Kombenionan i Responsabilidatnan
E Iglesia di JesuCristo ta konosí komo un iglesia ku ta enfatisá riba hasi kombenionan ku Dios,.
“Kon bo Iglesia ta diferensia for di otronan?” Mi kontesta na e pregunta importante aki a bin ta varia miéntras mi a madurá i miéntras e Iglesia a bin ta krese. Tempu mi a nase na Utah na 1932, nos Iglesia su miembresia tabata solamente mas o ménos 700,000 reuní mayormente den Utah i e estadonan den serkania. Durante e tempu ei, nos tabatin solamente 7 tèmpel. Awe e miembresia di e Iglesia di JesuCristo di e Santunan di e Delaster dianan su number ta mas ku 17 mión den mas o ménos 170 nashon. For di 1 di aprel, nos tin 189 tèmpel dediká den varios nashon i 146 otronan den diferente estado di planifikashon i konstrukshon. Mi a sinti pa papia tokante di e propósito di e tèmpelnan aki i e historia i ròl di e kombenio den nos adorashon. Esaki lo suplementá e enseñansanan inspirá di e diskursantenan anterior.
I.
Un kombenio ta un kompromiso pa kumpli ku sierto responsabilidatnan. Kompromisonan personal ta esensial pa e regulashon di nos bidanan individual i pa e funshonamentu di sosiedat. E idea aki ta wòrdu desafiá aktualmente. Un minoria ku ta ekspresá nan mes hopi ta oponé outoridat institushonal i ta insistí ku personanan mester ta liber for di kualke restrikshon ku ta limitá nan libertat individual. Ainda nos sa for di añanan di eksperensia ku personanan ta entregá algun libertat individual pa gana e bentahanan di biba den komunidatnan organisá. E tipo di entrega di libertat individual ta prinsipalmente basá riba kompromisonan òf kombenionan, ekspresá òf impliká.
Aki tin algun ehèmpel di responsabilidatnan di kombenio den nos sosiedat: (1) wesnan, (2) militar, (3) empleado médiko i (4) bombero. Tur esnan involví den e empleonan konosí aki ta hasi un kompromiso—hopi biaha formalisá dor di un huramentu òf kombenio—pa ehersé su debernan asigná. E mesun kos ta bèrdat di nos misioneronan di tempu kompletu. Pañanan distinkto òf plakanan ku nòmber tin komo intenshon ku ta mustra ku esun ku ta karg’é ta bou di kombenio i p’esei e tin e deber di siña i sirbi i mester wòrdu apoyá den e servisio ei. Un propósito relatá ta pa rekòrdá esnan ku ta bisti esakinan di nan responsabilidatnan di kombenio. No tin ningun magia den nan paña òf símbolo distinktivo, solamente un rekordatorio nesesario di e responsabilidatnan ku esnan ku ta us’é a asumí. Esaki tambe ta bèrdat di e símbolonan di e renchinan di kompromiso òf matrimonio i nan ròl den duna nota na opservadónan òf rekòrdando e kargadónan di nan responsabilidat di kombenio.
II.
Loke mi a bisa di kombenio siendo un fundeshi pa e regulashon di bidanan individual ta apliká partikularmente na kombenionan religioso. E fundeshi i historia di hopi afiliashon religioso i rekisitonan ta basá riba kombenionan. Por ehèmpel, e kombenio Abrahámiko ta fundamental pa vários tradishon religioso. E ta introdusí e idea di Dios Su promesanan di kombeio ku Su yunan. E Tèstamènt Bieu frekuentemente ta referí na Dios Su kombenio ku Abraham i su desendensia.
E promé parti di e Buki di Mormon, ku a wòrdu skibí durante e periodo di e Antiguo Testamento, klaramente ta demonstrá e ròl di e kombenionan den e historia i adorashon di e Israelitanan. Nefi a wòrdu bisá ku e israelitanan den e periodo ei tabata “un registro di e hudiunan, kual ta kontené e kombenionan di Señor, kual e a hasi ku e kas di Israel.”2 E bukinan di Nefi tambe ta hasi referensia frekuente na e kombenio Abrahámiko3 i na Israel komo “e pueblo di kombenio di Señor.”4 E práktika di kombenio ku Dios òf lidernan religioso tambe ta registrá den e skrituranan di e Buki di Mormon tokante Nefi, José den Egipto, Rei Benjamin, Alma, i Kapitan Moroni.5
III.
Ora e tempu a yega pa e Restorashon di e plenitut di e evangelio di JesuCristo, Dios a yama e profeta, José Smith. Nos no sa e kontenido kompletu di e instrukshonnan inisial di e angel Moroni na e profeta hóben madurando aki Nos sa ku el a bisa José ku “Dios ta tin un obra [p’e] pa hasi” i ku “e plenitut di e Evangelio sempiterno” mester wòrdu tresé dilanti, inkluyendo “e promesanan hasí na e tatanan.”6 Tambe nos sa ku e skrituranan ku e hóben José a lesa intensivamente—hasta promé ku el a wòrdu dirigí pa organisá e iglesia—tabata vários di e enseñansanan tokante kombenionan ku e tabata tradusi den e Buki di Mormon. E buki ei ta e fuente prinsipal di e Restorashon pa e plenitut di e evangelio, inkluyendo Dios Su plan pa Su yunan, i e Buki di Mormon ta yená ku referensia na kombenionan.
Siendo bon lesá den e Beibel, José mester tabata sa di e buki di Hebreonan su referensia na e Salbador Su intenshon di “hasi un kombenio nobo ku e kas di Israel i ku e kas di Juda.”7 Hebreo tambe e ta referí na Jesus komo “e mediadó di e kombenio nobo.”8 Signifikantemente, e relato bíbliko di e Salbador su ministerio mortal ta titulá “E Tèstamènt Nobo,” un sinónimo kasi manera “E Kombenio Nobo.”
Kombenionan tabata fundamental den e Restorashon di e evangelio. Esaki ta evidente den e pasonan inisial ku Señor a dirigí e Profeta pa tuma den organisá Su Iglesia. Asina e Buki di Mormon a wòrdu publiká, Señor a dirigí e organisashon di Su Iglesia restorá, pronto yamá E Iglesia di JesuCristo di e Santunan di e Delaster Dianan.9 Revelashon registrá na aprel 1830 ta bisa ku despues ku hendenan “lo wòrdu risibí dor di boutismo den su iglesia” despues ku nan “testifiká” (kual ta nifiká testifiká solemnemente) “ku di bèrdat nan a arepentí di tur nan pikánan, i nan ta deseoso pa tuma riba nan e nòmber di JesuCristo, teniendo e determinashon di sirbié te na final.”10
E mesun revelashon aki ta indiká pa e Iglesia “reuní huntu frekuentemente pa partisipá di e pan i e biña [awa] den rekuerdo di Señor Jesus.” E importansia di e ordenansa aki ta evidente den e palabranan di kombenionan spesifiká pa e elder òf saserdote ku ta ofisiá. E ta bendishoná e emblemanan di e pan pa “tur e almanan ku ta partisipá di dje … , pa nan por … testifiká na abo, O Dios e Tata Eterno, ku nan ta dispuesto pa tuma riba nan e nòmber di bo Yu, i semper kòrd’é i warda su mandamentunan ku el a duna nan.”11
E ròl sentral di kombenio den e Iglesia resien restorá a wòrdu reafirmá den e prefasio ku Señor a duna pa e promé publikashon di Su revelashonnan. Einan Señor a deklará ku El a yama José Smith pasobra e habitantenan di e tera “a alehá for di mi ordenansanan, i a kibra mi kombenio sempiterno.”12 E revelashon ta sigui splika ku Su mandamentunan a wòrdu duná “pa su kombenio sempiterno por wòrdu establesé.”13
Awe nos komprondé e ròl di kombenio den e Iglesia restorá i e adorashon di su miembronan. Presidente Gordon B. Hinckley a duna e resumen aki di e efekto di nos boutismo i e partisipashon semanal di e sakramento: “Kada miembro di e iglesia aki ku a drenta den e awanan di boutismo a bira parti di e kombenio sagrado. Kada bia ku nos partisipá di e sakramento di Señor Su sena, nos ta renobá e kombenio ei.”14
Nos a wòrdu rekòrdá pa hopi diskursante den e konferensia aki ku Presidente Russell M. Nelson hopi bia ta referi na e plan di salbashon komo e “kaminda di kombenio” ku ta “hiba nos bèk na [Dios]” i “tin di haber ku nos relashon ku Dios.”15 E ta siña nos tokante di e signifikado di e kombenio den nos seremonionan di tèmpel i ta urgi nos pa wak e fin for di e komienso i pa “pensa selestial.”16
IV.
Awor mi ta papia mas di kombenionan di tèmpel. Den kumplimentu di su responsabilidat pa restorá e plenitut di e evangelio di JesuCristo, e Profeta Jose Smith a pasa hopi di su último añanan dirigiendo e konstrukshon di un tèmpel den Nauvoo, Illinois. Pa medio di dje Señor a revelá enseñansanan, doktrina, i kombenionan sagrado pa su susesor por atminstrá den e témpelnan. Einan e hendenan a wòrdu investí lo wòrdu siñá di Dios su plan i e invitá pa hasi kombenionan sagrado. Esnan ku a biba fielmente na e kombenionan ei a wòrdu primintí bida eterno, kaminda “tur kos ta di nan” i nan “lo biba den e presensia di Dios i Cristo pa semper.”17
E seremonianan di investidura den e Tèmpel di Nauvoo a wòrdu atministrá djis promé ku e pioneronan di antaño a wòrdu saká pa kuminsá e biahe históriko pa e area montañoso di Wèst. Nos tin hopi testimonio di e pioneronan ei ku e poder ku nan a risibí dor di ta mará na Cristo den nan investidura den e Tèmpel di Nauvoo a duna nan e forsa pa hasi nan biahe épiko i establesé nan mes den Wèst.18
Personanan ku a wòrdu investí den e tèmpel ta responsabel pa bisti e garment di tèmpel, un artikulo di paña ku no ta visibel pasobra e ta wòrdu bistí bou di e pañanan eksterior. E ta rekòrdá e miembronan investí di e kombenionan sagrado ku nan a hasi i e bendishonnan ku nan a wòrdu primintí den e tèmpel sagrado. Pa logra e propósitonan sagrado ei, nos a wòrdu instruí pa bisti e garmentsnan di tèmpel kontinuamente, ku uniko eksepshon siendo esnan opviamente nesesario. Pasobra kombenionan no ta “tuma un dia liber”, pa kita e garmentsnan por wòrdu interpretá komo un falta di kumplimentu di e responsabilidatnan i bendishonnan na kua nan ta relatá. Den kontraste, e personanan ku ta bisti nan garments fielmente i warda nan kombenio di tèmpel ta afirmá nan ròl komo disípulo di e Señor JesuCristo.
E Iglesia di JesuCristo di e Santunan di e Delaster Dianan ta konstruyendo tèmpelnan rònt mundu. Nan propósito ta pa bendishoná e yunan di kombenio di Dios ku adorashon di tèmpel i ku e responsabilidatnan i poder sagrado i bendishonnan úniko di ta mará na Cristo ku nan a risibí pa medio di kombenio.
E Iglesia di JesuCristo ta konosí komo un iglesia ku ta enfatisá hasi kombenio ku Dios,. Kombenionan ta inherente den kada un di e ordenansanan di salbashon i eksaltashon ku e Iglesia restorá aki ta atministrá. E ordenansa di boutismo i su kombenio asosiá ta rekesitonan pa entrada den e reino selestial. E ordenansanan i kombenionan asosiá di e tèmpel ta e rekesitonan esensial pa eksaltashon den e reino selestial, kual ta bida eterno, “e don di mas grandi ku tur otro don di Dios.”19 Esei ta e enfoke di E Iglesia di JesuCristo di e Santunan di e Delaster Dianan.
Mi ta testifiká di JesuCristo, ku ta na kabes di e Iglesia ei, i mi ta invoka Su bendishon riba tur ku ta buska pa warda e kombenionan sagrado. Den e nòmber di JesuCristo, amèn.