Lanta! E Ta Yama Bo
E evangelio no ta un manera pa evitá desafionan i problemanan pero e ta un solushon pa oumentá nos fe i siña kon pa enfrentá nan.
Algun tempu pasá mi a puntra mi kasa, “Bo por bisa mi dikon, mas leu ku mi ta kòrda, nos nunka no tabata tin problemanan grandi den nos bida?”
El a wak mi i a bisa, “sigur. “Lo mi bisa bo dikon nos nunka no tabata tin problemanan grandi; esaki ta pasobra bo tin un memoria hopi kòrtiku!”
Su kontesta lihé i sabi a buta mi realisá un biaha mas ku bibando e evangelio di JesuCristo no ta kita e doló i aflikshonnan, kual ta nesesario pa krese.
E evangelio no ta un manera pa evitá desafionan i problemanan pero e ta un solushon pa oumentá nos fe i siña kon pa enfrentá nan.
Mi tabatin e sentido di e bèrdat aki un par di luna pasá ora mi tabata kanando un dia, i direpente mi bista a bira nublá, skur, i ku ola. Mi tabata tin miedu. Despues, e dòkternan a bisa mi, “Si bo no kuminsá ku tratamentu mesora, lo bo pèrdè bo bista asta den un par di siman.” Mi tabata tin mas miedu.
Y despues, nan a bisa:,“Bo mester inyekshonnan intravitreo—inyekshonnan dirèkt den e wowo, wowo hanchu habrí—kada kuatèr siman pa restu di bo bida.”
Esei tabata un yamada-di-atenshon inkómodo.
Despues un reflekshon a bini den e forma di un pregunta. Mi a puntra mi mes, “OK! Mi bista físiko no ta bon, pero konta ku mi vishon spiritual? Lo mi mester algun tratamentu einan? I kiko kemen di tin un vishon spiritual kla?”
Mi a reflekshoná riba e historia di e hòmber siegu, yamá Bartimeo, deskribí den e Evangelio di Marko. E eskrituranan ta bisa, “I ora el a tende ku tabata Jesus di Názarèt, el a kuminsá grita, i bisa, Jesus, Yu di David, tene miserikòrdia dimi.”1
Téknikamente, den e wowonan di hopi hende, Jesus tabata e yu di Jose só, e ora ei dikon Bartimeo a yam’É “Yu di David”? Simplemente pasobra el a rekonosé ku Jesus tabata e Mesias, kual a profetisá ku lo bai nase komo desendiente di David.2
Ta interesante ku e hòmber siegu aki, ku no tabata tin bista físiko, a rekonosé Jesus. El a wak spiritualmente lo kual ku e no por a wak físikamente, kaminda hopi otronan por a wak Jesus físikamente pero nan tabata totalmente siegu spiritualmente.
Di e historia aki nos ta siña mas tokante vishon spiritual kla.
Nos ta lesa, “I hopi hende tabata rous é mand’é keda ketu; ma el a grita mas duru ainda: Yu di David, tene miserikòrdia di mi.”3
Tur hende banda di dje tabata bis’é pa keda ketu, pero el a grita mas pasobra e tabata sá ken Jesus tabata realmente. El a ignorá e stèmnan ei i a grita aun mas duru.
El a aktuá na lugá di wòrdu aktuá riba dje. Apesar di su sirkunstansianan limitá, el a usa su fe pa bai mas leu di su limitashonnan.
Pues, e promé prinsipio ku nos ta siña tanos ta mantené un vishon spiritual kla ora nos enfoká riba JesuCristo i keda kere den lo kual nos sá ku ta bèrdat. n
Rumannan, pa warda nos bista spiritual intakto, nos mester disidi pa no skucha e stèmnan di e mundu rònt di nos. Den e mundu konfuso i ku ta konfundí aki, nos mester keda fiel na lo kual ku nos sa, fiel na nos kombenionan, fiel den warda e mandamentunan, i reafirmá nos kreensianan ainda mas fuerte, manera e hòmber aki a hasi. Nos mester grita ainda mas fuerte nos testimonio di e Señor na e mundu. E hòmber aki tabata konosé Jesus, a keda fiel na lo kual ku e tabata kere, i no tabata distraí pa e stèmnan rònt di dje.
Tin hopi stèmnan awe purbando di baha nos stèmnan komo disipelnan di JesuCristo. E stèmnan di e mundu ta purba di silensiá nos, pero ei ta eksaktamente pa kiko nos mester deklará nos testimonio di e Salbador mas duru i fuerte. Den tur e stèmnan di e mundu, Señor ta konta ku mi i kubo pa deklará nos testimonionan, pa hisa nos stèm, i pa bira Su stèm. Si nos no hasié, ken lo tèstifiká di JesuCristo? Ken lo bisa Su nòmber i deklará Su mishon divino?
Nos tin un karga spiritual ku ta bini for di nos konosementu di JesuCristo.
Pero kiko Bartimeo a hasi despues di esei?
Ku e mandato di Señor pa lanta, el a aktua atrobe den fe.
E skrituranan ta bisa, “I el a benta su mantel un banda, a bula ariba, i a bin serka Jesus.”4
E hòmber humilde i fiel aki a komprondé ku e por a lanta na un bida mihó pa e mandato di Jesus. E tabata sa ku e tabata mihó ku su sirkunstansianan, i e promé kos ku el a hasi ora el a tende Jesus yam’é tabata benta su mantel un banda.
Un biaha mas el a aktuá enbes di wòrdu aktuá.
El lo por a pensa, “Mi no mester esaki mas, awor ku Jesus a bini den mi bida. Esaki ta un dia nobo. Mi ta kla ku e bida di miseria aki. Ku Jesus mi por kuminsá un bida nobo di felisidat i alegria den djE, kunÉ, i pa medio di djE. I mi no ta preokupá kiko e mundu pensa di mi. Jesus ta yamando mi, i E lo yudami biba un bida nobo.”
Ki importante kambio!
Ora el a tira su mantel un banda, el a desasí di tur ekskusanan.
I esaki ta e di dos prinsipio: nos ta mantené un vishon spiritual kla ora nos laga e hòmber natural atras, repentí, i kuminsa un bida nobo den Cristo.
E manera pa hasié ta hasiendo i wardando kombenionan pa lanta na un bida mihó pa medio di JesuCristo.
Turesten nos traha èkskiusnan pa sinti duele di nos mes, duele di nos sirkunstansianan i problemanan i pa tur e kosnan malu ku ta pasando den nos bida, i asta tur e hendenan malu ku nos ta pensa ku ta hasi nos infelis, nos ta sigui ku e mantel riba nos skoudèrnan. Ta bèrdat ku tin biaha hende, konsiente òf no, ta heridá nos. Pero nos tin ku disidí pa aktua ku fe den Cristo pa kita e mantel emoshonal i mental ku ainda nos ta karga pa skonde ekskiusnan òf pika i tir’é afó, sabiendo ku E por i lo sana nos.
Nunka ta un bon èkskius pa bisa, “Mi ta manera mi ta pa motibu di algun sirkunstansianan desafortuná i desagradabel. I mi no por kambia, i mi ta hustifiká.”
Ora nos pensa asina, nos ta disidi pa wòrdu aktuá.
Nos ta keda ku e mantel.
Aktua ku fe ta nifiká konfia den nos Salbador, i kere ku pa medio di Su Ekspiashon, nos por lanta riba tur kos segun Su mandato.
E di tres prinsipio ta den e delaster kuater palabranan: “[el] a bini na Jesus.”
Kon e por a bai serka Jesus si e tabata siegu? E úniko manera pa kana bai serka Jesus ta pa medio di skucha Su stèm.
I esaki ta e di tres prinsipio: nos ta mantené un vishon spiritual kla ora nos ta tende e stèm di Señor i permití E guia nos.
Mesun kos ku e hòmber aki a hisa si stèm riba tur e stèmnan rònt di dje, e tabata dispuesto pa skucha e stèm di Señor meimei di tur e otro stèmnan.
Esaki ta e mesun fe ku a permití Pedro kana riba awa manera e tene su enfoke spiritual na Señor i no wòrdu distraí pa e bientunan rònt di dje.
E historia di e hòmber siegu aki ta kaba ku e palabranan “I mesora el a rekobrá su bista i a sigui Jesus riba kaminda.”5
Un di e lèsnan di mas importante di e historia aki ta ku e hòmber aki a ehersé berdadero fe den JesuCristo i a risibí un milager pasobra el a puntra ku berdadero intenshon, e berdadero intenshon di sigui E.
I esaki ta e delaster motibu pa e bendishonnan ku nos ta risibí den nos bida, kual ta sigui JesuCristo. E ta bai tokante rekonosé E, hasi i warda kombenionan ku Dios pa motibu di Dje, kambia nos naturalesapa medio di Dje, i perseverá te na fin pa medio di sigui E.
Pa ami, warda un vishon spiritual kla ta trata di enfoká riba JesuCristo.
Asina mi bista spiritual ta kla ora mi tuma mi inyekshonnan na wowo? Wel, ken ami ta pa bisa? Pero mi ta gradesido pa loke mi ta wak.
Mi ta mira ku klaridat e man di Señor den e trabou sagrado aki i den mi bida.
Mi ta mira e fe di hopi hendenan tur kaminda ku mi bai kual ta fortalesé mi mes fe.
Mi ta wak angelnan rònt dimi.
Mi ta mira e fe di hopi ku no ta mira Señor fisikamente pero ta rekonos’É spiritualmente, pasobra nan ta konos’É intimamente.
Mi ta tèstifiká ku e evangelio aki ta e kontesta pa tur kos, pasobra JesuCristo ta e kontesta pa tur hende. Mi ta gradesido di lo kual ku mi por mira ora mi ta sigui mi Salbador.
Mi ta primintí ku ora nos tende e stèm di Señor i pèrmitíÉ guia nos riba e Salbador Su kaminda di kombenio, nos lo wòrdu bendishoná ku vishon kla, komprondimentu spiritual, i pas di kurason i mente durante nos bida.
Ku nos por grita nos testimonio di djE mas duru ku e stèmnan rònt di nos, den un mundu ku tin mester di tende mas di JesuCristo i no ménos. Ku nos por kita e mantel ku ainda nos ta bisti, i lanta riba e mundu pa un bida mihó den i pa medio di Cristo. Ku nos por deshasí di tur èkskiusnan pa no sigui JesuCristo i haña tur e bon motibunan pa sigui É turesten nos tende Su stèm. Esaki ta mi orashon den e nòmber di JesuCristo, amèn.