Fiel te na Fin

Dor di hermana Andrea Muñoz Spannaus

Segundo konsehero den e Presidensia General di Mujeres Jovenes

Dor di Su man, lo bo por tumba tur Goliat ku aparesé den bo bida.

Kerido amigunan hóben, awe lo mi kier papia direktamente ku boso—e hubentut di Iglesia.

A pasa un aña ku nos Presidensia General di Mujeres Jovenes a wòrdu yamá. Kuantu kos a sosodé den e aña aki ku a pasa aki!

Nos a topa hopi di boso i a studia e siñansanan di Cristo huntu. Nos a kanta kantikanan, sera amistatnan nobo i sirbi ku boso den nos komunidatnan. Nos a wòrdu fortales’é dor di skucha boso testimonionan na konferensianan di hubentut i eventonan mundial. I nos a adorá huntu den e kas di Señor.

Kada bes, nos a kompartí un mensahe di nos Señor JesuCristo. Awe nochi lo no ta diferente; mi tin un mensahe pa boso, e hubentut di e Iglesia di JesuCristo.

E Gran Preguntanan

Bo a yega di puntra bo mes kon bo por ta fiel na Dios bibando den un mundu di pika? Di unda bo ta haña e forsa pa sigui bai dilanti i sigui hasi bon? Kon bo por eksperensia felisidat berdadero?

Mi ta kere ku e eksperensia di David i Goliath¹ por yuda.

David i Goliat

Den Tèstamènt Bieu, e ehérsito di e felisteonan tabata bataya kontra e Israelitanan, i tur mainta i tur anochi, un filisteo gigante yama Goliat tabata reta kualkier Israelita pa bringa kuné.

Entre e pueblo Israelita tabata biba David, un wardadó di karné yòn muchu mas chikí ku Goliat pero ku un fe grandi den JesuCristo! David a ofresé pa bringa boluntariamente. Asta e rei a trata na deskurash’é, pero David a skohe pa su konfiansa den JesuCristo.

Anteriormente, David a bringa ku un leon i tambe un ber. For di su propio eksperensia, e tabata sa ku Dios a protehé i a hasié viktorioso. Pa David, e kousa di Dios tabata e kousa di mas importante. Pues, yen di fe den un Dios ku lo no bandon’é, el a kue sinku piedra lizu, kue su slengu i a bai pa enfrentá e gigante.

E skrituranan ta konta nos ku e promé piedra ku David a tira a dal Goliat den su frenta, kabando ku su bida.²

Buskando e Kontesta

David a usa solamente un piedra pa mata Goliat, kaminda e tabata prepará ku sinku. Ku sinku! Esaki ta pone mi pensa tokante kon ami por prepará mi mes pa enfrentá e mundu.

Ki lo ta si kada un di David su piedranan ta representá un fortalesa ku nos mester pa ta triunfante den nos bida? Kiko e sinku piedranan aki lo por ta? Mi a pensa riba e posibilidatnan aki:

E piedra di mi amor pa Dios.
E piedra di mi fe den nos Salbador JesuCristo.
E piedra di e konosementu di mi identidat berdadero.
E piedra di mi arepentimentu diario.
E piedra di mi akseso na Dios su poder.

Laga nos papia tokante kon nos ta wòrdu bendishoná dor di e fortalesanan aki.

Promé, e piedra di mi amor pa Dios. Stima Dios ta e promé gran mandamentu.³ E guia Para la Fortalesa de la Juventud ta siña nos: “Dios ta stima bo. E ta boso Tata. Su amor perfekto por inspirá bo pa Stim’É. Ora ku bo amor pa Tata Selestial ta e influensia di mas importante den bo bida, hopi desishonnan ta bira mas fásil.”⁴

Nos amor pa Dios i nos relashon serkano ku nÉ ta duna nos e fortalesa ku nos mester pa transformá nos kurasonnan i vense nos retonan mas fásil.

Di dos, e piedra di mi fe den nos Salbador JesuCristo. Ora ku JesuCristo a bini na mundu, El a sufri pa nos pikánan⁵ i a tuma riba Su mes nos penanan, nos dolónan, nos debilidatnan i nos malesanan físiko i mental. Ta p’esei E sa kon pa yuda nos. Tin fe den JesuCristo ta nifiká pa konfia kompletamente den Su sabiduria, Su tempu, Su amor; i Su poder pa ekspiá pa nos pikanan. E piedra di fe den JesuCristo lo vense kualkier “gigante” den nos bida.⁶ Nos por vense e mundu dekaí aki paso El a vense promé.⁷

Number tres, e piedra di konosementu di mi identidat berdadero. Nos kerido profeta, Presidente Russell M. Nelson a siña nos ku nos identidat di mas importante ta komo yunan di Dios, yunan di kombenio i disípulonan di JesuCristo.⁸

Tur kos ta kambia ora ku mi sa ken mi ta di bèrdat.⁹ Ora ku mi ta duda den mi abilidatnan, mi ta ripití ku regularidat pa mi mes den mi mente òf na bos altu, “Mi ta un yu di Dios, Mi ta un yu di Dios,” kuantu bes ku mi mester te ora ku atrobe mi sinti sigur pa sigui.

Kuater, e piedra di mi arepentimentu diario. Den e guia Fortalesa de la JuventudPara la nos ta lesa: “Arepentimentu no ta kastigu pa pika; e ta e manera ku e Salbador ta liberá nos for di pika. Arepentí ta nifiká kambia―alehá for di pika i hala serka Dios. E ta nifiká pa mehorá i risibí pordon. E tipo di kambio aki no ta un suseso di un bes; e ta un proseso kontinuo.”¹⁰

Nada no ta duna mas libertat ku sinti Dios su pordon i sa ku nos ta limpi i rekonsiliá ku nE. Pordon ta posibel pa tur hende.

E di sinku piedra ta e piedra di mi akseso na Dios Su poder. E kombenionan ku nos ta sera ku Dios, manera esnan ku nos ta hasi den e ordenansanan di boutismo, ta duna nos akseso na e poder di Santidat.¹¹ Dios Su poder ta un poder real ku ta yuda nos enfrentá retonan, tuma bon desishonnan i oumentá nos kapasidat pa sobrebibí situashonnan difísil. E ta un poder di kual nos por krese den e abilidatnan spesífiko ku nos mester¹²

E guia Para la Fortalesa de la Juventud ta splika: “Kombenionan ta konektá bo na Tata Selestial i e Salbador. Nan ta oumentá Dios su poder den bo bida.”¹³

Laga nos papia di e konekshon aki. Bo ta kòrda ora ku Cristo a siña e diferensia entre un kas traha riba un baranka i un den santu?¹⁴ Elder Dieter F. Uchtdorf a splika: “Un kas no ta sobrebibí den un tormenta paso e kas ta fuerte. E no ta sobrebibí tampoko djis paso e baranka ta fuerte. E kas ta sobrebibí e tormenta paso e ta firme ankra na e baranka fuerte ei. Ta e forsa di e konekshon na e piedra ta konta.”¹⁵

Nos konekshon personal na JesuCristo lo duna nos e kurashi i konfiansa pa sigui dilanti entre hendenan ku no ta respetá nos kerensianan òf ku ta tenta nos. Cristo ta invitá nos pa tenÉ den nos pensamentunan konstantemente; E ta bisa nos, “Wak na mi den kadapensamentu.”¹⁶ Pensa riba e Salbador ta duna nos klaridat den mente pa tuma desishonnan, pa aktua sin miedu i pa bisa no na loke ta kontrali na siñansanan di Dios.¹⁷ Ora ku mi dia ta difísil i mi ta sinti manera mi no por soportá mas, pensa riba Cristo ta duna mi pas i ta duna mi speransa.

Kon nos por hasi uso di e poder di JesuCristo aki? Obedesé nos kombenionan i oumentando nos fe den JesuCristo ta klave.

Di bèrdat mi ta deseá pa David tabata tin un piedra mas; esei lo tabata e piedra di mi testimonio. Nos testimonio ta konstruí riba eksperensianan spiritual personal den kual nos por rekonosé e influensia dibino den nos bida.¹⁸ Niun hende no por kita e konosementu ei for di nos. Sabiendo loke nos sa dor di a biba nos eksperensianan spiritual no tin preis. Ser fiel na e konosementu ei ta duna nos libertat. E ta duna nos alegria! Si nos stima e bèrdat, nos lo busk’e i una bes nos hañ’e nos lo defendé.¹⁹

Un invitashon

Meskos ku ami ta skohe piedra number seis, mi ta invitá bo pa reuní ku bo klas, korum òf famia i pensa riba kua otro fortalesanan bo mester atkerí pa keda fiel na Dios i asina vense e mundu.

Un promesa

Kerido amigunan, Cristo ta ansioso pa kompaña nos den e biahe di nos bida. Mi ta primintí boso, si boso tene na e bara di heru, lo bo kana man tené ku JesuCristo.²⁰ E lo guia bo i E lo siña bo.²¹ Na Su man, lo bo por tumba bou tur Goliat ku aparesé den bo bida.

Testimonio

Mi ta tèstifiká ku tin goso den hasi orashon tur dia, den lesa e Buki di Mormon tur dia, den partisipá di Santa Sena tur djadumingu i bai seminario—asta mainta tempran! Tin goso den hasi bon.

Tin goso den ser fiel na e Dios di universo, e Salbador di e mundu, e Rei di Reinan. Tin goso den ta un disípulo di JesuCristo.

Dios ta nos Tata. E konosé e deseonan di boso kurasonnan i boso posibilidatnan i E ta konfia boso.

Kerido hubentut, JesuCristo lo yuda bo pa ta fiel te na fin. Di e bèrdatnan aki mi ta duna mi testimonio, den e nòmber di JesuCristo, amèn.