ຊື່ສັດຈົນເຖິງທີ່ສຸດ

ໂດຍ ຊິດສະເຕີ ແອນເດຣຍ ມູໂຍສ ສະແປນນາວສ໌

ທີ່ປຶກສາທີສອງໃນຝ່າຍປະທານອົງການຍິງໜຸ່ມສາມັນ

ໂດຍພຣະຫັດຂອງພຣະອົງ, ພວກເຈົ້າຈະສາມາດໂຄ່ນລົ້ມໂກລີອາດ ທີ່ປະກົດຕົວຢູ່ໃນຊີວິດຂອງພວກເຈົ້າໄດ້.

ເພື່ອນໜຸ່ມທີ່ຮັກແພງທັງຫລາຍ, ມື້ນີ້ ຂ້າພະເຈົ້າຂໍກ່າວກັບພວກເຈົ້າໂດຍກົງ—ຊາວໜຸ່ມຂອງສາດສະໜາຈັກ.

ເປັນເວລາໜຶ່ງປີແລ້ວນັບຕັ້ງແຕ່ຝ່າຍປະທານອົງການຍິງໜຸ່ມສາມັນຖືກເອີ້ນ. ຫລາຍສິ່ງຫລາຍຢ່າງໄດ້ເກີດຂຶ້ນໃນປີທີ່ຜ່ານມານີ້!

ພວກເຮົາໄດ້ພົບປະກັບພວກເຈົ້າຫລາຍຄົນ ແລະ ໄດ້ສຶກສາຄຳສອນຂອງພຣະຄຣິດນຳກັນ. ພວກເຮົາໄດ້ຮ້ອງເພງ, ໄດ້ຜູກມິດໃໝ່, ແລະ ໄດ້ຮັບໃຊ້ນຳພວກເຈົ້າໃນຊຸມຊົນຂອງເຮົາ. ພວກເຮົາໄດ້ຮັບຄວາມເຂັ້ມແຂງໂດຍການຮັບຟັງປະຈັກພະຍານຂອງພວກເຈົ້າຢູ່ທີ່ກອງປະຊຸມຊາວໜຸ່ມ ແລະ ກິດຈະກຳຕະຫລອດທົ່ວໂລກ. ແລະ ພວກເຮົາໄດ້ນະມັດສະການນຳກັນຢູ່ໃນບ້ານຂອງພຣະຜູ້ເປັນເຈົ້າ.

ແຕ່ລະເທື່ອ, ພວກເຮົາໄດ້ແບ່ງປັນຂ່າວສານຈາກອົງພຣະເຢຊູຄຣິດເຈົ້າຂອງເຮົາ. ຄ່ຳຄືນນີ້ກໍຈະບໍ່ແຕກຕ່າງຫຍັງ; ຂ້າພະເຈົ້າມີຂ່າວສານສຳລັບພວກເຈົ້າ, ຊາວໜຸ່ມຂອງສາດສະໜາຈັກຂອງພຣະເຢຊູຄຣິດ.

ຄຳຖາມທີ່ສຳຄັນ

ພວກເຈົ້າເຄີຍໄດ້ຄິດບໍວ່າ ພວກເຈົ້າຈະສາມາດເປັນຄົນຊື່ສັດຕໍ່ພຣະເຈົ້າໃນຂະນະທີ່ດຳລົງຊີວິດຢູ່ໃນໂລກທີ່ມີບາບນີ້? ພວກເຈົ້າຈະໄດ້ຄວາມເຂັ້ມແຂງມາຈາກໃສ ເພື່ອຈະກ້າວໄປໜ້າ ແລະ ສືບຕໍ່ເຮັດຄວາມດີ? ພວກເຈົ້າຈະປະສົບຄວາມຊື່ນຊົມທີ່ແທ້ຈິງແນວໃດ?

ຂ້າພະເຈົ້າຄິດວ່າ ປະສົບການຂອງດາວິດ ແລະ ໂກລີອາດ¹ ສາມາດຊ່ວຍໄດ້.

ດາວິດ ແລະ ໂກລີອາດ

ຢູ່ໃນພຣະຄຳພີເດີມ, ກອງທັບຊາວຟີລິດສະຕິນກຳລັງສູ້ຮົບກັບພວກອິດສະຣາເອນ, ແລະ ທຸກເຊົ້າ ແລະ ທຸກແລງ, ຊາຍຟີລິດສະຕິນຜູ້ສູງໃຫຍ່ຊື່ ໂກລີອາດ ໄດ້ທ້າທາຍໃຫ້ພວກອິດສະຣາເອນຄົນໃດກໍຕາມອອກໄປຕໍ່ສູ້ກັບລາວ.

ຢູ່ໃນທ່າມກາງພວກອິດສະຣາເອນກໍມີດາວິດອາໄສຢູ່ດ້ວຍ, ລາວເປັນຄົນລ້ຽງແກະໜຸ່ມ ທີ່ຮູບຮ່າງນ້ອຍກວ່າໂກລີອາດຫລາຍເທົ່າ ແຕ່ມີສັດທາມະຫາສານໃນພຣະເຢຊູຄຣິດ. ດາວິດໄດ້ອາສາຈະອອກໄປສູ້ຮົບ. ແມ່ນແຕ່ກະສັດກໍໄດ້ພະຍາຍາມຫັກຫ້າມບໍ່ໃຫ້ລາວໄປ, ແຕ່ດາວິດໄດ້ເລືອກທີ່ຈະໄວ້ວາງໃຈໃນພຣະເຢຊູຄຣິດ.

ກ່ອນໜ້ານັ້ນ, ດາວິດໄດ້ຕໍ່ສູ້ກັບສິງ ແລະ ໝີມາກ່ອນແລ້ວ. ຈາກປະສົບການຂອງລາວເອງ, ລາວໄດ້ຮູ້ວ່າພຣະເຈົ້າໄດ້ປົກປ້ອງລາວ ແລະ ເຮັດໃຫ້ລາວໄດ້ຮັບໄຊຊະນະ. ຕໍ່ດາວິດ, ອຸດົມການຂອງພຣະເຈົ້າຄືອຸດົມການທີ່ສຳຄັນທີ່ສຸດ. ສະນັ້ນ, ເຕັມໄປດ້ວຍສັດທາໃນພຣະເຈົ້າ ອົງທີ່ຈະບໍ່ປະຖິ້ມລາວ, ລາວໄດ້ເກັບເອົາຫີນກ້ຽງຫ້າກ້ອນ, ຖືເອົາກະຖຸນຂອງລາວ, ແລະ ໄດ້ອອກໄປປະເຊີນໜ້າກັບຊາຍສູງໃຫຍ່ຄົນນັ້ນ.

ພຣະຄຳພີບອກເຮົາວ່າ ຫີນກ້ອນທຳອິດທີ່ດາວິດໄດ້ຍິງໄປ ຖືກໜ້າຜາກຂອງໂກລີອາດ, ໄດ້ດັບຊີວິດຂອງລາວ.²

ການສະແຫວງຫາຄຳຕອບ

ເຖິງແມ່ນດາວິດໄດ້ໃຊ້ຫີນພຽງກ້ອນດຽວເພື່ອຂ້າໂກລີອາດ, ແຕ່ລາວໄດ້ກຽມໄວ້ຫ້າກ້ອນ. ຫ້າກ້ອນ! ສິ່ງນີ້ເຮັດໃຫ້ຂ້າພະເຈົ້າຄິດກ່ຽວກັບວ່າ ຂ້າພະເຈົ້າສາມາດກະກຽມຕົວຂ້າພະເຈົ້າເອງເພື່ອປະເຊີນໜ້າກັບຊາວໂລກແນວໃດ.

ຈະເປັນແນວໃດຖ້າຫາກວ່າກ້ອນຫີນຂອງດາວິດເປັນຕົວແທນໃຫ້ແກ່ຄວາມເຂັ້ມແຂງທີ່ເຮົາຕ້ອງການເພື່ອຈະມີໄຊຊະນະໃນຊີວິດຂອງເຮົາ? ຫີນຫ້າກ້ອນນັ້ນຈະເປັນສິ່ງໃດແດ່? ຂ້າພະເຈົ້າໄດ້ຄິດເຖິງຄວາມເປັນໄປໄດ້ເຫລົ່ານີ້:

ກ້ອນຫີນແຫ່ງ ຄວາມຮັກຂອງຂ້າພະເຈົ້າທີ່ມີຕໍ່ພຣະເຈົ້າ.
ກ້ອນຫີນແຫ່ງ ສັດທາຂອງຂ້າພະເຈົ້າໃນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.
ກ້ອນຫີນແຫ່ງ ຄວາມຮູ້ເຖິງເອກະລັກທີ່ແທ້ຈິງຂອງຂ້າພະເຈົ້າ.
ກ້ອນຫີນແຫ່ງ ການກັບໃຈທຸກໆວັນຂອງຂ້າພະເຈົ້າ.
ກ້ອນຫີນແຫ່ງ ການເຂົ້າເຖິງອຳນາດຂອງພຣະເຈົ້າ.

ໃຫ້ເຮົາມາເວົ້າລົມກ່ຽວກັບວ່າເຮົາໄດ້ຮັບພອນໂດຍຄວາມເຂັ້ມແຂງເຫລົ່ານີ້ແນວໃດ.

ໜຶ່ງ, ກ້ອນຫີນແຫ່ງ ຄວາມຮັກຂອງຂ້າພະເຈົ້າທີ່ມີຕໍ່ພຣະເຈົ້າ. ການຮັກພຣະເຈົ້າແມ່ນພຣະບັນຍັດຂໍ້ໃຫຍ່ ແລະ ຂໍ້ຕົ້ນ.³ ຄູ່ມື ສຳລັບຄວາມເຂັ້ມແຂງຂອງຊາວໜຸ່ມ ສິດສອນເຮົາວ່າ: “ພຣະເຈົ້າຮັກເຈົ້າ. ພຣະອົງເປັນພຣະບິດາຂອງເຈົ້າ. ຄວາມຮັກທີ່ສົມບູນແບບຂອງພຣະອົງສາມາດດົນໃຈເຈົ້າໃຫ້ຮັກພຣະອົງ. ເມື່ອຄວາມຮັກຂອງເຈົ້າທີ່ມີຕໍ່ພຣະບິດາເທິງສະຫວັນເປັນອິດທິພົນທີ່ສຳຄັນທີ່ສຸດໃນຊີວິດຂອງເຈົ້າ, ການຕັດສິນໃຈຫລາຍໆຢ່າງຈະງ່າຍຂຶ້ນ.”⁴

ຄວາມຮັກຂອງເຮົາທີ່ມີຕໍ່ພຣະເຈົ້າ ແລະ ຄວາມສຳພັນທີ່ໃກ້ຊິດຂອງເຮົາກັບພຣະອົງ ຊ່ວຍໃຫ້ເຮົາມີຄວາມເຂັ້ມແຂງທີ່ເຮົາຕ້ອງການ ເພື່ອຈະປ່ຽນແປງຫົວໃຈຂອງເຮົາ ແລະ ເອົາຊະນະຄວາມທ້າທາຍຂອງເຮົາງ່າຍຂຶ້ນ.

ສອງ, ກ້ອນຫີນແຫ່ງ ສັດທາຂອງຂ້າພະເຈົ້າໃນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ເມື່ອພຣະເຢຊູຄຣິດໄດ້ສະເດັດມາສູ່ໂລກ, ພຣະອົງໄດ້ຮັບທຸກທໍລະມານເພື່ອບາບຂອງເຮົາ⁵ ແລະ ພຣະອົງໄດ້ຮັບເອົາຄວາມໂສກເສົ້າຂອງເຮົາ, ຄວາມເຈັບປວດຂອງເຮົາ, ຄວາມອ່ອນແອຂອງເຮົາ, ແລະ ຄວາມເຈັບປ່ວຍທາງຮ່າງກາຍ ແລະ ຈິດໃຈຂອງເຮົາ. ນັ້ນຄືເຫດຜົນທີ່ພຣະອົງຮູ້ວ່າຈະຊ່ວຍເຮົາແນວໃດ. ການມີສັດທາໃນພຣະເຢຊູຄຣິດໝາຍຄວາມວ່າ ທີ່ຈະໄວ້ວາງໃຈໃນສະຕິປັນຍາຂອງພຣະອົງ, ເວລາຂອງພຣະອົງ, ຄວາມຮັກຂອງພຣະອົງ, ແລະ ອຳນາດຂອງພຣະອົງຢ່າງເຕັມທີ່ ເພື່ອຈະຊົດໃຊ້ເພື່ອບາບຂອງເຮົາ. ກ້ອນຫີນແຫ່ງສັດທາໃນພຣະເຢຊູຄຣິດຈະເອົາຊະນະ “ຍັກໃຫຍ່” ໃນຊີວິດຂອງເຮົາ.⁶ ເຮົາສາມາດເອົາຊະນະໂລກທີ່ຕົກຕ່ຳນີ້ໄດ້ເພາະວ່າ ພຣະອົງເປັນຜູ້ທຳອິດທີ່ໄດ້ເອົາຊະນະມັນ.⁷

ສາມ, ກ້ອນຫີນແຫ່ງ ຄວາມຮູ້ເຖິງເອກະລັກທີ່ແທ້ຈິງຂອງຂ້າພະເຈົ້າ. ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ໄດ້ສິດສອນເຮົາວ່າ ເອກະລັກທີ່ສຳຄັນທີ່ສຸດຂອງເຮົາແມ່ນວ່າ ເຮົາເປັນລູກຂອງພຣະເຈົ້າ, ລູກແຫ່ງພັນທະສັນຍາ, ແລະ ສານຸສິດຂອງພຣະເຢຊູຄຣິດ.⁸

ທຸກສິ່ງປ່ຽນໄປເມື່ອຂ້າພະເຈົ້າຮູ້ວ່າຂ້າພະເຈົ້າເປັນໃຜແທ້ໆ.⁹ ເມື່ອຂ້າພະເຈົ້າສົງໄສຄວາມສາມາດຂອງຕົນ, ຂ້າພະເຈົ້າມັກຈະກ່າວຊ້ຳໃນໃຈ ຫລື ອອກສຽງວ່າ, “ເຮົາເປັນທິດາຂອງພຣະເຈົ້າ, ເຮົາເປັນທິດາຂອງພຣະເຈົ້າ,” ຫລາຍໆເທື່ອເທົ່າທີ່ຂ້າພະເຈົ້າຕ້ອງການ ຈົນກວ່າຂ້າພະເຈົ້າຮູ້ສຶກໝັ້ນໃຈທີ່ຈະດຳເນີນຕໍ່ໄປ.

ສີ່, ກ້ອນຫີນແຫ່ງ ການກັບໃຈປະຈຳວັນຂອງຂ້າພະເຈົ້າ. ຢູ່ໃນຄູ່ມື ສຳລັບຄວາມເຂັ້ມແຂງຂອງຊາວໜຸ່ມ, ເຮົາອ່ານວ່າ: “ການກັບໃຈບໍ່ແມ່ນການລົງໂທດສຳລັບບາບ; ມັນເປັນວິທີທີ່ພຣະຜູ້ຊ່ວຍໃຫ້ລອດປົດປ່ອຍເຮົາຈາກບາບ. ການກັບໃຈໝາຍຄວາມວ່າຈະປ່ຽນແປງ―ທີ່ຈະຫັນໜີຈາກບາບ ແລະ ຫັນໄປຫາພຣະເຈົ້າ. ມັນໝາຍຄວາມວ່າຈະປັບປຸງ ແລະ ຮັບເອົາການໃຫ້ອະໄພ. ການປ່ຽນແປງແບບນີ້ບໍ່ແມ່ນເຫດການທີ່ເກີດຂຶ້ນເທື່ອດຽວ; ມັນເປັນຂະບວນການທີ່ຕໍ່ເນື່ອງ.”¹⁰

ບໍ່ມີຄວາມຮູ້ສຶກໃດທີ່ເປັນອິດສະລະຫລາຍໄປກວ່າຄວາມຮູ້ສຶກເຖິງການໃຫ້ອະໄພຂອງພຣະເຈົ້າ ແລະ ການທີ່ຮູ້ວ່າເຮົາສະອາດ ແລະ ໄດ້ຄືນດີກັບພຣະອົງ. ການໃຫ້ອະໄພ ແມ່ນເປັນໄປໄດ້ສຳລັບທຸກຄົນ.

ຫີນກ້ອນທີຫ້າຄືກ້ອນຫີນແຫ່ງ ການເຂົ້າເຖິງອຳນາດຂອງພຣະເຈົ້າ. ພັນທະສັນຍາທີ່ເຮົາເຮັດກັບພຣະເຈົ້າ, ດັ່ງທີ່ເຮົາເຮັດໃນພິທີການບັບຕິສະມາ, ຊ່ວຍໃຫ້ເຮົາເຂົ້າເຖິງອຳນາດຂອງຄວາມເປັນເໝືອນພຣະເຈົ້າ.¹¹ ອຳນາດຂອງພຣະເຈົ້າແມ່ນອຳນາດທີ່ແທ້ຈິງ ທີ່ຊ່ວຍເຮົາໃຫ້ປະເຊີນໜ້າກັບການທ້າທາຍ, ຕັດສິນໃຈທີ່ຖືກຕ້ອງ, ແລະ ເພີ່ມທະວີຄວາມສາມາດຂອງເຮົາທີ່ຈະອົດທົນຕໍ່ສະພາບການທີ່ຍາກລຳບາກ. ມັນເປັນອຳນາດຊຶ່ງໃນນັ້ນ ເຮົາສາມາດເຕີບໂຕໃນຄວາມສາມາດໃດໜຶ່ງໂດຍສະເພາະທີ່ເຮົາຕ້ອງການ.¹²

ຄູ່ມື ສຳລັບຄວາມເຂັ້ມແຂງຂອງຊາວໜຸ່ມ ອະທິບາຍວ່າ: “ພັນທະສັນຍາ ເຊື່ອມຕໍ່ ເຈົ້າເຂົ້າກັບພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ. ມັນ ເພີ່ມທະວີອຳນາດຂອງພຣະເຈົ້າ ໃນຊີວິດຂອງເຈົ້າ.”¹³

ໃຫ້ເຮົາມາເວົ້າລົມກັນກ່ຽວກັບການເຊື່ອມຕໍ່ນັ້ນ. ຈຳຕອນທີ່ພຣະຄຣິດໄດ້ສິດສອນຄວາມແຕກຕ່າງລະຫວ່າງເຮືອນທີ່ສ້າງຂຶ້ນຢູ່ເທິງດານຫີນ ແລະ ເຮືອນທີ່ສ້າງຂຶ້ນຢູ່ເທິງຫາດຊາຍໄດ້ບໍ?¹⁴ ແອວເດີ ດີເດີ ແອັຟ ອຸກດອບ ໄດ້ອະທິບາຍວ່າ: “ເຮືອນຈະບໍ່ລອດໃນພະຍຸເພາະຄວາມແໜ້ນໜາຂອງມັນ. ມັນຈະບໍ່ລອດເພາະດານຫີນທີ່ແຂງແກ່ນເຊັ່ນກັນ. ເຮືອນຈະລອດໄດ້ຍ້ອນວ່າມັນຍຶດຕິດຢ່າງໝັ້ນຄົງຢູ່ກັບດານຫີນທີ່ແຂງແກ່ນ. ມັນແມ່ນຄວາມເຂັ້ມແຂງຂອງ ການເຊື່ອມຕໍ່ ກັບດານຫີນ ທີ່ເປັນສິ່ງສຳຄັນ.”¹⁵

ການເຊື່ອມຕໍ່ສ່ວນຕົວຂອງເຮົາກັບພຣະເຢຊູຄຣິດຈະຊ່ວຍໃຫ້ເຮົາມີຄວາມກ້າຫານ ແລະ ຄວາມໝັ້ນໃຈທີ່ຈະກ້າວໄປໜ້າ ທ່າມກາງຜູ້ຄົນທີ່ບໍ່ນັບຖືຄວາມເຊື່ອຖືຂອງເຮົາ ຫລື ຜູ້ທີ່ກັ່ນແກ້ງເຮົາ. ພຣະຄຣິດເຊື້ອເຊີນເຮົາໃຫ້ຮັກສາພຣະອົງໄວ້ຢູ່ໃນຄວາມນຶກຄິດຂອງເຮົາສະເໝີ; ພຣະອົງບອກເຮົາວ່າ “ຈົ່ງເບິ່ງທີ່ເຮົາໃນຄວາມນຶກຄິດ ທຸກຢ່າງ.”¹⁶ ການຄິດກ່ຽວກັບພຣະຜູ້ຊ່ວຍໃຫ້ລອດຈະຊ່ວຍໃຫ້ເຮົາມີຄວາມນຶກຄິດທີ່ແຈ່ມແຈ້ງເພື່ອຈະຕັດສິນໃຈ, ລົງມືກະທຳປາດສະຈາກຄວາມຢ້ານກົວ, ແລະ ທີ່ຈະປະຕິເສດສິ່ງທີ່ກົງກັນຂ້າມກັບຄຳສອນຂອງພຣະເຈົ້າ.¹⁷ ເມື່ອຂ້າພະເຈົ້າມີມື້ທີ່ຫຍຸ້ງຍາກ ແລະ ຂ້າພະເຈົ້າຮູ້ສຶກວ່າ ຂ້າພະເຈົ້າຈະທົນຕໍ່ໄປບໍ່ໄຫວແລ້ວ, ການຄິດກ່ຽວກັບພຣະຄຣິດ ກໍນຳຄວາມສະຫງົບມາໃຫ້ຂ້າພະເຈົ້າ ແລະ ໃຫ້ຂ້າພະເຈົ້າມີຄວາມຫວັງ.

ເຮົາຈະເພິ່ງອຳນາດນີ້ຂອງພຣະເຢຊູຄຣິດໄດ້ແນວໃດ? ການເຊື່ອຟັງພັນທະສັນຍາຂອງເຮົາ ແລະ ການເພີ່ມທະວີສັດທາຂອງເຮົາໃນພຣະເຢຊູຄຣິດເປັນສິ່ງສຳຄັນ.

ແທ້ຈິງແລ້ວ ຂ້າພະເຈົ້າຢາກໃຫ້ດາວິດມີຫີນອີກກ້ອນໜຶ່ງ; ນັ້ນກໍຈະເປັນກ້ອນຫີນແຫ່ງ ປະຈັກພະຍານຂອງຂ້າພະເຈົ້າ. ປະຈັກພະຍານຂອງເຮົາແມ່ນສ້າງຂຶ້ນໂດຍປະສົບການທາງວິນຍານສ່ວນຕົວ ຊຶ່ງໃນນັ້ນເຮົາຮັບຮູ້ອິດທິພົນແຫ່ງສະຫວັນໃນຊີວິດຂອງເຮົາ.¹⁸ ບໍ່ມີໃຜສາມາດເອົາຄວາມຮູ້ນັ້ນໄປຈາກເຮົາໄດ້. ການຮູ້ສິ່ງທີ່ເຮົາຮູ້ຈາກການທີ່ໄດ້ມີປະສົບການທາງວິນຍານຂອງເຮົາເປັນສິ່ງທີ່ລ້ຳຄ່າ. ການເປັນຄົນຈິງໃຈຕໍ່ຄວາມຮູ້ນັ້ນຊ່ວຍໃຫ້ເຮົາເປັນອິດສະລະ. ມັນໃຫ້ເຮົາມີຄວາມຊື່ນຊົມ! ຖ້າຫາກເຮົາມັກຄວາມຈິງ, ເຮົາຈະສະແຫວງຫາມັນ, ແລະ ເມື່ອເຮົາໄດ້ພົບມັນແລ້ວ, ເຮົາຈະປົກປ້ອງມັນ.¹⁹

ຄຳເຊື້ອເຊີນ

ດັ່ງທີ່ຂ້າພະເຈົ້າໄດ້ເລືອກຫີນກ້ອນທີຫົກ, ຂ້າພະເຈົ້າຂໍເຊື້ອເຊີນພວກເຈົ້າໃຫ້ໄປພົບກັບຫ້ອງຮຽນ, ກຸ່ມ, ຫລື ຄອບຄົວຂອງພວກເຈົ້າ ແລະ ຄິດກ່ຽວກັບຄວາມເຂັ້ມແຂງຢ່າງອື່ນທີ່ພວກເຈົ້າຕ້ອງມີ ເພື່ອຈະຍັງຄົງຊື່ສັດຕໍ່ພຣະເຈົ້າ ແລະ, ດ້ວຍເຫດນັ້ນ, ເອົາຊະນະໂລກ.

ຄຳສັນຍາ

ໝູ່ເພື່ອນທີ່ຮັກແພງ, ພຣະຄຣິດຕື່ນເຕັ້ນທີ່ຈະສະຖິດຢູ່ເປັນເພື່ອນເຮົາ ໃນການເດີນທາງຂອງຊີວິດເຮົາ. ຂ້າພະເຈົ້າສັນຍາກັບພວກເຈົ້າ, ຂະນະທີ່ພວກເຈົ້າຈັບຮາວເຫລັກ, ພວກເຈົ້າຈະຍ່າງຈັບມືກັນໄປກັບພຣະເຢຊູຄຣິດ.²⁰ ພຣະອົງ ຈະຊີ້ນຳພວກເຈົ້າ, ແລະ ພຣະອົງ ຈະສິດສອນພວກເຈົ້າ.²¹ ໂດຍພຣະຫັດ ຂອງພຣະອົງ, ພວກເຈົ້າຈະສາມາດໂຄ່ນລົ້ມໂກລີອາດ ທີ່ປະກົດຕົວຢູ່ໃນຊີວິດຂອງພວກເຈົ້າໄດ້.

ປະຈັກພະຍານ

ຂ້າພະເຈົ້າເປັນພະຍານວ່າ ມີຄວາມຊື່ນຊົມໃນການອະທິຖານທຸກໆວັນ, ໃນການອ່ານພຣະຄຳພີມໍມອນທຸກໆວັນ, ໃນການຮັບສ່ວນສິນລະລຶກທຸກໆວັນອາທິດ, ແລະ ໃນການໄປຫ້ອງຮຽນສາດສະໜາ—ແມ່ນແຕ່ຕອນເຊົ້າໆ! ມີຄວາມຊື່ນຊົມໃນການເຮັດຄວາມດີງາມ.

ມີຄວາມຊື່ນຊົມໃນການເປັນຄົນຊື່ສັດຕໍ່ພຣະເຈົ້າແຫ່ງຈັກກະວານ, ພຣະຜູ້ຊ່ວຍໃຫ້ລອດຂອງໂລກ, ຈອມກະສັດ. ມີຄວາມຊື່ນຊົມໃນການເປັນສານຸສິດຂອງພຣະເຢຊູຄຣິດ.

ພຣະເຈົ້າເປັນພຣະບິດາຂອງເຮົາ. ພຣະອົງຮູ້ຈັກຄວາມປາດຖະໜາຂອງໃຈພວກເຈົ້າ ແລະ ຄວາມເປັນໄປໄດ້ຂອງພວກເຈົ້າ, ແລະ ພຣະອົງໄວ້ພຣະໄທພວກເຈົ້າ.

ຊາວໜຸ່ມທີ່ຮັກແພງ, ພຣະເຢຊູຄຣິດຈະຊ່ວຍພວກເຈົ້າໃຫ້ເປັນຄົນຊື່ສັດຈົນເຖິງທີ່ສຸດ. ຂ້າພະເຈົ້າເປັນພະຍານເຖິງຄວາມຈິງເຫລົ່ານີ້, ໃນພຣະນາມຂອງພຣະເຢຊູຄຣິດ, ອາແມນ.