Oposishon den Tur Kos

Dor di Elder Mathias Held

Di e Setenta

Pa por ehersé nos albedrio, nos mester tin opshonnan di oposishon pa konsiderá.

Resientemente, segun nos tabata koriendo den un siudat deskonosí pa nos, inesperadamente mi a hasi un lorada robes, kual a laga mi kasa i ami riba un karetera prinsipal sin final pa mianan, sin por a bira bèk. Nos a risibí un invitashon kaloroso pa bai kas di un amigu i tabata preokupá ku awor nos lo a yega muchu mas lat ku nos tabata spera.

Miéntras nos tabata riba e kaminda aki i buskando desesperadamente un manera pa sali, mi a kulpa mi mes di no a pone bon atenshon na e sistema di nabegashon. E eksperensia aki a pone mi pensa tokante kon tin bia den nos bida nos ta tuma desishonnan robes i kon nos mester biba ku e konsekuensianan humildemente i ku pasenshi te ora ku nos por kambia nos rumbo atrobe.

Bida ta trata di tuma desishonnan. Nos Tata Selestial a duna nos e regalo dibino di albedrio presisamente pa nos por a siña for di nos desishonnan—for di esnan bon i tambe esnan malu. Nos ta koregí nos desishonnan robes ora nos arepentí. Akinan kresementu ta tuma lugá. Tata Selestial Su plan pa nos tur ta pa siña, desaroyá i progresá pa bida eterno.

For di dia ami i mi kasa a haña e lèsnan di e misioneronan i a djòin Iglesia hopi aña pasá, semper mi a wòrdu impreshoná pa e siñansanan profundo ku Lehi a duna su yu Jakob den e Buki di Mormon. El a siñ’é ku “Señor Dios a laga pa hende por aktua pa su mes”¹ i ku ta nesesario, pa tin oposishon den tur kos.”² Pa por ehersé nos albedrio, nos mester tin opshonnan di oposishon pa konsiderá. Fuera di esei, e Buki di Mormon ta rekordá nos tambe ku nos a wòrdu “instruí sufisiente”³ i ku “e Spiritu di Cristo”⁴ a wòrdu duna na kada un di nos “pa diserní bon for di malu”⁵

Den bida, konstantemente nos ta konfrontá hopi desishonnan importante. Por ehèmpel:

Skohe si nos ta sigui Dios Su mandamentunan òf no.
Skohe pa por tin fe i rekonosé ora ku milagernan sosodé òf warda dudosamente pa algu pasa promé ku skohe pa kere solamente e ora ei.
Skohe pa desaroyá konfiansa den Dios òf antisipá ku miedu un otro reto e siguiente dia.

Manera ora mi a hasi e lorada robes riba e kaminda ei, sufri di e konsekuensianan di nos propio desishonnan pober hopi bia por ta spesialmente doloroso paso nos tin solamente nos mes pa akusá. Sinembargo, semper nos por skohe pa risibí e konsuelo pa medio di e proseso dibino di arepentimentu, koregí kosnan malu i hasi nan bon bek, i dor di hasi esaki siña algun lèsnan ku ta kambia bida.

Tin bia nos por eksperensia oposishon tambe i pruebanan di kosnan fuera di nos kontrol, manera:

Momentunan di bon salu i periodonan di malestar.
Tempunan di pas i tempunan di guera.
Oranan di dia i anochi i temporadanan di zomer i di wenter.
Tempunan di trabou siguí pa tempunan di sosiegu.

Maske nos no por skohe entre e tipo di situashonnan aki paso nan ta djis pasa, ainda nos ta liber pa skohe kon pa reakshoná kontra nan. Nos por hasi esei ku un aktitut positivo i pesimista. Nos por buska pa siña for di e eksperensia i puntra pa Señor su yudansa i sosten òf nos por pensa ku nos ta riba nos mes den e prueba aki i ku nos mester sufri nos so. Nos por “ahustá nos belanan”pa e realidat nobo òf nos por disidí pa no kambia nada. Den e skuridat di anochi, nos por sende nos lusnan Den e frui di invierno, nos lo mester skohe pa bisti paña kontra frui. Den tempu di malesa, nos por buska ayudo di dòkter òf spiritual. Nos por skohe kon pa reakshoná den e sirkunstansianan aki.

Ahustá,siña,buska,skohe tur ta verbonan di akshon. Kòrda ku nos ta agentenan i no ophetonan. I laga nos no lubidá nunka ku Jesus a primintí pa “tuma riba dje e dolónan i malesanan di su pueblo … ku E lo … sostené,” òf yuda, nos ora ku nos bai na djE.⁶ Nos por skohe pa konstruí nos fundeshi riba e baranka ku ta JesuCristo di manera ku ora e warwarú bini “e lo no tin poder riba [nos].”⁷ El a primintí ku “ken ku bini [na E], [E] lo risibí; i bendishoná ta esnan ku bini na [djE].”⁸

Awor, tin un prinsipio adishonal ku ta spesialmente importante. Lehi a bisa ku”mester tin … un oposishon den tur kos.”⁹ Esaki ta nifika ku oposishonnan no ta eksisti apart for di otro. Nan por asta komplementá otro. Nos lo no por identifiká goso si nos no a eksperensia tristesa un sierto momentu. Sinti hamber tin bes ta yuda nos pa ta spesialmente agradesido ora ku nos tin sufisiente pa kome atrobe. Nos lo no por a identifiká bèrdat si nos no a mira engaño tambe aki i aya.

E oposishonnan aki ta manera e dos bandanan di un moneda. Tur dos banda tei semper presente. Charles Dickens a duna un ehèmpel di e idea aki ora ku el a sirbi ku “E tabata e mihó tempu, e tabata e tempu di mas malu.”¹⁰

Laga mi duna un ehèmpel di nos propio bida. Kasa, forma famia, i haña yunan a trese pa nos e momentunan di mas alegria den nos bida ku nos a yega di eksperensia nunka den nos bida, pero tambe e momentunan di doló di mas profundo, angustia i luto ora ku algu paso un di nos. Den e alegria i felisidat infinito ku nos yunan tin bes tabata sigui tambe periodonan di malesanan frekuente, hospitalisashon, i nochinan sin drumi yena ku ansiedat; pero tambe haña alivio den orashonnan i bendishonnan di saserdosio. E eksperensianan kontradiktorio aki a siña nos ku nos no ta nos so nunka den momentunan di sufrimentu i nan a mustra nos tambe kuantu nos por soportá ku Señor su sosten i yudansa. E eksperensianan aki a yuda pa forma nos den un manera maravioso i e ta totalmente balapena. No ta pa esaki nos a bini?

Den skrituranan nos por haña tambe algun ehèmpel interesante:

Lehi a siña su yu Jakob ku e aflikshonnan ku el a sufri den wustein a yud’e haña sa e grandesa di Dios i ku “[Dios] lo konsagrá [su] aflikshonnan pa [su] probecho.”¹¹
Durante Jose Smith su enkarselashon kruel den e prizòn di Liberty, Señor a bisé ku “tur e kosnan aki lo [dun’e] eksperensia, i lo ta pa [su] bienestar.”¹²
Finalmente, JesuCristo su sakrifisio infinito tabata siertamente e ehèmpel di doló di mas grandi i sufrimentu nunka bisto, pero el a trese tambe e bendishonnan bunita di Su Ekspiashon pa tur e yunan di Dios.

Kaminda tin solo, mester tin sombra tambe. Inundashonnan por trese destrukshon, pero nan ta trese bida tambe. Lágrimanan di doló hopi bes ta wòrdu kombertí den lágrimanan di alivio i felisidat. Sintimentunan di tristesa ora ku sernan kerí fayesé despues lo wòrdu kompensá ku e alegria di reuní atrobe. Den tempunan di guera i destrukshon, hopi akshonnan di bondat i amor ta sosodé tambe pa esnan ku “wowo pa mira i orea pa skucha.”¹³

Nos mundu di awendia hopi bes ta wòrdu karakterisá pa miedu i ansiedat—miedu di kiko futuro lo trese kuné pa nos. Pero Jesus a siña nos pa konfia i “wak na [Dje] den kada pensamentu; no duda, ni teme.”¹⁴

Laga nos konstantemente hasi un esfuerso konsiente pa wak ámbos banda di tur moneda asigná na nos den nos bida. Ounke tin bes ámbos banda no ta visibel pa nos mes ora, nos por sa di konfia ku nan tei semper ei nan.

Nos por ta sigur ku nos difikultatnan, penanan, aflikshonnan i dolónan no ta definí nos: mas bien, ta e manera ku nos ta pasa dor di nan lo yuda nos krese i hala mas serka di Dios. Ta nos aktitut i desishonnan ta definí nos muchu mas mihó ku nos retonan.

Ora tin salu, balorá i gradesí kada momentu. Ora tin malesa, purba di siña ku pasenshi for di esaki i sa ku esaki por kambia atrobe di akuerdo ku Dios su boluntat. Ora di tristesa, konfia ku felisidat ta den porta; hopi bes nos no por mir’e ainda. Kambia bo enfoke konsientemente i elevá bo pensamentunan na e aspektonan positivo di retonan; paso sin duda nan tambe lo tei semper! No lubidá nunka pa ta agradesido. Skohe pa Kere. Skohe pa tin fe den JesuCristo. Skohe pa konfia Dios semper. Skohe pa “pensa selestial,” manera Presidente Russell M. Nelson a siña nos resientemente!¹⁵

Laga pa nos ta semper konsiente di nos Tata Selestial su plan maravioso pa nos. E ta stima nos i a manda Su Yu Stima pa yuda den nos pruebanan i pa habri pa nos e porta pa regresá bek na E. JesuCristo ta bibu i ta para ei nan na tur momentu, wardando nos pa skohe pa yama na Dje pa proveé sosten, fortalesa i salbashon. Di e kosnan aki Mi ta tèstifiká den e nòmber di JesuCristo, amèn.