Regosihá den e Don di Yabinan di Saserdosio

Dor di Presidente Russell M. Nelson

Presidente di E Iglesia di JesuCristo di e Santunan di e Delaster Dianan

Yabinan di Saserdosio ta goberná kon e saserdosio di Dios mester wòrdu usa pa logra Señor su propósitonan i bendishoná tur ku aseptá e evangelio restorá.

Mi kerido rumannan, awe ta un dia históriko pa Presidente Dallin H. Oaks i ami. Tabata 40 aña pasa, riba 7 Aprel 1984, ora ku nos a wòrdu sostené den e Quorum di e Diesdos Apòstelnan.¹ Nos a regosihá den kada un i tur konferensia general for di e tempu ei, inkluyendo esun aki. Nos a wòrdu bendishoná atrobe ku a un derame sagrado di e Spiritu. Mi ta spera ku boso lo studia repetidamente e mensahenan di e konferensia aki den e lunanan ku ta bini.

Ora ku ma nase,² tabata tin seis tèmpel den funshon den Iglesia—kada un den St. George, Logan, Manti i Salt Lake City, Utah; tambe den Cardsson, Alberta, Canada; i Laie, Hawaii. Dos tèmpel anteriormente a funshoná kòrtiku na Kirtland, Ohio i Nauvoo, Illinois. Segun hinter e Iglesia a move pa wèst, e Santunan a haña nan mes obligá pa laga e dos tèmpelnan aki atras.

E Tèmpel di Nauvoo a wòrdu destruí pa un pegadó di kandela. El a wòrdu rekonstruí i dediká dor di Presidente Gordon B. Hinckley.³ E Tèmpel di Kirtland a wòrdu ptofaná dor di enemigunan di Iglesia. Despues ku e Tèmpel di Kirtlland a wòrdu atkerí dor di Komunidat di Cristo, kual tabata doño di dje pa hopi aña.

Luna pasa nos a anunsiá ku E Iglesia di JesuCristo di e Santunan di e Delaster Dianan a kumpra e Tèmpel di Kirtland, huntu ku diferente sitionan signifikativamente históriko na Nauvoo. Nos ta apresiá enormemente e diskushonnan kordial i mutuamente benefisioso ku nos tabata tin ku e lidernan di Komunidat di Cristo ku a hiba na e akuerdo aki.

E Tèmpel di Kirtland tin un signifikashon inusual pa e Restorashon di e evangelio di JesuCristo. Diferente eventonan ku a tuma lugá einan a wòrdu profetisá pa míles di aña i tabata esensial pa Señor su Iglesia restorá pa kumpli ku su mishonnan di delaster dianan.

Lo mas importante di e eventonan aki a tuma lugá riba Djadumingu di Pasku, Aprel 3, 1836.⁴ Riba e dia ei, Jose Smith i Oliver Cowdery a eksperensiá un serie di bishitanan remarkabel. Promé, Señor JesuCristo a aparesé. E Profeta a registrá ku e Salbador “Su wowonan tabata manera un flam di kandela; e kabei di su kabes tabata blanku manera sneu puru; su kara tabata bria mas ku e klaridat di solo; i su stèm tabata manera e zonido di bashamentu di hopi awa.”⁵

Durante e bishitanan aki, Señor a afirmá Su identidat. El a bisa, “Ami ta e di promé i e delaster; ami ta e ku ta biba, Ami ta esun ku a muri; Ami ta boso abogado dilanti e Tata.”⁶

JesuCristo a deklará e ora ei ku El a aseptá e tèmpel komo Su kas i a hasi e promesa sorprendente aki: “Lo Mi manifestá mi mes na mi pueblo den miserikòrdia den e kas aki.”⁷

E promesa signifikante aki ta konta pa tur tèmpel dediká awendia. Mi ta invitá boso pa reflekshoná riba loke Señor su promesa ta nifiká pa boso personalmente.

Despues di e Salbador su bishita, Moises a aparesé. Moises a konferí na Jose Smith e yabinan pa rekohementu di Israel i e regreso di e dies tribunan.⁸

Ora ku e vishon aki a kaba, “Elias a aparesé i entregá e dispensashon di e evangelio di Abraham” na Jose.⁹

Despues Elias e profeta a aparesé. Su aparesementu a kumpli e promesa di Malakias ku promé ku e di Dos Binida, Señor lo manda Elijah pa “bira e kurason di e tatanan na e yunan, i e kurason di e yunan na e tatanan.”¹⁰ Elias a konferí e yabinan di e poder di seyamentu na Jose Smith.¹¹

E signifikashon di e yabinan aki su regreso na e mundu dor di tres mensahero selestial bou di direkshon di Señor no por ta eksaherá. Yabinan di Saserdosio ta forma e outoridat i poder di presidensia. Yabinan di Saserdosio ta goberná kon e saserdosio di Dios mester wòrdu usa pa logra Señor su propósitonan i bendishoná tur ku aseptá e evangelio restorá di JesuCristo.

E ta importante pa nota ku promé ku e organisashon di e Iglesia, mensaheronan selestial a konferí e Saserdosio Aroniko i Melkisadek na e Profeta Jose i a dune yabinan pa ámbos saserdosio.¹² E yabinan aki a duna Jose Smith e outoridat pa organisá e Iglesia na 1830.¹³

Despues den e Tèmpel di Kirtland na 1836, e traspaso di e tres yabinan di saserdosio adishonal aki —esta, e yabinan di e rekohementu di Israel, yabinan di e evangelio di Abraham i yabinan di e poder di seyamentu —tabata esensial. E yabinan aki a outorisá Jose Smith—i tur Presidensia eksitoso di Señor su Iglesia —pa rekohé Israel na ámbos banda di e velo, pa bendishoná tur yunan di kombenio ku e bendishon di Abraham, pa posishoná un seyo ku ta ratifiká riba ordenansanan di saserdosio i kombenionan i pa sea famianan eternamente. E poder di e yabinan di saserdosio aki ta infinito i asombroso.

Konsiderá kon bo bida lo tabata diferente si e yabinan di saserdosio no a wòrdu restorá na mundu.¹⁴ Sin e yabinan di saserdosio, boso no por a wòrdu investí ku e poder di Dios.¹⁵ Sin e yabinan di saserdosio, e Iglesia lo a sirbi solamente komo un organisashon signifikante di siñansa i humanitario pero no muchu mas. Sin yabinan di Saserdosio, niun di nos lo por tabata tin akseso na ordenansanan esensial ku ta mara nos na nos sernan kerí eternamente i permití nos eventualmente biba ku Dios.

Yabinan di Saserdosio ta distinguí e Iglesia di Jesu Cristo di e Santunan di e Delaster Dianan for di kualkier otro organisashon na mundu. Hopi otro organisashonnan por i ta hasi bo bida mas mihó aki den mortalidat. Pero ningun otro organisashon por i lo influensiá bo bida despues di morto.¹⁶

Yabinan di Saserdosio ta duna nos e outoridat pa ekstendé e bendishonnan primintí na Abraham pa kada hòmber i muhé ku ta warda kombenionan. Obranan di Tèmpel ta hasi e bendishonnan ekskisito aki disponibel pa turDios Su yunan, sin importá unda òf ki momentu nan a biba, òf ta bibu awor. Laga nos regosihá ku e yabinan di saserdosio tei atrobe nan mundu.

Mi ta invitá bo pa konsiderá kuidadosamente e tres siguiente deklarashonnan:

E rekohementu di Israel ta evidensia ku Dios ta stima tur Su yunan tur kaminda.
E evangelio di Abraham tambe ta evidensia ku Dios ta stima tur di Su yunan tur kaminda. E ta invitá nos pa bini na Dje—“blanku i pretu, esnan den sklabitut i liber, muhé i hòmber; … tur ta igual dilanti Dios.”¹⁷
E poder di seya ta evidensia supremo di kuantu Dios stima tur di Su yunan i kier pa kada un di nan skohe pa regresá kas serka djE.

Yabinan di saserdosio restorá pa medio di e Profeta Jose Smith a hasi posibel pa tur hende ku ta warda kombenionan por gosa di privilegionan spiritual personal inkreibel. Akinan atrobe, tin hopi ku nos por siña for di e historia sagrado di e Tèmpel di Kirtland.

Jose Smith su orashon di dedikashon di e Tèmpel di Kirtland ta un siñansa tokante kon e tèmpel ta empoderá abo i ami spiritualmente pa pasa den e retonan di bida den e delaster dianan aki. Mi ta enkurashá bo pa studia e orashon ei registrá den Doctrina y Convenios sekshon 109 E orashon di dedikashon ei, kual a wòrdu risibí dor di revelashon, ta siña ku e tèmpel ta “un kas di orashon, un kas di ayuno, un kas di fe, un kas di siñansa, un kas di gloria, un kas di òrdu, un kas di Dios.”¹⁸

E lista di atributonan aki ta muchu mas ku un deskripshon di un tèmpel. E ta un promesa tokante kiko lo pasa ku esnan ku sirbi i adorá den e kas di Señor. Nan por spera pa risibí respuestanan riba orashon, revelashon personal, mas fe, forsa, konsuelo, mas konosementu i mas poder.

Tempu den tèmpel lo yuda bo pa pensa selestial i pa haña un bista di ken bo ta realmente, ken bo por yega na bira i e tipo di bida ku bo por tin pa eternidat. Adorashon regular den tèmpel lo halsa e manera ku bo ta mira bo mes i kon bo ta pas den Dios su plan magnífiko. Mi ta primintí bo esei.

A primintí nos tambe ku den tèmpel nos por “risibí e plenitut di e Spiritu Santu.”¹⁹ Imaginá kiko e promesa ei ta nifiká ora ta trata di tin e shelunan habri pa kada un buskadó sinsero di e bèrdat eterno.

Nos ta wòrdu instruí tambe ku tur ku adorá den e tèmpel lo tin e poder di Dios i angelnan ku tin “enkargo riba nan.”²⁰ Kuantu e ta oumentá bo konfiansa di sa ku, komo un muhé òf hòmber armá ku e poder di Dios, bo no mester enfrentá bida bo so? Ki kurashi e ta duna bo di sa ku angelnan realmente lo yuda bo?

Finalmente, a keda primintí na nos ku “ningun kombinashon di maldat” lo prevalesé riba esnan ku ta adorá den e kas di Señor.²¹

Komprondé e privilegionan spiritual ku ta posibel den tèmpel ta vital pa kada un di nos awendia.

Mi kerido rumannan, ata mi promesa aki. Nada lo no yuda boso mas mihó pa tene duru na e bara di heru²⁵ ku adorá den tèmpel ku mas regularidat segun boso sirkunstansia ta permití. Nada lo no protehá boso mas mihó ora ku bo kontra e mundu su neblinanan di skuridat. Nada lo no fortalesé bo testimonio di JesuCristo i Su Ekspiashon òf yuda bo komprondé Dios su plan magnífiko mas mihó. Nada lo no kalma bo spiritu mas durante tempunan di doló. Nada lo no habri e shelunan mas tantu. Nada!

E tèmpel ta e entrada na e bendishonnan di mas grandioso ku Dios tin pa kada un di nos, paso e tèmpel ta e úniko lugá riba mundu kaminda nos por risibí ture bendishonnan primintí na Abraham.²³ Esaki ta e motibu dikon nos ta hasiendo tur loke ta den nos poder, bou di direkshon di Señor, pa hasi e bendishonnan di tèmpel mas aksesibel pa miembronan di Iglesia. Pues, nos ta komplasí di anunsiá ku nos a plania pa konstruí un tèmpel nobo den kada un di e 15 lugánan aki:

Uturoa, French Polynesia
Chihuahua, Mèksico
Florianópolis, Brazil
Rosario, Argentina
Edinburgh, Scotland
Brisbane, Australia area sùit
Victoria, British Columbia
Yuma, Arizona
Houston, Texas area sùit
Des Moines, Iowa
Cincinnati, Ohio
Honolulu, Hawaii
West Jordan, Utah
Lehi, Utah
Maracaibo, Venezuela

Mi kerido rumannan, Mi ta testifiká ku esaki ta E Iglesia di JesuCristo di e Santunan di e Delaster Dianan. E ta para na kabes. Nos ta Su disípulonan.

Laga nos regosihá den e restorashon di yabinan di saserdosio kual ta hasi posibel pa abo i ami por disfrutá kada bendishon spiritual ku nos ta dispuesto i digno pa risibí. Mi ta tèstifiká asina den e nòmber sagrado di JesuCristo, amèn.