Ser Unu ku Cristo
Nos ta uní dor di nos amor i fe den JesuCristo i Su Ekspiashon. E esensia di pertenesé di bèrdat ta pa ta unu ku Cristo.
Mi a sinti profundamente tokante di e Ekspiashon di JesuCristo for di tempu mi tabata basta hóben, pero e realidat di e Salbador Su Ekspiashon a bin n’ami tempu mi tabatin 25 aña. Mi a kaba di gradua na standford Law School i tabata studiando pa pasa eksamen pa wòrdu atmití komo abogado na California. Mi mama a yama i a bisa ku mi abuelo Crozier Kimball, ku tabata biba na Utah, tabata muriendo. El a bisa ku si mi ke mir’é, mihó mi bin kas. Mi abuelo tabatin 88 aña i tabata hopi malu. Mi tabatin un bishita maravioso. E tabata asina komplasé pa wak mi i kompartí su testimonio ku mi.
Ora Crozier tabatin apenas tres aña, su tata, David Patten Kimball, a muri na edat di 44 aña,1Crozier a spera ku su tata i su abuelo Heber C. Kimball, lo aprobá di manera el a biba i a sinti ku ku e tabata fiel na e legado.
Mi abuelo su konseho primordial na mi tabata pa evitá kualke sentido di derechi òf privilegio dor di antepasadonan fiel. El a bisa mi ku mi enfoke mester ta riba e Salbador i e Salbador Su Ekspiashon. El a bisa ku nos tur ta yunan di un Tata Selestial amoroso. Kualsea ki nos antepasado di mundu ta, kada unu di nos lo mester duna un informe na e Salbador pa kon nos a warda Su madamentunan.
Abuelo a referí na e Salbador komo e “Wardadó di e porta” un referensia na 2Nefi 9:41. Ela a bisa mi ku e ta spera ku e tabata sufisientemente arepentí pa kalifiká pa e Salbador Su miserikòrdia.2
Mi tabata profundamenté konmové. Mi sa ku e tabata un hòmber hustu. E tabata un patriarka i a sirbi diferente mishon. El a siña mi ku niun hende por regresá serka Dios dor di bon obra solamente sin e benefisio di e Salbador Su Ekspiashon. Mi por kòrda asta te awe e gran amor i apresio ku Abuelo tabatin pa e Salbador i Su Ekspiashon.
Den 2019 durante un asignashon na Yerusalèm,3 mi a bishitá un kamber ariba ku por tabata banda di e lugá Kaminda e Salbador a laba e pianan di Su apòstelnan promé ku su Krusifikshon. Mi tabata spiritualmente konmové di kon El a manda Su Apòstelnan pa stima otro.
Mi a rekordá e Salbador Su Oorashon intersesora rogando pa nos. E orashon aki a sosodé literalmente den e delaster oranan di Su bida mortal manera registrá den e Evangelio di Juan.
E orashon aki tabata dirigí na e siguidónan di Cristo, inkluyendo nos tur.4 Den e Salbador Su petishon na Su Tata, El a roga “ku nan tur por ta un; manera Abo ta den Mi i Ami den Bo, pa asina nan por ta den nos.” E Salbador despues a kontinuá, “I e gloria ku Abo a duna mi, mi a duna na nan; pa nan por ta unu, manera nos ta unu.”5 Unidat ta lokual Cristo a hasi orashon pe promé ku Su traishon i Krusifikashon. Unidat ku Cristo i nos Tata Selestial por wòrdu optené dor di e Salbador Su Ekspiashon.
Señor Su miserikòrdia ku ta salba no ta depende di linahe, edukashon, estado ekonómiko, òf rasa. E ta basá riba ta unu ku Cristo i Su mandamentunan.
E Profeta José Smith i Oliverio Cowdery a risibí e revelashon di e organisashon i gobernashon di Iglesia den 1830, djis despues ku e Iglesia a wòrdu organisá. Loke ta awor sekshon 20 a wòrdu lesá pa e Profeta José den e promé konferensia di Iglesia i tabata e promé revelashon aprobá pa konsentimentu komun.6
E kontenido di e revelashon aki ta di bèrdat remarkabel. E ta siñá nos e nifikashon i ròl di e Salabdor i kon pa [por] tin akseso na Su poder i bendishonnan dor di Su grasia ekspiatorio. E Profeta José tabatin 24 aña i ya kaba a risibí numeroso revelashon i a kompletá e tradukshon di e Buki di Mormon dor di e don i poder di Dios. Tantu José komo Oliverio ta indentifiká komo Apòstelnan ordená i asina tin e outoridat pa presidí riba e Iglesia.
Versíkulo 7 pa 30 ta kontené un resumen di doktrina esensial di Iglesia, inkluyendo e realidat di Dios, e Kreashon di genero humano, e Kaida, i Tata Selestial Su plan di salbashon dor di ekspiashon di JesuCristo. Versíkulo 37 ta kontené e e rekesítonan pa batisá den Señor Su Iglesia. Versíkulo 75 pa 79 ta eksponé e orashonnan di Santa Sena ku nos ta usa tur Sabat.
E doktrina, prinsipionan, sakramentonan, i práktikanan ku Señor a establesé dor di José Smith, e Profeta di e Restorashon, di bèrdat ta.7
E rekisitonan pa boutismo, maske profundo ta simpel di un manera úniko. Nan primeramente ta inkluí humildat dilanti di Dios, un kurason kebrantá i un spiritu kontritu,8 arepintiendo di tur piká, tumando riba nos e nòmber di JesuCristo, perseverá te na final, i demostrando dor di nos obra ku nos a risibí di e Spiritu di Cristo.9
Ta importante ku tur e kualifikashonnan pa boutismo ta spiritual Ningun atkesishon ekononómiko ni sosial ta nesesario. E pober i e riku tin e mesun rekesitonan spiritual.
No tin rekerimentu di rasa, genero, ni etnisidat. E Buki di Mormon ta hasié kla ku tur ta invitá pa partisipá di e bondat di Señor, “pretu i blanku, esnan mará òf liber, hòmber i muhé; … tur ta meskos pa Dios.”10 “Tur hende tin e privilegio, unu meskos ku e otro, i niun no ta prohibí.”11
Mirando nos “paresido” ku Dios, e tin poko sentido enfatisá nos diferensianan. Algun di un manera eroneo a enkurashá nos “pa imaginá hende di ta muchu mas diferente di nos mes i di otro ku nan ta di bèrdat. [Algun] ta tuma diferensia real pero chikitu, i ta magnifiká nan den abismo,”12
Adishonalmente, algun di manera eroneo a asumí ku pasó tur hende ta invitá pa risibí Su bondat i bida eterno, ku no tin rekesitonan di kondukta.13
Sinembargo, e skrituranan ta testifiká ku tur persona ku por wòrdu tene responsabel ta wòrdu rekeri pa arepentí di nan pikánan i warda Su mandamentunan.14 Señor ta hasié kla ku tur tin albedrio moral i “ta liber pa skohe libertat i bida eterno, dor di e gran Mediador di tur hende, … i duna oido na Su gran mandamentunan, i ta fiel na Su palabranan, i skohe bida eterno.”15 Pa risibí e bendishon di e Salbador Su Ekspiashon, nos mester ehersé afirmativamente nos albedrio moral pa skohe Cristo i obedesé Su mandamentunan.
Durante mi bida, e signifikado di “albedrio moral” i “liber albedrio” a wòrdu analisá i diskutí. Tabatin i a kontinua di tin hopi argumento intelektual riba e tópikonan aki.
Riba e portada di un publikashon importante di èks alumnonan di un universidat un profesor prominente di biologia ta afirmá, “No tin espasio pa liber albedrio.”16 No ta un sorpresa ku e profesor ta wòrdu sitá den e artíkulo bisando “No tin nada manera un Dios, … i no tin liber albedrio, i ku esaki ta un universo amplio, indiferente i bashí.” 17 Mi no por ta mas den desakuerdo ku esaki.
Un doktrina fundamental di nos fe ta ku nos tin albedrio moral,18 ku ta inkluí liber albedrio.19 Albedrio ta e abilidat pa skohe -i aktua ken nos ta sigui.15 E ta esensial den e plan di salbashon. Sin albedrio moral, nos no por a siña, progresá, ni skohe pa ta un ku Cristo Dor di albedrio moral, nos “ta liber pa skohe libertat i bida eterno.”20 Den e Konsilio premortal den shelu, e Tata Su plan a inkluí albedrio komo un elemento esensial. Lusifèr a rebeldiá i “buska pa distruí e albedrio di hòmber.”21 Konsekuentemente, e privilegio di tin un bida mortal a wòrdu nengá na Satanas i na esnan ku a siguié.
Otro spiritunan premortal a ehersé nan albedrio siguiendo Tata Selestial Su plan. Spiritunan bendishoná dor di nanse den e bida mortal aki ta sigui di tin na albedrio. Nos ta liber pa skohe i aktua, pero nos no por kontrolá e konsekuensianan. “Eskohonan bon i hustu ta kondusí na felisidat, pas, i bida eterno miéntras eskohonan di piká i maldat al final lo kondusí na angustia i miseria.”22 Manera Alma a bisa, “Maldat nunka no tabata felisidat.”23
Dn un mundu ekstremadamente kompetitivo, tin un esfuerso konstante pa bria. Luchando pa ta e mihó ku nos por ta, ta un esfuerso hustu i ku ta bal la pena. Esaki ta konsistente ku Señor Su doktrina. Esfuerso pa disminuí òf despresiá otronan òf krea bareranan pa nan éksito [por] a kontrali na Señor Su doktrina. Nos no por kulpa sirkunstansianan di otro pa un desishon pa aktua kontrali na Dios Su mandamentunan.
Den e mundu di awendia, ta fásil pa enfoká riba eksito material i di trabou. Algun ta pèrdè bista riba prinsipionan eterno i eskohonan ku tin signifikashon eterno. Nos lo ta sabí pa sigui Presidente Russell M. Nelson su konseho pa “pensa selestial.”24
Nos eskohonan mas importante por wòrdu hasí dor di kasi tur hende independientemente di talento, oportunidat, òf sirkunstansianan ekonómiko. Un énfasis riba pone eskohonan familiar promé ta esensial. Esaki ta kla den henter e skritura. Pensa den e relato den 1 Nefi, kaminda Lehi “a sali pa e desierto. I el a bandoná su kas, i e tera di su herensia, i su oro, i su plata, i su kosnan presioso, i no a bai ku nada, ku no ta su famía.”25
Ora nos ta enfrentá e kambionan di bida, hopi suseso ta sosodé riba kual nos tin poko òf niun kontròl. Desafíonan di salú i aksidentenan opviamente por kai den e kategoria aki. E pandemia di COVID-19 resien a impaktá hende severamente, ku a hasi tur kos bon. Pa e eskohonan di mas importante, nos tin kontròl. Bayendo bèk na mi tempu komo misionero, Elder Marion D. Hanks, nos presidente di mishon, a laga nos tur memorisá un poema di Ella Wheeler Wilcox:
No tin kasualidat, no tin destino, no tin fe.
Por pasa rondó di, òf stroba, òf kontrolá
E firme resolushon di un alma determiná.26
De asuntunan di prinsipio, komportamentu, opservansia religioso, i biba rekto, nos tin e kòntròl. Nos fe den i adorashon di Dios e Tata i Su Tu, JesuCristo, ta un eskoho ku nos a hasi.276
Por fabor komprondé mi no ta boga pa ménos interes den estudio ni trabou. Loke mi ta bisa ta ku ora ku esfuersonan relashoná ku edukashon i trabou ta elevá riba e famia òf di ta unu ku Cristo, e konsekuensianan no intenshoná por ta hopi atverso.
E doktrina kla i simpel spliká den Doctrina y Convenios 20 ta konmovedó i kombinsente ya ku e ta amplia i klarifiká konseptonan spiritual sagrado. E ta siña ku salbashon ta bin ora JesuCristo ta hustifiká i santifiká almanan ku a arepentí dor di e Salbador Su grasia.28 E ta prepará e senario pa e ròl preminente di Su Ekspiashon.
Nos mester lucha pa inkluí otronan den nos sírkulo di unidat. Si nos ke sigui e amonestashon di Presidente Russell M. Nelson pa reuní Israel esparsí na tur dos banda di e velo, nos mester inkluí otronan den nos sírkulo di unidat. Manera Presidente Nelson a siña asina bunita: “Riba kada kontinente iriba tur e islanan den laman, hendenan ta wòrdu rekohé den E Iglesia di JesuCristo di e Santunan di e Delaster Dianan. Diferensianan di kultura, idioma, genero, rasa, i nashonalidat ta pèrdè nan importansia ora e fielnan ta drenta den e kaminda di kombenio i bini na nos Redentor stimá.”29
Nos ta uní dor di nos amor i fe den JesuCristo i komo yunan di un Tata Selestial amoroso. E esensia di pertenesé di bèrdat ta pa ta unu ku Cristo. E ordenansanan di boutismo i e Santa Sena eksponé den Doctrina y Convenios 20, huntu ku nos kombenionan di tèmpel ta uni nos den maneranan spesial i pèrmití nos pa ta unu ku manera di importansia eterno i pa biba den pas i harmonia.
Mi ta duna mi testimonio i testimonio ku sertesa ku JesuCristo ta biba, i dor di Su Ekspiashon, nos por ta unu ku Cristo Den e nòmber sagrado di JesuCristo, amèn.