ຜົນທີ່ຕັ້ງຢູ່ຖາວອນ

ໂດຍ ແອວດີ ແມດຕິວ ແອວ ຄາເພັນເຕີ

ແຫ່ງສາວົກເຈັດສິບ

ການທີ່ມີພຣະວິນຍານບໍລິສຸດມາຜະນຶກພິທີການຂອງເຮົາ ແມ່ນສຳຄັນຫລາຍ ຖ້າເຮົາຢາກມີພອນທີ່ໄດ້ສັນຍາໄວ້ຊົ່ວນິລັນດອນ.

ຕອນຍັງນ້ອຍ, ຂ້າພະເຈົ້າມັກໝາກຄາຍທີ່ສົດ ແລະ ສຸກ. ຈົນຮອດມື້ນີ້, ຄວາມຄິດທີ່ຈະກັດໝາກຄາຍທີ່ຊຸ່ມຊໍ່າ ແລະ ສຸກ ພ້ອມດ້ວຍລົດສົ້ມຂອງມັນນັ້ນ ເຮັດໃຫ້ນໍ້າລາຍແຕກ. ເມື່ອໝາກຄາຍສຸກເຕັມຂະໜາດທີ່ໄດ້ຖືກເກັບແລ້ວ, ມັນຈະຢູ່ໄດ້ສອງຫາສີ່ມື້ ກ່ອນທີ່ມັນຈະເນົ່າ. ຂ້າພະເຈົ້າມີຄວາມຊົງຈໍາທີ່ດີກັບການເຂົ້າຄົວກັບແມ່ ແລະ ອ້າຍເອື້ອຍນ້ອງຂອງຂ້າພະເຈົ້າ ຂະນະທີ່ພວກເຮົາທຳການເກັບຮັກສາໝາກຄາຍທີ່ໄດ້ເກັບມາເພື່ອລະດູໜາວທີ່ຈະມາເຖິງ ໂດຍການບັນຈຸມັນໃສ່ໃນຂວດປິດແໜ້ນ. ຖ້າເຮົາເກັບຮັກສາໝາກຄາຍໄວ້ຢ່າງຖືກຕ້ອງ, ໝາກໄມ້ທີ່ແຊບຊ້ອຍນີ້ ຈະຄົງຢູ່ເປັນປີໆ, ບໍ່ແມ່ນພຽງແຕ່ສອງຫາສີ່ມື້ເທົ່ານັ້ນ. ຖ້າມີການກະກຽມ ແລະ ໃຊ້ຄວາມຮ້ອນຢ່າງເໝາະສົມ, ໝາກໄມ້ນີ້ຈະຖືກເກັບຮັກສາໄວ້ຈົນກວ່າຢາງປິດຝາຈະເສື່ອມຄຸນນະພາບ.

ພຣະຄຣິດໄດ້ຊີ້ນຳເຮົາໃຫ້ “ອອກໄປ ແລະ ເກີດຜົນ, … ເພື່ອຜົນຂອງພວກເຈົ້າຈະຕັ້ງຢູ່ຖາວອນ.”¹ ແຕ່ພຣະອົງບໍ່ໄດ້ເວົ້າກ່ຽວກັບໝາກຄາຍ. ພຣະອົງກຳລັງເວົ້າກ່ຽວກັບພອນຂອງພຣະເຈົ້າແກ່ລູກໆຂອງພຣະອົງ. ຖ້າເຮົາເຮັດ ແລະ ຮັກສາພັນທະສັນຍາກັບພຣະເຈົ້າ, ພອນທີ່ກ່ຽວຂ້ອງກັບພັນທະສັນຍາຂອງເຮົາ ຈະສາມາດຂະຫຍາຍອອກໄປຜ່ານຂ້າມຊີວິດນີ້ ແລະ ຈະຖືກຜະນຶກໄວ້ກັບເຮົາ, ຫລື ເກັບຮັກສາໄວ້, ຕະຫລອດໄປ, ກາຍເປັນຜົນທີ່ຍືນຍົງຊົ່ວນິລັນດອນ.

ພຣະວິນຍານບໍລິສຸດ, ໃນບົດບາດອັນສູງສົ່ງຂອງພຣະອົງ ໃນຖານະພຣະວິນຍານສັກສິດແຫ່ງຄຳສັນຍາ, ຈະຜະນຶກພິທີການແຕ່ລະຢ່າງໄວ້ກັບຜູ້ທີ່ຊື່ສັດຕໍ່ພັນທະສັນຍາຂອງເຂົາເຈົ້າ ເພື່ອມັນຈະມີຜົນໃຊ້ໄດ້ຫລັງຈາກຄວາມເປັນມະຕະ.² ການທີ່ມີພຣະວິນຍານບໍລິສຸດມາຜະນຶກພິທີການຂອງເຮົາ ແມ່ນສຳຄັນຫລາຍ ຖ້າເຮົາຢາກມີພອນທີ່ໄດ້ສັນຍາໄວ້ຊົ່ວນິລັນດອນ, ໂດຍກາຍເປັນຜົນທີ່ຕັ້ງຢູ່ຖາວອນ.

ນີ້ເປັນສິ່ງທີ່ສຳຄັນໂດຍສະເພາະ ຖ້າເຮົາຢາກໄດ້ຮັບຄວາມສູງສົ່ງ.³ ດັ່ງທີ່ປະທານຣະໂຊ ເອັມ ແນວສັນ ໄດ້ສິດສອນ, ເຮົາຄວນ “ເລີ່ມຕົ້ນໂດຍມີຈຸດຈົບໃນຈິດໃຈ. … ແນ່ນອນ, ສຳລັບພວກເຮົາແຕ່ລະຄົນແລ້ວ, ‘ຈຸດຈົບ’ ທີ່ເຮົາຕ້ອງການບັນລຸຫລາຍທີ່ສຸດ ແມ່ນການໄດ້ຢູ່ກັບຄອບຄົວຂອງເຮົາຕະຫລອດໄປໃນສະພາບແຫ່ງຄວາມສູງສົ່ງ ບ່ອນທີ່ເຮົາຈະຢູ່ໃນທີ່ປະທັບຂອງພຣະເຈົ້າ, ພຣະບິດາເທິງສະຫວັນຂອງເຮົາ, ແລະ ພຣະບຸດຂອງພຣະອົງ ພຣະເຢຊູຄຣິດ.”⁴ ປະທານແນວສັນຍັງໄດ້ກ່າວໄວ້ເຊັ່ນກັນວ່າ: “ການແຕ່ງງານຊັ້ນສູງ ແມ່ນສ່ວນສຳຄັນຂອງການກຽມຕົວສຳລັບຊີວິດນິລັນດອນ. ມັນຮຽກຮ້ອງໃຫ້ຄົນຄົນໜຶ່ງແຕ່ງງານກັບຄົນທີ່ຖືກຕ້ອງ, ໃນສະຖານທີ່ທີ່ຖືກຕ້ອງ, ໂດຍສິດອຳນາດທີ່ຖືກຕ້ອງ, ແລະ ໃຫ້ເຊື່ອຟັງພັນທະສັນຍາອັນສັກສິດນັ້ນຢ່າງຊື່ສັດ. ຈາກນັ້ນ, ຄົນຄົນນັ້ນຈະໄດ້ຮັບປະກັນເຖິງຄວາມສູງສົ່ງໃນອານາຈັກຊັ້ນສູງຂອງພຣະເຈົ້າ.”⁵

ແມ່ນຫຍັງຄືພອນຂອງຄວາມສູງສົ່ງ? ມັນລວມທັງການສະຖິດຢູ່ໃນທີ່ປະທັບຂອງພຣະເຈົ້າຊົ່ວນິລັນດອນນຳກັນ ໃນຖານະສາມີ ແລະ ພັນລະຍາ, ສືບທອດ “ບັນລັງ, ອານາຈັກ, ເຂດປົກຄອງ, ແລະ ອຳນາດ … ຄວາມຕໍ່ເນື່ອງຂອງເຊື້ອສາຍຕະຫລອດການ ແລະ ຕະຫລອດໄປ,”⁶ ຮັບເອົາທຸກສິ່ງທີ່ພຣະເຈົ້າອົງເປັນພຣະບິດາຊົງມີ.⁷

ພຣະຜູ້ເປັນເຈົ້າໄດ້ເປີດເຜີຍຜ່ານທາງໂຈເຊັບ ສະມິດ ວ່າ:

“ໃນລັດສະໝີພາບຂອງຊັ້ນສູງ ມີສະຫວັນ ຫລື ລະດັບສາມຊັ້ນ;

“ແລະ ກ່ອນຈະໄດ້ບັນລຸເຖິງຊັ້ນສູງສຸດໄດ້, ມະນຸດຕ້ອງເຂົ້າສູ່ລະບຽບນີ້ຂອງຖານະປະໂລຫິດ [ໝາຍເຖິງ ພັນທະສັນຍາໃໝ່ ແລະ ເປັນນິດຂອງການແຕ່ງງານ];

“ແລະ ຖ້າຫາກເຂົາບໍ່ເຮັດ, ເຂົາຈະບັນລຸເຖິງມັນບໍ່ໄດ້.

“ເຂົາຈະເຂົ້າໄປໃນຊັ້ນອື່ນ, ແຕ່ນັ້ນຄືທີ່ສຸດຂອງອານາຈັກຂອງເຂົາ; ເຂົາບໍ່ສາມາດມີເພີ່ມເຕີມ.”⁸

ເຮົາຮຽນຮູ້ຢູ່ທີ່ນີ້ວ່າ ຄົນຄົນໜຶ່ງຈະສາມາດຢູ່ໃນອານາຈັກຊັ້ນສູງ, ຫລື ຢູ່ໃນທີ່ປະທັບຂອງພຣະເຈົ້າ, ແລະ ເປັນຄົນໂສດ. ແຕ່ການໄດ້ຮັບຄວາມສູງສົ່ງຢູ່ໃນລະດັບທີ່ສູງທີ່ສຸດຂອງອານາຈັກຊັ້ນສູງ, ຄົນຄົນໜຶ່ງຕ້ອງເຂົ້າສູ່ການແຕ່ງງານໂດຍສິດອຳນາດທີ່ເໝາະສົມ ແລະ ແລ້ວຈິງໃຈຕໍ່ພັນທະສັນຍາທີ່ໄດ້ເຮັດໄວ້ໃນການແຕ່ງງານນັ້ນ. ເມື່ອເຮົາຊື່ສັດຕໍ່ພັນທະສັນຍາເຫລົ່ານີ້, ພຣະວິນຍານສັກສິດແຫ່ງຄຳສັນຍາ ຈະສາມາດຜະນຶກພັນທະສັນຍາແຫ່ງການແຕ່ງງານຂອງເຮົາໄດ້.⁹ ພອນທີ່ໄດ້ຮັບຈາກການຜະນຶກເຫລົ່ານັ້ນ ຈະກາຍເປັນຜົນທີ່ຕັ້ງຢູ່ຖາວອນ.

ຈຳເປັນຕ້ອງເຮັດຫຍັງເພື່ອຮັກສາພັນທະສັນຍາໃໝ່ ແລະ ເປັນນິດຂອງການແຕ່ງງານຢ່າງຊື່ສັດ?

ປະທານຣະໂຊ ເອັມ ແນວສັນ ໄດ້ສິດສອນວ່າ ມີຄວາມຜູກພັນຢູ່ສອງປະເພດເມື່ອເຮົາເຂົ້າສູ່ພັນທະສັນຍາແຫ່ງການແຕ່ງງານນິລັນດອນ: ຄວາມຜູກພັນລະດັບເທົ່າທຽມກັນລະຫວ່າງສາມີ ແລະ ພັນລະຍາ, ແລະ ຄວາມຜູກພັນລະດັບສູງກວ່າກັບພຣະເຈົ້າ.¹⁰ ເພື່ອທີ່ຈະໃຫ້ພອນແຫ່ງຄວາມສູງສົ່ງຖືກຜະນຶກເຂົ້າກັບເຮົາ ແລະ ຄົງຢູ່ຫລັງຈາກຊີວິດນີ້, ເຮົາຕ້ອງຈິງໃຈຕໍ່ລະດັບເທົ່າທຽມກັນ ແລະ ລະດັບສູງກວ່າຂອງພັນທະສັນຍານັ້ນ.

ເພື່ອທີ່ຈະຮັກສາຄວາມຜູກພັນລະດັບເທົ່າທຽມກັນກັບຄູ່ຄອງຂອງທ່ານ, ພຣະເຈົ້າໄດ້ແນະນຳເຮົາໃຫ້ “ຮັກເມຍ [ຫລື ຜົວ] [ຂອງທ່ານ] ດ້ວຍສຸດໃຈ [ຂອງທ່ານ], ແລະ … ແນບສະໜິດຢູ່ກັບນາງ [ຫລື ເຂົາ] ແລະ ບໍ່ມີຄົນອື່ນອີກ.”¹¹ ສຳລັບຜູ້ທີ່ແຕ່ງງານແລ້ວ, ໃຫ້ແນບສະໜິດຢູ່ກັບນາງ ຫລື ເຂົາ ແລະ ບໍ່ມີຄົນອື່ນອີກ ໝາຍຄວາມວ່າ ທ່ານປຶກສາຫາລືນຳກັນໃນຄວາມຮັກ, ທ່ານຮັກ ແລະ ຫ່ວງໃຍກັນແລະກັນ, ທ່ານໃຫ້ລຳດັບຄວາມສຳຄັນຕໍ່ການໃຊ້ເວລາກັບຄູ່ຄອງຂອງທ່ານຫລາຍກວ່າຄວາມສົນໃຈຢູ່ທາງນອກ, ແລະ ທ່ານທູນຂໍໃຫ້ພຣະເຈົ້າຊ່ວຍທ່ານເອົາຊະນະຄວາມອ່ອນແອຂອງທ່ານ.¹² ມັນຍັງໝາຍຄວາມວ່າ ຈະຕ້ອງບໍ່ມີຄວາມໃກ້ຊິດທາງອາລົມ ຫລື ທາງເພດໃດໆຢູ່ນອກການແຕ່ງງານຂອງທ່ານ, ລວມທັງການຈີບ ຫລື ການຄົບກັນ, ແລະ ຈະບໍ່ມີຮູບພາບລາມົກ, ຊຶ່ງກໍ່ໃຫ້ເກີດຕັນຫາ.¹³

ເພື່ອທີ່ຈະຮັກສາຄວາມຜູກພັນລະດັບເທົ່າທຽມກັນໃນພັນທະສັນຍາ, ແຕ່ລະຝ່າຍຕ້ອງປາດຖະໜາທີ່ຈະຢູ່ໃນການແຕ່ງງານ. ປະທານດາລິນ ເອັຈ ໂອກສ໌ ໄດ້ສິດສອນເມື່ອບໍ່ດົນມານີ້ວ່າ: “ພວກເຮົາຮູ້ເຊັ່ນກັນວ່າ [ພຣະເຈົ້າ] ຈະບໍ່ບັງຄັບຜູ້ໃດໃຫ້ເຂົ້າໃນຄວາມສຳພັນແຫ່ງການຜະນຶກໂດຍທີ່ເຂົາບໍ່ເຕັມໃຈ. ພອນຂອງຄວາມສຳພັນແຫ່ງການຜະນຶກນັ້ນ ຮັບປະກັນທຸກຄົນທີ່ຮັກສາພັນທະສັນຍາຂອງຕົນ ແຕ່ບໍ່ມີວັນໂດຍການບັງຄັບຄວາມສຳພັນແຫ່ງການຜະນຶກໃສ່ອີກຄົນໜຶ່ງທີ່ບໍ່ມີຄ່າຄວນ ຫລື ບໍ່ເຕັມໃຈ.”¹⁴

ແລ້ວຄວາມຜູກພັນລະດັບສູງກວ່າທີ່ປະທານແນວສັນອ້າງເຖິງນັ້ນແມ່ນຫຍັງ? ຄວາມຜູກພັນລະດັບສູງກວ່າ ຄືສິ່ງທີ່ເຮົາສ້າງໄວ້ກັບພຣະເຈົ້າ.

ເພື່ອທີ່ຈະຮັກສາຄວາມຜູກພັນລະດັບສູງກວ່າກັບພຣະເຈົ້າ, ເຮົາຕ້ອງຈິງໃຈຕໍ່ພັນທະສັນຍາຂອງພຣະວິຫານທີ່ເຮົາໄດ້ເຮັດ ວ່າດ້ວຍກົດແຫ່ງການເຊື່ອຟັງ, ການເສຍສະລະ, ພຣະກິດຕິຄຸນ, ພົມມະຈັນ, ແລະ ການອຸທິດຖວາຍ. ເຮົາຍັງເຮັດພັນທະສັນຍາກັບພຣະເຈົ້າວ່າຈະຮັບເອົາຄູ່ນິລັນດອນຂອງເຮົາ ແລະ ເພື່ອທີ່ຈະເປັນຄູ່ຄອງ ແລະ ພໍ່ແມ່ທີ່ດີ. ເມື່ອເຮົາຮັກສາຄວາມຜູກພັນລະດັບສູງກວ່າ, ເຮົາກໍຈະມີຄຸນສົມບັດສຳລັບພອນຕ່າງໆຂອງການເປັນສ່ວນໜຶ່ງຂອງຄອບຄົວຂອງພຣະເຈົ້າ ຜ່ານທາງພັນທະສັນຍາແຫ່ງອັບຣາຮາມ, ລວມທັງພອນຕ່າງໆແຫ່ງຄວາມຈະເລີນຮຸ່ງເຮືອງ, ພຣະກິດຕິຄຸນ, ແລະ ຖານະປະໂລຫິດ.¹⁵ ພອນເຫລົ່ານີ້ຍັງເປັນຜົນທີ່ຕັ້ງຢູ່ຖາວອນນຳອີກ.

ຂະນະທີ່ເຮົາຫວັງວ່າ ທຸກຄົນທີ່ເຂົ້າສູ່ພັນທະສັນຍາໃໝ່ ແລະ ເປັນນິດ ຈະຍັງຄົງຈິງໃຈ ແລະ ໄດ້ຮັບພອນທີ່ຖືກຜະນຶກເຂົ້າກັບພວກເຂົາຊົ່ວນິລັນດອນ, ບາງເທື່ອ ອຸດົມການນັ້ນອາດເບິ່ງຄືວ່າເກີນທີ່ເຮົາຈະເອື້ອມເຖິງ. ຕະຫລອດການປະຕິບັດສາດສະໜາກິດຂອງຂ້າພະເຈົ້າ ຂ້າພະເຈົ້າໄດ້ພົບກັບສະມາຊິກທີ່ເຮັດ ແລະ ຮັກສາພັນທະສັນຍາ ຂະນະທີ່ຄູ່ຄອງຂອງພວກເຂົາບໍ່ໄດ້ເຮັດ. ຍັງມີຄົນທີ່ໂສດ, ທີ່ບໍ່ເຄີຍມີໂອກາດທີ່ຈະແຕ່ງງານໃນຊີວິດມະຕະນຳອີກ. ແລະ ຍັງມີຄົນທີ່ບໍ່ຊື່ສັດໃນພັນທະສັນຍາແຫ່ງການແຕ່ງງານຂອງພວກເຂົາ. ແມ່ນຫຍັງຈະເກີດຂຶ້ນກັບບຸກຄົນໃນແຕ່ລະສະພາບການເຫລົ່ານີ້?

ຖ້າທ່ານຍັງຄົງຊື່ສັດຕໍ່ພັນທະສັນຍາທີ່ທ່ານໄດ້ເຮັດໄວ້ ເມື່ອທ່ານໄດ້ຮັບຂອງປະທານສັກສິດ, ທ່ານຈະໄດ້ຮັບພອນສ່ວນຕົວທີ່ໄດ້ສັນຍາໄວ້ກັບທ່ານໃນຂອງປະທານສັກສິດ ເຖິງແມ່ນວ່າ ຄູ່ຄອງຂອງທ່ານໄດ້ເຮັດຜິດພັນທະສັນຍາຂອງເຂົາ ຫລື ໄດ້ຖອນຕົວຈາກການແຕ່ງງານແລ້ວກໍຕາມ. ຖ້າທ່ານໄດ້ຖືກຜະນຶກ ແລະ ໄດ້ຢ່າຮ້າງໃນພາຍຫລັງ, ແລະ ຖ້າການຜະນຶກຂອງທ່ານບໍ່ຖືກຍົກເລີກ, ພອນສ່ວນຕົວຂອງການຜະນຶກນັ້ນ ຈະຍັງຄົງມີຜົນສັກສິດຕໍ່ທ່ານ ຖ້າຫາກທ່ານຍັງຄົງຊື່ສັດ.¹⁶

ບາງເທື່ອ, ເນື່ອງຈາກຄວາມຮູ້ສຶກຂອງການຖືກທໍລະຍົດ ແລະ ຄວາມເຈັບປວດຢ່າງຍິ່ງ, ຄູ່ຄອງທີ່ຊື່ສັດອາດຢາກຍົກເລີກການຜະນຶກກັບຄູ່ຄອງທີ່ບໍ່ຊື່ສັດ ເພື່ອທີ່ຈະຢູ່ຫ່າງຈາກເຂົາໃຫ້ຫລາຍທີ່ສຸດ, ທັງຢູ່ເທິງແຜ່ນດິນໂລກ ແລະ ຊົ່ວນິລັນດອນ. ຖ້າຫາກທ່ານກັງວົນວ່າ ທ່ານຈະຖືກຜູກມັດກັບຄູ່ຄອງຄົນເກົ່າທີ່ບໍ່ກັບໃຈ, ໃຫ້ຈື່ໄວ້ວ່າ, ທ່ານຈະບໍ່ເປັນຢ່າງນັ້ນ! ພຣະເຈົ້າຈະບໍ່ຮຽກຮ້ອງໃຫ້ຜູ້ໃດຍັງຄົງຢູ່ໃນຄວາມສຳພັນທີ່ຖືກຜະນຶກຕະຫລອດຊົ່ວນິລັນດອນ ໂດຍທີ່ເຂົາບໍ່ເຕັມໃຈ. ພຣະບິດາເທິງສະຫວັນຈະເຮັດໃຫ້ແນ່ໃຈວ່າ ເຮົາຈະໄດ້ຮັບພອນທຸກໆປະການທີ່ເຮົາປາດຖະໜາ ແລະ ເລືອກ.¹⁷

ເຖິງຢ່າງໃດກໍຕາມ, ຖ້າປາດຖະໜາທີ່ຈະຍົກເລີກການຜະນຶກ, ອຳເພີໃຈກໍຈະໄດ້ຮັບຄວາມເຄົາລົບ. ທ່ານສາມາດເຮັດຕາມຂັ້ນຕອນບາງຢ່າງ. ແຕ່ສິ່ງນີ້ບໍ່ຄວນເຮັດແບບສະບາຍສະບາຍ! ຝ່າຍປະທານສູງສຸດດຳລົງຂໍກະແຈເພື່ອຜູກມັດເທິງແຜ່ນດິນໂລກ ແລະ ໃນສະຫວັນ. ເມື່ອການຍົກເລີກການຜະນຶກໄດ້ຖືກອະນຸມັດໂດຍຝ່າຍປະທານສູງສຸດແລ້ວ, ພອນທີ່ກ່ຽວຂ້ອງກັບການຜະນຶກນັ້ນ ຈະບໍ່ມີຜົນບັງຄັບໃຊ້ອີກຕໍ່ໄປ; ມັນຈະຖືກຍົກເລີກທັງລະດັບເທົ່າທຽມກັນ ແລະ ລະດັບສູງກວ່າ. ມັນສຳຄັນທີ່ຈະເຂົ້າໃຈວ່າ ເພື່ອທີ່ຈະຮັບພອນແຫ່ງຄວາມສູງສົ່ງ, ເຮົາຕ້ອງສະແດງໃຫ້ເຫັນວ່າ ເຮົາເຕັມໃຈທີ່ຈະເຂົ້າເຮັດ ແລະ ຮັກສາພັນທະສັນຍາໃໝ່ ແລະ ເປັນນິດນີ້ຢ່າງຊື່ສັດ, ບໍ່ວ່າຈະໃນຊີວິດນີ້ ຫລື ຊີວິດໜ້າກໍຕາມ.
ສຳລັບຜູ້ທີ່ເປັນສະມາຊິກໂສດຂອງສາດສະໜາຈັກ, ກະລຸນາຈື່ໄວ້ວ່າ “ໃນວິທີ ແລະ ເວລາຂອງພຣະຜູ້ເປັນເຈົ້າ, ບໍ່ມີພອນໃດທີ່ຈະຖືກກີດກັນຈາກໄພ່ພົນທີ່ຊື່ສັດຂອງພຣະອົງ. ພຣະຜູ້ເປັນເຈົ້າຈະພິພາກສາ ແລະ ໃຫ້ລາງວັນແຕ່ລະຄົນຕາມ [ຄວາມປາດຖະໜາ] ຂອງໃຈເຂົາ ຕະຫລອດທັງການກະທຳຂອງເຂົາ.”¹⁸
ຖ້າຫາກທ່ານບໍ່ໄດ້ຊື່ສັດຕໍ່ພັນທະສັນຍາຂອງພຣະວິຫານ, ຈະມີຄວາມຫວັງບໍ່? ມີ! ພຣະກິດຕິຄຸນຂອງພຣະເຢຊູຄຣິດແມ່ນພຣະກິດຕິຄຸນແຫ່ງຄວາມຫວັງ. ຄວາມຫວັງນັ້ນຈະມາເຖິງຜ່ານທາງພຣະເຢຊູຄຣິດ ດ້ວຍການກັບໃຈທີ່ຈິງໃຈ ແລະ ການຕິດຕາມຄຳສອນຂອງພຣະຄຣິດດ້ວຍຄວາມເຊື່ອຟັງ. ຂ້າພະເຈົ້າເຄີຍເຫັນບຸກຄົນທີ່ເຮັດຜິດພາດຢ່າງຮ້າຍແຮງ, ຜິດພັນທະສັນຍາອັນສັກສິດ. ເປັນປະຈຳ, ຂ້າພະເຈົ້າເຫັນຜູ້ທີ່ກັບໃຈຢ່າງຈິງໃຈ, ໄດ້ຮັບການໃຫ້ອະໄພ, ແລະ ກັບຄືນສູ່ເສັ້ນທາງແຫ່ງພັນທະສັນຍາ. ຖ້າຫາກທ່ານໄດ້ເຮັດຜິດພັນທະສັນຍາຂອງພຣະວິຫານແລ້ວ, ຂ້າພະເຈົ້າຂໍຮ້ອງໃຫ້ທ່ານຫັນໄປຫາພຣະເຢຊູຄຣິດ, ປຶກສາຫາລືກັບອະທິການຂອງທ່ານ, ກັບໃຈ, ແລະ ເປີດຈິດວິນຍານຂອງທ່ານໃຫ້ອຳນາດແຫ່ງການປີ່ນປົວ ອັນຍິ່ງໃຫຍ່ ທີ່ມີຢູ່ ຍ້ອນການຊົດໃຊ້ຂອງພຣະເຢຊູຄຣິດ.

ອ້າຍເອື້ອຍນ້ອງທັງຫລາຍ, ພຣະບິດາເທິງສະຫວັນທີ່ຊົງຮັກຂອງເຮົາ ໄດ້ປະທານພັນທະສັນຍາໃຫ້ແກ່ເຮົາ ເພື່ອວ່າເຮົາຈະສາມາດເຂົ້າເຖິງທຸກສິ່ງທີ່ພຣະອົງກຽມໄວ້ໃຫ້ເຮົາ. ພອນອັນສັກສິດຈາກພຣະເຈົ້າເຫລົ່ານີ້ ແຊບຊ້ອຍຍິ່ງກວ່າໝາກໄມ້ໃດໆໃນໂລກ. ມັນສາມາດຖືກເກັບຮັກສາໄວ້ສຳລັບເຮົາຕະຫລອດໄປ, ກາຍເປັນຜົນທີ່ຕັ້ງຢູ່ຖາວອນ, ເມື່ອເຮົາຊື່ສັດຕໍ່ພັນທະສັນຍາຂອງເຮົາ.

ຂ້າພະເຈົ້າເປັນພະຍານວ່າ ພຣະເຈົ້າໄດ້ຟື້ນຟູສິດອຳນາດໃນການຜູກມັດເທິງແຜ່ນດິນໂລກ ແລະ ໃນສະຫວັນ. ສິດອຳນາດນັ້ນ ແມ່ນພົບໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ມັນຖືກດຳລົງໂດຍຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ແລະ ຖືກນຳໃຊ້ພາຍໃຕ້ການຊີ້ນຳຂອງປະທານຣະໂຊ ເອັມ ແນວສັນ. ຜູ້ທີ່ເຂົ້າສູ່ພັນທະສັນຍາໃໝ່ ແລະ ເປັນນິດແຫ່ງການແຕ່ງງານ ແລະ ຮັກສາພັນທະສັນຍານັ້ນ ສາມາດກາຍເປັນຄົນທີ່ດີພ້ອມ ແລະ ໃນທີ່ສຸດ ຈະໄດ້ຮັບຄວາມສົມບູນແຫ່ງລັດສະໝີພາບຂອງພຣະບິດາ, ບໍ່ວ່າສະພາບການຈະຢູ່ນອກເໜືອການຄວບຄຸມຂອງພວກເຂົາສໍ່າໃດກໍຕາມ.¹⁹

ພອນທີ່ໄດ້ສັນຍາໄວ້ທີ່ກ່ຽວພັນກັບພັນທະສັນຍາຂອງເຮົາເຫລົ່ານີ້ ສາມາດຖືກຜະນຶກເຂົ້າກັບເຮົາ ໂດຍພຣະວິນຍານສັກສິດແຫ່ງຄຳສັນຍາ ແລະ ກາຍເປັນຜົນທີ່ຕັ້ງຢູ່ຖາວອນຕະຫລອດການ ແລະ ຕະຫລອດໄປ. ຂ້າພະເຈົ້າເປັນພະຍານໃນພຣະນາມຂອງພຣະເຢຊູຄຣິດ, ອາແມນ.