia.⁷ E ta e dispensashon ku lo introdusí e Segunda Benida di e Salbador JesuCristo i Su reinado di milenio.

Awel, kiko ta diferente tokante e dispensashon aki? Kiko Señor a duna nos awendia, spesialmente pa nos tempu, ku lo yuda nos yega serka di e Salbador i no bandon’E nunka?

Un kontesta ku ta bin na mi mente ta e skrituranan—i partikularmente e Buki di Mormon: Un Otro Tèstamènt di JesuCristo.

Miéntras Dios a primintí ku nunka mas lo no tin un otro apostasia general, nos mester ta konsiente i kuidadoso pa evitá un apostasia personal—rekordando, manera Presidente Russell M. Nelson a siña, ““Nos tur ta responsabel pa nos kresementu spiritual individual.”“ ⁸ Studia e Buki di Mormon, manera nos ta hasiendo e aña aki, semper lo trese nos mas serka di e Salbador—i ta yuda nos keda mas serka di djE.

Nos ta yamé ““estudio,”“ i esei ta bon pasó e ta impliká esfuerso. Pero no ta semper nos mester siña un echo nobo. Tin bia lesa e Buki di Mormon ta simplemente tokante sinti konekshon ku Dios awe—alimentá nos alma, sea fortalesé spiritualmente promé ku sali pa enfrentá e mundu, òf haña sanashon despues di un dia difísil den e mundu.

Nos ta studia e skrituranan pa asina e Spiritu Santu, e gran maestro, por profundisá nos kombershon na Tata Selestial i JesuCristo i yuda nos bira mas manera Nan.⁹

Ku e pensamentunan aki na mente, nos por konsiderá, ““Kiko e Spiritu Santu a siña nos e siman aki durante nos estudio di e Buki di Mormon?”“ i ““Kon esaki ta trese nos mas serka di e Salbador?”“

Esakinan ta preguntanan bon pa nos estudio di skritura na kas. Nan ta tambe preguntanan ekselente pa kuminsá un klas di djadumingu na iglesia. Nos ta mehorá nos siñansa na iglesia riba djadumingu dor di mehorá nos siñamentu na kas durante siman. P’esei, den nos klasnan di djadumingu, ““esun ku ta prediká i esun ku ta skucha ta komprondé otro i tur dos ta ser edifiká i ta gosa huntu.”“¹⁰

Aki tin algun versíkulo ku e Spiritu a impreshoná na mi mente for di estudio di e Buki di Mormon e siman aki:

Nefi a instruí Jakob pa ““preservá e planchanan i pasa nan … di generashon pa generashon. I si tabatin predikashon ku tabata sagrado, òf revelashon … , òf profesia, Jakòb mester a ““graba … nan riba e planchanan aki … pa bienestar di [nan] pueblo.”“¹¹
Mas despues Jakòb a testifiká ku ora nos investigá e [skrituranan], … i tin tur e testigunan aki, nos ta haña un speransa, i nos fe ta bira firme.”“¹²

Awor, e versíkulonan aki a pone mi kòrda loke Nefi a bisa previamente tokante e planchanan di bròns:

Nos a optené e registronan … , i a eksaminánan i a haña ku nan tabata … di gran balor pa nos, pa medio di kua nos por a preservá e mandamentunan di Señor pa nos yunan.

““P’esei, tabata sabiduría den Señor pa nos a bai ku nan, miéntras nos tabata biaha den e desierto na e tera di promesa.”“¹³

Awor, si tabata sabio pa Lehi i su famia pa por tin e skrituranan, e ta mesun sabio pa nos. E gran balor i poder spiritual di e skrituranan ta sigui intakto den nos bida awe.

No a yega di tin un pueblo den historia ku akseso na e Buki di Mormon i otro skritura ku nos ta gosa di dje awe.¹⁴ Si, Lehi i su famia tabata bendishoná pa karga e planchanan di bròns ku nan, pero nan no tabatin un kopia pa kada tènt! E kopia di mas importante di e Buki di Mormon ta nos kopia personal. E ta e kopia ku nos ta lesa.

Den Lehi su vishon di e palu di bida, Lehi a siña nos e importansia di eksperensia personal ku e amor di Dios. Despues ku el a partisipá di e fruta, Lehi a mira su kasá, Sariah, i su yunan hòmber Nefi i Sam un poko mas leu.

““Nan a para manera ku nan no tabata sa unda nan mester a bai.

““… Lehi a hasi señal na nan”“ i ““a bisa nan tambe ku un stèm haltu ku nan mester bin serka dje, i partisipá di e fruta, ku tabata deseabel mas ku tur otro fruta.

““I … nan a bini na dje i a partisipá di e fruta.”“¹⁵

Mi ta stima Lehi su ehèmpel di kriansa intenshonal. Sariah, Nefi, i Sam tabata biba bida bon, i hustu. Pero Señor tabatin algu mihó, algu mas dushi pa nan. Nan no tabata sa unda pa hañé, pero Lehi si. P’esei, el a yama nan, ““ku un stèm haltu”“, pa nan bin serka e palu di bida i partisipá di e fruta nan mes. Su instrukshon tabata kla. No por tin un mal komprondementu.

Mi ta e produkto di un forma similar di kriansa intenshonal.¹⁶ Tempu mi tabata un mucha chikitu, kisas 11 òf 12 aña di edat, mi mama a puntra mi, ““Mark, bo sa pa bo mes, pa medio di Spiritu Santu, ku e evangelio ta bèrdat?”“

Su pregunta a sorprendé mi. Semper mi a purba di ta un ““bon mucha”“, i mi a pensa ku esei tabata sufisiente. Pero mi mama, meskos ku Lehi, tabata sa ku algu mas tabata nesesario. Mi mester a aktua i sa pa mi mes.

Mi a kontestá ku ainda mi no tabatin e eksperensia ei. E no tabata parse nada asombrá pa mi kontesta.

E ora ei el a bisa algu ku nunka mi a lubidá. Mi ta kòrda su palabranan te awe: ““Tata Selestial ke pa bo sa pa bo mes. Pero bo mester hasi esfuerso. Bo mester lesa e Buki di Mormon i hasi orashon pa sa pa medio di e Spiritu Santu. Tata Selestial lo kontestá bo orashonnan”“

Awel, nunka ainda mi no a lesa e Buki di Mormon. Mi no a pensa ku mi ta grandi sufisiente pa hasi esei. Pero mi mama tabata sa mihó.

Su pregunta a spièrta un deseo den mi pa sa pa mi mes.

Asina, kada anochi, den e kamber ku mi tabata kompartí ku dos di mi rumannan hòmber, mi tabata sende e lus riba mi kama i lesa un kapítulo di e Buki di Mormon. Despues, ora mi a paga e lus, mi a baha for di mi kama, hinka mi rudia i hasi orashon. Mi a hasi orashon mas sinsero i ku mas deseo ku nunka promé. Mi a pidi Tata Selestial pa laga mi sa si e Buki di Mormon ta berdadero.

For di e momentu ku mi a kuminsá lesa e buki di Mormon, mi a sinti ku mi Tata Selestial tabata sa di mi esfuersonan. I mi a sinti ku mi tabata importante p’E. Ora mi tabata lesa i hasi orashon, sentimentunan di trankilidat i pas a baha riba mi. Kapítulo pa kapítulo, e lus di fe tabata bira mas briyante den mi alma. Ku tempu, mi a realisá ku e sintimentunan ei tabata konfirmashon di e bèrdat di e Spiritu Santu.¹⁷ Mi a yega na e konklushon pa mi mes ku e Buki di Mormon ta bèrdat i ku JesuCristo ta e Salbador di e mundu. Esta gradesido mi ta pa mi mama su invitashon inspirá.

E eksperensia aki di lesa e Buki di Mormon komo mucha a kuminsá un patronchi di estudio di skritura ku ta sigui bendishoná mi te awe. Ainda mi ta lesa e Buki di Mormon i ta hinka rudia den orashon. I e Spiritu Santu ta konfirmá su bèrdatnan kada biaha di nobo.

Nefi a bisa korektamente. Ta sabiduria den Señor ku nos mester tin e skrituranan huntu ku nos durante nos bida. E Buki di Mormon ta e ““piedra klave”“ ku ta hasi e dispensashon aki diferente for di tur e dispensashonnan anterior. Ora nos studia e Buki di Mormon i sigui e profeta bibu, lo no tin apostasia personal den nos bida.¹⁸

E invitashon pa bini na e palu di bida dor di tene duru na e palabra di Dios no ta solamente un invitashon di Lehi na su famia, i e no ta solamente un invitashon di mi mama na ami pa lesa i hasi orashon tokante e Buki di Mormon. E ta tambe un invitashon di nos profeta, President Russell M. Nelson, na kada un di nos.

““Mi ta primintí,”“ el a bisa, ““ku segun bo studia e Buki di Mormon den orashon, tur dia, lo bo tuma mihó desishonnan—tur dia. Mi ta primintí ku ora bo meditá riba loke bo a studia, e bentananan di shelu lo habri i lo bo risibí kontestanan riba bo propio preguntanan i direkshon pa bo propio bida.”“¹⁹

Ta mi orashon ku lesa e Buki di Mormon e aña aki lo ta un goso i un bendishon pa kada un di nos i lo trese nos mas serka di e Salbador.

Tata Selestial ta bibu. JesuCristo ta nos Salbador i Redentor. E Buki di Mormon ta kontené Su palabranan i ta transmití Su amor. Presidente Russell M. Nelson ta e profeta bibu di Señor riba tera awe. Mi sa ku e kosnan aki ta bèrdat pa motibu di e testimonio ku e Spiritu Santu a konfirmá, e testimonio ku mi a risibí promé miéntras mi tabata lesa e Buki di Mormon komo mucha. Den e nòmber di JesuCristo, amèn.