Ma o le Mea Tonu Lava Lena
E moomia ona tatou ausia ma faatumauina tulaga faatonuina ina ia mafai ai ona tatou auai i le faatinoina o mea taua faaleagaga e tutupu o le olaga.
Talofa lava. Ou te fiafia tele e mafuta ma i latou o loo umia le perisitua a le Atua, ma ou te fiafia i le alofa faausoga i le lalolagi atoa lea tatou te fefaasoaai ma faapelepele i ai. E tulai mai se agaga faapitoa mai le faamoemoe o le a aoaoina i tatou i mea malamalama ma le taua o le talalelei a Iesu Keriso.
O le afiafi nei ou te fia tuusao atu ai o’u manatu i alii talavou o le Ekalesia. O outou o loo aofia ai i se isi tupulaga, e taliaina lo outou faafofoga mai foi i ai.
I le vaitau o le Kerisimasi na sei mavae atu nei, sa auai atu ai le sooupu o talafou ia Walter Cronkite i le konaseti o le Kerisimasi a le Aufaipese a le Tapeneko ma le Faaili i le Lotoa o le Malumalu. “Na ia … faaaluina le 19 tausaga e avea ai ma tagata faasalalau e faailoaina mai talafou mo le ‘CBS Evening News’ … Na mauaina e [Mr. Cronkite] le tulaga o le ‘tagata sili ona faatuatuaina i Amerika.’”1 Ina ua fesiligia o ia pe faapefea ona manao e manatuaina o ia, o lana tali, “Oi, o se tagata sa na faia le mea sili.”2 I le taimi atoa o lana galuega maoae, e faaiuina ai e Mr. Cronkite ia talafou taitasi i le faaupuga, “Ma o le mea tonu lava lena.” O le afiafi nei, o le a tatou talatalanoa ai i le mea tonu lava lena.
I se konafesi faalesiteki talu ai nei, na faamatala mai ai ia te au e le peresitene o le siteki se tala. Sa ia fesiligia lona atalii po o le a le mea sa talanoaina i se faeasaite na faia talu ai nei i le afiafi o le Aso Sa. Sa tali le alii talavou, “Siitia i luga le fua.” Ona ia faamatala atu lea i lona tama lona tau musu i lea autu ona o le mataupu lava lea i vasega ma fonotaga uma. O lo’u manatu muamua lava, “Matuai lelei tele; o loo talanoaina le savali a le perofeta, ua lagonaina, ma o loo faatinoina.” O lo’u manatu lona lua e faatatau lea i lagona o le alii talavou e tusa ai ma faamanatu faifaipea. O faamanatu faifaipea e mafai ona faasoesa pe afai o loo tatou taumafai malosi tatou te faia le mea sili.
A o avea ma se talavou ou te le amanaiaina lo’u tina i taimi uma lava e fai mai ai pe a ou savali i fafo i le faitotoa: “David, ia manatua po o ai oe.” O le faamanatu e masani ai lava ona oo mai nisi tala malie mai au uo. E oo mai le ita pe a faasino soo mai e lo’u tama ia te au le fale o Peresitene Siaosi Alapati Samita pe a ma tietie atu i le auala 13 i Sasae o le Aai o Sate Leki ma faamanatu mai pea ia te au e faapea o se perofeta soifua a le Atua lea e alofa ia te au, e nofo iina. O le aso, ou te matuai faafetai lava mo na faamanatu faifaipea.
O le faaupuga “siitia i luga le fua” e masani ona faaaoga i tagata e aafia i taaloga e faamatala ai le ausiaina o ni tulaga maualuluga o le faatinoga. O le faaaogaina o se faaupuga e faaaoga i taaloga e mafai ona fesoasoani e faamatala ai le mafuaaga e taua tele ai le tali atu i le mea ua talosaga mai ai ia Peresitene Hinckley ia i tatou i le konafesi talu ai ina ia faataunuuina ina ua ia saunoa mai: “Ou te faamoemoe o le a talia ma agavaa o tatou alii talavou ma tamaitai talavou, ma tauaveina le lu’i ua ia [Elder Ballard] faatuina. E tatau ona tatou siitia le tulaga faatonuina o le tauaogaina ma le agavaa o i latou e o atu i le lalolagi o ni avefu’a a le Alii o Iesu Keriso.”3
I le tausaga ua mavae sa tatou molimauina ai se Olimipeka matagofie o le Taumalulu i le Aai o Sate Leki. O le tele lava o taaloga o le Olimipeka, e tatau ai i tagata taaalo ona ausia le maualalo faatapulaaina o mea e ausia ina ia mafai ai ona agavaa e tauva. O o tatou olaga e tali tutusa lava foi ma le faiga e agavaa ai le tagata mo le Olimipeka lea tatou te moomia ai ona ausia ma faatumauina tulaga faatonuina ina ia mafai ai ona tauva i taaloga taua faaleagaga o le olaga. O tagata taaalo e tauva i taaloga o le lalolagi e i ai sa latou faatulagaga o aso taitasi. Latou te matuai aoaoina lelei ia tomai e moomia mai e a latou taaloga. Ona faatoa mafai lea ona latou agavaa e auai i se tauvaga. Ma o le mea tonu lava lena.
Alii talavou, afai tou te mananao e mauaina le atoatoa ma agavaa e avea ma tagata auai i taaloga sili ona taua i le olaga e pei o faauuga i le perisitua, ma faamanuiaga o le malumalu, ma le auaunaga faafaifeautalai, e tatau foi ona e atinaeina se faatulagaga i aso taitasi o le faamaoni, mama, suesue, ma le tatalo. Ma o le mea tonu lava lena.
Ua iloa lelei ma malamalama tagata taaalo o le Olimipeka i tulafono o loo puleaina ai a latou taaloga. O le le mulimuli i tulafono e mafai ona oo mai ai ni faasalaga mamafa ma e oo ai lava ina faaleaogaina. I le Olimipeka talu ai, o le le usitaia o tulafono e aofia ai le faaaogaina o fualaau e faaleleia ai le faatinoga na mafua ai le toe aveeseina o se pine o le Olimipeka. O se tasi o faasalaga mamafa e tuuina atu i se tagata taalo e faia lea i le taaloga o le taga polo. E na o le sese lava o le sainia o se pepa o ‘ai o se sikoa e le sa’o mo soo se pu lava o pu uma e 18 e mafai ona faaleaogaina ai. E matuai leai lava se faapalepale. E leai se afaina pe faateleina pe faaitiitia ai ia ‘ai o le tagata; o le faasalaga e tutusa lava—o le faaleaogaina.
Ina ua mavae le silia ma le 50 tausaga, o loo mafai lava ona ou faalogoina upu a le taitai o le tauvaga: “Malie atalii, e tatau ona matou faaleaogaina oe mai le taamilosaga ona o lou sainia sese o se pepa o ‘ai.” Na mafua ona faaleaogaina au, ona o lo’u ta’uina i le taitai e tatau ona ou faasa’oina o’u ‘ai. Na tele vaiaso sa ou faapea ifo ai ia te au: “Aisea na ou le filemu ai pea? E le gata i lea, e le o se mea sese na fuafuaina. Na sa’o le aofaiga atoa o ‘ai.” E ui lava sa lelei la’u taalo ou te malo ai, ae sa ou tuua le tufaga faailoga e aunoa ma se mea na maua. Ma o le mea tonu lava lena.
Au uo talavou e, e taua tulafono, e matuai taua lava. E i ai foi faasalaga i le olaga, atonu e oo lava foi i le faaleaogaina, pe afai e solia ia tulafono. O lo tatou auai i mea sili ona taua i le olaga e mafai ona oo atu i se tulaga matautia pe afai tatou te le mulimuli i tulafono o loo aofia ai i poloaiga a lo tatou Tama o i le Lagi. O le aafia i agasala feusuai, fualaau faasaina, le usiusitai i tulafono a le malo, po o le faasaua e mafai ona taofia ai i tatou mai le auai i taimi sili ona taua. O le a sili ona outou lelei pe a outou vaai atu i tulafono o ni mea e taofiofia ai oe ina ia saogalemu, ae le o ni filifili e noatia ai oe. O le usiusitai e atinaeina ai le malosi. Ma o le mea tonu lava lena.
I le 1834 na tusia ai e le Perofeta o Iosefa Samita, “E leai se isi masina ua sili ona ou pisi ai nai lo Novema; a o aofia ai lo’u olaga i mau gaoioiga ma tiutetauave e faaauauina pea, sa ou faia ai la’u tulafono lenei: Afai e poloai mai le Alii, ia fai loa.”4
O nisi tagata, o taaloga o se pisinisi. O le eseesega i le va o le manumalo ma le faiaina e mafai ona tetele ni aofaiga o tupe e aofia ai. E faafaigaluegaina e tagata taaalo ia ni o latou sui e taulimaina a latou mataupu faapisinisi. O sui sooupu, o faiaoga e koleniina, faiaoga e aoaoina, faapea ma faatonu, latou te lagolagoina le tagata taalo ina ia faalauteleina lana faatinoga.
Ua tuuina mai e lo tatou Tama o i le Lagi i Ona atalii faapelepele se aufaigaluega maoae e lagolagoina o ia e sili atu nai lo le aufaigaluega o loo faaaogaina e tagata taaalo. O o tatou matua o ni sui sooupu maoae. Latou te tausia i tatou ina ia faamanuiaina. E le gata e fiafia ia i tatou, ae ona latou te alolofa ia i tatou, o i latou foi o ni faufautua lelei tele.
Na saunoa atu le Aposetolo o Paulo i le aoaoina o tagata Kolose e faapea, “O outou le fanau, ia outou faalogo i o outou matua i mea uma; aua o le mea malie lea i le Alii” (Kolose 3:20). E faaopoopo atu i o tatou matua, mafaufau i le tele o tagata e lagolago mai lea ua tuuina mai e faalauteleina la tatou faatinoga faaleagaga. O o tatou epikopo, e avea ma o tatou faiaoga ma faaaoga o latou ki o le perisitua paia e faamanuia ai o tatou olaga. O faiaoga seminare, fautua o korama, ma faiaoga o aiga e atoa i ai le au lagolago lea sa tuufaatasia e le Alii ina ia fesoasoani ia i tatou e saunia mo mea taua e tutupu i le olaga. A o outou mulimuli ma usiusitai, o le a agaigai i luma le faaleleia o la outou faatinoga. Pe a poloai mai le Alii, ia faia loa. Ma o le mea tonu lava lena.
O se tasi o eseesega taua lava i le va o le lelei ma le lelei maoae o le mea lea e ta’ua e tagata mafaufau i taaloga o le “taulai.” O tagata tauva o e mafai ona tuuese mea e le taua ae matuai taulai atu i le mea e taua, e mafai ona faaleleia la latou faatinoga. O le taulai o se vaega taua lea o le faamanuiaina.
Sa ou faalogo i se talanoaga i le va o le tagata ta polo lauiloa o Arnold Palmer ma se keli talavou sa ia faaaogaina mo le uluai taimi. Sa ta’u atu e le keli talavou lenei ia Mr. Palmer a o ia tuuina atu i ai lana pate, le mamao o le fu’a e 165 iata, sa i ai se vai e le o iloa atu o loo i le itu tauagavale ma se vaega lafulafua o loo i le itu taumatau. Sa toe faamanatu atu e Mr. Palmer i se auala agamalu ma le manino i le alii talavou faapea e na o le pau le faamatalaga na ia moomia o le mamao lea agai i le pu. Na ia toe fautua atu foi e le o manao o ia e aveese lona taulai atu e ala lea i lona popole i le mea o i le taumatau po o le agavale.
E faigofie lava ona aveesea la tatou vaai atu i mea sili ona taua o le olaga. E tele naua mea e faalavelave ai i tatou. E pei lava mea o loo faalavelaveina ai le olaga o mea o loo faalavelave ai i le malae ta polo. O le saogalemu ma le faamanuiaina e oo mai pe a faatumauina le taulai atu i avanoa taua e maua mai le tata’i sao atu lava o le polo i le ogatotonu—siitaga o le perisitua, agavaa mo le malumalu, ma le auaunaga faafaifeautalai. Ma o le mea tonu lava lena.
Ia faamanuia mai lo tatou Tama o i le Lagi ia te outou uma taitoatasi. Ou te molimau atu ia te outou uma o Iesu o le Keriso. O loo soifua o Ia, ma o Lona alofa mo i tatou e atoatoa. Ou te faafetai mo se perofeta maoae o le o loo fesoasoani ia i tatou ina ia malamalama afai ua poloai mai ai le Alii, ia fai loa, aua o le mea tonu lava lena. I le suafa o lo tatou Faaola ma le Togiola, o Iesu Keriso, amene.