ການເຊື່ອມຕໍ່ພຣະບັນຍັດຂໍ້ໃຫຍ່ສຳຄັນສອງຂໍ້
ຄວາມສາມາດຂອງເຮົາທີ່ຈະຕິດຕາມພຣະເຢຊູຄຣິດແມ່ນຂຶ້ນຢູ່ກັບຄວາມເຂັ້ມແຂງ ແລະ ພະລັງຂອງເຮົາ ໃນການດຳລົງຊີວິດຕາມພຣະບັນຍັດຂໍ້ທຳອິດ ແລະ ຂໍ້ທີສອງ ດ້ວຍຄວາມສົມດຸນ ແລະ ການອຸທິດຕົນທີ່ເທົ່າທຽມກັນ.
ຄຳນຳ
ເມື່ອ ລີຊາ ພັນລະຍາຂອງຂ້າພະເຈົ້າກັບຂ້າພະເຈົ້າເດີນທາງໄປເຮັດວຽກງານມອບໝາຍທົ່ວໂລກ, ພວກເຮົາໃຈເຕັ້ນກັບສິດທິພິເສດທີ່ໄດ້ພົບປະກັບພວກທ່ານ ໃນຊຸມນຸມຊົນທັງໃຫຍ່ ແລະ ນ້ອຍ. ຄວາມອຸທິດຕົນຂອງທ່ານຕໍ່ວຽກງານຂອງພຣະຜູ້ເປັນເຈົ້າເຮັດໃຫ້ພວກເຮົາລຸກຂຶ້ນ ແລະ ຢືນເປັນພະຍານເຖິງພຣະກິດຕິຄຸນຂອງພຣະເຢຊູຄຣິດ. ພວກເຮົາໄດ້ກັບບ້ານຈາກການເດີນທາງແຕ່ລະຄັ້ງ ໂດຍສົງໄສວ່າ ພວກເຮົາໄດ້ໃຫ້ຫລາຍເທົ່າກັບທີ່ພວກເຮົາໄດ້ຮັບຫລືບໍ່.
ຕອນເດີນທາງ, ພວກເຮົາມີເວລາທ່ຽວຊົມໜ້ອຍ. ເຖິງຢ່າງໃດກໍຕາມ, ເມື່ອເປັນໄປໄດ້, ຂ້າພະເຈົ້າຈະໃຊ້ເວລາໜ້ອຍໜຶ່ງກັບສິ່ງທີ່ຂ້າພະເຈົ້າຫລົງໄຫລທີ່ສຸດ. ຂ້າພະເຈົ້າມີຄວາມສົນໃຈໃນດ້ານສະຖາປັດຍະກຳ ແລະ ການອອກແບບ ແລະ ມີຄວາມປະທັບໃຈເປັນພິເສດກັບຂົວຕ່າງໆ. ຂົວຫ້ອຍຍິ່ງເຮັດໃຫ້ຂ້າພະເຈົ້າປະຫລາດໃຈ. ບໍ່ວ່າຈະເປັນຂົວສາຍຮຸ້ງໃນໂຕກຽວ, ຂົວຊິງໝ່າໃນຮົງກົງ, ຂົວທາວເວີໃນລອນດອນ, ຫລື ຂົວອື່ນໆທີ່ຂ້າພະເຈົ້າເຄີຍໄດ້ເຫັນ, ຂ້າພະເຈົ້າຈະປະຫລາດໃຈກັບຄວາມອັດສະຣິຍະທາງວິສະວະກຳ ຢູ່ໃນໂຄງສ້າງທີ່ຊັບຊ້ອນເຫລົ່ານັ້ນ. ຂົວພາເຮົາໄປຫາບ່ອນທີ່ເຮົາໄປບໍ່ເຖິງ ຖ້າປາດສະຈາກມັນ. (ກ່ອນຈະເລົ່າຕໍ່, ຂ້າພະເຈົ້າສັງເກດເຫັນວ່າ ນັບແຕ່ຂ່າວສານນີ້ໄດ້ຖືກກະກຽມ, ອຸບັດຕິເຫດອັນໜ້າສະລົດໃຈ ໄດ້ເກີດຂຶ້ນກັບຂົວໃນເມືອງບາວຕາມໍ. ພວກເຮົາໂສກເສົ້າກັບການສູນເສຍຊີວິດ ແລະ ສະແດງຄວາມເສຍໃຈກັບຄອບຄົວທີ່ໄດ້ຮັບຜົນກະທົບ.)
ຂົວຫ້ອຍທີ່ສວຍງາມ
ເມື່ອບໍ່ດົນມານີ້, ວຽກງານມອບໝາຍທີ່ກອງປະຊຸມໄດ້ພາຂ້າພະເຈົ້າໄປລັດຄາລິຟໍເນຍ, ອີກເທື່ອໜຶ່ງ ຂ້າພະເຈົ້າໄດ້ຂ້າມຂົວໂກນເດັນເກດ ອັນເປັນສັນຍາລັກ, ຊຶ່ງຖືວ່າເປັນສິ່ງມະຫັດສະຈັນທາງວິສະວະກຳຂອງໂລກ. ໂຄງສ້າງອັນຍິ່ງໃຫຍ່ນີ້ປະສົມປະສານຮູບແບບທີ່ສວຍງາມ, ຈຸດປະສົງທີ່ເປັນປະໂຫຍດ, ແລະ ວິສະວະກຳທີ່ຊ່ຽວຊານເຂົ້າກັນ. ມັນເປັນຂົວຫ້ອຍທີ່ເດັ່ນທີ່ສຸດ ທີ່ມີຫລັກໃຫຍ່ຕັ້ງຢູ່ສອງສົ້ນ, ຮອງຮັບໂດຍເສົາຂະໜາດໃຫຍ່. ຫລັກໃຫຍ່ຝາແຝດທີ່ມີນ້ຳໜັກມະຫາສານ ແລະ ສະຫງ່າງາມ ສູງຂຶ້ນເໜືອມະຫາສະໝຸດ ເປັນອົງປະກອບທຳອິດທີ່ຖືກສ້າງຂຶ້ນ. ຫລັກທັງສອງຮັບນ້ຳໜັກຂອງສາຍເຄໂບ້ໃຫຍ່ລວງຂວາງ ແລະ ສາຍເຄໂບ້ນ້ອຍລວງຕັ້ງ, ຊຶ່ງຮອງຮັບຖະໜົນດ້ານລຸ່ມ. ຄວາມສາມາດສະເຖຍລະພາບທີ່ພິເສດ—ພະລັງງານຂອງຫລັກໃຫຍ່ທັງສອງ—ຄືຄວາມມະຫັດສະຈັນເບື້ອງຫລັງຂອງວິສະວະກຳຂອງຂົວນັ້ນ.
ເຂດຂົວໂກນເດັນເກດ
ພາບການກໍ່ສ້າງຂົວໃນຕອນຕົ້ນ ເປັນສິ່ງຢືນຢັນເຖິງຫລັກການທາງວິສະວະກຳ. ອົງປະກອບຂອງຂົວແຕ່ລະສ່ວນ ຈະໄດ້ຮັບການຮັບຮອງນ້ຳໜັກຈາກຫລັກໃຫຍ່ທີ່ມີຊັດສ່ວນເທົ່າທຽມກັນ, ຊຶ່ງທັງສອງຫລັກຈະເຊື່ອມຕໍ່ຫາກັນຢ່າງເປັນອິດສະລະ.
Getty Images/Underwood Archives
ເມື່ອຂົວສ້າງສຳເລັດ, ດ້ວຍຫລັກໃຫຍ່ທັງສອງຕັ້ງຢູ່ຢ່າງແໜ້ນໜາ ແລະ ເສົາທີ່ຍຶດໝັ້ນຢູ່ໃນຮາກຖານຫີນ, ມັນເປັນພາບຂອງຄວາມເຂັ້ມແຂງ ແລະ ຄວາມສວຍງາມ.
ມື້ນີ້ຂ້າພະເຈົ້າຂໍເຊື້ອເຊີນທ່ານໃຫ້ເບິ່ງຂົວທີ່ສະຫງ່າງາມນີ້, ດ້ວຍຫລັກໃຫຍ່ຝາແຝດທີ່ສູງ ຊຶ່ງສ້າງເທິງຮາກຖານທີ່ແຂງແກ່ນ, ຜ່ານກະຈົກພຣະກິດຕິຄຸນ.
ໃນຊ່ວງໄລຍະການປະຕິບັດສາດສະໜາກິດຂອງພຣະເຢຊູຄຣິດ, ລະຫວ່າງທີ່ເຮົາເອີ້ນວ່າ ສັບປະດາບໍລິສຸດ, ຟາຣີຊາຍຄົນໜຶ່ງຜູ້ເປັນທະນາຍຄວາມ1 ໄດ້ຖາມຄຳຖາມພຣະຜູ້ຊ່ວຍໃຫ້ລອດ ທີ່ລາວຄິດວ່າຄົງຕອບບໍ່ໄດ້:2 “ອາຈານເອີຍ, ໃນກົດບັນຍັດແມ່ນຂໍ້ໃດ ທີ່ເປັນຂໍ້ໃຫຍ່ສຳຄັນທີ່ສຸດ?” ທະນາຍຄວາມທີ່, “ທົດລອງພຣະອົງ” ແລະ ສະແຫວງຫາຄຳຕອບທີ່ຖືກຕ້ອງຕາມກົດບັນຍັດ, ດ້ວຍເຈດຕະນາເບິ່ງເໝືອນຫລອກລວງ, ໄດ້ຮັບຄຳຕອບທີ່ແທ້ຈິງ, ສັກສິດ, ແລະ ສູງສົ່ງ.
“ພຣະເຢຊູໄດ້ກ່າວກັບລາວວ່າ, “ຈົ່ງຮັກອົງພຣະຜູ້ເປັນເຈົ້າພຣະເຈົ້າຂອງເຈົ້າດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຈົ້າ.
“ນັ້ນແຫລະ ແມ່ນກົດບັນຍັດຂໍ້ໃຫຍ່ ແລະ ຂໍ້ຕົ້ນ.” ຟັງການປຽບທຽບຂົວຂອງເຮົາ, ຫລັກໃຫຍ່ທຳອິດ!
“ຂໍ້ທີສອງກໍເໝືອນກັນຄື, ຈົ່ງຮັກເພື່ອນບ້ານເໝືອນຮັກຕົນເອງ.” ນີ້ແມ່ນຫລັກໃຫຍ່ທີສອງ!
“ກົດບັນຍັດທັງໝົດ ແລະ ບັນດາຖ້ອຍຄຳຂອງ [ສາດສະດາ] ກໍຂຶ້ນກັບກົດບັນຍັດສອງຂໍ້ນີ້ແຫລະ.”3 ອົງປະກອບສ່ວນທີ່ເຫລືອຂອງຂົວ!
ໃຫ້ເຮົາກວດກາເບິ່ງພຣະບັນຍັດສອງຂໍ້ໃຫຍ່ແຕ່ລະຂໍ້ນີ້, ທີ່ຖືກເປີດເຜີຍ ແລະ ທ່ອງຈຳຕາມຄຳຕອບຂອງພຣະເຢຊູຄຣິດ. ເມື່ອເຮົາເຮັດເຊັ່ນນັ້ນ, ຈົ່ງປ່ອຍໃຫ້ພາບຂອງຂົວຫ້ອຍທີ່ງົດງາມສະທ້ອນຢູ່ໃນຄວາມຄິດຂອງດວງຕາຂອງທ່ານ.
ຮັກພຣະຜູ້ເປັນເຈົ້າ
ທຳອິດ, ຮັກພຣະຜູ້ເປັນເຈົ້າດ້ວຍສຸດໃຈ, ຈິດວິນຍານ, ແລະ ຄວາມຄິດຂອງທ່ານ.
ໃນຄຳຕອບນີ້, ພຣະເຢຊູຄຣິດໄດ້ລວມສາລະສຳຄັນຂອງກົດບັນຍັດໄວ້ໃນຄຳສອນອັນສັກສິດຂອງພຣະຄຳພີເດີມ. ການຮັກພຣະຜູ້ເປັນເຈົ້າເປັນການເນັ້ນໃສ່ໃຈຂອງທ່ານກ່ອນ—ທຳມະຊາດຂອງທ່ານ. ພຣະຜູ້ເປັນເຈົ້າຈະໃຫ້ທ່ານຮັກດ້ວຍສຸດຈິດວິນຍານຂອງທ່ານ4—ການອຸທິດຖວາຍທັງໝົດໃນຕົວທ່ານ—ແລະ ສຸດທ້າຍ, ຮັກດ້ວຍສຸດຄວາມຄິດຂອງທ່ານ—ຄວາມສະຫລາດ ແລະ ສະຕິປັນຍາຂອງທ່ານ. ຄວາມຮັກຕໍ່ພຣະເຈົ້າບໍ່ມີຂອບເຂດ ຫລື ຈຳກັດ. ມັນເປັນນິດ ແລະ ນິລັນດອນ.
ສຳລັບຂ້າພະເຈົ້າ, ການປະຕິບັດຕາມພຣະບັນຍັດຂໍ້ທຳອິດ ບາງຄັ້ງສາມາດຮູ້ສຶກເປັນທາງທິດສະດີ, ແມ່ນແຕ່ເປັນຕາຫວາດຫວັ່ນ. ດ້ວຍຄວາມກະຕັນຍູ, ເມື່ອຂ້າພະເຈົ້າພິຈາລະນາພຣະຄຳຂອງພຣະເຢຊູຕື່ມອີກ, ພຣະບັນຍັດຂໍ້ນີ້ເຂົ້າໃຈໄດ້ງ່າຍຂຶ້ນ: “ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ.”5 ສິ່ງນີ້ຂ້າພະເຈົ້າເຮັດໄດ້. ຂ້າພະເຈົ້າສາມາດຮັກພຣະບິດາເທິງສະຫວັນ ແລະ ພຣະເຢຊູຄຣິດ, ຊຶ່ງຈາກນັ້ນນຳໄປສູ່ການອະທິຖານ, ການສຶກສາພຣະຄຳພີ, ແລະ ການນະມັດສະການໃນພຣະວິຫານ. ເຮົາຮັກພຣະເຈົ້າ ແລະ ພຣະບຸດຜ່ານທາງການຈ່າຍສ່ວນສິບ, ການຮັກສາວັນຊະບາໂຕໃຫ້ສັກສິດ, ການດຳລົງຊີວິດທີ່ມີຄຸນນະທຳ ແລະ ບໍລິສຸດ, ແລະ ການເຊື່ອຟັງ.
ການຮັກພຣະຜູ້ເປັນເຈົ້າມັກຈະຖືກວັດແທກກັນໃນການກະທຳເລັກນ້ອຍໃນແຕ່ລະວັນ, ບາດກ້າວເທິງເສັ້ນທາງແຫ່ງພັນທະສັນຍາ: ສຳລັບຄົນໜຸ່ມ, ການໃຊ້ສື່ສັງຄົມເພື່ອເສີມສ້າງ ແທນທີ່ຈະມ້າງເພ, ອອກຈາກງານລ້ຽງ, ໜັງຮູບເງົາ, ຫລື ກິດຈະກຳທີ່ອາດຈະທ້າທາຍມາດຕະຖານ; ສະແດງຄວາມເຄົາລົບຕໍ່ໍ່ສິ່ງສັກສິດ.
ໃຫ້ພິຈາລະນາຕົວຢ່າງນີ້. ມັນແມ່ນວັນອາທິດຖືສິນອົດເຂົ້າ ຂະນະທີ່ ແວນຊ໌6 ແລະ ຂ້າພະເຈົ້າໄດ້ໄປເຄາະປະຕູຂອງເຮືອນທີ່ຕ່ຳຕ້ອຍຫລັງໜຶ່ງ. ພວກເຮົາ ແລະ ມັກຄະນາຍົກຄົນອື່ນໆໃນກຸ່ມຄາດຫວັງ ຈະໄດ້ຍິນຄຳວ່າ, “ເຊີນເຂົ້າມາ,” ຮ້ອງບອກຢ່າງອົບອຸ່ນ ດ້ວຍສຳນຽງເຢຍລະມັນທີ່ໜັກແໜ້ນ ຈົນໄດ້ຍິນຜ່ານປະຕູ. ຊິດສະເຕີ ມູຢາ ເປັນຄົນໜຶ່ງໃນບັນດາແມ່ໝ້າຍ ຊາວອົບພະຍົບ ທີ່ຢູ່ໃນຫວອດ. ມັນຍາກສຳລັບລາວທີ່ຈະມາເປີດປະຕູ, ເພາະລາວຕາບອດ. ຂະນະທີ່ພວກເຮົາກ້າວເຂົ້າໄປໃນເຮືອນທີ່ມີແສງລິບລີ່, ລາວໄດ້ທັກທາຍພວກເຮົາດ້ວຍຄຳຖາມທີ່ດີໆ: ພວກເຈົ້າຊື່ຫຍັງ? ພວກເຈົ້າສະບາຍດີບໍ? ພວກເຈົ້າຮັກພຣະຜູ້ເປັນເຈົ້າບໍ? ພວກເຮົາໄດ້ຕອບ ແລະ ໄດ້ແບ່ງປັນວ່າ ພວກເຮົາມາຮັບເອົາເງິນບໍລິຈາກດ້ວຍການອົດອາຫານຂອງລາວ. ເຖິງແມ່ນພວກເຮົາຈະອາຍຸຍັງນ້ອຍ, ສະພາບທີ່ຍາກຈົນຂອງລາວກໍປະກົດໃຫ້ເຫັນຢ່າງຊັດເຈນ, ແລະ ຄຳຕອບທີ່ປ່ຽມໄປໄດ້ດ້ວຍສັດທາຂອງລາວກໍຊາບຊຶ້ງໃຈຢ່າງຍິ່ງ: “ຂ້ອຍໄດ້ວາງຫລຽນໜຶ່ງໄວ້ເທິງຮ້ານມື້ເຊົ້ານີ້. ຂ້ອຍກະຕັນຍູທີ່ໄດ້ຖວາຍເງິນບໍລິຈາກ. ຂໍໃຫ້ພວກເຈົ້າເອົາມັນໃສ່ໃນຊອງ ແລະ ຂຽນໃບບໍລິຈາກໃຫ້ຂ້ອຍແດ່?” ຄວາມຮັກຂອງລາວຕໍ່ພຣະຜູ້ເປັນເຈົ້າໄດ້ຍົກສັດທາຂອງພວກເຮົາ ທຸກຄັ້ງທີ່ພວກເຮົາອອກຈາກເຮືອນຂອງລາວໄປ.
ກະສັດເບັນຢາມິນໄດ້ສັນຍາພະລັງທີ່ໂດດເດັ່ນສຳລັບຜູ້ທີ່ປະຕິບັດຕາມພຣະບັນຍັດຂໍ້ໃຫຍ່ຂໍ້ທຳອິດ. “ຂ້າພະເຈົ້າປາດຖະໜາໃຫ້ພວກທ່ານພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດ. … ເຂົາໄດ້ຮັບພອນທຸກຢ່າງ, … ແລະ ຖ້າຫາກເຂົາອົດທົນຢ່າງຊື່ສັດຈົນເຖິງທີ່ສຸດແລ້ວ, ເຂົາຈະຖືກຮັບເຂົ້າສູ່ສະຫວັນ … ໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”7
ການຮັກພຣະຜູ້ເປັນເຈົ້ານຳໄປສູ່ຄວາມສຸກນິລັນດອນ!
ຮັກເພື່ອນບ້ານຂອງທ່ານ
ພຣະເຢຊູຄຣິດໄດ້ກ່າວວ່າ, “ຂໍ້ທີສອງກໍເໝືອນກັນຄື, ຈົ່ງຮັກເພື່ອນບ້ານເໝືອນຮັກຕົນເອງ.”8 ນີ້ແມ່ນຫລັກໃຫຍ່ທີສອງຂອງຂົວ.
ໃນຂໍ້ນີ້ ພຣະເຢຊູເຊື່ອມໂຍງຄວາມປາດຖະໜາຂອງເຮົາ, ທີ່ຈະຮັກພຣະຜູ້ເປັນເຈົ້າ, ເຂົ້າກັບຄວາມປາດຖະໜາຂອງເຮົາທີ່ຈະຮັກເພື່ອນຊາຍ ແລະ ຍິງຂອງເຮົາ. ສິ່ງໜຶ່ງເພິ່ງພາອາໄສອີກສິ່ງໜຶ່ງ. ຄວາມຮັກຕໍ່ພຣະຜູ້ເປັນເຈົ້າຈະບໍ່ສົມບູນຖ້າຫາກເຮົາລະເລີຍເພື່ອນບ້ານຂອງເຮົາ. ຄວາມຮັກພາຍນອກນີ້ແມ່ນລວມທັງລູກໆຂອງພຣະເຈົ້າທຸກຄົນ ໂດຍບໍ່ຄຳນຶງເຖິງເພດ, ຊົນຊັ້ນທາງສັງຄົມ, ເຊື້ອຊາດ, ເພດສຳພັນ, ລາຍຮັບ, ອາຍຸ, ຫລື ຊົນເຜົ່າ. ເຮົາສະແຫວງຫາຜູ້ທີ່ໄດ້ຮັບບາດເຈັບ ແລະ ແຕກສະຫລາຍ, ຜູ້ດ້ອຍໂອກາດ, ເພາະ “ທຸກຄົນເທົ່າທຽມກັນໝົດສຳລັບພຣະເຈົ້າ.”9 ເຮົາ “ຊ່ວຍເຫລືອຄົນທີ່ອ່ອນແອ, ຍົກມືທີ່ເມື່ອຍລ້າ, ແລະ ໃຫ້ກຳລັງຫົວເຂົ່າທີ່ອ່ອນເພຍ.”10
ໃຫ້ພິຈາລະນາຕົວຢ່າງນີ້: ບຣາເດີ ອີແວນສ໌11 ແປກໃຈເມື່ອລາວໄດ້ຖືກກະຕຸ້ນໃຫ້ຢຸດລົດຂອງລາວ ແລະ ໄປເຄາະປະຕູຂອງຄອບຄົວໜຶ່ງທີ່ລາວບໍ່ຮູ້ຈັກ. ເມື່ອແມ່ໝ້າຍຄົນໜຶ່ງທີ່ມີລູກຫລາຍກວ່າ 10 ຄົນໄດ້ມາເປີດປະຕູ, ສະພາບທີ່ຍາກລຳບາກ ແລະ ຄວາມຕ້ອງການຢ່າງຫລວງຫລາຍຂອງເຂົາເຈົ້າກໍປະກົດຕໍ່ລາວທັນທີ. ສິ່ງທຳອິດແມ່ນງ່າຍ, ຄືການທາສີເຮືອນຂອງເຂົາເຈົ້າ, ຊຶ່ງຕິດຕາມດ້ວຍການປະຕິບັດສາດສະໜາກິດຝ່າຍໂລກ ແລະ ຝ່າຍວິນຍານເປັນເວລາຫລາຍປີຕໍ່ຄອບຄົວນີ້.
ແມ່ຜູ້ກະຕັນຍູຄົນນີ້ໄດ້ຂຽນໃນເວລາຕໍ່ມາ ເຖິງເພື່ອນທີ່ສະຫວັນໄດ້ສົ່ງມາວ່າ: “ເຈົ້າໄດ້ໃຊ້ຊີວິດເອື້ອມອອກໄປຫາພວກເຮົາທີ່ຕ່ຳຕ້ອຍທີ່ສຸດ. ຂ້ອຍມັກຟັງສິ່ງທີ່ພຣະຜູ້ເປັນເຈົ້າໄດ້ກ່າວກັບເຈົ້າ ເມື່ອພຣະອົງສະແດງຄວາມຊາບຊຶ້ງຂອງພຣະອົງສຳລັບຄວາມດີທີ່ເຈົ້າໄດ້ເຮັດ ໃນທາງດ້ານການເງິນ ແລະ ທາງວິນຍານສຳລັບຜູ້ຄົນທີ່ມີພຽງແຕ່ເຈົ້າ ແລະ ພຣະອົງເທົ່ານັ້ນທີ່ຮູ້ຈັກ. ຂໍຂອບໃຈທີ່ໃຫ້ພອນໃນຫລາຍໆດ້ານ, … ສຳລັບຜູ້ສອນສາດສະໜາທີ່ເຈົ້າໄດ້ຈັດຫາໃຫ້. … ຂ້ອຍມັກຈະສົງໄສວ່າ ພຣະຜູ້ເປັນເຈົ້າໄດ້ເລືອກເອົາເຈົ້າຄົນດຽວໂດຍສະເພາະບໍ ຫລື ເຈົ້າເປັນພຽງຄົນດຽວທີ່ຮັບຟັງ.”
ການຮັກເພື່ອນບ້ານຂອງທ່ານແມ່ນລວມດ້ວຍການກະທຳທີ່ມີນ້ຳໃຈ ແລະ ການຮັບໃຊ້ເໝືອນພຣະຄຣິດ. ທ່ານຈະສາມາດປະຖິ້ມຄວາມຄຽດແຄ້ນ, ໃຫ້ອະໄພສັດຕູ, ຕ້ອນຮັບ ແລະ ປະຕິບັດຕໍ່ເພື່ອນບ້ານຂອງທ່ານ, ແລະ ຮັບໃຊ້ຜູ້ສູງອາຍຸໄດ້ບໍ? ທ່ານແຕ່ລະຄົນຈະຖືກດົນໃຈ ເມື່ອທ່ານສ້າງຫລັກໃຫຍ່ແຫ່ງຄວາມຮັກຕໍ່ເພື່ອນບ້ານ.
ປະທານຣະໂຊ ເອັມ ແນວສັນ ໄດ້ສິດສອນວ່າ: “ການໃຫ້ຄວາມຊ່ວຍເຫລືອແກ່ຄົນອື່ນ—ການພະຍາຍາມດ້ວຍຄວາມຊື່ສັດ ເພື່ອດູແລຄົນອື່ນ ເທົ່າໆກັບ ຫລື ຫລາຍກວ່າ ທີ່ເຮົາດູແລຕົວເອງ—ຈະເປັນຄວາມສຸກຂອງເຮົາ. ໂດຍສະເພາະ … ຕອນທີ່ເຮົາບໍ່ສະດວກ ແລະ ຕອນທີ່ເຮົາເຮັດສິ່ງທີ່ບໍ່ເຄີຍເຮັດມາກ່ອນ. ການດຳລົງ ຊີວິດຕາມພຣະບັນຍັດຂໍ້ທີສອງທີ່ຍິ່ງໃຫຍ່ ເປັນ ສິ່ງຈຳເປັນ ຕໍ່ການທີ່ຈະກາຍເປັນສານຸສິດທີ່ແທ້ຈິງຂອງພຣະເຢຊູຄຣິດ.”12
ການເພິ່ງພາອາໄສກັນ
ພຣະເຢຊູໄດ້ສິດສອນຕື່ມວ່າ, “ກົດບັນຍັດທັງໝົດ ແລະ ບັນດາຖ້ອຍຄຳຂອງ [ສາດສະດາ] ກໍຂຶ້ນກັບກົດບັນຍັດສອງຂໍ້ນີ້ແຫລະ.”13 ນີ້ເປັນຄຳແນະນຳທີ່ດີຫລາຍ. ມີການເພິ່ງພາອາໄສກັນທີ່ສຳຄັນລະຫວ່າງການຮັກພຣະຜູ້ເປັນເຈົ້າ ກັບການຮັກຊຶ່ງກັນແລະກັນ. ເພື່ອໃຫ້ຂົວໂກນເດັນເກດ ທຳງານໄດ້ດີຕາມທີ່ອອກແບບໄວ້, ຫລັກໃຫຍ່ທັງສອງຈະຕ້ອງແຂງແຮງພໍ ແລະ ມີພະລັງເທົ່າໆກັນ ແລະ ຮັບນ້ຳໜັກຂອງສາຍເຄໂບ້, ທາງຍ່າງ, ແລະ ການຈາລະຈອນທີ່ຂ້າມຂົວນັ້ນໄດ້. ປາດສະຈາກຄວາມສາມາດທາງວິສະວະກຳນີ້ແລ້ວ, ຂົວສາມາດຖືກທຳລາຍ, ແມ່ນແຕ່ນຳໄປສູ່ການພັງທະລາຍ. ສຳລັບຂົວຫ້ອຍໃດໆກໍຕາມທີ່ຈະສາມາດໃຊ້ໄດ້ຕາມຈຸດປະສົງການສ້າງ, ຫລັກໃຫຍ່ຂອງຂົວຈະຕ້ອງທຳງານຮ່ວມກັນຢ່າງກົມກຽວ ເຊັ່ນດຽວກັນ, ຄວາມສາມາດຂອງເຮົາທີ່ຈະຕິດຕາມພຣະເຢຊູຄຣິດແມ່ນຂຶ້ນຢູ່ກັບຄວາມເຂັ້ມແຂງ ແລະ ພະລັງຂອງເຮົາ ໃນການດຳລົງຊີວິດຕາມພຣະບັນຍັດຂໍ້ທຳອິດ ແລະ ຂໍ້ທີສອງ ດ້ວຍຄວາມສົມດຸນ ແລະ ການອຸທິດຕົນທີ່ເທົ່າທຽມກັນຕໍ່ທັງສອງຂໍ້.
ເຖິງຢ່າງໃດກໍຕາມ, ຄວາມຂັດແຍ້ງທີ່ເພີ່ມຂຶ້ນໃນໂລກບົ່ງບອກບາງຄັ້ງວ່າເຮົາບໍ່ສາມາດຫລຽວເຫັນ ຫລື ຈື່ຈຳສິ່ງນີ້ໄດ້. ບາງຄົນສຸມໃຈໃສ່ກັບການຮັກສາພຣະບັນຍັດຢ່າງຈິງຈັງ ຈົນວ່າບໍ່ມີຄວາມອົດທົນຕໍ່ຄົນທີ່ພວກເຂົາເຫັນວ່າຊອບທຳໜ້ອຍກວ່າ. ບາງຄົນພົບວ່າເປັນເລື່ອງຍາກທີ່ຈະຮັກຄົນທີ່ກຳລັງເລືອກໃຊ້ຊີວິດນອກພັນທະສັນຍາ ຫລື ແມ່ນແຕ່ຢູ່ຫ່າງຈາກການມີສ່ວນຮ່ວມທາງສາດສະໜາໃດໆ.
ອີກທາງໜຶ່ງ, ມີຜູ້ທີ່ເນັ້ນໜັກເຖິງຄວາມສຳຄັນຂອງການຮັກຄົນອື່ນ ໂດຍບໍ່ມີການຮັບຮູ້ວ່າເຮົາທຸກຄົນຮັບຜິດຊອບຕໍ່ພຣະເຈົ້າ. ບາງຄົນປະຕິເສດຄວາມຄິດທັງໝົດທີ່ວ່າ ມີສິ່ງທີ່ເປັນຄວາມຈິງທີ່ສົມບູນ ຫລື ຖືກ ແລະ ຜິດ ແລະ ເຊື່ອວ່າສິ່ງດຽວທີ່ຮຽກຮ້ອງຈາກເຮົາແມ່ນຄວາມອົດທົນ ແລະ ການຍອມຮັບການເລືອກຄົນອື່ນໂດຍສົມບູນ. ຄວາມບໍ່ສົມດຸນຢ່າງໃດຢ່າງໜຶ່ງເຫລົ່ານີ້ອາດເຮັດໃຫ້ຂົວທາງວິນຍານພິກຂວ້ຳ ຫລື ພັງທະລາຍລົງໄດ້.
ປະທານດາລິນ ເອັຈ ໂອກສ໌ ໄດ້ບັນຍາຍເລື່ອງນີ້ ເມື່ອເພິ່ນກ່າວວ່າ: “ເຮົາໄດ້ຖືກບັນຊາໃຫ້ຮັກກັນແລະກັນ, ນັບແຕ່ຄຳອຸປະມາຂອງພຣະເຢຊູກ່ຽວກັບໄທຊາມາເຣຍຜູ້ໃຈດີ ສິດສອນວ່າທຸກຄົນເປັນເພື່ອນບ້ານຂອງເຮົາ. ແຕ່ຄວາມກະຕືລືລົ້ນຂອງເຮົາທີ່ຈະຮັກສາພຣະບັນຍັດຂໍ້ທີສອງນີ້ ບໍ່ຄວນເຮັດໃຫ້ເຮົາລືມຂໍ້ທຳອິດ, ທີ່ຈະຮັກພຣະເຈົ້າຂອງເຮົາດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຮົາ.”14
ສະຫລຸບ
ສະນັ້ນຄຳຖາມສຳລັບເຮົາແຕ່ລະຄົນຄື ເຮົາຈະສ້າງຂົວແຫ່ງສັດທາ ແລະ ການອຸທິດຕົນຂອງເຮົາເອງໄດ້ແນວໃດ—ການສ້າງຫລັກໃຫຍ່ທີ່ສູງຂອງການຮັກທັງພຣະເຈົ້າ ແລະ ການຮັກເພື່ອນບ້ານຂອງເຮົາໄດ້ແນວໃດ? ເຮົາພຽງເລີ່ມຕົ້ນ. ຄວາມພະຍາຍາມໃນຊ່ວງທຳອິດຂອງເຮົາອາດເບິ່ງຄືວ່າເປັນແຜນການທີ່ເຮົາແຕ້ມໃສ່ເຈ້ຍເຊັດມື ຫລື ໃນແຜນຜັງຂັ້ນຕົ້ນ ຂອງຂົວທີ່ເຮົາຫວັງວ່າຈະກໍ່ສ້າງ. ມັນອາດປະກອບດ້ວຍເປົ້າໝາຍຕາມຄວາມເປັນຈິງບາງຢ່າງ ເພື່ອຄວາມເຂົ້າໃຈພຣະກິດຕິຄຸນຂອງພຣະຜູ້ເປັນເຈົ້າຫລາຍຂຶ້ນ ຫລື ປະຕິຍານທີ່ຈະຕັດສິນຄົນອື່ນໜ້ອຍລົງ. ບໍ່ມີໃຜເດັກເກີນໄປ ຫລື ແກ່ເກີນໄປທີ່ຈະເລີ່ມຕົ້ນ.
ເມື່ອເວລາຜ່ານໄປ, ດ້ວຍການວາງແຜນດ້ວຍການອະທິຖານ ແລະ ຢ່າງຮອບຄອບ, ແນວຄິດຄ້າວໆຈະໄດ້ຮັບການຂັດເກົາ. ການກະທຳໃໝ່ຈະກາຍເປັນນິໄສ. ຮ່າງຕົ້ນໆຈະກາຍເປັນແຜນຜັງທີ່ຖືກຂັດເກົາ. ເຮົາສ້າງຂົວທາງວິນຍານສ່ວນຕົວຂອງເຮົາດ້ວຍໃຈ ແລະ ຄວາມຄິດທີ່ອຸທິດຕົນຕໍ່ພຣະບິດາເທິງສະຫວັນ ແລະ ພຣະບຸດອົງດຽວທີ່ຖືກຳເນີດຂອງພຣະອົງ ຕະຫລອດທັງຕໍ່ອ້າຍເອື້ອຍນ້ອງຂອງເຮົາ ກັບຜູ້ທີ່ເຮົາເຮັດວຽກ, ຫລິ້ນ, ແລະ ຢູ່ນຳ.
ໃນວັນຂ້າງໜ້າ, ເມື່ອທ່ານຂ້າມຂົວຫ້ອຍສູງທີ່ສະຫງ່າງາມ ຫລື ແມ່ນແຕ່ເຫັນຮູບພາບ, ດ້ວຍຫລັກໃຫຍ່ທີ່ສູງຂອງມັນ, ຂ້າພະເຈົ້າເຊື້ອເຊີນທ່ານໃຫ້ຈື່ຈຳພຣະບັນຍັດສອງຂໍ້, ດັ່ງທີ່ບັນຍາຍໄວ້ໂດຍພຣະເຢຊູຄຣິດ ໃນພຣະຄຳພີໃໝ່. ຂໍໃຫ້ຄຳແນະນຳຂອງພຣະຜູ້ເປັນເຈົ້າຈົ່ງດົນໃຈເຮົາ. ຂໍໃຫ້ໃຈ ແລະ ຄວາມຄິດຂອງເຮົາຈົ່ງຖືກຍົກຂຶ້ນເພື່ອຮັກພຣະຜູ້ເປັນເຈົ້າ ແລະ ຫັນອອກໄປຮັກເພື່ອນບ້ານຂອງເຮົາ.
ຂໍໃຫ້ສິ່ງນີ້ເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ, ຊຶ່ງຂ້າພະເຈົ້າເປັນພະຍານໃນພຣະນາມຂອງພຣະເຢຊູຄຣິດ, ອາແມນ.