ການກົງກັນຂ້າມໃນທຸກຢ່າງ

ໂດຍ ແອວເດີ ມາຕີອາສ໌ ແຮວດ໌

ແຫ່ງສາວົກເຈັດສິບ

ເພື່ອໃຊ້ອຳເພີໃຈຂອງເຮົາ, ເຮົາຕ້ອງມີທາງເລືອກທີ່ກົງກັນຂ້າມກັນໃຫ້ເຮົາພິຈາລະນາ.

ເມື່ອບໍ່ດົນມານີ້, ໃນຂະນະທີ່ກຳລັງຂັບລົດຢູ່ໃນເມືອງທີ່ພວກເຮົາບໍ່ຮູ້ຈັກ, ຂ້າພະເຈົ້າໄດ້ລ້ຽວລົດຜິດທາງໂດຍບໍ່ໄດ້ຕັ້ງໃຈ, ຊຶ່ງເຮັດໃຫ້ຂ້າພະເຈົ້າ ແລະ ພັນລະຍາຕ້ອງຂັບຂຶ້ນໄປທາງດ່ວນທີ່ບໍ່ສາມາດລ້ຽວກັບໄດ້ເປັນໄລຍະຫລາຍກິໂລແມັດ. ພວກເຮົາໄດ້ຮັບຄຳເຊີນທີ່ດີໃຫ້ໄປບ້ານຂອງເພື່ອນຄົນໜຶ່ງ ແລະ ເປັນຫ່ວງວ່າຕອນນີ້ພວກເຮົາອາດຈະໄປຮອດຊ້າຫລາຍກວ່າທີ່ພວກເຮົາຄາດໄວ້.

ຂະນະທີ່ຂັບລົດຢູ່ໃນທາງດ່ວນເສັ້ນນີ້ ແລະ ພະຍາຍາມຊອກຫາທາງອອກອີກຄັ້ງຢ່າງສິ້ນຫວັງ, ຂ້າພະເຈົ້າໄດ້ກ່າວໂທດຕົວເອງທີ່ບໍ່ໄດ້ໃສ່ໃຈລະບົບການນຳທາງໃຫ້ດີກ່ອນນີ້. ປະສົບການນີ້ໄດ້ເຮັດໃຫ້ຂ້າພະເຈົ້າຄິດວ່າບາງຄັ້ງໃນຊີວິດຂອງເຮົາ ເຮົາກໍຕັດສິນໃຈຜິດ ແລະ ເຮົາຕ້ອງໄດ້ໃຊ້ຊີວິດກັບຜົນທີ່ຕາມມາຢ່າງຖ່ອມໃຈ ແລະ ອົດທົນຕໍ່ໄປ ຈົນກວ່າເຮົາຈະສາມາດປ່ຽນເສັ້ນທາງໄດ້ອີກຄັ້ງ.

ຊີວິດຄືທຸກສິ່ງກ່ຽວກັບການຕັດສິນໃຈເລືອກ. ພຣະບິດາເທິງສະຫວັນຂອງເຮົາໄດ້ມອບຂອງປະທານແຫ່ງອຳເພີໃຈຈາກສະຫວັນຢ່າງແນ່ແທ້ໃຫ້ກັບເຮົາ ເພື່ອວ່າເຮົາຈະສາມາດຮຽນຮູ້ຈາກການເລືອກຂອງເຮົາ—ຈາກສິ່ງທີ່ຖືກຕ້ອງ ແລະ ຈາກສິ່ງທີ່ຜິດນຳອີກ. ເຮົາແກ້ໄຂການເລືອກຜິດຂອງເຮົາເມື່ອເຮົາກັບໃຈ. ນີ້ຄືຈຸດທີ່ການເຕີບໂຕເກີດຂຶ້ນ. ແຜນຂອງພຣະບິດາເທິງສະຫວັນສຳລັບເຮົາທຸກຄົນແມ່ນກ່ຽວກັບການຮຽນຮູ້, ການພັດທະນາ, ແລະ ການກ້າວໄປທາງໜ້າສູ່ຊີວິດນິລັນດອນ.

ນັບຕັ້ງແຕ່ຂ້າພະເຈົ້າ ແລະ ພັນລະຍາ ໄດ້ຮັບການສິດສອນຈາກຜູ້ສອນສາດສະໜາ ແລະ ໄດ້ເຂົ້າຮ່ວມສາດສະໜາຈັກເມື່ອຫລາຍປີກ່ອນ, ຂ້າພະເຈົ້າປະທັບໃຈສະເໝີກັບການສິດສອນທີ່ເລິກເຊິ່ງ ທີ່ລີໄຮໄດ້ສິດສອນຢາໂຄບລູກຊາຍຂອງເພິ່ນໃນພຣະຄຳພີມໍມອນ. ເພິ່ນໄດ້ສິດສອນລາວວ່າ “ອົງພຣະຜູ້ເປັນເຈົ້າຈຶ່ງປະທານໃຫ້ມະນຸດ ເພື່ອພວກເຂົາຈະກະທຳດ້ວຍຕົວເອງ”¹ ແລະ ວ່າ “ມັນຕ້ອງມີການກົງກັນຂ້າມໃນທຸກຢ່າງ.”² ເພື່ອໃຊ້ອຳເພີໃຈຂອງເຮົາ, ເຮົາຕ້ອງມີທາງເລືອກທີ່ກົງກັນຂ້າມກັນໃຫ້ເຮົາພິຈາລະນາ. ໃນການກະທຳເຊັ່ນນັ້ນ, ພຣະຄຳພີມໍມອນຍັງເຕືອນເຮົາອີກວ່າເຮົາ “ໄດ້ຮັບການແນະນຳຢ່າງພາກພຽນ”³ ແລະ ວ່າ “ພຣະວິນຍານຂອງພຣະຄຣິດ”⁴ ໄດ້ຖືກປະທານໃຫ້ກັບເຮົາທຸກຄົນ ເພື່ອໃຫ້ “ຮູ້ຈັກຄວາມດີຈາກຄວາມຊົ່ວ.”⁵

ໃນຊີວິດ, ເຮົາຕ້ອງປະເຊີນໜ້າກັບທາງເລືອກທີ່ສຳຄັນຫລາຍຢ່າງຢູ່ສະເໝີ. ຍົກຕົວຢ່າງ:

ການເລືອກວ່າເຮົາຈະເຮັດຕາມພຣະບັນຍັດຂອງພຣະເຈົ້າຫລືບໍ່.
ການເລືອກທີ່ຈະມີສັດທາ ແລະ ຮັບຮູ້ເມື່ອມີສິ່ງອັດສະຈັນເກີດຂຶ້ນ ຫລື ລໍຖ້າຢ່າງສົງໄສໃຫ້ບາງສິ່ງເກີດຂຶ້ນເທົ່ານັ້ນກ່ອນການເລືອກທີ່ຈະເຊື່ອ.
ການເລືອກທີ່ຈະພັດທະນາຄວາມໄວ້ວາງໃຈໃນພຣະເຈົ້າ ຫລື ຄາດວ່າຈະມີການທ້າທາຍອີກໃນມື້ຕໍ່ໄປດ້ວຍຄວາມຢ້ານກົວ.

ເຊັ່ນດຽວກັນກັບຕອນທີ່ຂ້າພະເຈົ້າລ້ຽວຜິດທາງຂຶ້ນໄປທາງດ່ວນ, ການທົນທຸກຈາກຜົນທີ່ຕາມມາຂອງການຕັດສິນໃຈທີ່ບໍ່ຖືກຕ້ອງຂອງ ເຮົາເອງ ມັກຈະເຈັບປວດເປັນພິເສດຍ້ອນວ່າ ເຮົາໂທດໃຜບໍ່ໄດ້ນອກຈາກຕົວເຮົາເອງ. ເຖິງຢ່າງໃດກໍຕາມ, ເຮົາກໍສາມາດເລືອກໄດ້ຢູ່ສະເໝີທີ່ຈະຮັບເອົາການປອບໂຍນຜ່ານທາງຂະບວນການກັບໃຈແຫ່ງສະຫວັນ, ແກ້ໄຂສິ່ງທີ່ຜິດພາດໃຫ້ຖືກຕ້ອງໄດ້ອີກຄັ້ງ, ແລະ ດ້ວຍການເຮັດເຊັ່ນນັ້ນກໍໄດ້ຮຽນຮູ້ບົດຮຽນບາງຢ່າງທີ່ປ່ຽນແປງຊີວິດ.

ບາງຄັ້ງເຮົາກໍອາດຈະພົບພໍ້ກັບສິ່ງກົງກັນຂ້າມ ແລະ ການທົດລອງຈາກສິ່ງທີ່ເຮົາບໍ່ສາມາດຄວບຄຸມໄດ້, ເຊັ່ນວ່າ:

ຊ່ວງເວລາການມີສຸຂະພາບແຂງແຮງ ແລະ ເຈັບປ່ວຍ.
ເວລາແຫ່ງສັນຕິສຸກ ແລະ ເວລາແຫ່ງສົງຄາມ.
ຊົ່ວໂມງກາງເວັນ ແລະ ກາງຄືນ ແລະ ລະດູຮ້ອນ ແລະ ລະດູໜາວ.
ເວລາຂອງການອອກແຮງງານຕາມມາດ້ວຍເວລາຂອງການພັກຜ່ອນ.

ເຖິງແມ່ນວ່າຕາມປົກກະຕິແລ້ວເຮົາບໍ່ສາມາດເລືອກໄດ້ລະຫວ່າງສະຖານະການເຫລົ່ານີ້ ເພາະວ່າມັນເກີດຂຶ້ນດ້ວຍຕົວມັນເອງ, ເຮົາຍັງຄົງມີອິດສະລະໃນການເລືອກທີ່ຈະປະຕິບັດກັບມັນ ແນວໃດ. ເຮົາສາມາດຕອບສະໜອງດ້ວຍທັດສະນະຄະຕິໃນແງ່ບວກ ຫລື ໃນແງ່ລົບ. ເຮົາສາມາດສະແຫວງຫາທີ່ຈະຮຽນຮູ້ຈາກປະສົບການ ແລະ ຂໍຄວາມຊ່ວຍເຫລືອ ແລະ ການສະໜັບສະໜູນຈາກພຣະຜູ້ເປັນເຈົ້າຂອງເຮົາ, ຫລື ເຮົາສາມາດຄິດວ່າເຮົາຢູ່ຕົວຄົນດຽວໃນການທົດລອງນີ້ ແລະ ເຮົາຈຳຕ້ອງທົນທຸກຢູ່ກັບມັນຕາມລຳພັງ. ເຮົາສາມາດ “ປັບໃບເຮືອຂອງເຮົາ” ໃຫ້ເຂົ້າກັບຄວາມເປັນຈິງໃໝ່, ຫລື ເຮົາສາມາດຕັດສິນໃຈບໍ່ປ່ຽນແປງຫຍັງເລີຍ. ໃນຄ່ຳຄືນທີ່ມືດມິດ, ເຮົາສາມາດເປີດໄຟຂອງເຮົາ. ໃນລະດູໜາວທີ່ເຍືອກເຢັນ, ເຮົາຄວນເລືອກທີ່ຈະໃສ່ເສື້ອຜ້າໃຫ້ອຸ່ນ. ໃນລະດູການແຫ່ງຄວາມເຈັບປ່ວຍ, ເຮົາສະແຫວງຫາການປິ່ນປົວ ແລະ ການຊ່ວຍເຫລືອທາງວິນຍານ. ເຮົາເປັນຄົນເລືອກວິທີທີ່ຈະຕອບໂຕ້ກັບສະຖານະການເຫລົ່ານີ້.

ປັບປ່ຽນ, ຮຽນຮູ້, ສະແຫວງຫາ, ເລືອກ ລ້ວນແລ້ວແຕ່ເປັນຄຳກິລິຍາການກະທຳ. ຈົ່ງຈື່ຈຳໄວ້ວ່າເຮົາເປັນຜູ້ກະທຳ ແລະ ບໍ່ແມ່ນຜູ້ຖືກກະທຳທັງນັ້ນ. ຂໍໃຫ້ເຮົາຢ່າລືມວ່າພຣະເຢຊູໄດ້ສັນຍາໄວ້ວ່າ “ພຣະອົງຈະຮັບເອົາຄວາມເຈັບປວດ ແລະ ຄວາມປ່ວຍໄຂ້ຂອງຜູ້ຄົນຂອງພຣະອົງ … ເພື່ອພຣະອົງຈະ … ຊ່ວຍເຫລືອ,” ຫລື ຊ່ວຍເຮົາເມື່ອເຮົາຫັນມາຫາພຣະອົງ.⁶ ເຮົາສາມາດເລືອກທີ່ຈະສ້າງຮາກຖານຂອງເຮົາໄວ້ເທິງດານຫີນນັ້ນກໍຄືພຣະເຢຊູຄຣິດ ເພື່ອວ່າເມື່ອຟ້າແມບເຫລື້ອມກັບລົມບ້າໝູເຂົ້າມາ, “ມັນຈະບໍ່ມີອຳນາດເໜືອ [ເຮົາ].”⁷ ພຣະອົງໄດ້ສັນຍາວ່າ “ຜູ້ໃດກໍຕາມທີ່ຈະເຂົ້າມາ [ຫາພຣະອົງ], [ພຣະອົງ] ຈະຮັບເອົາໄວ້; ແລະ ຄົນທີ່ມາຫາ [ພຣະອົງ] ຈະເປັນສຸກ.”⁸

ບັດນີ້, ມີຫລັກທຳເພີ່ມເຕີມອີກຢ່າງໜຶ່ງທີ່ສຳຄັນໂດຍສະເພາະ. ລີໄຮໄດ້ເວົ້າວ່າ “ຈຳເປັນຕ້ອງມີ … ການກົງກັນຂ້າມ ໃນທຸກຢ່າງ.”⁹ ຊຶ່ງໝາຍຄວາມວ່າການກົງກັນຂ້າມບໍ່ໄດ້ຢູ່ແຍກອອກຈາກກັນ. ພວກມັນຍັງສາມາດສົ່ງເສີມຊຶ່ງກັນແລະກັນ. ເຮົາຈະບໍ່ສາມາດຈຳແນກຄວາມສຸກໄດ້ນອກຈາກວ່າເຮົາໄດ້ປະສົບກັບຄວາມໂສກເສົ້າມາແລ້ວໃນຊ່ວງໃດໜຶ່ງ. ຄວາມຮູ້ສຶກຫິວໂຫຍໃນບາງຄັ້ງກໍຊ່ວຍໃຫ້ເຮົາຮູ້ກະຕັນຍູເປັນພິເສດເມື່ອເຮົາມີພຽງພໍທີ່ຈະກິນອີກຄັ້ງ. ເຮົາຈະບໍ່ສາມາດຈຳແນກຄວາມຈິງໄດ້ນອກຈາກວ່າເຮົາໄດ້ເຫັນຄຳຫລອກລວງຢູ່ບ່ອນນັ້ນ ແລະ ບ່ອນນີ້.

ການກົງກັນຂ້າງເຫລົ່ານີ້ກໍປຽບເໝືອນກັນກັບສອງດ້ານໃນຫລຽນດຽວກັນ. ທັງສອງດ້ານແມ່ນເປັນຢູ່ສະເໝີ. ຊາລ໌ ດິກເກັນ ໄດ້ຍົກຕົວຢ່າງຂອງແນວຄິດນີ້ ເມື່ອເພິ່ນໄດ້ຂຽນວ່າ “ມັນແມ່ນຊ່ວງເວລາທີ່ດີທີ່ສຸດ, ມັນແມ່ນຊ່ວງເວລາທີ່ໂຫດຮ້າຍທີ່ສຸດ.”¹⁰

ຂ້າພະເຈົ້າຂໍຍົກຕົວຢ່າງຈາກຊີວິດຂອງເຮົາເອງ. ການແຕ່ງງານ, ການສ້າງຄອບຄົວ, ແລະ ການມີລູກໄດ້ນຳຊ່ວງເວລາແຫ່ງຄວາມສຸກທີ່ຍິ່ງໃຫຍ່ທີ່ສຸດຂອງເຮົາ ທີ່ເຮົາເຄີຍພົບພໍ້ໃນຊີວິດຂອງເຮົາ ແຕ່ວ່າກໍຍັງເປັນຊ່ວງເວລາທີ່ເຈັບປວດ, ໂສກເສົ້າ, ແລະ ເສຍໃຈທີ່ສຸດ ເມື່ອມີບາງສິ່ງບາງຢ່າງເກີດຂຶ້ນກັບເຮົາຄົນໃດຄົນໜຶ່ງ. ຄວາມສຸກ ແລະ ຄວາມຊື່ນຊົມອັນເປັນນິດກັບລູກໆຂອງເຮົາ ບາງຄັ້ງກໍຕາມມາດ້ວຍຊ່ວງເວລາຂອງການເຈັບໄຂ້, ການເຂົ້າໂຮງໝໍ, ແລະ ການອົດຫລັບອົດນອນ ທີ່ເຕັມໄປດ້ວຍຄວາມທຸກ, ພ້ອມກັບການພົບພໍ້ຄວາມໂລ່ງໃຈໃນຄຳອະທິຖານ ແລະ ພອນຂອງຖານະປະໂລຫິດ. ປະສົບການກົງກັນຂ້າມກັນເຫລົ່ານີ້ໄດ້ສິດສອນເຮົາວ່າ ເຮົາບໍ່ເຄີຍຢູ່ຕົວຄົນດຽວໃນຊ່ວງເວລາແຫ່ງຄວາມທຸກທໍລະມານ, ແລະ ມັນຍັງສະແດງໃຫ້ເຮົາເຫັນຕື່ມອີກວ່າ ເຮົາສາມາດແບກຮັບດ້ວຍຄວາມຊ່ວຍເຫລືອ ແລະ ການອູ້ມຊູຈາກພຣະຜູ້ເປັນເຈົ້າ. ປະສົບການເຫລົ່ານີ້ຊ່ວຍຫລໍ່ຫລອມເຮົາໃນວິທີທີ່ດີເລີດ, ແລະ ທັງໝົດນີ້ກໍກຸ້ມຄ່າຢ່າງແນ່ແທ້. ແລ້ວບໍ່ແມ່ນເຮົາໄດ້ມາທີ່ນີ້ເພື່ອສິ່ງນີ້ບໍ?

ໃນພຣະຄຳພີ ເຮົາຍັງພົບເຫັນຕົວຢ່າງທີ່ໜ້າສົນໃຈຈຳນວນໜຶ່ງນຳອີກ:

ລີໄຮໄດ້ສິດສອນຢາໂຄບລູກຊາຍຂອງເພິ່ນວ່າ ຄວາມທຸກທີ່ລາວໄດ້ທົນຕໍ່ໃນຖິ່ນແຫ້ງແລ້ງກັນດານ ໄດ້ຊ່ວຍໃຫ້ລາວຮູ້ເຖິງຄວາມຍິ່ງໃຫຍ່ຂອງພຣະເຈົ້າ ແລະ “[ພຣະເຈົ້າ] ໄດ້ຕັ້ງຄວາມທຸກ [ຂອງລາວ] ໄວ້ເພື່ອຜົນປະໂຫຍດ [ຂອງລາວ].”¹¹
ໃນລະຫວ່າງການຖືກຄຸມຂັງຢ່າງໂຫດຮ້າຍຂອງໂຈເຊັບ ສະມິດ ໃນຄຸກລີເບີຕີ, ພຣະຜູ້ເປັນເຈົ້າໄດ້ບອກເພິ່ນວ່າ, “ທັງໝົດຈະເປັນປະສົບການໃຫ້ແກ່ [ເພິ່ນ], ແລະ ຈະເກີດຂຶ້ນເພື່ອຄວາມດີ [ຂອງເພິ່ນ].”¹²
ທ້າຍທີ່ສຸດ, ການເສຍສະລະອັນບໍ່ມີຂອບເຂດຂອງພຣະເຢຊູຄຣິດຄືຕົວຢ່າງທີ່ຍິ່ງໃຫຍ່ທີ່ສຸດຂອງຄວາມເຈັບປວດ ແລະ ການທົນທຸກທໍລະມານເທົ່າທີ່ເຄີຍເຫັນມາຢ່າງແນ່ນອນ, ແຕ່ມັນກໍຍັງໄດ້ນຳເອົາພອນອັນປະເສີດຂອງການຊົດໃຊ້ຂອງພຣະອົງ ມາສູ່ລູກໆຂອງພຣະເຈົ້າທັງໝົດນຳອີກ.

ໃນບ່ອນທີ່ມີແສງຕາເວັນສ່ອງ, ກໍຍ່ອມມີເງົາມືດຢູ່ທີ່ນັ້ນເຊັ່ນກັນ. ອຸທົກກະໄພສາມາດນຳການທຳລາຍລ້າງມາ, ແຕ່ຕາມປົກກະຕິແລ້ວ ມັນຈະນຳຊີວິດມາເຊັ່ນກັນ. ນ້ຳຕາແຫ່ງຄວາມໂສກເສົ້າມັກຈະປ່ຽນມາເປັນນ້ຳຕາແຫ່ງຄວາມໂລ່ງໃຈ ແລະ ຄວາມສຸກ. ຄວາມຮູ້ສຶກເສຍໃຈເມື່ອຄົນຮັກໄດ້ຈາກໄປກໍຖືກຊົດເຊີຍດ້ວຍຄວາມຊື່ນຊົມທີ່ໄດ້ພົບກັນອີກຄັ້ງ. ໃນຊ່ວງເວລາແຫ່ງສົງຄາມ ແລະ ການທຳລາຍ, ການກະທຳເລັກນ້ອຍຫລາຍຢ່າງດ້ວຍຄວາມດີ ແລະ ຄວາມຮັກກໍຍັງເກີດຂຶ້ນກັບຜູ້ທີ່ “ຕາທີ່ເຫັນໄດ້, ແລະ ຫູທີ່ໄດ້ຍິນ.”¹³

ໂລກຂອງເຮົາທຸກມື້ນີ້ມັກຈະມີລັກສະນະສະເພາະຄືຄວາມຢ້ານກົວ ແລະ ວິຕົກກັງວົນ—ຢ້ານກົວວ່າອະນາຄົດຈະນຳເອົາຫຍັງແດ່ມາສູ່ເຮົາ. ແຕ່ພຣະເຢຊູໄດ້ສິດສອນເຮົາໃຫ້ໄວ້ວາງໃຈ ແລະ “ເບິ່ງທີ່ [ພຣະອົງ] ໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.”¹⁴

ຂໍໃຫ້ເຮົາພະຍາຍາມຢ່າງມີສະຕິຢູ່ສະເໝີທີ່ຈະເຫັນທັງສອງດ້ານຂອງ ທຸກ ຫລຽນ ທີ່ພິກປີ້ນໃນຊີວິດຂອງເຮົາ. ເຖິງແມ່ນວ່າບາງຄັ້ງເຮົາອາດຈະບໍ່ສາມາດເຫັນໄດ້ທັງສອງດ້ານໃນທັນທີ, ແຕ່ເຮົາກໍສາມາດຮູ້ຈັກ ແລະ ເຊື່ອໝັ້ນວ່າອີກດ້ານໜຶ່ງມີຢູ່ທີ່ນັ້ນຕະຫລອດເວລາ.

ເຮົາສາມາດໝັ້ນໃຈໄດ້ວ່າຄວາມຍາກລຳບາກ, ຄວາມໂສກເສົ້າ, ຄວາມທຸກ, ແລະ ຄວາມເຈັບປວດບໍ່ໄດ້ກຳນົດເຮົາ; ແຕ່ເປັນ ວິທີ ທີ່ເຮົາຈະດຳເນີນການຕໍ່ໄປ ທີ່ຈະຊ່ວຍໃຫ້ເຮົາເຕີບໂຕ ແລະ ຫຍັບເຂົ້າໃກ້ພຣະເຈົ້າຫລາຍຂຶ້ນ. ມັນແມ່ນທັດສະນະຄະຕິ ແລະ ການເລືອກຂອງເຮົາ ທີ່ກຳນົດເຮົາຫລາຍກວ່າການທ້າທາຍຕ່າງໆຂອງເຮົາ.

ເມື່ອມີສຸຂະພາບທີ່ດີ, ຈົ່ງທະນຸຖະໜອມ ແລະ ກະຕັນຍູກັບມັນທຸກເວລາ. ເມື່ອຢູ່ໃນຄວາມເຈັບປ່ວຍ, ຈົ່ງສະແຫວງຫາທີ່ຈະຮຽນຮູ້ຈາກມັນດ້ວຍຄວາມອົດທົນ ແລະ ຮູ້ວ່າສິ່ງນີ້ສາມາດປ່ຽນແປງໄດ້ອີກຄັ້ງຕາມພຣະປະສົງຂອງພຣະເຈົ້າ. ເມື່ອຢູ່ໃນຄວາມໂສກເສົ້າ, ຈົ່ງໄວ້ວາງໃຈວ່າຄວາມສຸກຢູ່ໃກ້ເຂົ້າມາແລ້ວ; ພຽງແຕ່ເຮົາມັກຈະບໍ່ເຫັນມັນເທື່ອ. ປ່ຽນຈຸດສຸມຂອງທ່ານຢ່າງມີສະຕິ ແລະ ຍົກລະດັບຄວາມຄິດຂອງທ່ານໄປສູ່ດ້ານບວກຂອງຄວາມທ້າທາຍ, ເພາະວ່າມັນຢູ່ທີ່ນັ້ນສະເໝີຢ່າງບໍ່ຕ້ອງສົງໄສ. ຢ່າລືມທີ່ຈະກະຕັນຍູ. ເລືອກທີ່ຈະເຊື່ອ. ເລືອກທີ່ຈະມີສັດທາໃນພຣະເຢຊູຄຣິດ. ເລືອກທີ່ຈະໄວ້ວາງໃຈພຣະເຈົ້າສະເໝີ. ເລືອກທີ່ຈະ “ຄິດກ່ຽວກັບຊັ້ນສູງ,” ດັ່ງທີ່ປະທານຣະໂຊ ເອັມ ແນວສັນ ໄດ້ສິດສອນພວກເຮົາເມື່ອບໍ່ດົນມານີ້!¹⁵

ຂໍໃຫ້ເຮົາຄຳນຶງເຖິງແຜນທີ່ດີເລີດຂອງພຣະບິດາເທິງສະຫວັນຂອງເຮົາສຳລັບເຮົາ. ພຣະອົງຊົງຮັກເຮົາ ແລະ ໄດ້ສົ່ງພຣະບຸດທີ່ຮັກຂອງພຣະອົງມາ ເພື່ອຊ່ວຍໃນການທົດລອງຂອງເຮົາ ແລະ ເປີດປະຕູເພື່ອໃຫ້ເຮົາກັບຄືນໄປຫາພຣະອົງ. ພຣະເຢຊູຄຣິດຊົງພຣະຊົນຢູ່ ແລະ ຢືນຢູ່ທີ່ນັ້ນທຸກເວລາ, ກຳລັງລໍຖ້າໃຫ້ເຮົາເລືອກທີ່ຈະເອີ້ນຫາພຣະອົງ ເພື່ອໃຫ້ຄວາມຊ່ວຍເຫລືອ, ຄວາມເຂັ້ມແຂງ, ແລະ ຄວາມລອດ. ຂ້າພະເຈົ້າເປັນພະຍານເຖິງສິ່ງເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.