Pre ordená pa Sirbi

Pa Elder Steven R. Bangerter

Di e Setenta

Nos Tata Selestial ta deseá pa revelá n’abo bo pre ordenashon personal, i E lo hasi esaki ora bo ta buska pa siña i sigui Su boluntat.

E anochi aki, mi ta papia ku e hubentut di e Iglesia, e generashon kresiente di hombres jovenes i mujeres jovenes ku ta e kargadónan di e standart pa e siguiente generashon.

Na òktober 2013, nos kerido profeta, Presidente Russell M. Nelson, a deklará: “Bo Tata Selestial a konosé bo pa hopi tempu. Abo, komo Su yunan, a wòrdu skohé dor di djE pa bin na tera na e momentu eksakto aki, pa ta un lider den Su gran obra aki na tera.”¹

Dos aña pasá, Presidente Nelson a kontinuá:

“Awe mi ta afirmá atrobe firmemente ku Señor a puntra kada hòmber hóben digno i kapas pa prepará pa i sirbi un mishon. Pa hombres jovenes Santu di e Delaster Dianan, servisio mishonal ta un responsabilidat di saserdosio. Boso hóbennan a wòrdu reservá pa e tempu aki ora e rekohementu primintí di Israel ta tumando lugá. …

Pa boso hermananan yòn i kapas, un mishon tambe ta un oportunidat poderoso, pero ta opshon, oportunidat. … Hasi orashon pa sa si Señor lo ke pa bo sirbi un mishon, i Su Spiritu Santu lo kontestá bo kurason i mente.”²

Nos profeta ta referí na Señor reservando e hubentut di nos tempu den e rekohementu di Israel i Su invitashon pa hasi orashon pa sa kiko Señor lo ke pa bo hasi ta, en parti, ta referensianan na e bida ku bo a biba i bendishonnan ku bo a risibí di Dios promé ku bo a nase riba e tera aki.³ Nos tur ku a nase riba e tera aki a biba promé huntu ku nos Tata Selestial komo Su yunan spiritual.⁴ Señor a deklará na Moises, “Ami, Señor Dios, a krea tur kos … spiritualmente, promé ku nan tabata naturalmente riba e fas di e tera.”⁵

Ora El a krea bo spiritualmente, El a stima bo komo Su yunan spiritual i a hinka den kada un di boso un naturalesa divino i destino eterno.⁶

Durante bo bida pre-mortal, “bo a desaroyá [bo] identidat i oumentá [bo] kapasidatnan spiritual.”⁷ Bo a wòrdu bendishoná ku e don di albedrio, e abilidat pa skohe pa bo mes, i bo a tuma desishonnan importante, manera e desishon di sigui e plan di felisidat di Tata Selestial, kual ta “optené un kurpa físiko i gana un eksperensia terenal pa progresá … i últimamente realisá [bo] destino divino komo heredero di bida eterno.”⁸ E desishon aki a afektá bo bida e tempu ei, den e bida pre-mortal, i e ta kontinuá ta afektá bo bida awendia.⁹ Komo un yu di Dios bibando den bida pre-mortal, abo a “krese den inteligensia i bo a siña pa stima e bèrdat.”¹⁰

Promé ku bo a nase, Dios a apuntá kada un di boso pa kumpli ku mishonnan spesífiko durante bo bida mortal riba e tera aki.¹¹ Si bo keda digno, e bendishonnan di e dekreto pre-mortal lo abilitá bo pa por tin tur tipo di oportunidat den e bida aki, inkluyendo oportunidatnan di sirbi den Iglesia i pa partisipá den e obra mas importante sosodiendo na tera awendia: e rekohementu di Israel.¹² E promesanan pre mortal i bendishonnan ta wòrdu yamá bo pre ordenashon. “E doktrina di pre ordenashon ta apliká na tur miembro di Iglesia.”¹³ Pre ordenashon no ta garantisá ku lo bo risibí sierto yamamentunan òf responsabilidatnan. E bendishonnan i oportunidatnan ta bin den e bida aki komo resultado di ehersé bo albedrio na un manera rekto, djis manera bo pre ordenashon den bo bida pre-mortal a bini komo resultado di rektitut.¹⁴ Ora bo a proba bo mes digno i progresá riba e kaminda di kombenio, lo bo risibí oportunidatnan pa sirbi den e klas di Mujeres Jovenes òf quorum di saserdosio. Lo bo wòrdu bendishoná pa sirbi den tèmpel, pa bira un ruman ministrante, i pa sirbi un mishon komo un disípulo di JesuCristo.

Dikon e ta importá pa buska pa konosé i komprondé bo pre ordenashon? Den e tempu ku tin hopi pregunta, kaminda hopi ta buska pa sa nan identidat berdadero, e echo ku Dios konosé nos i a bendishoná kada un di nos individualmente promé ku nos a nase riba e tera aki ku “karakterístika[nan] esensial di … pre mortal, mortal, i identidat i propósito eterno” ta trese pas dushi i siguransa na nos mente i kurason.¹⁵ Sabiendo ken bo ta, ta kuminsá ku entendimentu di Dios su bendishonnan di pre ordenashon dramá riba bo promé ku bo a nase riba e tera aki. Nos Tata Selestial ta deseá pa revelá n’abo, bo pre ordenashon personal, i E lo hasi esaki ora bo ta buska pa siña i sigui Su boluntat.¹⁶

Mi ta gusta lesa e postnan di Presidente Nelson riba Instagram. Un di mi faboritonan tabata riba 20 di yüli 2022. El a skibi.

“Mi ta kere ku si Señor lo papia ku bo direktamente, e promé kos ku E lo sòru pa bo komprondé ta bo identidat berdadero. Mi kerido amigunan, boso ta literalmente yunan spiritual di Dios. …

“… Wak pa bo no duda nunka: Bo potensial ta divino. Ku bo búskeda diligente, Dios lo duna bo un bista chikitu di ken lo bo por bira.”¹⁷

Mi por kompartí ku boso kon mi tata a siña mi pa diskubrí mi identidat i Dios Su plan den mi bida?

Un djasabra mainta tempu mi ta tin diestres aña, mi tabata kòrtando yerba komo parti di mi trabounan di kas semanal. Ora mi a kaba, mi a skucha e porta sera den e parti patras di nos kas i mi a mira mi tata yamando mi pa mi bai serka dje. Mi a kana bai patras na e pòrch, i el a invitá mi pa sinta riba e trapi. Tabata un mainta bunita. Ainda mi ta kòrd’é sinta asina serka duna mi ku nos skoudernan tabata mishi. El a kuminsá konta mi ku e stima mi. El a puntra mi ki mi metanan ta den bida. Mi a pensa, “Pues, esei ta fásil.” Mi tabata sa dos kos sigur: Mi ke tabata mas haltu, i mi ker a bai kamper mas biaha. Mi tabata un alma simpel. El a sonreí, tuma un pousa pa un momentu, i bisa: “Steve, mi ke kompartí algu ku bo ku ta hopi importante p’ami. Mi a hasi orashon pa nos Tata Selestial lo sòru pa loke mi bisa awor aki lo ta imprimí na un manera inolvidabel den bo mente i den bo alma p’asina bo no lubidá nunka mas.”

Mi tata tabatin mi atenshon kompletu e momentu ei. El a bira i wak mi den mi wowonan i bisa, “Mi yu, protehé bo momentunan privá den bo bida.” Tabatin un pousa largu ora e tabata laga e signifikado drenta profundo den mi kurason.

El a sigui e ora ei, “Bo sa, e momentunan kaminda bo ta e úniko den besindario i ningun hende no sa kiko bo ta hasiendo? E momentunan ei kaminda bo ta pensa ‘loke sea ku mi hasi no ta afektá ningun hende, solamente ami?”

E ora ei el a bisa, “Mas ku kualke otro tempu den bo bida, loke bo ta hasi den e momentunan privá den bo bida lo tin e impakto mas grandi riba kon bo ta enfrentá desafionan i dolónan di kurason; i loke bo hasi den momentunan privá lo tambe tin un impakto mas grandi ora bo ta enfrentá e éksitonan i goso ku lo bo eksperensiá ku kualke otro momentu den bo bida.

Mi tata a risibí e promé deseo di su kurason. E zonido i kadensia den su bos, i e amor ku ami a sinti den su palabranan, tabata imprimí na un manera inolvidabel den mi mente i den mi alma e dia ei.

Mi a siña durante e añanan ku e milager mas grandi di e dia ei riba e trapinan di e kas di mi infansia tabata ku, den e tempunan privá di mi bida, mi por bai serka Dios den orashon i risibí revelashon. Mi tata tabata siñando mi kon mi por siña di Dios Su bendishonnan di pre ordenashon. Den e momentunan privá ei, mi a siña ku e Buki di Mormon ta e palabra di Dios. Mi a siña ku Dios a pre ordená mi pa sirbi un mishon. Mi a siña ku Dios konosé mi i ta skucha i kontestá mi orashonnan. Mi a siña ku Jesus ta e Cristo, nos Salbador i Redentor.

Ounke mi a kometé hopi eror for di e dia memorabel ei ku mi tata, luchando pa protehé e momentunan privá den mi bida a keda un ankra mei mei di tormentonan den mi bida i a abilitá mi pa buska un lugá sigur i e bendishonnan di sanashon i fortalesa di nos Salbador Su sakrifisio di amor i ekspiashon.

Mi kerido rumannan hóben, ora bo ta protehá bo momentunan privá den bo bida ku rekreashon sano; skuchando músika ku ta elevá, lesa skritura, teniendo orashon regular ku nifikashon, i hasiendo esfuerso pa risibí i skrudiñá bo bendishon patriarkal, lo bo risibí revelashon. Den e palabranan di Presidente Nelson, bo wowonan lo bira “hanchu habrí na e bèrdat ku e bida aki berdaderamente ta e tempu kaminda bo ta disidí ki tipo di bida bo ke biba pa semper.”¹⁸

Nos Tata Selestial lo kontestá bo orashonnan, spesialmente bo orashonnan ofresé durante e momentunan privá di bo bida. E lo revelá n’abo bo donnan i talentonan pre ordená, i bo lo sinti Su amor rondoná bo, si bo pidi sinseramente i deseá genuinamente pa sa. Ora bo ta protehé e momentunan privá di bo bida, bo partisipashon den e ordenansanan i kombenionan di e evangelio lo bira mas signifikante. Lo bo mara bo mes mas kompletu na Dios den e kombenionan ku bo hasi ku nE, i lo bo wòrdu halsá na un speransa, fe i siguransa mas grandi den e promesanan ku E a hasi ku bo. Bo ke sa Dios Su plan p’abo? Mi ta duna testimonio ku E ke pa bo sa, i El a inspirá Su profeta na e mundu pa invitá kada un di nos pa hasi orashon i risibí e eksperensia aki pa nos mes ku ta habri nos wowonan . Mi ta duna testimonio di e realidat i poder di nos Salbador Su sakrifisio ekspiatorio ku ta hasi posibel pa yega na tur Dios Su bendishonnan pre ordená i disfrutá di nan, den e nòmber di JesuCristo, amèn.