E Siklo Poderoso, i Virtuoso di e Doktrina di Cristo.
Mi ta invitá boso pa biba e doktrina di Cristo di forma repetitivo i iterativo i intenshonalmente yuda otronan riba nan kaminda.
Algun aña pasá mi kasá Ruth, nos yu muhé, Ashley, i ami a bai un eskurshon den kayak ku otro turístanan den estado di Hawaii, Merka. Un kayak ta un boto ku ta abou riba awa, manera un kanoa, den kua e remadó ta sinta mirando dilanti i ta usa un rema di dos banda pa hala for di dilanti pa patras riba un banda i despues e otro banda. Nos tabata planeá pa rema te na dos isla chikitu dilanti di kosta di Oahu i bolbe bèk. Mi tabatin konfiansa pasó, komo hóben mi a rema kayaknan dor di lagonan di seru. Arogansia ta bin promé ku kaida, bèrdat?
Nos guia a duna nos instrukshonnan i a mustra nos e kayaknan di óseano ku nos por a usa. Nan tabata diferente for di esnan ku mi a rema kuné anteriormente. Mi mester a sinta riba e kayak, en bes di sinta den dje. Ora mi a subi e kayak, mi sentro di gravedat tabata mas haltu ku loke mi tabata kustumbrá di dje, i mi tabata ménos stabil den awa.
Na kuminsamentu, mi tabata rema mas lihé ku Ruth i Ashley. Despues di un ratu, mi tabata hopi mas dilanti di nan. Ounke mi tabata orguyoso di mi ritmo heróiko, mi a stòp di rema i a warda te ora nan a yega. Un ola grandi—di mas o ménos 13 sèntimeter1a dal e banda di mi kayak i a tira mi den awa. Na e momento ku mi a boltu e kayak vbèk i a lucha pa subi bèk riba dje, Ruth i Ashley a pasa mi dilanti, pero mi tabata muchu kansá pa sigui rema. Promé ku mi por a haña rosea, un otro ola, esun aki berdaderamente enorme—di por lo ménos 20 centimeter2a dal mi kayak i a pone mi bòltu atrobe. Ora mi a logra drecha e kayak, mi tabata asina sin rosea ku mi tabatin miedu di no lo por ta kapas pa subi riba dje.
Mirando mi situashon, e guía a yega i stabilisá mi kayak, hasiendo esaki mas fásil pa mi subi riba dje. Ora el a mira ku ainda mi tabata demasiado sin rosea pa mi por a rema mi so, el a pone un kabuya na mi kayak i a kuminsá rema, halando mi huntu kuné. Pronto mi a rekuperá mi aliento i a kuminsá rema bon mi so. El a laga e kabuya bai, i mi a yega e promé isla sin mas yudansa. Ora nos a yega, mi a kai riba e santu, kansá.
Despues ku e grupo a sosegá, e guia a bisa mi trankilmente, “Mener. Renlund, si bo djis sigui rema, manteniendo bo impulso, mi ta kere ku lo bo ta bon.” Mi a sigui su konseho ora nos a rema bai pa e di dos isla i despues bèk na nos punto di salida. Dos biaha, e guia a pasa na mi banda i bisa mi ku mi tabata hasiendo “tremendo!” Un ola mas grandi a dal riba mi kayak for di banda, pero mi no a bòltu.
Dor di rema e kayak konstantemente, mi tabata mantené impulso i progreso pa dilanti, i asina a suavisá e efekto di e olanan ku tabata dal riba mi for di e banda. E mesun prinsipio ta apliká na nos bida spiritual. Nos ta bira vulnerabel ora nos baha nos velosidat i spesialmente ora nos para.3 Si nos mantené nos impulso spiritual dor di “rema” kontinuamente na e Salbador, nos ta mas safe i mas sigur pasobra nos bida eterno ta dependé di nos fe den djE.4
Impulso spiritual ta kreá “durante un bida kompletu ora nos ta brasa e doktrina di Cristo kada bia.”.5 Hasiendo esaki, Presidente Russell M. Nelson a siña, ta produsí un “siklo mas poderoso i virtuoso.”6 Di bèrdat, e elementonan di e doktrina di Cristo—manera fe den Señor JesuCristo, arepentimentu, drenta den un relashon di kombenio ku Señor pa medio di boutismo, risibí e don di e Spiritu Santu, i perseverá te na e fin7no ta destiná pa ser eksperensiá komo eventonan ku ta sosodé un biaha so i ku ta keda marká den hòki. Partikularmente, “perseverá te na fin” no ta realmente un paso separá den e doktrina di Cristo, manera si nos a kumpli ku e promé kuater elementonan i despues a keda para, morde nos djentenan, i warda pa muri. No, perseverá te na fin ta apliká e otro elementonan di e doktrina di Cristo di forma repetitivo i iterativo, kreando e “sírkulo mas poderoso i virtuoso” ku Presidente Nelson a deskribí.8
Repetidamente ta nifiká ku nos ta eksperensiá e elementonan di e doktrin a di Cristo kada bia di nobo durante nos bida. Iterativo ta nifiká ku nos ta traha riba dje i ta mehorá ku kada ripitishon. Ounke nos ta ripití e elementonan, nos no ta simplemente birando den sírkulo sin un trayektoria pa dilanti. Na lugá di esei, nos ta bini mas serka di JesuCristo kada biaha ku nos pasa dor di e siklo.
Impulso ta enserá tantu velosidat komo direkshon.9 Si mi a rema e kayak ku forsa den e direkshon robes, lo mi por a krea un impulso signifikante, pero lo mi no a yega na e destinashon ku mi tabata deseá. Similarmente, den bida, nos mester “rema” na e Salbador pa bin serka djE.10
Nos fe den JesuCristo mester ser alimentá tur dia.11 E ta alimentá ora nos ta hasi orashon tur dia, studia e skrituranan tur dia, meditá riba e bondat di Dios tur dia, arepentí tur dia, i sigui e inspirashonnan di Spiritu Santu tur dia. Meskos ku no ta saludabel pa posponé kome tur nos kuminda te djadumingu i despues kome nos parti semanal di kuminda, no ta saludabel spiritualmente pa limitá nos komportashon pa alimentá testimonio na un dia den siman.12
Ora nos asumí responsabilidat pa nos propio testimonionan,13nos ta gana impulso spiritual i gradualmente ta desaroyá fe den JesuCristo, i e doktrina di JesuCristo ta bira sentral pa e propósito di bida.143 Asina tambe e impulso ta oumentá ora nos ta hasi esfuerso pa obedesé e leinan di Dios i ta arepentí. Arepentimentu ta alegria i ta permití nos siña di nos erornan, ku ta e manera ku nos ta progresá pa semper. Sin duda, lo tin okashon ku nos lo kai for di nos kayaknan i haña nos mes den awa profundo. Pa medio di arepentimentu, nos por bolbe na nos lugá i sigui, maske kuantu biaha nos a kai afó.15 E parti importante ta ku nos no ta entregá.
E siguiente elemento di e doktrina di Cristo ta e boutismo, ku ta inkluí e boutismo di awa i, pa medio di konfirmashon, e boutismo di Spiritu Santu.16 Ounke e boutismo ta un evento singular, nos ta renobá nos kombenio di boutismo repetidamente ora nos partisipá di e Santa Sena. E Santa Sena no ta remplasá boutismo, pero e ta konektá elementonan inisial den e doktrina di Cristo—fe i arepentimentu—ku resepshon di e Spiritu Santu. 17 Ora nos partisipá konsientemente di e Santa Sena,18 nos ta invitá e Spiritu Santu den nos bida,meskos ku ora nos a wòrdu boutisá i konfirmá.19 Ora nos ta kumpli ku e kombenio deskribí den e orashonnan sakramental, e Spiritu Santu ta bira nos kompañero.
Segun ku Spiritu Santu ta ehersé un influensia mas grandi den nos bida, nos ta desaroyá gradualmente i repetidamente atributonan manera di Cristo. Nos kurasonnan ta kambia. Nos disposishon pa hasi malu ta desminuí. Ora nos inklinashon pa hasi bon ta oumentá te ora nos ke solamente “hasi e bon kontinuamente.”20 I asina nos ta haña e poder selestial nesesario pa perseverá te na fin.21 Nos fe a oumentá, i nos ta kla pa ripití e siklo mas poderoso i virtuoso atrobe.
E impulso spiritual pa dilanti tambe ta ta motivá nos pa hasi mas kombenio ku Dios den e kas di Señor. Mas kombenio ta trese nos mas serka Cristo i ta konektá nos mas fuerte na djE. Pa medio die e kombenionan aki, nos tin mas akseso na Su poder. Pa ta kla, boutismo i kombenionan di tòmpe; no ta, den i di nan mes, e fuente di poder. E fuente di poder ta Señor Jesucristo i nos Tata Selestial. Hasi i warda e kombenionan ta krea un kondukto pa Nan poder den nos bidanan. Ora nos biba segun e kombenionan aki, eventualmente nos ta bira herederonan na tur loke Tata Selestial tin.22 E impulso produsí dor di biba e doktrina di Cristo no solamente ta duna poder na e transformashon di nos naturalesa dibino den nos destinashon eterno pero e ta motivá nos tambe pa yuda otronan den maneranan apropiá.
Konsiderá kon e guia di ekspedishon a yuda mi despues ku mi a bòltu for di e kayak. E no a grita for di leu un pregunta ku no ta yuda, manera, “Sr. Renlund, kiko bo ta hasiendo den awa?” E no a bini i rabia ku mi, bisando: “Sr. Renlund, lo bo no ta den e situashon aki si bo tabata mas fit físikamente.” e ni a kuminsá gara mi kayak mientras mi tabata purba pa subi riba dje. I e no a koregi mi dilanti di e grupo. Enbes, el a duna mi e yudansa ku mi tabatin mester na e momentu ku mi tabatin mester di dje. El a duna mi konseho ora mi tabata reseptivo. I el a hasi tur loke e por pa animá mi.
Ora nos ta ministrá na otronan, nos no tin mester di hasi preguntanan ku no ta yuda òf bisa loke ta opvio. Mayoria hende ku ta luchando sa ku nan ta luchando. Nos no mester huzga; nos huisio no ta yuda ni ta bon bini i mayoria bia ta basá riba mal informashon.
Kompará nos mes ku otronan por hiba nos na kometé erornan dañiño, spesialmente si nos konkluí ku nos ta mas hustu ku esnan ku ta lucha. Un komparashon asina ta meskos ku hoga sin speransa den tres meter23 di awa, mirando un otro hende ta hoga den kuater meter24 di awa, husgando e komo un pekadó mas grandi, i ta sinti bo bon tokante bo mes. Despues di tur kos, nos tur ta luchando na nos propio manera. Nos niun no ta gana salbashon.25 Nos no por nunka. Jakob den e Buki di Mormon, a siña nos pa “kòrda ku despues ku nos a rekonsiliá ku Dios, ta solamente den i pa medio di e grasia di Dios nos ta salbá.”26 Nos tur mester di e Salbador Su Ekspiashon infinito, no solamente un parti di dje.
Nos mester di tur nos kompashon, empatia, i amor ora nos ta interaktuá ku esnan rònt di nos.27 Esnan ku ta lucha “mester eksperensiá e amor puru di JesuCristo reflehá den [nos] palabranan i akshonnan.”28 Ora nos ta ministrá, nos ta animá otronan frekuentemente i ta ofresé yudansa. Asta si un persona no ta reseptivo, nos ta sigui ministrá segun nan pèrmití. E Salbador a siña ku “pasobra na esnan asina’ki boso lo sigui ministrá; pasobra boso no sa si nan lo bini bèk i arepentí, i bini na ami ku propósito bèrdadero di kurason, i ami lo kuranan; i boso lo ta e medio di trese salbashon pa nan.”29 E Salbador Su trabou ta pa sana. Nos trabou ta pa stima—pa stima i ministrá di tal manera ku otronan ta atraé na JesuCristo. esaki ta un di e frutanan di e siklo poderoso, i virtuoso di e doktrina di Cristo.
Mi ta invitá boso pa biba e doktrina di Cristo di forma repetitivo i iterativo i intenshonalmente yuda otronan riba nan kaminda. Mi ta testifiká ku e doktrina di Cristo ta sentral den e plan di Tata Selestial; despues di tur kos, e ta Su doktrina. Ora nos ta ehersé fe den JesuCristo i Su Ekspiashon, nos ta keda motivá pa sigui e kaminda di kombenio i ta motivá pa yuda otronan bira disípulonan fiel di JesuCristo. Nos por bira herederonan den reino di nos Tata Selestial, ku ta e kulminashon di biba e doktrina di Cristo, Den e nòmber di JesuCristo, amèn.